KGAOLO YA 23

Ho Kolobetswa ke Qeto e Molemo eo o ka e Etsang

Printed Edition

Jesu o ile a re Bakreste ba lokela ho kolobetswa. (Bala Matheu 28:19, 20.) Empa kolobetso ke eng? Hona motho o lokela ho etsang hore a kolobetswe?

1. Kolobetso ke eng?

Lentswe “kolobetso” le tswa lentsweng la Segerike le bolelang ho kenngwa ka hara metsi ka mmele kaofela. Ha Jesu a kolobetswa, o ile a kenngwa ka mmele kaofela ka hara Noka ya Jordane, yaba ‘o tswa ka metsing.’ (Mareka 1:9, 10) Ka tsela e tshwanang, Bakreste ba nnete ba kolobetswa ka hore ba kenngwe ka mmele kaofela ka hara metsi.

2. Kolobetso e bontshang?

Ha motho a kolobetswa, o bontsha hore o inehetse ho Jehova Modimo. Motho o inehela ho Jehova jwang? Pele a kolobetswa, o rapela a le mong mme o bolella Jehova hore o batla ho mo sebeletsa ka ho sa feleng. O tshepisa Jehova hore o tla sebeletsa yena feela le hore ho etsa thato ya hae e tla ba yona ntho ya bohlokwa ka ho fetisisa bophelong ba hae. O etsa qeto ya ho itatola mme o latela mohlala wa Jesu le dithuto tsa hae. (Matheu 16:24) Ha a inehela mme a kolobetswa, o ba le setswalle se matla le Jehova le Bakrestemmoho le yena.

3. Motho o lokela ho etsang pele a kolobetswa?

Pele o kolobetswa ho bohlokwa hore o ithute ka Jehova le hore o be le tumelo e matla ho yena. (Bala Baheberu 11:6.) Ha o ntse o tswela pele ho ithuta ka Jehova mme tumelo ya hao e ba matla, o tla mo rata le ho feta. Ha ho pelaelo hore o tla batla ho bolella batho ba bang ka yena le ho phela ka melao ya hae. (2 Timothea 4:2; 1 Johanne 5:3) Ha motho a ‘tsamaya ka mokgwa o tshwanelang Jehova e le hore a mo kgahlise ka botlalo,’ a ka batla ho nehela bophelo ba hae ho Modimo mme a kolobetswe.—Bakolose 1:9, 10.a

ITHUTE DINTLHA TSE DING

Bona hore na o ka ithutang kolobetsong ya Jesu le hore na o lokela ho etsang hore o itokisetse mohato ona wa bohlokwa.

4. Ho na le ntho eo re ka ithutang yona kolobetsong ya Jesu

Bala Matheu 3:13-17 e le hore o ka ithuta dintlha tse ding ka kolobetso ya Jesu ebe le buisana ka dipotso tsena:

Na Jesu e ne e le lesea ha a ne a kolobetswa?
O ile a kolobetswa jwang? Na o ile a fafatswa feela ka metsi?

Jesu o ile a qala ho etsa mosebetsi wa hae o kgethehileng oo Modimo a neng a mo file wona hore a o etse lefatsheng ha a ne a qeta ho kolobetswa. Bala Luka 3:21-23 le Johanne 6:38 ebe le buisana ka potso e latelang:

Ka mora hore Jesu a kolobetswe, ke mosebetsi ofe o neng o tla pele bophelong ba hae?

5. Ho ka kgoneha hore o kolobetswe

Qalong taba ya ho inehela le ho kolobetswa e ka bonahala e le ntho e thata. Le ha ho le jwalo, o ka tswela pele o ithuta ho fihlela o kgodisehile hore o batla ho etsa qeto ena ya bohlokwa. Bapala VIDEO e le hore o bone batho ba bang ba ileng ba etsa seo.

VIDEO: Ka Moo o ka Bang Motswalle wa Jehova ka Teng (1:11)

Bala Johanne 17:3 le Jakobo 1:5 ebe le buisana ka potso e latelang:

Ke eng e ka thusang motho hore a itokisetse ho kolobetswa?

