Jeremia

52 Tsedekia+ o ne a le lilemo li 21 ha e e-ba morena ’me a busa Jerusalema ka lilemo tse 11. Lebitso la ’mè oa hae e ne e le Hamutale+ morali oa Jeremia oa Libna. 2 Tsedekia o ile a etsa lintho tsohle tseo Jojakime a li entseng tse sa thabiseng Jehova.+ 3 Lintho tseo batho ba Jerusalema le Juda ba ileng ba li etsa li ile tsa halefisa Jehova hoo a ileng a ba leleka ka pel’a mahlo a hae.+ Tsedekia a fetohela morena oa Babilona.+ 4 Ka la leshome khoeling ea leshome ha Morena Tsedekia a e-na le lilemo tse robong a busa, Morena Nebukadnezare* oa Babilona a tla le masole ’ohle a hae ’me a hlasela Jerusalema. Ba hloma litente pel’a eona ’me ba haha lerako le e pota-potileng ka hohle ho e thibella.+ 5 Kahoo, motse oa thibelloa ho fihlela Morena Tsedekia a e-na le lilemo tse 11 a busa.

6 Ka letsatsi la borobong khoeling ea bone,+ ho ile ha e-ba le tlala e kholo motseng ’me batho ba ne ba se na lijo naheng eo.+ 7 Qetellong lerako la motse la heletsoa ’me masole ’ohle a baleha motseng bosiu. A tsoa ka keiti e pakeng tsa mabota a mabeli e haufi le serapa sa morena ha Bakalde ba ntse ba pota-potile motse. A ’na a baleha ka tsela ea Araba.+ 8 Empa masole a Bakalde a lelekisa morena, a fumana Tsedekia+ lehoatateng la Jeriko. Masole ’ohle a hae a ne a balehile. 9 A tšoara Morena Tsedekia a mo tlisa Ribla ho morena oa Babilona naheng ea Hamathe eaba oa mo ahlola. 10 Morena oa Babilona a bolaea bara ba Tsedekia ka pel’a mahlo a hae. A bolaela le likhosana tsohle tsa Juda Ribla. 11 Ka mor’a moo, morena oa Babilona a foufatsa Tsedekia,+ a mo tlama ka liketane tsa koporo, a mo tlisa Babilona ’me a mo koalla ho fihlela letsatsing la lefu la hae.

12 Ka letsatsi la leshome khoeling ea bohlano, e leng ha Morena Nebukadnezare* oa Babilona e-na le lilemo tse 19 a busa, Nebuzaradane mookameli oa balebeli ebile e le mohlokomeli oa morena oa Babilona, a tla Jerusalema.+ 13 A chesa ntlo ea Jehova,+ ntlo ea morena* le matlo ’ohle a Jerusalema. A boela a chesa matlo ’ohle a maholo. 14 Masole ’ohle a Bakalde a neng a e-na le mookameli oa balebeli a heletsa marako a neng a pota-potile Jerusalema.+

15 Nebuzaradane mookameli oa balebeli a hapa ba bang ba batho ba futsanehileng, a isa batho bohle ba neng ba setse motseng botlamuoeng. A hapa le ba balehetseng ka lehlakoreng la morena oa Babilona le ba bang kaofela bao e leng litsebi tsa mesebetsi ea matsoho.+ 16 Empa Nebuzaradane mookameli oa balebeli a siea ba bang ba batho ba futsanehileng ka ho fetisisa hore ba sebetse e le balemi ba morara le lihoai tse sebelisoang ka thata.+

17 Bakalde ba pshatla lipilara tsa koporo+ tse neng li le ntlong ea Jehova, literoli+ le Tanka* ea koporo,+ tse neng li le ka tlung ea Jehova ’me ba isa koporo eo eohle Babilona.+ 18 Ba nka le linkho, likharafu, lintho tse timang mollo, likotlolo,+ likopi+ le lintho tsohle tse neng li sebelisoa tempeleng tse entsoeng ka koporo. 19 Mookameli oa balebeli a nka libeisine,+ lipane tsa mollo, likotlolo, linkho, liluloana tsa lebone,+ likopi le likotlolo tse entsoeng ka khauta ea ’nete le silevera ea ’nete.+ 20 Koporo ea lipilara tse peli, Tanka,* ea lipoho tse 12 tsa koporo+ tse neng li le tlas’a Tanka le ea literoli tseo Solomone a neng a li etselitse ntlo ea Jehova, e ne e le ngata hoo ho neng ho sa khonehe hore e methoe.

21 Ha e le lipilara, pilara ka ’ngoe e ne e le bophahamo ba limithara tse robeli,* e ne e ka fasoa ka khoele e bolelele ba limithara tse ka holimonyana ho tse hlano,*+ botenya ba eona e ne e le bophara ba lisenthimithara tse ka bang supa* hape e ne e le sekoti. 22 Hlooho ea pilara e ne e le ea koporo, bophahamo ba hlooho eo e ne e le limithara tse ka holimonyana ho tse peli.*+ Letanta* le likharenate tse neng li khabisitse hlooho li ne li entsoe ka koporo. Pilara ea bobeli e ne e tšoana le pilara ea pele le likharenate li ne li tšoana. 23 Ho ne ho e-na le likharenate tse 96 ka mahlakoreng. Likharenate tsohle tse neng li potolohile letanta li ne li le 100.+

24 Mookameli oa balebeli a boela a nka Seraia+ moprista e moholo, Sofonia+ moprista oa bobeli le balebeli ba bararo ba monyako.+ 25 A boela a nka mookameli a le mong oa lekhotla eo e neng e le mookameli oa masole, metsoalle e supileng ea Morena Tsedekia e neng e le motseng, mongoli oa mookameli oa masole ea neng a bokella masole ha a ea ntoeng le banna ba 60 ba ileng ba fumanoa motseng. 26 Nebuzaradane mookameli oa balebeli a ba nka ’me a ba isa Ribla ho morena oa Babilona. 27 Morena oa Babilona a ba bolaela Ribla+ naheng ea Hamathe. Eaba Bajuda ba tlosoa naheng ea bona baa haptjoa.+

28 Bana ke batho bao Nebukadnezare* a ba hapileng: Ka selemo sa bosupa sa puso ea hae, a hapa Bajuda ba 3 023.+

29 Ka selemo sa bo18 sa puso ea Nebukadnezare,*+ batho ba 832 ba ile ba tlosoa Jerusalema.

30 Ka selemo sa bo23 sa puso ea Nebukadnezare,* Nebuzaradane mookameli oa balebeli a hapa Bajuda ba 745.+

Batho bohle ba neng ba hapuoe ba ne ba le 4 600.

31 Ka selemo sa bo37 Morena Jojakine+ oa Juda a hapuoe, ka letsatsi la bo25 khoeling ea bo12, Morena Evile-merodake oa Babilona a hauhela* Morena Jojakine oa Juda ’me a mo ntša teronkong selemong seo e bileng morena ka sona.+ 32 O ile a mo tšoara hantle ’me a mo hlompha ho feta marena* a mang a neng a hapuoe le eena Babilona. 33 Jojakine a hlobola liaparo tseo a neng a li apara teronkong, a jella tafoleng ea morena kamehla bophelo bohle ba hae. 34 O ne a lula a fuoa lijo tse tsoang ho morena oa Babilona letsatsi le leng le le leng, bophelo bohle ba hae ho fihlela letsatsing la lefu la hae.