SIFUNDVO 29

Kwentekani Nasifa?

Printed Edition

Wake wafelwa yini ngumuntfu lomtsandzako? Etimeni letibuhlungu njengalesi, ungahle utibute: ‘Kwentekani nasifa? Likhona yini litsemba lekutsi sitawuphindze sibabone bantfu lesibatsandzako labashonile?’ Kulesifundvo nakulesilandzelako, sitawucoca ngetimphendvulo teliBhayibheli letidvudvutako.

1. Kwentekani nasifa?

Jesu wahlobanisa kufa nebutfongo lobukhulu. Umuntfu lokulobukhulu butfongo, akati kutsi kwentekani endzaweni lakuyo. Kufa kufana njani nebutfongo? Umuntfu nasekafile, akabuva buhlungu. Akabi nesitunge, ngisho nobe bekabatsandza kangakanani bangani bakhe nemndeni wakhe. LiBhayibheli litsi: “Labafile abati lutfo.”—Fundza Umshumayeli 9:5.

2. Kungasisita njani kwati liciniso ngekufa?

Bantfu labanyenti bayakwesaba kufa baphindze besabe nebantfu labafile! Nobe kunjalo, kungakudvudvuta loko lokushiwo liBhayibheli mayelana nekufa. Jesu watsi: “Liciniso litanikhulula.” (Johane 8:32) Letinye tinkholo tifundzisa kutsi kukhona lokuchubeka kuphila, umuntfu nasekafile, kodvwa liBhayibheli alikufundzisi loko. Ngako-ke, kute umuntfu lohluphekako nasekafile. Njengobe bantfu labafile bangati lutfo, ngeke baze basilimate. Kute sidzingo sekukhonta labafile nobe sekubentela tintfo kuze bangasilimati futsi kute nesidzingo sekubafaka emithantazweni yetfu.

Labanye bantfu batsi bayakhona kukhuluma nebantfu labafile. Kungenteka yini vele loko? Njengobe sesifundzile, “labafile abati lutfo.” Labo labacabanga kutsi bakhuluma nebantfu labafile, kungenteka basuke bakhuluma nemadimoni latenta labantfu labafile. Ngako kwati liciniso ngekufa, kuyasivikela emadimonini. Jehova uyasecwayisa ngekwetama kukhuluma nebantfu labafile ngobe uyati kutsi kukhuluma nemadimoni kutasilimata.—Fundza Dutheronomi 18:10-12.

CHUBEKA UFUNISISA

Tfola lokunyenti mayelana naloko lokufundziswa liBhayibheli ngekufa futsi ucinise kukholwa kwakho kuNkulunkulu lonelutsandvo longabajezisi bantfu labafile.

Indvodza lefelwe ngumfati ihleti nebantfwana bayo lababili emngcwabeni. Idvudvutwa bangani netihlobo.

3. Fundza liciniso mayelana nesimo sebantfu labafile

Emhlabeni wonkhe, bantfu bakholelwa etintfweni letehlukahlukene mayelana nekutsi kwentekani nasifa. Ecinisweni, akusiko konkhe labakukholelwako lokuliciniso.

Ngutiphi tintfo letivamile labatikholelwako endzaweni yangakini mayelana nesimo sebantfu labafile?

Kuze ubone loko lokufundziswa liBhayibheli, dlala le-VIDEO.

I-VIDEO: Labafile Bakusiphi Simo?—Incenye (1:19)

Sicephu se-video letsi ‘Labafile Bakusiphi Simo?—Incenye.’ Titfombe: 1. Sidvumbu sisembhedzeni esibhedlela. 2. Indvodza lehleti emkhatsini webantfu lababili ilele njengoba ihamba ngesitimela.

Fundza Umshumayeli 3:20, bese nicoca ngalemibuto:

Ngekusho kwalelivesi, kwentekani kumuntfu nakafa?
Kukhona yini lokuchubeka kuphila umuntfu nasekafile?

