Litsemba Lelingulona Lona Ngetihlobo Tetfu Letifile

1-3. Bonkhe bantfu bagijinyiswa ngusiphi sitsa, futsi kucoca ngaloko lokufundziswa liBhayibheli kusisita ngani?

TICABANGE ubalekela sitsa lesinelulaka. Sinemandla futsi sinematubane kunawe. Uyati kutsi asinamusa ngobe uke wasibona sibulala labanye bangani bakho. Ubatse uyatati ngematubane, usitfola sila emuva kwakho. Kuphela emachinga. Kutsi kusenjalo, kuvele umuntfu longakulamulela. Unemandla kunalesitsa sakho, futsi wetsembisa kukusita. Kutsi hhemu!

² Ngemcondvo lotsite, ugijinyiswa sitsa lesitsite. Sonkhe sigijinyiswa nguleso sitsa. Njengobe sifundzile esehlukweni lesendlulile, liBhayibheli libita kufa ngekutsi sitsa. Kute namunye wetfu longasishiya nobe alwe naso futsi asehlule. Labanyenti betfu basibonile lesitsa sibulala bantfu lababatsandzako. Kodvwa Jehova unemandla lamakhulu kunekufa. UnguMkhululi lonelutsandvo futsi losavele abonisile kutsi angasehlula lesitsa. Wetsembisa kutsi utasibhubhisa lesitsa lesikufa, singaphindzi sibe khona. LiBhayibheli lifundzisa kutsi: “Sitsa sekugcina lesiyawucitfwa kufa.” (1 Khorinte 15:26) Tindzaba letimnandzi leto!

³ Ase sicoce kafishane ngekutsi siva kunjani nakufa umuntfu lesimtsandzako. Loku kutasisita sati ngalokunye lokujabulisako. Jehova utsembisa kutsi labafile batawuphindze baphile. (Isaya 26:19) Batawuvuswa. Litsemba leluvuko-ke lelo!

 4. (a) Kungani indlela Jesu lenta ngayo nakufe umuntfu lamtsandzako isifundzisa ngemiva yaJehova? (b) Kwakubobani bangani baJesu?

⁴ Wake wafelwa ngumuntfu lomtsandzako? Buhlungu, kudzabuka kanye nekuphelelwa ngemandla kungabonakala kungabeketeleleki. Etikhatsini letinjalo, kudzingeka sifundze Livi laNkulunkulu kute sitfole indvudvuto. (2 Khorinte 1:3, 4) LiBhayibheli liyasisita sicondze kutsi Jehova naJesu bativa njani ngekufa. Jesu, lowalingisa Babe wakhe ngalokuphelele, wabuva buhlungu bekufelwa. (Johane 14:9) Ngesikhatsi aseJerusalema, abevame kuvakashela Lazaro nabodzadzewabo, boMariya naMata, labebahlala eBhetaniya, lidolobha lelalisedvute. Baba bangani labakhulu. LiBhayibheli litsi: “Jesu abebatsandza boMata nadzadzewabo kanye naLazaro.” (Johane 11:5) Njengobe sifundzile esehlukweni lesendlulile, Lazaro wagcina afile.

5, 6. (a) Wentani Jesu ngesikhatsi anetihlobo nebangani baLazaro labebakhala? (b) Kungani kukhala kwaJesu kusikhutsata?

⁵ Wativa njani Jesu nakufa umngani wakhe? Kulandzisa kusitjela kutsi Jesu waya etihlotjeni nakubangani baLazaro labebakhala. Nakababona, weva buhlungu kakhulu. “Wabibitseka, wadzabuka kakhulu.” Lendzaba iphindze itsi, “Jesu wakhala tinyembeti.” (Johane 11:33, 35) Kukhala kwaJesu kwakusho kutsi abengenalitsemba yini? Cha, akunjalo! Empeleni Jesu bekati kutsi kunalokutsite lokumangalisako lokwakutakwenteka. (Johane 11:3, 4) Nobe kunjalo, wabuva buhlungu nelusizi lwekufelwa.

⁶ Ngalokufanako, kukhala kwaJesu natsi kuyasikhutsata. Kusifundzisa kutsi Jesu naBabe wakhe, Jehova, bayakutondza kufa. Kodvwa Nkulunkulu Jehova unemandla ekulwa nalesitsa futsi asehlule. Ase sibone kutsi Nkulunkulu wanika Jesu emandla ekwentani.

7, 8. Kungani simo saLazaro sasibonakala singetsembisi kubantfu labebalapho, kodvwa Jesu wentani?

