Yekucala KubaseKhorinte

15 Nyalo bazalwane nginikhumbuta ngetindzaba letimnandzi lengatimemetela kini,+ nani lenatemukela futsi lenitimelela ngekuciniseka. 2 Niyasindziswa nangabe nibambelela kuletindzaba letimnandzi lengatimemetela kini, ngaphandle nangabe kukholwa kwenu bekulite.

3 Ngobe nami nganitjela loko lokubaluleke kakhulu lengakwemukela, kutsi Khristu wafela tono tetfu njengobe kusho imiBhalo;+ 4 nekutsi wangcwatjwa,+ wavuswa+ ngelilanga lesitsatfu+ njengobe imiBhalo isho,+ 5 futsi wabonakala kuKhefase,*+ wase ubonakala nakubaphostoli labangu-12.+ 6 Ngemuva kwaloko wabonakala ngesikhatsi+ sinye kubazalwane labangetulu kwa-500, linyenti labo lisaphila kepha labanye babo sebafa.* 7 Ngemuva kwaloko wabonakala kuJakobe,+ wase ubonakala nakubo bonkhe baphostoli.+ 8 Kodvwa ekugcineni wabonakala nakimi+ kwaba shengatsi ubonakala kumuntfu lotelwe sisengakefiki sikhatsi.

9 Ngingulomncane kubaphostoli, futsi akungifaneli kubitwa ngekutsi ngingumphostoli, ngobe ngahlupha libandla laNkulunkulu.+ 10 Kodvwa ngemusa lomkhulu waNkulunkulu nginguloku lengingiko. Umusa lomkhulu langentela wona bewungasilo lite kimi, kodvwa ngatikhandla kubendlula bonkhe, hhayi ngemandla ami kepha ngenca yemusa lomkhulu waNkulunkulu losuke unami. 11 Ngisho kungatsiwa ngimi nobe ngibo labashumayelako, umlayeto lesiwushumayelako uyafana, futsi nani nawukholwa lomlayeto.

12 Ngako-ke nangabe kushunyayelwa kutsi Khristu uvusiwe kulabafile,+ yini lebangela kutsi labanye benu batsi labafile ngeke bavuswe? 13 Nangabe labafile bangeke bavuswe, naKhristu kusho kutsi akavuswanga. 14 Kodvwa nangabe Khristu angavuswanga, kushumayela kwetfu kulite, nekukholwa kwenu nako kulite. 15 Ngetulu kwaloko, kusho kutsi sikhuluma emanga ngaNkulunkulu,+ ngobe sitsi wavusa Khristu,+ kube kuyintfo langayentanga nangabe vele labafile bangeke bavuswe. 16 Nangabe labafile bangeke bavuswe, kusho kutsi naKhristu akavuswanga. 17 Ngetulu kwaloko, nangabe Khristu angavuswanga, kusho kutsi kukholwa kwenu kulite; nitawuchubeka nisetonweni tenu,+ 18 futsi kusho kutsi labo labafe* basebunyeni naKhristu nabo sebanyamalele.+ 19 Nangabe setsembela kuKhristu kulokuphila loku kuphela, sibekuvelwa buhlungu kwendlula bonkhe bantfu.

20 Kodvwa Khristu uvusiwe kulabafile, waba wekucala* kutsi avuswe ekufeni.*+ 21 Njengobe kufa kwavela ngemuntfu,+ nekuvuswa kwalabafile nako kuvela ngemuntfu.+ 22 Njengobe ku-Adamu bonkhe bayafa,+ nakuKhristu bonkhe batawutfola kuphila.+ 23 Batawuvuswa nguloyo naloyo ngekulandzelana kwabo: Kucala* Khristu,+ bese kutsi ngesikhatsi sekuba khona kwakhe kulandzele labo lababakhe.+ 24 Ngemuva kwaloko, kuphela kutawufika, lapho atawubuyisela khona uMbuso kuNkulunkulu wakhe longuBabe, futsi utawube sekababhubhise bonkhe bohulumende nawo onkhe emagunya kanye nemandla.+ 25 Ngobe kufanele abe yinkhosi kuze kube ngulapho Nkulunkulu sekabeke tonkhe titsa takhe ngephansi kwetinyawo takhe.+ 26 Sitsa sekugcina lesitawucedvwa, kufa.+ 27 Ngobe Nkulunkulu “wabeka tonkhe tintfo ngephansi kwetinyawo takhe.”+ Kodvwa emavi latsi ‘tonkhe tintfo tabekwa,’+ abufakazi bekutsi loko akufaki ekhatsi Loyo lowabeka tonkhe tintfo ngephansi kwakhe.+ 28 Kodvwa kutawutsi lapho tonkhe tintfo setibekwe ngephansi kwayo, iNdvodzana nayo itawutibeka ngephansi kwaLoyo lowabeka tonkhe tintfo ngephansi kwayo,+ kuze Nkulunkulu abe nguko konkhe kubo bonkhe.+

