Yesus, wi Granpriester, e firi gi wi

1-2. (a) Fu san ede Yehovah seni en Manpkin kon na grontapu? (b) San wi o luku na ini na artikel disi? (Hebrewsma 5:7-9)

SOWAN 2000 yari psa, Yehovah Gado seni en lobi Manpkin kon na grontapu. Fu san ede? Wán reide, na taki a ben musu ferlusu libisma fu sondu nanga dede, so taki wan kba ben kan kon na ala den problema di Satan tyari kon (Yoh. 3:16; 1 Yoh. 3:8). Yehovah ben sabi tu taki den sani di Yesus ben ondrofeni leki libisma, ben o yepi en tu fu tron wan Granpriester di e ferstan san e miti wi èn di e firi gi wi. Yesus bigin dini leki Granpriester baka di a dopu na ini a yari 29.a

² Na ini na artikel disi, wi o luku fa den sani di Yesus ondrofeni leki libisma na grontapu yepi en fu tron wan Granpriester di e firi gi trawan. Te wi e kon ferstan moro bun fa Yesus „du ala san a ben musu du” fu man dini leki Granpriester, dan a o moro makelek gi wi fu begi Yehovah èn fu kon moro krosbei na en, spesrutu te wi e sari fu di wi meki fowtu.​—Leisi Hebrewsma 5:7-9.

GADO EN LOBI MANPKIN E KON NA GRONTAPU

3-4. Sortu prenspari sani Yesus libi na baka di a kon na grontapu, èn fa a libi na grontapu ben de gi en?

³ Furu fu wi ondrofeni taki a situwâsi fu wi kenki. Kande na fu di wi ben musu froisi gwe libi wan presi di wi ben lobi èn wi ben musu libi famiriman nanga mati na baka. Den kenki dati no makelek. Ma nowan enkri libisma ondrofeni san Yesus ben ondrofeni. Di a ben de na hemel, a ben de a fosi Manpkin fu Gado èn a moro prenspari engel. Yehovah ben lobi en èn ala ten a ben de nanga prisiri fu di a ben e dini na Gado en „ret’anusei” (Ps. 16:11; Odo 8:30). Ma tòg Filipisma 2:7 e taki dati a ben de klarklari fu „gowe libi ala san a ben abi”. Iya, a libi ala sani na baka di a ben abi na hemel fu kon libi na grontapu na mindri sondu libisma.

⁴ Prakseri sosrefi a bigin fu Yesus en libi na grontapu. A gebore na ini wan pôti famiri. Wi sabi disi fu di en p’pa nanga m’ma ben man gi tu pkin fowru nomo leki ofrandi na a tempel (Lef. 12:8; Luk. 2:24). Di na ogr’ati Kownu Herodes kon sabi taki Yesus gebore, dan a pruberi fu kiri en. Fu man kibri Yesus en libi, meki a famiri fu en lowe go tan na Egepte wan pisi ten (Mat. 2:13, 15). A no de fu taki dati a libi fu Yesus na grontapu ben de heri tra fasi leki a libi fu en na hemel.

5. San Yesus ben si na grontapu, èn fa a sani dati sreka en gi a frantwortu di a ben o kisi leki Granpriester? (Luku a prenki.)

⁵ Di Yesus ben de na grontapu, dan a si fa furu sma ben e pina. Yesus leri fa a ben de gi libisma fu lasi wan lobiwan na ini dede. A no de fu taki dati difrenti sma di a ben sabi kon dede na a ten di a ben de na grontapu, sosrefi en eigi kweki p’pa, Yosef. Na a ten di Yesus ben e du a diniwroko fu en, dan a miti gwasiman, brenisma, malengrisma, nanga p’pa nanga m’ma di ben lasi den pkin fu den na ini dede. A ben e firi gi ala den sma disi (Mat. 9:2, 6; 15:30; 20:34; Mark. 1:40, 41; Luk. 7:13). A tru taki di a ben de na hemel, a ben si kba fa libisma e pina. Ma now di a ben de na grontapu, a ben man ferstan moro bun fa libisma e firi te pina e miti den (Yes. 53:4). Den sani di Yesus ondrofeni na grontapu yepi en fu ferstan moro bun fa sma e firi na ini difrenti situwâsi èn fa den problema fu a libi e kwinsi den. Èn neleki ala tra libisma, Yesus srefi ben kon weri, a ben e broko en ede, èn a ben e sari.

