Esaia
22 Phatlalatso e tobisitsoeng Khohlong ea Pono:*+
Molato ke’ng ka lona ha le hloeletse marulelong kaofela?
2 U motse o lerata, motse o tletseng boikhohomoso,
U ne u tletse moferefere.
Batho ba hao ba bolailoeng ha baa bolaoa ka sabole
Ebile ha baa shoella ntoeng.+
3 Bahatelli bohle ba hao ba balehile ’moho.+
Ba entsoe batšoaruoa ho sa hlokahale seqha.
Batho bohle ba fumanoeng ba entsoe batšoaruoa+
Le hoja ba ne ba balehetse hole.
4 Ke ka lebaka leo ke itseng: “Khaotsang ho ncheba.
Le se ke la tsitlella ho ntšelisa.
5 Ke letsatsi la morusu, tlholo le pherekano,+
Le tsoa ho ’Musi oa Lintho Tsohle Jehova oa mabotho
Le Khohlong ea Pono.
Lerako lea heletsoa+
’Me ho na le seboko se fihlang thabeng.
Lipere* li tla ema keiting.
8 Lesira* la Juda le tla tlosoa.
Letsatsing leo u tla sheba pokello ea lihlomo tsa Ntlo ea Moru+ 9 ’me u tla bona makhalo a mangata a Motse oa Davida.+ Hape, u tla bokella metsi a letamo le ka tlase.+ 10 U tla bala matlo a Jerusalema ’me u tla heletsa a mang e le ho tiisa lerako. 11 U tla etsa beisine pakeng tsa marako a mabeli bakeng sa ho khakeletsa metsi a letamo la khale empa u ke ke oa tšepa Moetsi oa lona e Moholo ’me u ke ke oa bona Ea le entseng khale.
12 Letsatsing leo, ’Musi oa Lintho Tsohle, Jehova oa mabotho,
O tla batla hore batho ba lle, ba hloname,+
Ba beole lihlooho le ho apara lesela le hoashang.*
13 Empa ho e-na le hoo, ba thabile, ba entse mekete,
Ba hlaba likhomo, ba hlaba linku,
Ba ja nama, ba noa veine.+
Ba re: ‘A re jeng, re noeng hobane hosane re tl’o shoa.’”+
14 Eaba Jehova oa mabotho o senola taba ena: “‘Phoso ena ea lona e ke ke ea tšoareloa ho fihlela le shoa,’+ ke ’Musi oa Lintho Tsohle, Jehova oa mabotho ea chong.”
15 ’Musi oa Lintho Tsohle, Jehova oa mabotho o re: “E-ea ho Shebna+ motsamaisi ea okametseng ntlo ea morena* ’me u re ho eena, 16 ‘Ke eng eo u e thahasellang moo? U thahasella mang moo, hoo u icheketseng lebitla?’ O cheka lebitla la hae moo ho phahameng, o ichekela lebitla* lefikeng. 17 ‘Uena monna, bona! Jehova o tla u tabanya fatše ’me o tla u tšoara ka thata. 18 O tla u phuthela ka thata, a u betsetse naheng e sabaletseng joaloka bolo. U tla shoella moo ’me likariki tsa hao tse hlomphehang li tla fella moo, ba ntlo ea mong’a hao ba soabe. 19 Ke tla u tlosa boemong ba hao, ke u ntše ka ofising ea hao.
20 Letsatsing leo, ke tla bitsa mohlanka oa ka Eliakime+ mora oa Hilkia. 21 Ke tla mo apesa seaparo sa hao se selelele, ke mo tlame ka tieo ka lebanta la hao+ ’me ke fane ka bolaoli* ba hao letsohong la hae. E tla ba ntate oa baahi ba Jerusalema le ba ntlo ea Juda. 22 Ke tla beha senotlolo sa ntlo ea Davida+ lehetleng la hae. O tla bula ’me ha ho na ea tla koala, o tla koala ’me ha ho na ea tla bula. 23 Ke tla mo kokotela joaloka sepekere* sebakeng se tiileng ’me o tla ba joaloka terone ea khanya ho ntlo ea ntate oa hae. 24 Ba tla fanyeha khanya eohle ea ntlo ea ntate oa hae holim’a hae, litloholo le bana,* lijana tsohle tse nyenyane, likotlolo hammoho le linkho tsohle tse kholo.’
25 Jehova oa mabotho o re, ‘Letsatsing leo, ho tla tlosoa sepekere* se kokoteletsoeng sebakeng se tiileng, se tla khaoloa se oe ’me mojaro o holim’a sona o felisoe+ hobane Jehova o buile joalo.’”