29 Ngako batawenta njani labo lababhajatiswe ngenjongo yekuba ngulabafile?+ Nangabe labafile bangeke bavuswe, kungani babhajatiselwa leyo njongo? 30 Pho yini lesenta sibe sengotini sonkhe sikhatsi?*+ 31 Malanga onkhe ngibhekana nekufa, futsi loku kucinisekiswa yinjabulo lenginayo ngani bazalwane kuKhristu Jesu iNkhosi yetfu. 32 Nangabe nami njengalabanye bantfu* ngilwe netilwane tesiganga e-Efesu,+ kungisita ngani loko? Nangabe labafile bangeke bavuswe, “asidleni sinatse, ngobe kusasa sitakufa.”+ 33 Ningadukiswa. Kutihlanganisa nebantfu lababi kona imikhuba lemihle.*+ 34 Sangulukani, nente lokulungile futsi ningachubeki nenta tono, ngobe labanye bete lwati ngaNkulunkulu. Loku ngikukhuluma kuze nibe nemahloni.

35 Ngetulu kwaloko, lomunye utawutsi: “Labafile batawuvuswa njani? Batawube banemtimba lonjani?”+ 36 Wena muntfu longenangcondvo! Lokuhlanyelako akuphili ngaphandle kwekutsi kucale kufe. 37 Loko lokuhlanyelako akusiso lesicu lesisuke sitawukhula, kodvwa kusuke kuyinhlanyelo nje, kungaba yakolo nobe yalokunye; 38 kepha Nkulunkulu uyinika sicu ngendlela latsandza ngayo, futsi unika inhlanyelo ngayinye sicu sayo. 39 Imitimba ayifani, kunemtimba webantfu, wetinkhomo, wetinyoni kanye newetinhlanti. 40 Kunemitimba yasezulwini+ nemitimba yasemhlabeni;+ inkhatimulo yemitimba yasezulwini ingulolunye luhlobo, kantsi nenkhatimulo yemitimba yasemhlabeni nayo ingulolunye luhlobo. 41 Inkhatimulo yelilanga yehlukile, nenkhatimulo yenyeti yehlukile,+ futsi inkhatimulo yetinkhanyeti nayo yehlukile; ecinisweni, inkhatimulo yenkhanyeti ngayinye ayifani neyalenye.

42 Kunjalo nangekuvuswa kwalabafile. Umtimba uhlanyelwa unekonakala, uvuswe sewute konakala.+ 43 Uhlanyelwa ute inkhatimulo, uvuswe sewunenkhatimulo.+ Uhlanyelwa ubutsakatsaka, uvuswe sewunemandla.+ 44 Uhlanyelwa ungumtimba wenyama, uvuswe sewungumtimba wemoya. Nangabe kunemtimba wenyama, ukhona nemtimba wemoya. 45 Kunjengobe kubhaliwe kwatsiwa: “Adamu, umuntfu wekucala, waba ngumuntfu lophilako.”*+ Adamu wekugcina waba ngumoya lonika kuphila.+ 46 Kodvwa loko lokungumoya akusiko kwekucala. Loko lokuyinyama ngiko kwekucala, bese kulandzela loko lokungumoya. 47 Umuntfu wekucala uvela emhlabeni futsi wentiwe ngelutfuli;+ umuntfu wesibili uvela ezulwini.+ 48 Njengobe loyo lowentiwe ngelutfuli anjalo, banjalo nalabo labentiwe ngelutfuli; futsi njengobe loyo wasezulwini anjalo, banjalo nalabo lababasezulwini.+ 49 Nanjengobe sifana naloyo lowentiwe ngelutfuli,+ sitawuphindze sifane naloyo wasezulwini.+

50 Nobe kunjalo, ngiyanitjela bazalwane kutsi inyama nengati ngeke kuwutfole uMbuso waNkulunkulu, nekonakala ngeke kukutfole kungonakali. 51 Nginitjela imfihlo lengcwele: Akusibo bonkhe kitsi labatawulala ekufeni, kodvwa sonkhe sitawuguculwa,+ 52 ngekushesha nangekucwabita kweliso ngelicilongo lekugcina. Ngobe licilongo litawukhala,+ labafile bavuswe sebete konakala futsi natsi sitawuguculwa. 53 Ngobe loku lokonakalako kufanele kwembatse kungonakali,+ naloku lokufako kufanele kwembatse kungafi.+ 54 Ngesikhatsi loku lokonakalako kwembatsa kungonakali naloku lokufako kwembatsa kungafi, atawugcwaliseka emavi latsi: “Kufa sekugwinywe phakadze.”+ 55 “Wena kufa, kuphi kuncoba kwakho? Kufa, luphi ludvonsi lwakho?”+ 56 Ludvonsi loluveta kufa sono,+ nemandla esono nguMtsetfo.*+ 57 Kodvwa siyambonga Nkulunkulu ngobe usisita kutsi sincobe ngeNkhosi yetfu Jesu Khristu!+

58 Ngako-ke bazalwane bami labatsandzekako, banini ngulabacinile,+ labangeke banyakatiswe, nihlale ninalokunyenti kwekukwenta+ emsebentini weNkhosi, nati kutsi kutikhandla kwenu akusilo lite+ eNkhosini.