YESUS E SORI TAKI A E FIRI GI SMA

6. San a profeititori na ini Yesaya e leri wi fu a fasi fa Yesus e si sma? (Yesaya 42:3)

⁶ Di Yesus ben e du a diniwroko fu en, dan ala ten a ben e sori taki a ben e firi gi den wan di trawan ben e wiswasi. Na so a meki a profeititori kon tru di Yehovah ben meki Yesaya taki. Son leisi den Hebrew Buku fu Bijbel e agersi den sma di e bribi tranga na ini Yehovah, nanga wan dyari pe sani e gro bun noso nanga moi bigi bon (Ps. 92:12; Yes. 61:3; Yer. 31:12). Ma Bijbel e agersi den pôtiwan nanga den wan di trawan e wiswasi, nanga wan warimbo di broko èn nanga wan faya di e suku fu dede (Leisi Yesaya 42:3; Mat. 12:20). Nanga yepi fu santa yeye, a profeiti Yesaya gebroiki den eksempre disi fu taki fu a lobi nanga a switifasi di Yesus ben o sori gi den sma di trawan ben e wiswasi.

7-8. Fa Yesus meki a profeititori fu Yesaya kon tru?

⁷ Na Evangelie skrifiman Mateyus ben taki fu Yesus di a gebroiki den wortu disi fu Yesaya: „A no o masi wan warimbo di broko èn a no o kiri wan faya di e suku fu dede.” Yesus du furu wondru gi den sma di trawan ben e wiswasi èn di no ben abi nowan howpu taki a libi fu den ben o kon moro betre. Wan fu den sma dati ben de wan man di ben abi gwasi. A man disi ben musu fu denki taki noiti a ben o kon betre baka èn taki noiti a ben o man de makandra nanga en famiriman nanga mati (Luk. 5:12, 13). Èn wan dofuman ben de tu di no ben man taki bun. Prakseri fa a man disi ben e firi te a ben e si fa trawan ben e taki switi tori nanga makandra, ma dan ensrefi no ben e man ferstan san den ben e taki (Mark. 7:32, 33). Ma dati a no ala.

⁸ Na a ten di Yesus ben de na grontapu, furu Dyu ben e bribi taki te sma ben e siki noso te den ben malengri, dan na strafu den ben e kisi fu den sondu fu den noso fu den sondu fu den p’pa nanga m’ma (Yoh. 9:2). Fu di sma ben abi a fowtu denki disi, meki den no ben e libi bun kwetkweti nanga den wan di ben e pina, èn a no de fu taki dati den sma ben las’ati. Yesus meki a profeititori fu Yesaya kon tru fu di a dresi den siki fu den sma disi èn a yepi den fu kon sabi taki Gado ben e broko en ede nanga den. San disi e leri wi fu a fasi fa Yesus e si wi na ini a ten disi?

