3 SARA
A no tan prakseri den sani di a libi na baka
SARA ben trow nanga Abraham èn a ben lobi en srefsrefi. Den ben e libi na ini a foto Ur, na ini a kondre Sineyar. A foto disi ben bigi èn a ben abi hei skotu na en lontu. A bigi Eufraat-liba ben de krosbei fu a foto disi. Den sma fu a foto disi ben e anbegi furu falsi gado, ma Abraham no ben du dati. A ben e anbegi a wan-enkri tru Gado, Yehovah. Sara ben bribi na ini a tru Gado tu. Ma wan dei Sara ben musu sori moro bribi nanga dek’ati. Fu san ede?
Abraham ben taigi en taki Yehovah ben taki nanga en. Sara ben musu fu breiti di a yere dati. Ma a sani di Yehovah taigi Abraham fu du, no ben makelek. Den ben musu gwe libi den oso nanga den famiri èn den ben musu froisi go na wan kondre di ben de bun fara. A ben o teki langa fu waka go na a kondre dati èn den ben o libi na ini tenti. Sara no ben o libi moro na ini wan foto di abi skotu nanga waktiman. A no ben o libi moro na ini wan bigi oso di ben abi watra èn a no ben o abi wan moi dyari moro, noso tra sani di ben meki a libi moro switi. A no ben o man go na a w’woyo tu fu bai n’nyan sani nanga tra sani. A libi no ben o makelek srefsrefi. Ma tòg Sara ben de klarklari fu gwe. A fertrow tapu Yehovah èn a bribi en. Na so a teki san a ben abi fanowdu, a taki den famiri nanga mati fu en odi, èn a go nanga Abraham, aladi a no ben sabi pe den ben o go.
Sara no ben dwengi Abraham fu drai go baka na den oso na Ur. Ma a tan horbaka gi en èn a go awinsi pe Yehovah ben seni den go
Sara sori taki a abi dek’ati na wan tra fasi tu. Na apostel Paulus ben skrifi fu Sara nanga en masra Abraham: „Efu den ben o tan prakseri a presi fu pe den ben kmoto, dan den ben o abi na okasi fu drai go baka” (Hebr. 11:15). Sara ben kan prakseri fa a ben o switi gi en fu de baka na en oso na ini Ur èn fa a ben o firi fu de baka na ini wan foto di abi hei skotu nanga waktiman. Ma na presi fu dati, a sori taki a abi dek’ati èn a besroiti fu no prakseri srefi fu drai go baka.
Te fu kba den doro a kondre Kanan. A kondre disi no ben abi wan bigi liba leki Eufraat-liba. Sobun Sara no ben o abi na okasi fu bai n’nyan nanga tra sani di bisnisman ben tyari kon fu tra kondre. Di wan angriten ben kon na ini Kanan, dan den ben musu froisi fu di tra fasi no ben de. Aladi a ten disi ben musu fu muilek gi Sara, tòg a no dwengi en masra fu drai go baka na den oso na ini Ur. Na presi fu dati, a go na Egepte nanga Abraham sondro fu krutukrutu.
