Ho Rarolla Bothata ba Mafutsana

BAETA-PELE ba bang ba bolumeli ba bua ka matla ka mathata a kajeno hoo batho ba ka lumelang hore ba hlile ba tseba kamoo ba ka ntlafatsang lintho. Leha ho le joalo, haeba baeta-pele ba lipolotiki le ba moruo ba hlolehile ho rarolla mathata, na kannete baeta-pele ba bolumeli ba ka etsa ho molemonyana ka ho tšehetsa mekha ea phetohelo lipolotiking?

Baeta-pele ba kereke ba tšehetsa moea oa bona o ba susumetsang, empa ha se e mong le e mong ea kholisehileng ka botšepehi ba bona. Edmund Burke o ngotse: “Ke phoso e akaretsang ho nahana hore batletlebi ba matla ba sechaba ba ka khahlehela katleho ea sona.” Na ho ka etsahala hore baeta-pele ba kereke ba susumetsoe ke likameho ho ena le ho chesehela toka?

Makasine oa Brazil oa Veja oa bolela: “Bonneteng, seo Kereke e se labalabeloang ke matla . . . ’Nete ea hore matlotlo a lefatše a bokelletsoe haholo ho Boprotestanta, Bobuddha, ekasitana le linaheng tse sa lumeleng boteng ba Molimo e susumelletsa Kereke ho leka ho khutlela bolaoling ka thuso ea mafutsana linaheng tse futsanehileng.”

Empa leha ho ka lumeloa hore baruti bao ha ba batle molemo oa botho, na kannete mafutsana a tla fumana molemo ka ho tšehetsa mokha oa tokoloho ea bolumeli o kopanyelletsang lintoa tsa sechaba? Na eo ke tsela ea ho rarolla bothata ba mafutsana?

Mohlala o Behetsoeng Bakreste ba ’Nete

Ke mohlala ofe o behiloeng ke Jesu Kreste, oo Bakreste bohle ba ’nete ba tlamehang ho o etsisa? Ha a ne a le lefatšeng, haa ka a itšunya linchafatsong tsa sechaba leha e le hore o ile a kheloha mosebetsi oa hae oa ho bolella ba bang ka ’Muso oa Molimo. (Luka 4:43; Johanne 6:15) Ekasitana le Mopapa John Paul II, ha a ne a bua ka lintoa tsa sechaba, o hlokometse: “Melaetsa e bontša ka ho hlaka hore ho Jesu, ntho leha e le efe e neng e tla fapanyetsana le mosebetsi oa hae e le Mohlanka oa Yahweh [Jehova] e ne e le teko.”

Sena ha se bolele hore Jesu o ne a sa hlokomele litlhoko tsa mafutsana. O ne a li hlokomela. “A a utloela bohloko,” ho bolela Bibele, “hobane ba ne ba khathetse [kapa ba tlatlapuoa], ba saretsoe joaloka linku tse se nang molisa.” (Matheu 9:36) le a mema bao ba neng ba tla mo latela: “Tloong ho ’na, lōna bohle ba khathetseng, ba imeloang, ’me ke tla le imolla!”—Mattheu 11:28.

Boprofeta ba Bibele bo hlalosa ’Muso oa Kreste: “Hobane o tla boloka ea lesitsi ha a hooa, le ea malimabe ea hlokang mothusi; o tla utloela ea malimabe le mohloki bohloko, a boloke bophelo ba ea lesitsi; o tla ba loela bohorohosong le botubong, mali a bona e be ntho e hlokoang mahlong a hae.”—Pesaleme ea 72:12-14.

Ka lebaka leo bao ba tla etsisa Jesu ba lokela ho ba le lerato le leholo bakeng sa mafutsana ’me ba lokela ho batla ho ba thusa. Empa joang? Kaha Jesu a lumetse hore lefatše la kajeno le tlas’a taolo ea Satane Diabolose, haa ka a leka ho le nchafatsa. (Luka 4:5-8; Johanne 12:31; 14:30; 18:36) Empa o ile a thusa mafutsana ka ho a fa taeo e neng e tla a thusa ho mamella mathata a bophelo.

Jesu o rutile barutuoa ba hae ho ba mahlahahlaha, ka ho etsa joalo ba etsisa eena le Ntate oa hae. O itse: “Ntate o sa sebetsa le joale, le ’na kea sebetsa.” (Johanne 5:17) Hape, balateli ba Kreste ba ile ba laeloa kamoo ba ka hlokomelang bona le malapa a bona ka ho hloeka boitšoarong, ho tšepahala, le ka ho ba mafolofolo mosebetsing. (Ba-Filippi 4:4-8; 1 Ba-Thessalonika 4:11, 12) Empa hona e ne e le feela tokisetsong ea ho hong ho molemonyana: ho amohela litlhohonolofatso tsa ’Muso oa Molimo.

’Muso oa Molimo ke Oona Feela Tharollo

Jesu o ile a hōlisa ’Muso oa Molimo e le ’ona tharollo feela ea sebele le ea ka ho sa feleng ea bothata ba mafutsana le batho bohle. Maikutlo a hao ke afe ka oona? Ke hobane’ng ha babuelli ba mokhatlo oa bolumeli oa tokoloho ba sa bue letho ka ’Muso oa Molimo?

