Kungaticondzi Tindzaba Letitsite Letisebhayibhelini

Intfombatanyana beyibuke intfutfu lenyenti lebeyiphuma efemini ikhuphuka yenta intfo lebukeka njengemafu. Yaphetsa ngekutsi umsebenti walefemu kwenta emafu. Kungakuhlekisa kubona indlela lomntfwana ladideke ngayo. Nobe kunjalo, kungacondzi tintfo letinkhulu kungabanga tinkinga ekuphileni kwetfu. Asesibekise, kuwufundza kabi umbhalo ebhodleleni lemitsi kungaba nemiphumela lebuhlungu.

Kungativa kahle tindzaba letiseBhayibhelini kungaba kubi kakhulu. Nasi sibonelo, labanye bantfu abazange baticondze tintfo Jesu labetifundzisa. (Johane 6:48-68) Esikhundleni sekutsi bafundze lokunyenti, bakufulatsela konkhe Jesu labekufundzisa. Balahlekelwa kakhulu!

Uyalifundza yini liBhayibheli kute likucondzise? Wenta kahle kakhulu nawenta njalo. Kepha ikhona yini ingoti yekutsi loko lokufundzako ukuve kabi? Loko kuvamile kubantfu labanyenti. Asewucabange ngetintfo letintsatfu bantfu labavamise kutiva kabi.

• Bantfu labanyenti bavame kuwuva kabi umyalo weliBhayibheli wekutsi kufanele ‘sesabe Nkulunkulu’ weliciniso. Bacabanga kutsi loku kwesaba lokufanana nekwesaba silwane lesiyingoti. (Umshumayeli 12:13) Kepha Nkulunkulu akafuni kutsi labo labamkhontako bative ngaleyo ndlela ngaye. Utsi: “Ungesabi, ngobe mine nginawe; ungajabhi, ngobe mine nginguNkulunkulu wakho. Ngitakucinisa ngikusite.” (Isaya 41:10) Kwesaba Nkulunkulu kumane nje kusho kumhlonipha ngalokujulile.

• 

  Labanye bantfu abawacondzi kahle lamavi laphefumulelwe latsi: “Konkhe kunesikhatsi sako, . . . Kunesikhatsi sekutalwa nesikhatsi sekufa.” Baphetsa ngekutsi Nkulunkulu ubekele wonkhe umuntfu lusuku latawufa ngalo. (Umshumayeli 3:1, 2) Empeleni, lombhalo ukhuluma ngemjikeleto wekuphila nangekutsi kufa kuyintfo levamile kitsi sonkhe. LiVi laNkulunkulu liphindze lifundzise kutsi tincumo lesitentako tiyabutsintsa budze bekuphila kwetfu. Cabanga nganaku lelikushoko: “Kwesaba Simakadze kwandzisa kuphila kwemuntfu.” (Taga 10:27; Tihlabelelo 90:10; Isaya 55:3) Kanjani? Kuhlonipha liVi laNkulunkulu kutawusenta sibalekele imikhuba lemibi lefana nekudzakwa kanye nekutiphatsa kabi.​—1 Khorinte 6:9, 10.

• Labanye bawatsatsa njengobe anjalo emavi eliBhayibheli latsi emazulu nemhlaba ‘agcinelwe umlilo,’ bese baphetsa ngekutsi Nkulunkulu utayibhubhisa leplanethi lengumhlaba. (2 Phetro 3:7) Kepha Nkulunkulu wetsembisa kutsi angeke avumele leplanethi lengumhlaba kutsi ibhujiswe. Nkulunkulu “wasimisa umhlaba etikwetisekelo tawo, kuze ungatanyatanyiswa, phakadze naphakadze.” (Tihlabelelo 104:5; Isaya 45:18) Nguletintfo letimbi letentekako letitawucedvwa ngalokuphelele kube shengatsi tibhujiswa ngemlilo, hhayi leplanethi yetfu. Ligama lelitsi emazulu lingasho sibhakabhaka, umkhatsi noma indzawo yaNkulunkulu yekuhlala. Konkhe loku ngeke kubhujiswe.

Njengobe ubonile kuletibonelo lesikhulume ngato, esikhatsini lesinyenti bantfu nabafundza liBhayibheli abawacondzi lamanye emavesi. Nkulunkulu angayivumela yini intfo lenjalo kutsi yenteke? Labanye bangatsi: ‘Kube Nkulunkulu abehlakaniphile futsi akwati konkhe, abetasinika incwadzi lebhalwe ngalokucacile kuze iviwe nguwo wonkhe umuntfu. Akakwentanga ngani loko?’ Ake ucabange ngetizatfu letintsatfu letenta bantfu bangaliva kahle liBhayibheli.