⁷ Lazaro abengcwatjwe emgedzeni. Jesu watsi akususwe lelitje lelaliwuvalile. Mata wala ngobe kwase kuphele emalanga lamane Lazaro afile, futsi kungenteka kutsi sidvumbu sakhe sase sicala kubola. (Johane 11:39) Ngembono wemuntfu, lalingekho ngisho nalelincane litsemba lekutsi angavuka.

⁸ Litje lesuswa, Jesu wamemeta ngelivi lelikhulu, watsi: “Lazaro! Phuma!” Yini leyenteka? “Umufi waphuma.” (Johane 11:43, 44) Cabanga indlela labebajabule ngayo bantfu labebalapho. Nobe ngabe labo bebalapho kwakubomnakabo Lazaro, tihlobo takhe, bangani, nobe bomakhelwane, bebati kutsi abefile. Kodvwa abesavusiwe​—yena kanye lomuntfu labamtsandzako—​bese akanye nabo. Loko labakubona abakukholwanga. Labanyenti bamangala bajabulile. Kufa kwakuncotjiwe!

9, 10. (a) Jesu watsi ngubani uMtfombo wemandla ekuvusa Lazaro? (b) Kusisita ngani kufundza tindzaba letikhuluma ngeluvuko eBhayibhelini?

⁹ Jesu akazange atsi lesimangaliso usenta ngemandla akhe. Emthandazweni wakhe ngembi kwekuvusa Lazaro, washo kutsi nguJehova longuMtfombo weluvuko. (Johane 11:41, 42) Jehova abengacali kusebentisa emandla akhe ngalendlela. Kuvuswa kwaLazaro kungulesinye setimangaliso kuletiyimfica tekuvuswa kwebantfu lokukhulunywa ngato eVini laNkulunkulu.a Kufundza ngaletimangaliso kuyajabulisa. Tisifundzisa kutsi Nkulunkulu akakhetsi, ngobe labo labavuswa bebafaka ekhatsi labancane nalabadzala, emadvodza nebafati, ema-Israyeli nalabangesiwo ema-Israyeli. Bajabula kakhulu bantfu! Sibonelo saloku kungalesikhatsi Jesu avusa intfombatane lencane ekufeni, batali bayo ‘bamangala kakhulu.’ (Makho 5:42) Jehova abebaletsele injabulo labebangeke bayikhohlwe.

¹⁰ Kuliciniso kutsi bantfu labavuswa nguJesu baphindze bafa. Loku kusho kutsi kubavusa kwakhe kwakukudlala ngesikhatsi yini? Cha, akusho loko. Letindzaba teliBhayibheli tigcizelela emaciniso labalulekile futsi tisiniketa litsemba.

11. Indzaba lemayelana nekuvuswa kwaLazaro ilifakazela njani liciniso lelikuMshumayeli 9:5?

¹¹ LiBhayibheli lifundzisa kutsi labafile “abati lutfo.” Indzaba yaLazaro iyakucinisekisa loko. Nasavusiwe, wamangalisa bantfu yini ngekubacocela ngekutsi lizulu linjani? Nobe wabesabisa yini ngetindzaba letetfusako tesihogo semlilo? Cha, akakwentanga loko. LiBhayibheli alisitjeli kutsi Lazaro wakhuluma tindzaba letinjena. Kulamalanga lamane afile, ‘abengati lutfo.’ (Umshumayeli 9:5) Lazaro abemane nje alele ekufeni.​—Johane 11:11.

12. Singaciniseka njani kutsi Lazaro wavuswa?

¹² Indzaba yaLazaro isicinisekisa kutsi luvuko luyawuba khona nakanjani, akusiyo nje inganekwane. Jesu wavusa Lazaro embikwebantfu labanyenti. Ngisho nebafundisi labebamenyanya Jesu, behluleka kuphika kutsi lesimangaliso sentekile. Esikhundleni saloko batsi: “Senta njani? Lomuntfu [Jesu] wenta tibonakaliso letinyenti.” (Johane 11:47) Labanyenti beta batewubona Lazaro lovusiwe. Umphumela waba kutsi, labanye kubo bamkholwa Jesu. Babona kutsi utfunywe nguNkulunkulu lapho avusa Lazaro. Lobufakazi bacaca bha kangangekutsi labanye baholi bemaJuda lababi bahlela kubulala Jesu kanye naLazaro.​—Johane 11:53; 12:9-11.

13. Yini lesicinisekisako kutsi Jehova angabavusa labafile?

¹³ Kubulima yini kwemukela luvuko njengentfo letakwenteka? Cha, akunjalo ngobe Jesu watsi “bonkhe bantfu labasemathuneni” bayawuvuswa. (Johane 5:28) Jehova nguye uMdali wetintfo tonkhe. Kufanele kube matima yini kukholwa kutsi angabadala kabusha bantfu? Kuliciniso kutsi konkhe kutakuya ngekutsi bobani labasenkhumbulweni yakhe. Angabakhumbula yini bantfu labanyenti kangaka lesibatsandzako labafile? Kunetigidzigidzi tetinkhanyeti esibhakabhakeni, kodvwa Nkulunkulu utibita tonkhe ngemabito. (Isaya 40:26) Ngako Nkulunkulu Jehova angabakhumbula bonkhe lesibatsandzako labafile, futsi ukulungele kubavusa baphindze baphile.