B. Yena mme eo o a kolobetswa hore ebe Paki ya Jehova mme o kenngwa ka mmele kaofela ka metsing.

Re inehela ho Jehova ka hore re mo bolelle hore re batla ho mo sebeletsa ka ho sa feleng
Ha re kolobetswa, re bontsha batho ba shebileng hore re inehetse ho Modimo

6. Ha re kolobetswa re ba karolo ya lelapa la Jehova

Ha re kolobetswa re ba karolo ya lelapa le momahaneng lefatsheng lohle. Le hoja re tswa dibakeng le ditsong tse sa tshwaneng, kaofela ha rona re dumela ntho e tshwanang mme re phela ka melao e tshwanang. Bala Pesaleme ya 25:14 le 1 Petrose 2:17 ebe le buisana ka potso e latelang:

Kolobetso e ama setswalle sa rona le Jehova le setswalle sa rona le batho ba mo sebeletsang jwang?

Ditshwantsho: Moradiwabo rona ya kolobeditsweng o thabile ha a nahana ka moo a utlwanang le ba bang ka phuthehong. 1. O bolella moradiwabo rona ka moo a ikutlwang ka teng. 2. O thusa moradiwabo rona ya hodileng ho tsamaya. 3. O ja le metswalle e nang le dilemo tse sa tshwaneng. 4. O bua le Ntate ka molaetsa wa Bibele a thuswa ke moradi e mong wabo rona. 5. O inka senepe le Dipaki tse pedi tsa merabe e sa tshwaneng kopanong.

BATHO BA BANG BA RE: “Ha ke eso ikemisetse ho kolobetswa.”

Haeba le wena o ikutlwa jwalo, na o nahana hore ho na le nako eo ka yona o tla batla ho kolobetswa?

KAKARETSO

Jesu o ile a ruta hore Bakreste ba lokela ho kolobetswa. Empa pele motho a kolobetswa, o lokela ho ba le tumelo e matla ho Jehova, a phele ka melao ya hae mme a inehele ho yena.

Re Ithutileng?

Kolobetso ke eng mme ke hobaneng ha e le bohlokwa?
Ha motho a kolobetswa o bontshang?
Ke eng seo motho a lokelang ho se etsa pele a inehela le ho kolobetswa?

Re qetile kgaolo ka la:

Seo o ka se Etsang

Hlahloba lethathamo le qetellong ya Karolo ya 4 le nang le sehlooho se reng: “Na ke se ke Itokiseditse ho Ruta Bibele le Phutheho?” le “Na ke Itokiseditse ho Kolobetswa?,” e le hore o bone hore na o se o loketse ho kolobetswa.

Ntho e nngwe:

Ntho e nngwe

BATLA

Ithute hore na kolobetso ke eng le hore na ha se eng.

“Kolobetso ke Eng?” (Sehlooho se websaeteng)

Hlahloba dintho tseo motho a ka di etsang e le hore a kolobetswe.

“O Tla Susumelletswa ho Kolobetswa ha o Rata Ebile o Ananela Jehova” (Tora ya ho Lebela, March 2020)

Hlokomela hore na ntate e mong o ile a thuswa keng hore a kolobetswe.

“Ba ne ba Batla Hore ke Iponele Seo e Leng Nnete” (Molula-Qhooa, February 1, 2013)

Ithute hore na hobaneng ha ho kolobetswa e le ntho ya bohlokwa eo o ka e etsang le hore na o ka itokisetsa yona jwang.

“Na ke Lokela ho Kolobetswa?” (Dipotso Batjha Baa Botsa—Dikarabo Tse Sebetsang, Buka ya 2, kgaolo ya 37)

a Haeba motho a ile a kolobetswa bodumeding bo bong, o tla lokela ho kolobetswa hape. Hobaneng? Hobane bodumedi boo bo ne bo sa rute nnete e ka Bibeleng.—Sheba Liketso 19:1-5 le Kgaolo ya 13.