Jeremia
21 Jeremia o ile a fumana molaetsa o tsoang ho Jehova nakong eo Morena Tsedekia+ a neng a rometse Pashkure+ mora oa Malkija le Sofonia+ mora oa moprista Maseia ho Jeremia hore ba re: 2 “Re kopa u re botsetse ho Jehova hobane Morena Nebukadnezare* oa Babilona oa re loantša.+ Mohlomong Jehova o tla re etsetsa e meng ea mesebetsi ea hae e hlollang e le hore morena eo a re tlohele.”+
3 Jeremia a re ho bona: “Le tle le re ho Tsedekia: 4 ‘Jehova Molimo oa Iseraele o re: “Ke etsa hore libetsa tsa ntoa tse matsohong a lona li le fetohele, e leng libetsa tseo le loantšang morena oa Babilona+ ka tsona le Bakalde ba ka nģ’ane ho lerako ba le thibeletseng. Ke tla li bokella ka har’a motse ona. 5 Ke tla le loantša ka letsoho la ka,+ matla a ka, ka bohale bo tukang le ka khalefo.+ 6 Ke tla otla baahi ba motse ona, batho hammoho le liphoofolo. Ba tla bolaoa ke lefu le kotsi la seoa.”’+
7 Jehova o boetse o re: ‘Ka mor’a moo, Morena Tsedekia oa Juda le bahlanka ba hae le batho ba motse ona ba phonyohileng lefu la seoa, sabole le tlala, ke tla nehelana ka bona letsohong la Morena Nebukadnezare* oa Babilona, matsohong a lira tsa bona le matsohong a ba batlang ho ba bolaea.+ Morena Nebukadnezare o tla ba bolaea ka sabole. A ke ke a ba utloela bohloko leha e le ho ba qenehela kapa ho ba hauhela.’”+
8 “U re ho sechaba sena: ‘Jehova o re: “Ke beha tsela ea bophelo le tsela ea lefu ka pel’a lona. 9 Batho ba tla sala motseng ona ba tla bolaoa ke sabole, tlala le lefu la seoa. Empa mang kapa mang ea tsoang ’me a inehela ka pel’a Bakalde ba le thibeletseng o tla lula a phela ’me o tla fumana bophelo ba hae e le moputso.”’*+
10 Etsoe ke ikemiselitse ho tlisetsa motse ona* tlokotsi ho e-na le lintho tse molemo.+ O tla oela matsohong a morena oa Babilona+ ’me o tla o chesa ka mollo,” ke Jehova ea chong.+
11 “Lona ba ntlo ea morena oa Juda, mamelang lentsoe la Jehova. 12 Lona ba ntlo ea Davida, Jehova o re:
‘Ahlolang ka toka hoseng ho hong le ho hong,
Le pholose motho ea utsoetsoang letsohong la molotsana+
E le hore khalefo ea ka e se ke ea tuka joaloka mollo+
Eaba e tuka hoo ho se nang motho ea ka e timang
Hobane liketso tsa lona li le khopo.+
13 Ke khahlanong le uena, uena moahi ea lulang khohlong,*
Uena lefika la naha e motsitsa,’ ke Jehova ea chong.
‘Ha e le lona ba reng: “Ke mang ea tla re futuhela?
Ke mang ea tla kena moo re lulang?”
‘Ke tla hotetsa moru oa lona ka mollo.
Mollo oo o tla chesa lintho tsohle tse le potolohileng.’”+