LiBhayibheli lisitjela ngekufa kwaLazaro, umngani lomkhulu waJesu. Njengobe ufundza Johane 11:11-14, naka kutsi Jesu watsi Lazaro bekakusiphi simo. Ngemuva kwaloko nicoce ngalemibuto:

Jesu wakuhlobanisa nani kufa?
Loku kusitjelani ngesimo sebantfu labafile?
Utiva njani ngaloko liBhayibheli lelikushoko ngekufa?

4. Liciniso ngekufa liyasizuzisa

Kwati liciniso ngekufa kuyasikhulula ekwesabeni bantfu labafile. Fundza Umshumayeli 9:10, bese nicoca ngalombuto:

Bantfu labafile bangasilimata yini?

Nasilikholelwa liciniso leliseBhayibhelini, ngeke siwakholelwe emanga ekutsi kufanele sijabulise bantfu labafile nobe sibakhonte. Fundza Isaya 8:19; neSembulo 4:11, bese nicoca ngalombuto:

Ucabanga kutsi Jehova utiva njani nangabe umuntfu akhonta nobe acela lusito kumuntfu lofile?

Titfombe: Emasiko lahambisana nekukhonta labafile. 1. Indvodza iguce phambi kwelithuna iyathantaza futsi inikela ngekudla. 2. Emadvodza lamatsatfu lavunulile ayadansa. 3. Bantfu bayahambahamba bagcoke ema-mask etikobho futsi baphetse ematsambo. — Liciniso mayelana nekufa liyasikhulula emasikweni langamjabulisi Jehova

5. Siyadvudvuteka nasifundza liciniso ngekufa

Bantfu labanyenti bafundziswe kutsi nabafa batawujeziswa ngenca yetintfo letimbi labatenta. Kuyasidvudvuta kwati kutsi kute umuntfu lohluphekako nasekafile, ngisho nalabo lebebenta tintfo letimbi kakhulu. Fundza KubaseRoma 6:7, bese nicoca ngalombuto:

Njengobe sifundza eBhayibhelini, nangabe umuntfu lofile akhululiwe esonweni, ucabanga kutsi uyahlupheka yini ngenca yetono latenta?

Njengobe sichubeka simati Jehova, sitawubona kutsi angeke aze abajezise bantfu labafile. Fundza Dutheronomi 32:4; na-1 Johane 4:8, bese nicoca ngalemibuto:

Nkulunkulu lonalobuntfu lobubalwe kulamavesi langenhla angabajezisa yini bantfu labafile?
Kuyakudvudvuta yini kwati liciniso ngekufa? Usho ngani?

LABANYE BANTFU BATSI: “Ngiyesaba kutsi kutawentekani kimi nangifa.”

Nguliphi livesi leliseBhayibhelini lelidvudvutako longamkhombisa lona?

LOKO LESICOCE NGAKO

Umuntfu nakafa, kute kwakhe lokuchubeka kuphila. Bantfu labafile abahlupheki futsi angeke babalimate bantfu labaphilako.

Yini Loyifundzile?

Kwentekani nasifa?
Kusisita njani kwati liciniso ngekufa?
Kwati liciniso ngekufa kusidvudvuta njani?

Lilanga locedze ngalo lesifundvo:

Umgomo

Kwetama kubamba ngengcondvo umbhalo munye lokulesifundvo kuze ukhone kuchaza simo salabafile.

Leminye Imigomo Lotibekela Yona:

Your other goal

LOKUNYE LONGAKUHLOLA

Fundza kutsi ligama lelitsi “umphefumulo” lisho kutsini eBhayibhelini.

“Uyini Umphefumulo?” (Sihloko lesiku-internet)

Tfola kutsi Nkulunkulu usebentisa sihogo yini kuze ajezise bantfu lababi.

Sihogo Siyindzawo Yekuhlushwa Yini? (3:07)

Kufanele yini sibesabe bantfu labafile?

Imimoya Yabafileyo—Ingakusiza Noma Ingakulimaza? Ingabe Ikhona Ngempela? (incwajana letfolakala ngesiZulu)

Tfola kutsi lenye indvodza yadvudvuteka njani nayifundza liciniso ngekutsi kwentekani nasifa.

“Ngazithanda Izimpendulo ZeBhayibheli Ezicacile Nezinengqondo” (Sicongosekulindza saFebruary 1, 2015, lesitfolakala ngesiZulu)