Buka ea Pele ea Likronike

5 Bana ke bara ba Rubene+ letsibolo la Iseraele. Kaha Rubene o ile a robala le serethe* sa ntate oa hae,*+ tokelo ea hae ea ho ba letsibolo e ile ea fuoa bara ba Josefa mora oa Iseraele. Kahoo, o ne a sa ngolisoa e le letsibolo lelokong la habo.+ 2 Leha Juda+ a ne a phahametse bana babo ’me eo e neng e tl’o ba moeta-pele+ a ne a tl’o hlaha ho eena, tokelo ea letsibolo e ne e le ea Josefa. 3 Bara ba Rubene letsibolo la Iseraele e ne e le Hanoke, Palu, Hezrone le Karmi.+ 4 Mora oa Joele e ne e le Shemaia, mora oa Shemaia e le Gogo, mora oa Gogo e le Shimei, 5 mora oa Shimei e le Mikea, mora oa Mikea e le Reaia, mora oa Reaia e le Baale 6 ’me mora oa Baale e le Bera, eo Morena Tilgathe-pilnesere+ oa Asiria a ileng a mo isa botlamuoeng. E ne e le khosana ea Barubene. 7 Bana babo ka malapa a bona ba ngolisitsoeng ka maloko le ka masika a bona e ne e le Jeiele e leng hlooho, Zakaria 8 le Bela mora oa Azaze mora oa Shema mora oa Joele, ea neng a lula Aroere+ le ho ea fihla Nebo le Baale-meone.+ 9 Ka bochabela o ne a lula ho ea fihla qalong ea lefeella nokeng ea Eufrate+ hobane liphoofolo tsa bona li ne li se li le ngata naheng ea Gileade.+ 10 Mehleng ea Saule, ba ile ba loantša Bahagare ’me ba ba hlola eaba ba lula litenteng tsa bona naheng eohle e ka bochabela ho Gileade.

11 Litloholo tsa Gade li ne li lula haufi le bona naheng ea Bashane ho ea fihla Salka.+ 12 Naheng ea Bashane, Joele e ne e le hlooho, Shafame e le oa bobeli ’me ho ne ho boetse ho e-na le Janai le Shafate. 13 Bana ba bo bona e ne e le Mikaele, Meshulame, Sheba, Jorai, Jakane, Zia le Ebere, kaofela e le ba supileng. 14 Bana e ne e le bara ba Abikaile mora oa Huri, mora oa Jarooa, mora oa Gileade, mora oa Mikaele, mora oa Jeshishai, mora oa Jahdo, mora oa Buze. 15 Aki mora oa Abdiele mora oa Guni e ne e le hlooho ea lelapa la bo-ntate ba bona. 16 Ba ne ba lula Gileade,+ Bashane+ le metseng e haufi le eona* le makhulong ’ohle a Sharone ho ea fihla moo a fellang teng. 17 Kaofela ha bona ba ne ba ngolisitsoe ho ea ka maloko mehleng ea Morena Jothame+ oa Juda le mehleng ea Morena Jeroboame*+ oa Iseraele.

18 Barubene, Bagade le halofo ea leloko la Manase ba ne ba e-na le banna ba matla ba 44 760 lebothong la bona la sesole, ba neng ba tšoara lithebe le lisabole hammoho le liqha ’me ba koetliselitsoe ntoa. 19 Ba loantša Bahagare,+ Jeture, Nafishe+ le Nodabe. 20 Ha ba ne ba loana le bona, Molimo o ile a ba thusa ’me ba hlola Bahagare le bohle ba neng ba e-na le bona. Kaha ba ile ba kopa Molimo hore a ba thuse ntoeng, o ile a araba kopo ea bona hobane ba ne ba mo tšepa.+ 21 Ba ile ba ba nkela liphoofolo tsa bona e leng likamele tse 50 000, linku tse 250 000 le litonki tse 2 000. Ba nka le batho ba 100 000. 22 Molimo o ne a ba loanela.+ Kahoo, ho ile ha bolaoa batho ba bangata eaba ba lula naheng ea bona ho fihlela nakong ea botlamuoa.+

23 Litloholo tsa halofo ea leloko la Manase+ li ne li lula naheng ea Bashane ho ea Baale-hermone, Senire le Thabeng ea Hermone.+ Li ne li le ngata. 24 Tsena e ne e le lihlooho tsa malapa a bo-ntate ba tsona: Efere, Ishi, Eliele, Azriele, Jeremia, Hodavia le Jahdiele. E ne e le banna ba matla ba tummeng ’me e le lihlooho tsa malapa a bo-ntate ba tsona. 25 Empa ha baa ka ba tšepahalla Molimo oa baholo-holo ba bona. Ba ile ba rapela melimo* ea lichaba tsa naha eo+ tseo Molimo a neng a li felisitse. 26 Molimo oa Iseraele a susumetsa Morena Pule oa Asiria+ (e leng Morena Tilgathe-pilnesere+ oa Asiria) hore a nke Barubene, Bagade le halofo ea leloko la Manase a ba ise botlamuoeng Hala, Habore, Har’a le nokeng ea Gozane,+ moo ba ntseng ba le teng ho fihlela kajeno.