Jeremia
24 Eaba Jehova o mpontša libaskete tse peli tsa lifeie* tse behiloeng ka pel’a tempele ea Jehova. O ile a mpontša tsona ka mor’a hore Nebukadnezare* morena oa Babilona a hape Jekonia*+ mora oa Jojakime,+ morena oa Juda hammoho le likhosana tsa Juda, litsebi tsa mesebetsi ea matsoho le batho ba sebetsang ka tšepe.* O ile a ba tlosa Jerusalema a ba isa Babilona.+ 2 Baskete e ’ngoe e ne e tšetse lifeie tse ntle haholo tse kang lifeie tse butsoang pele empa baskete e ’ngoe e ne e tšetse lifeie tse mpe haholo, li le mpe hoo li neng li ke ke tsa jeoa.
3 Eaba Jehova o re ho ’na: “U bona’ng Jeremia?” Ka re: “Ke bona lifeie. Lifeie tse ntle li ntle haholo empa lifeie tse mpe li mpe haholo, li mpe hoo li ke keng tsa jeoa.”+
4 Jehova a re ho ’na: 5 “ ’Na, Jehova Molimo oa Iseraele ke re: ‘Bajuda ba hapiloeng, bao ke ba lelekileng sebakeng sena ho ea naheng ea Bakalde, ke tla ba rata joaloka lifeie tsena tse ntle. 6 Ke tla ba beha leihlo e le hore ke ba etse hantle ’me ke ba khutlisetse naheng ena.+ Ke tla ba haha, nke ke ka ba liha. Ke tla ba hloma, nke ke ka ba fothola.+ 7 Ke tla etsa hore lipelo tsa bona li batle ho ntseba, li tsebe hore ke ’na Jehova.+ E tla ba batho ba ka ’me ke tla ba Molimo oa bona+ etsoe ba tla khutlela ho ’na ka lipelo tsohle tsa bona.+
8 Empa ha e le Tsedekia+ morena oa Juda, likhosana tsa hae, batho ba Jerusalema ba setseng naheng ena le ba lulang naheng ea Egepeta,+ ho ’na ba tla ba joaloka lifeie tse mpe hoo li ke keng tsa jeoa,’+ ke Jehova ea chong. 9 ‘Ke tla ba tlisetsa tlokotsi e mpe hoo mebuso eohle ea lefatše e tla tšoha ha e bona ntho e ba hlahetseng.+ Batho ba tla ba nyefola, ba bue ka bona e le mehlala ea batho ba rohakiloeng,+ ba ba some le ho ba rohaka libakeng tsohle tseo ke tla ba hasanyetsa ho tsona.+ 10 Ke tla ba bolaea ka sabole,+ tlala le lefu la seoa+ ho fihlela ba timela naheng eo ke e fileng bona le baholo-holo ba bona.’”