SIFUNDVO 52
Kungani Indlela Lesikhetsa Kugcoka Ngayo Nalesikhetsa Kubukeka Ngayo Ibalulekile?
Sonkhe siyatikhetsela indlela lesifuna kugcoka ngayo nalesifuna kubukeka ngayo. Nasilandzela timiso letimelula letiseBhayibhelini, singakukhetsa kahle loko lesifuna kukugcoka, siphindze sijabulise Jehova. Asesihlole letinye taletimiso.
1. Ngutiphi timiso letingasisita nasikhetsa loko lesifuna kukugcoka, kanye nendlela lesitawubukeka ngayo?
Kufanele sikhetse timphahla “letilungiswe kahle, ngekuzitsa nangekuvutfwa,” futsi sibukeke sihlantekile kuze bantfu babone kutsi ‘sihlonipha Nkulunkulu.’ (1 KuThimothi 2:9, 10) Cabanga nganati timiso letine: (1) Timphahla tetfu kufanele tibe ‘nguletilungiswe kahle.’ Kungenteka ubonile emihlanganweni yetfu yelibandla kutsi bantfu baJehova bagcoka ngetindlela letingafani, kodvwa indlela lesigcoka ngayo nalesitilungisa ngayo ikhombisa kutsi siyamhlonipha Nkulunkulu. (2) Nasigcoka “ngesizotsa” asenti labanye babe nemicabango lengakafaneli nome sente labanye basinake ngalokungenasidzingo. (3) Sikhombisa ‘kuvutfwa’ nasingatilandzeli tonkhe titayela nemafashini lafikako. (4) Indlela lesibukeka ngayo kufanele ihlale ikhombisa kutsi ‘sihlonipha Nkulunkulu,’ kuze kutsi labanye babone kutsi sikhonta Nkulunkulu weliciniso.—1 KubaseKhorinte 10:31.
2. Indlela lesibukeka ngayo ingabatsintsa njani lesikholwa nabo?
Ngisho nanobe sinenkhululeko yekukhetsa kutsi sitawugcokani, kufanele sicabange kutsi indlela lesibukeka ngayo itawubatsintsa njani labanye. Kufanele sente konkhe lesingakwenta kuze singabakhubi labanye, kunaloko, ‘sentele makhelwane wetfu lokuhle futsi simakhe.’—Fundza KubaseRoma 15:1, 2.
3. Indlela lesibukeka ngayo ingabasita njani labanye bafune kufundza ngaJehova?
Setama kugcoka kahle ngaso sonkhe sikhatsi, kodvwa sinaka kakhulu lapho siya emihlanganweni yelibandla nobe nasiya emsebentini wekushumayela. Asifuni kutsi bantfu bangatinaki tindzaba letimnandzi ngenca yendlela lesibukeka ngayo. Kunaloko, indlela lesibukeka ngayo kufanele yente bantfu bafune kuva liciniso, futsi ihlobise “imfundziso yeMsindzisi wetfu.”—KuThithusi 2:10.
CHUBEKA UFUNISISA
Tfola kutsi singaciniseka njani kutsi indlela lesigcoka ngayo nalesitilungisa ngayo itawusita labanye babone kutsi singemaKhristu.
Indlela lesibukeka ngayo ingakhombisa kutsi siyabahlonipha bantfu labasemagunyeni. Ngisho nobe Jehova akhona kubona lokusetinhlitiyweni tetfu, indlela lesibukeka ngayo kufanele ikhombise kutsi siyamhlonipha
4. Nasibukeka kahle sikhombisa kutsi siyamhlonipha Jehova
Ngusiphi sizatfu lesibaluleke kakhulu lesisenta sinake indlela lesibukeka ngayo? Fundza Tihlabelelo 47:2, bese nicoca ngalemibuto:
Ngusiphi sincumo lokufanele sisente ngedlela lesigcoka ngayo nasikhumbula kutsi itsintsa umbono bantfu labanawo ngaJehova?
Ucabanga kutsi kubalulekile yini kunaka indlela lesibukeka ngayo nasiya emihlanganweni nobe emsebentini wekushumayela? Yini lekwenta usho njalo?
5. Singatenta njani tincumo letikahle nakutiwa endzabeni yekugcoka nekutilungisa?
Kunobe ngabe ngusiphi simo lesititfola sikuso, kufanele siciniseke kutsi timphahla tetfu tiyafaneleka futsi tihlobile, ngisho nome tidulile nome tingakaduli. Fundza 1 KubaseKhorinte 10:24 na-1 KuThimothi 2:9, 10, bese nicoca ngekutsi kungani kungakafaneli sigcoke timphahla . . .
letite sizotsa naletingakahlobi.
letimpintjako, letiveta umtimba nobe letenta bantfu babe nemicabango lemibi.
Ngisho nobe emaKhristu angekho ngaphansi kweMtsetfo waMosi, angafundza lokunyenti kuwo ngendlela Jehova lacabanga nayo. Fundza Dutheronomi 22:5 bese nicoca ngalombuto:
Kungani kufanele siyibalekele indlela yekugcoka nekutilungisa leyenta emadvodza abukeke njengebafati nebafati babukeke njengemadvodza?
Fundza 1 KubaseKhorinte 10:32, 33 na-1 Johane 2:15, 16, bese nicoca ngalemibuto:
Kungani kufanele sibe nendzaba kutsi indlela lesigcoka ngayo iyabakhuba yini labanye emmangweni lesihlala kuwo nobe ebandleni?
Ngutiphi titayela tekugcoka letivamile endzaweni lohlala kuyo?
Ucabanga kutsi letinye taletitayela tingamfanela yini umKhristu? Kungani usho njalo?
Singagcoka siphindze sitilungise ngetindlela letehlukahlukene, ngesikhatsi lesifanako sibe sijabulisa Jehova
LABANYE BANTFU BATSI: “Nginelilungelo lekugcoka nobe ngabe yini lengiyifunako.”
Uyavumelana yini naloko? Leni?
LOKO LESICOCE NGAKO
Nasiyikhetsa kahle indlela lesibukeka ngayo sikhombisa kutsi siyamhlonipha Jehova kanye nalabanye.
Yini Loyifundzile?
Yini leyenta indlela lesigcoka ngayo nalesitilungisa ngayo ibaluleke kuJehova?
Ngutiphi letinye timiso lokufanele tisicondzise nasenta tincumo endleleni lesibukeka ngayo?
Indlela lesibukeka ngayo ingawutsintsa njani umbono walabanye ngekukhonta kweliciniso?
LOKUNYE LONGAKUHLOLA
Buka kutsi yini labanye labayicabangako nababuka indlela logcoke ngayo.
Kukuhlakanipha kucabangisisa ngemiphumela ngaphambi kwekutsi wente i-tattoo.
“Litsini LiBhayibheli Ngema-Tattoo?” (Sihloko lesiku-internet)
Cabanga ngaletinye timiso letingasisita sente tincumo.
“Indlela Logcoka Ngayo Iyamkhatimulisa Yini Nkulunkulu?” (Sicongosekulindza saSeptember 2016)
Yini leyasita lowesifazane lofuna kujabulisa Nkulunkulu kutsi emukele indlela labanye labakhetsa kugcoka ngayo?
“Dress and Grooming Was My Stumbling Block” (Phaphama!, yaDecember 22, 2003 letfolakala ngesiNgisi)