14, 15. Njengobe kuboniswa nguloko lokwashiwo nguJobe, Jehova utiva njani ngekuvusa labafile?

¹⁴ Utiva njani Jehova ngekuvusa labafile? LiBhayibheli lifundzisa kutsi Jehova ulobikela kuvusa labafile. Indvodza lelungile lenguJobe yabuta: “Nangabe umuntfu afa, uyawuphindze aphile yini?” Jobe abekhuluma ngekulindza ethuneni kuze kube sikhatsi lesifanele saNkulunkulu kutsi amvuse. Watsi kuJehova: “Uyawungibita, mine ngikuphendvule. Uyawufisa kubona leso sidalwa lesentiwa tandla takho.”​—Jobe 14:13-15.

¹⁵ Awucabange nje! Jehova uyakulobikela kuvusa labafile. Akusijabulisi yini kwati kutsi Jehova utiva ngalendlela? Kodvwa kutsiwani ngeluvuko lolutako? Bobani labatawuvuswa, futsi batawuvuselwa kuphi?

16. Labafile batawuvuselwa ekuphileni lokunjani?

¹⁶ Tindzaba letiseBhayibhelini letimayelana neluvuko tisifundzisa lokunyenti ngeluvuko lolutako. Bantfu labavuswa lapha emhlabeni baphindze bahlangana netihlobo tabo. Luvuko lolutako nalo luyofanana nalolu​—kodvwa lona luyoba ncono kakhulu. Njengobe sifundzile eSehlukweni 3, injongo yaNkulunkulu kutsi wonkhe lomhlaba ube lipharadisi. Ngako labafile angeke bavuselwe emhlabeni lonetimphi, bugebengu kanye nekugula. Batawuba nelitfuba lekuphila phakadze emhlabeni lonekuthula futsi bajabule.

17. Batawuba banyenti kangakanani bantfu labatawuvuswa?

¹⁷ Bobani labatawuvuswa? Jesu watsi ‘bonkhe bantfu labasemathuneni bayawuliva livi lakhe [Jesu] bavuke.’ (Johane 5:28, 29) Ngalokufananako, Sembulo 20:13 sitsi: “Lwandle lwakhipha labafile lababekulo, kufa [“neHayidesi,” NW.] kwaniketa labafile lababekuko.” Ligama lelitsi “Hayidesi” limane nje lisho indzawo lengumfanekiso lapho bantfu labanyenti labafile balala khona . (Fundza Sandzisanchazo, emakhasini 212-13.) Emathuna angeke aphindze abe khona. Tigidzigidzi tebantfu labangcwatjwa kuwo tiyovuswa. Umphostoli Pawula watsi: “Bonkhe bantfu, labalungile nalabangakalungi, bayawuvuka ekufeni.” (Imisebenti 24:15) Kusho kutsini loku?

18. Bobani labahlanganiswe emkhatsini ‘walabalungile’ labatawuvuswa, futsi wena utiva njani ngalelitsemba?

¹⁸ “Labalungile” bafaka ekhatsi bantfu labanyenti lesifundza ngabo eBhayibhelini labaphila ngembi kwekuba Jesu ete emhlabeni. Laba bafaka ekhatsi Nowa, Abrahama, Sara, Mosi, Ruthe, Esta, nalabanye labanyenti. Labanye kulamadvodza nebafati lebebanelukholo lolucinile kukhulunywa ngabo encwadzini yemaHebheru sehluko 11. Kodvwa “labalungile” baphindze bahlanganise tinceku taJehova letifa esikhatsini lesiphila kuso. Ngelitsemba leluvuko, nyalo asisakwesabi kufa.​—Hebheru 2:15.