Fu di Sara ben moi srefsrefi, meki Abraham ben e frede taki sma ben o wani kiri en èn teki Sara tyari gwe. Dati meki Abraham aksi Sara fu taigi sma taki den na brada nanga sisa. Ma dati no ben yepi. Di a Farao fu Egepte kon yere fa Sara moi, a seni den srafu fu en fu go teki Sara puru na Abraham èn tyari Sara kon na paleis fu en. A no de fu taki dati a libi ini wan paleis ben o moro switi leki fu libi na ini tenti èn Sara no ben o abi fu frede, fu di ogri no ben o miti en drape. Ma Sara gwe libi Abraham soso fu kan abi wan switi libi nanga a Farao? No, a sori taki a abi dek’ati. A no gwe libi en masra èn Yehovah kibri en. A no teki langa, fosi a ben de makandra baka nanga en masra Abraham di a ben lobi srefsrefi.a
Yehovah ben pramisi Abraham taki wan bigi pipel ben o kmoto fu en. Ma Sara no ben man kisi pkin. A sani dati ben muilek gi en èn a ben e meki a sari srefsrefi. Ma baka furu yari di den tan na ini Kanan, Yehovah blesi Sara. Aladi Sara ben abi 90 yari, Yehovah blesi en èn a gi en a sani di a ben wani langa ten kba. Na so Sara kisi wan manpkin. Yehovah ben taigi den taki den musu kari a boi Isak, san wani taki „Lafu”. A nen disi ben fiti fu di Abraham nanga Sara ben lafu fu prisiri di den yere taki den ben o kisi wan manpkin. Sara ben de seiker taki tra sma ben o lafu èn prisiri nanga en tu te den ben o yere taki Yehovah ben du wan wondru gi en.
Sara libi langa nofo fu man kweki en manpkin èn fu si fa a boi kon tron wan bun man. Fu di Sara sori taki a abi dek’ati leki wan m’ma, meki a ben man kibri en boi. Èn teleki a dede, a no prakseri srefi fu drai go baka na a presi pe a ben kan abi wan moro switi libi. Na presi fu dati, a sori taki a abi dek’ati èn a ben tan wakti fu si den sani di Yehovah pramisi. Sara nanga en osofamiri no si den sani di Yehovah pramisi gi a ten di e kon, ma wi de seiker taki heri esi den o si fa den sani dati kon tru.
Leisi a tori:
Prakseri a sani disi:
Na sortu fasi Sara sori taki a abi dek’ati?
Diki moro dipi
1. A ben de wan fowtu sani taki Sara trow nanga Abraham aladi a ben de en afu-brada? (wp17.3 12 ¶5, futuwortu)
2. Ferteri san Sara libi na baka na ini Ur. (wp17.3 13 ¶3–14 ¶2) 1
Photograph taken by courtesy of the British Museum
Prenki 1: Wan gowtu sani di abi moi diri ston di sma feni na a presi pe Ur ben de
3. Fa wi du sabi taki a ben de wan koni sani di Abraham no meki son sma sabi taki Sara na en frow? (wp17.3 14 ¶6–15 ¶2)
4. Aladi Sara ben saka ensrefi na ondro Abraham, disi ben wani taki dati a no ben taigi Abraham noiti fa a ben e denki noso firi? Ferklari dati. (g 1/08 29 ¶4-5-wcgr) 2
Prenki 2
San yu leri
Luku na eksempre fu Sara nanga di fu a frow fu Lot.
Na sortu fasi a situwâsi fu den ben de a srefi? (Gen. 12:1; 13:5-7; 19:12, 15)
Fa den ben difrenti fu makandra? (Gen. 19:17, 26; Luk. 17:28-32)
San wi kan leri fu den besroiti di den teki èn fu a fasi fa sani waka gi den?
Sara ben moi srefsrefi èn en masra ben gudu. San wi kan leri fu Sara efu a situwâsi fu wi de a srefi? (Odo 31:30; 1 Tim. 6:17-19)
Fa yu kan abi a srefi dek’ati leki Sara? 3
Prenki 3
Denki dipi
San a tori disi e leri mi fu Yehovah?
San a tori disi abi fu du nanga a wani fu Yehovah?
San mi ben o wani aksi Sara te a opo baka?
Sortu tra sani yu kan leri
Na eksempre fu Sara na soso gi den frow di trow? Noso masra kan leri wan sani fu en tu?
Luku san Sara nanga Abraham du fu sori taki den e lespeki makandra.
a Bakaten, wan srefi sortu sani ben psa nanga Sara di wan kownu di nen Abimeilek teki en puru na Abraham. Sara sori dek’ati di a tan du san Abraham ben aksi en fu du èn a leisi disi baka Yehovah kibri en.