’Nete ke hore, ba lahlile tumelo litšepisong tsa Bibele mabapi le ’Muso oa Molimo. Empa, ha Jesu a ne a ruta balateli ba hae ho rapella hore “muso oa Molimo o tle le hore thato ea hae e etsoe lefatšeng joale ka ha e etsoa leholimong,’ o ne a sa fane ka tšepo ea thetso. Thapelo eo e tla arabeloa. ’Muso oa Molimo ke oa sebele. U ka kholiseha hore Kreste le ka mohla o ne a ke ke a thetsa balateli ba hae ba inehetseng ka ho ba ruta ho rapella ntho e neng e ke ke ea etsahala.—Mattheu 6:9, 10.

Moapostola Petrose o ile a fuoa tokelo ea ho bona ’muso oa leholimo e sa le pele. Sena se etsahetse ha Jesu a ne a fetohela boemong bo khanyang ka pel’a Petrose le baapostola ba bang ba babeli thabeng e telele. Ke ka lebaka leo lilemo tse ngata hamorao Petrose a neng a ka ngola: “Hobane hase ka ho ea ka litšōmo tse entsoeng ka mano re le tsebisitseng matla le ho tla ha Jesu Kreste, Morena oa rōna; empa e le ka hobane re iponetse boholo ba hae ka mahlo a rōna.”—2 Petrose 1:16-18.

Ponong, Petrose ka sebele o bone Kreste a busa ’Musong oo oa Molimo! Petrose o tsoela pele: “Re na le litaba tsa boprofeta [ka ’Muso, ka baprofeta ba kang Esaia le Daniele], tse tiisitsoeng ka ho fetisisa.” (2 Petrose 1:19) Ka mohlala, moprofeta Daniele o tlalehile pono ea ho hlongoa ha Kreste e le Morena ha A ne a “neoa ’muso, le hlompho, le horena.” Daniele o tsoetse pele ka ho re: ” ’Muso oa hae ke ’muso o sa feleng, o ke keng oa feta, borena ba hae bo ke ke ba felisoa.”—Daniele 7:13, 14.

Ke eng seo “boprofeta” bo bolelang hore se tla etsahalla mebuso ea kajeno ea batho ha ’Muso oa Molimo o arabela lithapelo tsa balateli ba Kreste? Mamela boprofeta bo bululetsoeng ho Daniele 2:44: “Empa mehleng ea marena ao [mebuso e teng hona joale], Molimo oa leholimo o tla hloma ’muso o ke keng oa senyeha ka ho sa eeng kae [’Muso oo Kreste a rutileng barutuoa ba hae ho o rapella], ’me borena ba oona bo ke ke ba fetela ho sechaba se seng; o tla robaka o felise mebuso eo kaofela [mebuso ea kajeno ea batho], empa oona o tla ba teng ka ho sa feleng.”

Ka sebele, ’Muso ona oa Molimo ke ’ona tšepo feela ea batho bakeng sa ho rarolla bothata ba mafutsana! ’Nete ke hore, batho ba hloleha ho busa batho ba bang hantle. Histori e senola hore ‘batho ba rena holim’a ba bang ho ba etsa hampe,’ ho sa tsotellehe mofuta oa ’muso oa batho o lekiloeng. Joalokaha Lentsoe la Molimo le bontšitse khale, ha ho ho motho ho ipusa ka ntle ho Molimo.—Moeklesia 8:9; Jeremia 10:23.

Ka lehlakoreng le leng, u ka kholiseha hore litlhohonolofatso tse ngata tse hlalositsoeng ke “boprofeta” ba Esaia li tla phethahala, e leng: “Ba tla haha matlo, ba lule ho ’ona; ba tla hloma merara, ba je litholoana tsa eona. Ba ke ke ba haha matlo, osele a lula teng, leha e le ho hloma merara, osele a je tholoana tsa eona. . . . Ba ke ke ba sebeletsa lefeela, ba ke ke ba tsoala bana, ’me ba lahleheloa ke bona kapele; hobane e tla ba leloko le hlohonolofalitsoeng ke Jehova, ’me bana ba bona ba tla ’ne ba lule le bona. Etlare ba eso ho hooe, ke tla be ke se ke arabile; etlare ba sa bolela, ke tla be ke se ke ba utloile.”—Esaia 65:21-24.

Jehova Molimo a ke ke a sebelisa boiteko leha e le bofe ba batho kapa mekha, ho kopanyelletsa le mokhatlo oa bolumeli oa tokoloho, ho tlisa litlhohonolofatso tsena. Ho ena le hoo, ’muso oa hae oa leholimo o tla nka taolo ’me o kopanye batho bohle ba mamelang, le ho tlisa toka le katleho. Ka baka leo, lula o hopotse ’Muso oa Molimo. O behe pele bophelong ba hao. E, “ho balehela ho Jehova ke molemo o fetisang oa ho itšepela batho.”—Pesaleme ea 118:8; Mattheu 6:33.

[Setšoantšo se leqepheng la 14]

Muso oa Molimo o tla rarolla mathata a mafutsana