19. Bobani ‘labangakalungi,’ futsi nguliphi litfuba Jehova latabaniketa lona?

¹⁹ Kutsiwani ngabo bonkhe labo labangazange bakhonte Jehova nobe bamhloniphe ngenca yekutsi abafundzanga ngaye? Letigidzigidzi ‘talabangakalungi’ angeke atikhohlwe Jehova. Nato tiyovuswa tiniketwe litfuba lekufundza ngaNkulunkulu weliciniso futsi timkhonte. Emkhatsini weminyaka letinkhulungwane, labafile batawuvuswa futsi banikwe litfuba lekuhlangana nebantfu baJehova labalungile emhlabeni futsi bamkhonte. Kutawuba sikhatsi lesijabulisako leso. Lesikhatsi lesi liBhayibheli lisibita ngekutsi Lilanga Lekwahlulelwa.b

20. Liyini liGehena, futsi bobani labaya kulo?

²⁰ Loku kusho kutsi bonkhe bantfu labafile bayovuswa yini? Cha, akunjalo. LiBhayibheli litsi labanye labafile ‘baseGehena.’ (Lukha 12:5, NW) Ligama lelitsi Gehena lisuselwa endzaweni lokwakulahlwa kuyo tibi ngephandle kweliJerusalema lakadzeni. Tidvumbu, netibi kwakushiswa kuleyo ndzawo. Tidvumbu letatilahlwa lapho tatitsatfwa njengaleto letingakufanelekeli kungcwatjwa kuvuswa. Ngako iGehena ikufanekisela kahle kubhujiswa phakadze. Nobe nje Jesu atawuba nayo incenye ekwahluleleni labaphilako nalabafile, nguJehova uMehluleli lomkhulu. (Imisebenti 10:42) Angeke abavuse labo labahlulela njengalababi futsi labangakatimiseli kushintja.

21, 22. (a) Nguluphi lolunye luhlobo lweluvuko lolukhona? (b) Ngubani wekucala ngca lowavuswa anemtimba wemoya?

²¹ LiBhayibheli liphindze likhulume ngalolunye luhlobo lweluvuko, kuvuselwa ezulwini njengesidalwa semoya. Sinye kuphela sibonelo saloluhlobo lweluvuko lokukhulunywa ngaso eBhayibhelini, sekuvuka kwaJesu Khristu.

²² Ngemuva kwekuba Jesu abulewe, Jehova akakuvumelanga kutsi iNdvodzana Yakhe leyetsembekile ihlale siphelwane ethuneni. (Tihlabelelo 16:10; Imisebenti 13:34, 35) Nkulunkulu wamvusa Jesu, kepha hhayi anemtimba wenyama. Umphostoli Phetro usichazela kutsi Khristu “wabulawa ngekwemtimba, kepha wavuswa ngamoya waNkulunkulu.” (1 Phetro 3:18) Ecinisweni lesi kwakusimangaliso lesikhulu. Jesu waphindze waphila futsi angumuntfu lonemtimba wemoya lonemandla. (1 Khorinte 15:3-6) Jesu abewekucala ngca kutfola loluhlobo loluphakeme lweluvuko. (Johane 3:13) Kodvwa bakhona nalabanye labebayovuswa ngalendlela.

23, 24. Bobani labakha ‘umhlambi lomncane’ waJesu, futsi bangakhi?

²³ Jesu bekati kutsi masinyane utawubuyela ezulwini, ngako watjela balandzeli bakhe labetsembekile kutsi ‘usayobalungisela indzawo.’ (Johane 14:2) Jesu wabita labo labayawuphila ezulwini ngekutsi ‘ngumhlambi lomncane.’ (Lukha 12:32) Bangakhi lokufanele babe kulelicembu lelincane lemaKhristu letsembekile? Ngekusho kweSembulo 14:1, umphostoli Johane watsi: ‘Ngatsi ngiyabuka ngabona liWundlu [Jesu Khristu] eNtsabeni yaseSiyoni lime nebantfu labangu-144 000; babenelibito lalo, neleYise libhalwe emabuntini abo.’

²⁴ LamaKhristu langu-144 000, lafaka ekhatsi baphostoli baJesu labetsembekile, avuselwa ekuphileni ezulwini. LamaKhristu avuswa nini? Umphostoli Pawula watsi avuswa ngesikhatsi sekuba khona kwaKhristu. (1 Khorinte 15:23) Njengobe utawufundza eSehlukweni 9, sesivele siphila kuso leso sikhatsi. Ngako-ke, lelidlanzana lelisele lalabo labangu-144 000 labafa esikhatsini setfu, bavuselwa ekuphileni kwasezulwini ngekucwabita kweliso. (1 Khorinte 15:51-55) Linyenti lebantfu lelinelitsemba lekuvuswa esikhatsini lesitako, liyovuselwa ekuphileni ePharadisi emhlabeni.

25. Sitawufundza ngani esehlukweni lesilandzelako?

²⁵ Ecinisweni, Jehova utasehlula lesitsa setfu lesikufa, futsi akuyuphindze kube khona. (Isaya 25:8) Nobe kunjalo, ungahle utibute, ‘Labo labavuselwa ezulwini bayokwentani?’ Bayoba yincenye yahulumende weMbuso lomuhle kakhulu wasezulwini. Sitawufundza kabanti ngalohulumende esehlukweni lesilandzelako.