9. Fa Hebrewsma 4:15, 16 e sori taki wi Granpriester na hemel e broko en ede trutru nanga sondu libisma?

⁹ Leisi Hebrewsma 4:15, 16. Wi kan de seiker taki Yesus o firi gi wi ala ten. San dati wani taki? A Griki wortu di vertaal nanga „man ferstan” wan trawan wani taki dati wan sma e firi gi wan trawan di e pina fu di a sabi san e miti en. A moi fu si taki Paulus e gebroiki a srefi Griki wortu na Hebrewsma 10:34, fu sori taki wi e firi gi den wan di de na strafu-oso. Den tori di e taki fu den wondru di Yesus du, e sori krin fa Yesus ben e firi te a ben e si fa sma ben e pina. A no ben e dresi sma soso fu di a ben e si a sani dati leki wan plekti. Na presi fu dati, a ben e broko en ede trutru nanga den sma èn a ben wani yepi den. Fu eksempre, di a dresi a gwasiman, dan a ben kan du a wondru dati fu farawe. Ma a ben e broko en ede so te nanga a man taki a fasi en. Kande dati ben de a fosi leisi na ini omeni yari di a gwasiman firi taki wan sma fasi en. Wan tra eksempre, na di Yesus ben yepi a dofuman so taki a ben man yere baka. A hori a situwâsi fu man dati na prakseri èn a tyari en go na wan presi pe tra sma no ben de èn pe furu b’bari no ben de fu yere. Èn wan tra leisi, wan uma ben wasi den futu fu Yesus nanga den watra-ai fu en, fu di a ben abi berow fu den sondu fu en. Di wan Fariseiman wiswasi na uma disi, dan Yesus opo taki gi na uma disi èn a pir’ai gi a Fariseiman (Mat. 8:3; Mark. 7:33; Luk. 7:44). A de krin taki Yesus no ben e wai pasi gi sma di ben e siki noso di ben du seryusu sondu. Na presi fu dati, a ben wani taki den kon na en èn a sori den taki a ben lobi den trutru. Wi kan de seiker taki Yesus o firi tu gi wi.

DE LEKI WI GRANPRIESTER NA INI A TEN DISI

10. San wi kan gebroiki na ini a ten disi fu yepi den dofuwan nanga den breniwan? (Luku den prenki.)

¹⁰ Fu di wi wani de leki Yesus, meki wi e du ala san wi man fu sori trawan taki wi lobi den èn taki wi e firi gi den (1 Petr. 2:21; 3:8). Aladi wi no man dresi den dofuwan noso den breniwan, tòg wi kan yepi den fu kon sabi Yehovah èn fu tron mati fu en. Fu eksempre, wi abi Bijbel buku di de fu kisi na ini moro leki 100 Dofusma-tongo. Wi abi buku tu di skrifi spesrutu gi brenisma noso gi sma di no man si bun, èn den buku disi de fu kisi na ini moro leki 60 tongo. Boiti dati, now den felem fu wi abi wan sten di e ferteri san e psa na ini den felem. Den seti disi e yepi dofusma nanga brenisma fu tron mati fu Yehovah nanga en Manpkin.

11. Fa Yehovah en organisâsi e sori neleki Yesus taki a e firi gi ala sortu sma? (Tori fu den apostel 2:5-7, 33) (Luku den prenki.)

¹¹ Yehovah en organisâsi e du muiti fu yepi ala sortu sma. Memre taki baka di Yesus kisi wan opobaka, a meki santa yeye kon na tapu den disipel fu en so taki ala den sma di ben kon makandra na a Pinksterfesa ben kan yere a bun nyunsu na ini „a tongo fu ibriwan fu den”. (Leisi Tori fu den apostel 2:5-7, 33.) Na ini a ten disi, na organisâsi fu wi di abi Yesus leki tiriman, e meki buku na ini moro leki 1000 tongo èn sonwan fu den tongo disi na tongo di pkin grupu sma nomo e taki. Fu eksempre, son Ingi tongo na tongo di wan tu sma nomo na ini Noord-Amerika nanga Zuid-Amerika e taki. Tòg na organisâsi meki buku di de fu kisi na ini moro leki 160 fu den tongo disi, fu sorgu taki so furu sma leki a man e yere a bun nyunsu. Den buku fu wi de fu kisi tu na ini moro leki 20 tongo di a Roma pipel e taki. Furu dusundusun sma di e taki den tongo disi kon na ini waarheid.

12. Sortu tra sani Yehovah en organisâsi e du fu yepi sma na ini a ten disi?

¹² Boiti taki na organisâsi e yepi sma fu kon sabi a bun nyunsu, a e yepi den wan tu di e pina fu di rampu miti den. Dati meki dusundusun brada nanga sisa de klarklari fu yepi den wan di de na nowtu. Boiti dati, na organisâsi e bow konmakandra presi di no abi tumsi furu pranpran, so taki sma kan kisi leri fu a tru Gado di lobi den.

