Lengolo le Eang ho Baroma
2 Ho sa tsotellehe hore na u mang,+ ha u na mabaka a ho ikemela ha u ahlola batho ba bang. Haeba u ahlola batho ba bang, oa ikahlola hobane le uena u etsa lintho tse tšoanang.+ 2 Rea tseba hore Molimo o ahlola batho ba etsang lintho tse joalo ’me o ahlola ka toka.*
3 Na u nahana hore u tla phonyoha kahlolo ea Molimo ha u ahlola batho ba tloaetseng ho etsa lintho tseo empa le uena u ntse u li etsa? 4 Kapa u nyatsa hore ebe Molimo o na le mamello+ ebile o mosa haholo?+ Na ha u hlokomele hore ka mosa Molimo o leka ho u thusa hore u bake?+ 5 Empa kaha u manganga ebile ha u batle ho baka, Molimo o tla u halefela. O tla u fa kotlo letsatsing leo ka lona a ahlolang batho ’me o tla ahlola ka toka.+ 6 O tla ahlola e mong le e mong ho ea ka mesebetsi ea hae.+ 7 Ba batlang khanya, tlhompho le bophelo bo ke keng ba fela+ ka ho lula ba etsa lintho tse lokileng, o tla ba fa bophelo bo sa feleng. 8 Empa o tla halefela batho ba ratang likhang, ba sa lateleng ’nete ’me ba tloaetse ho etsa lintho tse fosahetseng.+ 9 Motho e mong le e mong ea etsang lintho tse mpe o tla ba le mahlomola ho sa tsotellehe hore na ke Mojuda kapa ke Mogerike. 10 Molimo o tla fa e mong le e mong ea etsang lintho tse ntle tlotla le khotso. O tla qala ka Mojuda,+ a fetele ho Mogerike.+ 11 Molimo ha a leeme.+
12 Batho bohle ba etsang sebe hobane ba sa tsebe molao ba tla ’ne ba shoe le hoja ba sa ka ba o tseba.+ Ba etsang sebe ba ntse ba tseba molao ba tla ahloloa ka oona.+ 13 Batho ba utloang molao ha se bona bao Molimo a ba nkang ba lokile empa ba phethang molao ke bona ba tla nkoa ba lokile.+ 14 Batho ba lichaba ha ba tsebe Molao oa Molimo+ empa ba etsa lintho tse hlahang Molaong. Le hoja ba sa tsebe Molao oa Molimo, ba na le molao ka lipelong tsa bona. 15 Baa bontša hore litaba tsa molao li ngotsoe ka lipelong tsa bona, le matsoalo a bona aa ba pakela. Ha ba ntse ba nahana, ba khona ho iqosa kapa ho ikemela. 16 Lintho tsena li tla etsahala ha Molimo a ahlola batho a sebelisa Kreste Jesu.+ Lintho tsena tseo ke li buang ke karolo ea litaba tse monate tseo ke li phatlalatsang.
17 Ba bang ba lona le ipitsa Bajuda+ ’me le tšepile molao ebile le ikotla sefuba ka hore le batho ba Molimo. 18 Le tseba thato ea hae ebile le khona ho elelloa lintho tse lokileng hobane le rutiloe Molao.+ 19 Le bua le kholisehile hore le ka khona ho tataisa batho ba foufetseng le be le fe batho ba lefifing leseli. 20 Le nahana hore le ka khalemela batho ba se nang kelello ’me la ruta bana hobane le utloisisa lithuto tsa motheo tsa Molimo le ’nete e tsoang Molaong. 21 Uena ea rutang ba bang, ke hobane’ng ha u sa etse lintho tseo u li rutang?+ U ruta batho ba bang hore ba se ke ba utsoa,+ joale ke hobane’ng ha u utsoa? 22 U ruta batho hore ba se ke ba feba,+ joale u febela’ng? U re u nyonya litšoantšo tse rapeloang, joale ke hobane’ng ha u utsoa thepa ea litempele? 23 U ikotla sefuba ka hore u tseba molao, joale ke hobane’ng ha u tella Molimo ka ho tlola Molao? 24 “Lebitso la Molimo le ntse le rohakoa har’a lichaba ka lebaka la lona” feela joalokaha Mangolo a boletse.+
25 Lebollo+ le molemo haeba feela u mamela molao+ empa haeba u tlola molao, ho tšoana le ha u sa bolla. 26 Haeba motho ea sa bollang+ a etsa lintho tseo Molao o reng li lokile, Molimo o tla mo nka a bolotse.+ 27 Ha molichaba ea sa bollang a mamela Molao, oa bontša hore uena ea tlolang Molao, u molato le hoja u tseba Molao ebile u bolotse. 28 Ho ba Mojuda oa ’nete ha hoa itšetleha ka tsela eo motho a shebahalang ka eona,+ le lebollo ha le amane le ntho e etsoang ’meleng feela.+ 29 Mojuda oa ’nete ke eo e leng eena ka pelong,+ o bololitsoe pelong+ ka moea o halalelang eseng ka Molao.+ Motho eo o rorisoa ke Molimo eseng batho.+