BangemaKhristu Sibili Yini BoFakazi BaJehova?

Tsine BoFakazi BaJehova, sikholelwa kutsi singemaKhristu sibili. Sisho ngani? Kungenca yaloko lesikukholelwako, ligama letfu lelisenta sehluke, kanye nendlela lesitsandzana ngayo.

1. Kusekelwe kuphi loko BoFakazi BaJehova labakukholelwako?

Jesu watsi: “Livi lakho [Nkulunkulu] liliciniso.” (Johane 17:17) NjengaJesu, BoFakazi BaJehova bebasolo bakusekela eVini laNkulunkulu loko labakukholelwako. Sibonelo nje, buka indlela lesikwente ngayo loku kusukela ngelikhulu lesi-19. Cishe nga-1870, licembu lebafundzi beliBhayibheli lacala kuhlolisisa ngekucophelela loko lokufundziswa liBhayibheli. Lasekela lebelikukholelwa kuloko lokushiwo liBhayibheli, ngisho nobe bekwehlukile kuloko bekufundziswa masontfo. Base bacala kutjela labanye ngaloko lebebakutfolile.a

2. Sitibitelani ngekutsi siBoFakazi BaJehova?

Jehova ubita tikhonti takhe ngekutsi tibofakazi bakhe ngobe titjela labanye liciniso ngaye. (KumaHebheru 11:4–12:1) Sibonelo saloko kutsi, endvulo, Nkulunkulu watsi kubantfu bakhe: “Nine nibofakazi bami.” (Fundza Isaya 43:10.) Jesu ubitwa ngekutsi ‘nguFakazi Lowetsembekile.’ (Sembulo 1:5) Kungaleso sizatfu nga-1931, sakhetsa kutibita ngekutsi siBoFakazi BaJehova. Siyatigcabha ngekubitwa ngaleligama.

3. BoFakazi BaJehova balulingisa njani lutsandvo lwaJesu?

Jesu bekabatsandza kakhulu bafundzi bakhe kangangekutsi bebafana nemndeni kuye. (Fundza Makho 3:35.) Ngendlela lefanako, BoFakazi BaJehova bangumndeni lonebunye emhlabeni wonkhe. Kungako sibitana ngabomnaketfu nabodzadze wetfu. (KuFilemoni 1, 2) Siphindze silalele umyalo lotsi: “Nitsandze bonkhe bazalwane.” (1 Phetro 2:17) BoFakazi BaJehova bakhombisa lolutsandvo ngetindlela letinyenti, njengekusita bazalwane babo labasemhlabeni wonkhe nabadzinga lusito.

CHUBEKA UFUNISISA

4. Sisekela loko lesikukholelwako eBhayibhelini

Jehova washo kutsi kucondza kwetfu liBhayibheli kutawuya ngekuya kukhanya. Fundza Danyela 12:4 nembhalo longentansi, bese nicoca ngalombuto:

• Yini ‘letawuba yinyenti’ kubantfu baNkulunkulu njengobe bachubeka bahlolisisa liBhayibheli?

Buka indlela licembu lebafundzi beliBhayibheli, lokufaka ekhatsi Charles Russell, labalitadisha ngayo liVi laNkulunkulu. Dlala le-VIDEO, bese nicoca ngalombuto lolandzelako.

I-VIDEO: Kutfolakala Kabusha Kwemaciniso LaseBhayibhelini (7:45)

• Kule-video, Charles Russell kanye nalabanye Bafundzi beliBhayibheli, balitadisha njani liBhayibheli?

Bewati yini?

Ngaletinye tikhatsi, lesikukholelwako sikulungisile. Leni? Njengobe lilanga naliphuma liwukhanyisa kancane kancane umhlaba, naNkulunkulu wenta silicondze kancane kancane liVi lakhe. (Fundza Taga 4:18.) Ngisho nobe liBhayibheli lingashintji, kodvwa sitilungisile tintfo lesitikholelwako njengoba kucondza kwetfu liBhayibheli kuya kutfutfuka.

5. Senta ngekuvumelana neligama letfu

I-VIDEO: Ligama Lelichaza Kutsi Sibobani (2:40)

• Yini leyenta ligama lelitsi BoFakazi BaJehova lifaneleke?

Jehova wakhetselani bantfu kutsi babe bofakazi bakhe? Kuze batoveta kutsi unguNkulunkulu weliciniso, njengobe kukhulunywe emanga lamanyenti ngaye. Asesicoce nganankha lamabili.

Letinye tinkholo tifundzisa emalunga ato kutsi Nkulunkulu ufuna basebentise tithico nabamkhonta. Nobe kunjalo, fundza Levithikhusi 26:1, bese nicoca ngalemibuto:

• Litsini liciniso? Jehova utsini ngetithico?

Labanye baholi betinkholo bafundzisa kutsi Jesu unguNkulunkulu. Nobe kunjalo, fundza Johane 20:17, bese nicoca ngalemibuto:

• Litsini liciniso? Nkulunkulu naJesu ngumuntfu munye yini?

• Kukwenta utive njani kwati kutsi Jehova utfumele boFakazi bakhe kutsi bashumayele liciniso ngaye kanye nangeNdvodzana yakhe?

6. Siyatsandzana

LiBhayibheli litsi emaKhristu kufanele abe munye njengemalunga emtimba. Fundza 1 KubaseKhorinte 12:25, 26, bese nicoca ngalemibuto:

• EmaKhristu sibili kufanele ente njani nangabe lamanye emaKhristu ahlupheka?

• Yini loyitsandzile endleleni BoFakazi BaJehova labakhombisana ngayo kutsi bayatsandzana?

Nangabe kugadle sehlakalo kulenye indzawo emhlabeni, labanye BoFakazi baya kuyosita ngekushesha. Kuze ubone sibonelo saloko, dlala le-VIDEO, bese nicoca ngalombuto lolandzelako.

I-VIDEO: I-Haiti Yahlaselwa Siphepho Lokutsiwa NguMatthew (5:29)

• Tento taBoFakazi BaJehova tekusita nakuvele tehlakalo tikufakazela njani kutsi banelutsandvo?

LOKO LESICOCE NGAKO

BoFakazi BaJehova ngemaKhristu sibili. Singumndeni losemhlabeni wonkhe wetikhonti letisekela loko letikukholelwako eBhayibhelini, futsi senta liciniso ngaJehova latiwe.

Yini Loyifundzile?

• Yini leyasenta sakhetsa ligama lelitsi BoFakazi BaJehova?

• Siphatsana njani?

• Ucabanga kutsi BoFakazi BaJehova bangemaKhristu sibili yini?

LOKUNYE LONGAKUHLOLA

Fundza lokunyenti ngemladvo wetfu.

Jehovah’s Witnesses—Faith in Action, Part 1: Out of Darkness (1:00:53)

Buka sibonelo sendlela BoFakazi BaJehova labativete ngayo ebaleni timfundziso temanga.

Bantfu BaNkulunkulu Bangcwelisa Libito Lakhe (7:08)

Tfola timphendvulo temibuto longaba nayo ngaBoFakazi BaJehova.

“Imibuto Bantfu Labavamise Kuyibuta Mayelana NaBoFakazi BaJehova” (likhasi leliku-internet)

Stephen bekabenyanya aphindze abahlasele bantfu balobunye buve. Fundza kutsi yini layibona kuBoFakazi BaJehova leyamenta washintja.

“Kuphila Kwami Bekuya Ngekuya Kuba Kubi Kakhulu” (Sicongosekulindza saSeptember 1, 2015)