WI GRANPRIESTER KAN YEPI YU

13. San na wan tu fasi fa Yesus e yepi wi?

¹³ Fu di Yesus na wi moro bun skapuman, meki a e sorgu taki wi abi ala san de fanowdu fu tan mati fu Yehovah (Yoh. 10:14; Ef. 4:7). Son leisi, wi kan las’ati so te taki wi e firi leki wan faya di e suku fu dede, noso leki wan warimbo di broko. Kande wi e las’ati so te fu di wi abi wan seryusu siki, fu di wi meki wan fowtu, noso fu di wi kisi trobi nanga wan Kresten brada noso sisa. Kande a muilek gi wi fu tan prakseri a howpu di wi abi èn fu no prakseri den problema nanga den tesi di e miti wi now. Ma hori na prakseri taki Yesus e si san e miti yu èn a e ferstan fa yu e firi. Fu di Yesus e firi gi yu, meki a wani du wan sani fu yepi yu. Fu eksempre, a kan gebroiki a santa yeye fu gi yu krakti te yu swaki (Yoh. 16:7; Tit. 3:6). Boiti dati, Yesus kan gebroiki „mansma di abi spesrutu koni” èn sosrefi tra Kresten brada nanga sisa fu gi yu dek’ati, fu horbaka gi yu, èn fu yepi yu.​—Ef. 4:8.

14. San wi kan du te wi e firi brokosaka?

¹⁴ Efu yu e firi brokosaka, dan hori na prakseri taki Yesus na wi Granpriester èn denki dipi san dati wani taki gi yu. No fergiti taki Yehovah ben seni en kon na grontapu fu gi en libi leki lusu-paiman èn fu yepi en fu kon ferstan moro bun sortu problema e miti sondu libisma. Te wi e firi brokosaka fu di wi du sondu noso fu di wi meki fowtu, dan Yesus de klarklari fu yepi wi „na a yoisti ten”.​—Hebr. 4:15, 16.

15. San yepi wan brada fu drai kon baka na a gemeente?

¹⁵ Yesus e tiri a pipel fu en tu te den e meki muiti fu feni den wan di drifi gwe fu na ipi fu Yehovah èn a e yepi den (Mat. 18:12, 13). Luku san ben miti Stefano.b Twarfu yari baka di den brada ben puru en fu a gemeente, dan a besroiti fu go na wan fu den konmakandra fu wi. A e taki: „A no ben makelek gi mi, ma mi ben wani dini Yehovah baka makandra nanga mi Kresten brada nanga sisa. Den owruman di ben taki nanga mi, meki mi firi leki mi ben kon baka na oso. Son leisi, mi ben e sari taki mi ben gwe libi Yehovah, èn mi no ben wani go na zaal moro. Ma den brada memre mi taki Yehovah nanga Yesus ben wani taki mi hordoro. Di den teki mi baka na ini a gemeente, dan ala den brada nanga sisa gi mi nanga mi famiri wan switikon. Te fu kba mi wefi bigin studeri èn tide na a dei, wi e dini Yehovah leki osofamiri.” A no de fu taki dati wi lob’ati Granpriester na hemel musu fu breiti fu si fa den wan di abi berow e kisi a yepi di den abi fanowdu te den e drai kon baka na a gemeente.

16. Fu san ede yu de nanga tangi taki yu abi sowan lob’ati Granpriester?

¹⁶ Di Yesus ben e libi na grontapu, dan a yepi dusundusun sma na a reti ten. Na ini a ten disi, wi abi ala fertrow taki a o yepi wi tu te dati de fanowdu. Èn na ini a nyun grontapu di o kon heri esi, a o yepi wi fu abi wan libi sondro iniwan sondu noso swakifasi. Wi de nanga tangi trutru taki wi Gado, Yehovah, lobi wi so te taki a poti en Manpkin leki wi Granpriester.