1. LiBhayibheli libhalwe ngendlela yekutsi livakale kahle kubantfu labatfobekile nalabanesifiso sekufundza. Jesu watsi kuYise: “Ngikudvumisa embikwebantfu Babe, Nkhosi yemazulu nemhlaba, ngobe letintfo utifihlile kulabahlakaniphile nakulabafundzile, watembulela bantfwana.” (Lukha 10:21) LiBhayibheli libhaleke ngendlela yekutsi umlayeto walo uvakale kahle kuphela kulabo labanendlela lekahle yekucabanga. Bantfu labatigabatisako​—lokungumkhuba walabo labatibona ‘bahlakaniphile futsi bafundzile’—​ngibo bantfu labaliva kabi liBhayibheli. Kodvwa bantfu labafundza liBhayibheli labanesimo sengcondvo lesifana ‘nesebantfwana’, labatfobekile futsi labanesifiso sekufundza, ngibo lababusiswa ngekuwucondza kahle umlayeto weliBhayibheli. Nembala Nkulunkulu ulihlele ngendlela lemangalisako liBhayibheli!

2. LiBhayibheli lentelwe bantfu labafuna lusito lwaNkulunkulu ngebucotfo kute balicondze. Jesu wakhombisa kutsi bantfu bebatawudzinga lusito lolutsite kute bakuve kahle loko labekufundzisa. Bebatalutfola njani lusito lolunjalo? Jesu wachaza watsi: “Umsiti, lokungumoya longcwele, loyo Babe latawutfumela ngeligama lami, utanifundzisa tonkhe tintfo.” (Johane 14:26) Ngako Nkulunkulu usebentisa umoya wakhe longcwele, lokungemandla akhe lasebentako kute asite bantfu bakucondze loko labakufundza eBhayibhelini. Nobe kunjalo, Nkulunkulu akabaniki umoya wakhe bantfu labangalufuni lusito lwakhe, lokwenta kutsi liBhayibheli lingevakali kubo. Umoya longcwele uphindze wente emaKhristu lanelwati kutsi asite labo labafuna kucondza liBhayibheli.​—Imisebenti 8:26-35.

3. Letinye tincenye teliBhayibheli bantfu bangaticondza kuphela nasekufike sikhatsi lesitsite. Asesibekise, umphrofethi Danyela watjelwa kutsi abhale umlayeto lobewutawusebenta esikhatsini lesitako. Ingilosi yatsi kuDanyela: “Danyela, wavalele uze uwashicilele lamavi alencwadzi legocotwako, kuze kube nguleso sikhatsi sekugcina.” Eminyakeni leminyenti leyendlulile bantfu labanyenti bebasolo bayifundza incwadzi yaDanyela, kepha bebangayiva. Ecinisweni, ngisho naye Danyela imbala abengakuva loko lebekubhalwe nguye. Ngekutfobeka watsi: “Ngakuva loko labekukhuluma, kodvwa angizange ngikucondze kutsi kusho kutsini.” Ngekuhamba kwesikhatsi, bantfu bebatasicondza kahle siphrofetho lesabhalwa nguDanyela, kodvwa loko bekutawenteka ngesikhatsi lesifanele lesabekwa nguNkulunkulu. Ingilosi yabese itsi: “Hamba ngendlela yakho, Danyela, ngobe lamavi asavalelwe ashicilelwa, kuyawudzimate kube sikhatsi sekugcina.” Bobani labatayicondza kahle imilayeto yaNkulunkulu? “Kute namunye walababi loyawukuvisisa, kodvwa laba labahlakaniphile bayawukuvisisa kahle.” (Danyela 12:4, 8-10) Ngako Nkulunkulu akakwembuli loko lokushiwo tincenye letitsite teliBhayibheli nasisengakefiki sikhatsi lesikahle.

Kuke kwenteka yini kutsi BoFakazi BaJehova bangalicondzi kahle liBhayibheli ngenca yekutsi kusuke kungakafiki sikhatsi lesifanele? Yebo. Kodvwa kutsite nakufika sikhatsi saNkulunkulu sekutsi ente letinye tintfo tikhanye bha, BoFakazi bebakulungele kwenta tingucuko. Bakholelwa kutsi ngekwenta kwabo kanjalo basuke balingisa baphostoli baKhristu, lebebayilungisa ngekutfobeka indlela yabo yekucabanga nome ngunini lapho Jesu bekayilungisa khona.​—Imisebenti 1:6, 7.

Imibono yalentfombatana lencane mayelana naloko lokukhicitwa ngemafu kungamane nje kube kudideka lokuncane. Noko, loko lokufundziswa liBhayibheli kubaluleke kakhulu kuwe. Umlayeto weliBhayibheli ubaluleke kakhulu kutsi umuntfu angamane atifundzele yena ayedvwana bese uwuva kahle. Ngako-ke yetama kutfola lusito kute ukuve kahle loko lokufundzako. Lufune kulabo labadadisha liBhayibheli ngesimo sengcondvo lesihle, kulabo labetsembele emoyeni waNkulunkulu kute balicondze, nakulabo labacinisekako kutsi siphila emalangeni lapho Nkulunkulu asembulela sonkhe kute sicondze liBhayibheli. Ungangabati kukhuluma naBoFakazi BaJehova noma ufundze lucwaningo lwabo lolutfolakala ku-website letsi jw.org. LiBhayibheli liyasetsembisa: “Nangabe ufuna kucondza . . . , utawutfola nelwati ngaNkulunkulu.”​—Taga 2:3-5.