Pono ea Bibele

Karolo eo U e Phethang Lithapelong Tsa Hao

ALE lehlakoreng la thaba e okametseng motse, morena ea tšoenyehileng o khefutsa hanyenyane e le ho boha ntlo ea hae ea borena e ntle haholo, motse-moholo o hōlang ka mokhoa o sa tloaelehang, le mahlomola a soabisang a ba ntlo ea hae. Lebotho le leholo la ntoa le bokane ka boroa ’me joale le leba motseng. Balaoli ba ’muso ba phahameng ba koenehile, ’me batho ba bangata ba tšehetsa marabele. A nyahame, morena o etsa thapelo e eang ho Molimo. E le motho ea chesehelang bolumeli ka ho tebileng, kholiseho ea hae e-ea eketseha ea hore Molimo o tla utloa kōpo ea hae e tiileng ’me a nyopise merero ea ba entseng ’momori. Joale, ha a furalla motse oa hae o botle bo khanyang, o theoha thabeng ’me o leba leboea ’nģa ea lefeelleng ka mose ho nōka. Ke eng hape seo a ka se etsang? Joale boemo bo matsohong a Molimo.

Ka mokhoa o tšoanang, kajeno balumeli ba ikokobelitseng ba retelehela ho Molimo ka thapelo ha ba le tsietsing ka kholiseho e tšelisang ea hore ho phaella ho faneng ka tataiso e hlakileng mabapi le ho rapela, Bibele e senola hore Jehova Molimo ke “Moutloi oa thapelo.” (Pesaleme ea 65:2, NW) Rea tiisetsoa hore bohle ba lipelo li tšepahalang ba batlang Molimo ba tla utluoa.

Leha ho le joalo, na tumelo le thapelo li lekane? Re phetha karolo efe phellong ea lithapelo tsa rōna?

Re ka Tlatsetsa Joang?

Morena ea boletsoeng qalong ke Morena Davida oa Iseraele ea boholo-holo. A tobane le ’momori oa mora oa hae Absalome ea tletseng morero oa bolotsana le moeletsi oa hae ea tletseng boikaketsi Akitofele, o ile a khetha ho baleha Jerusalema le ho batla tširelo motseng o lefeelleng o sirelelitsoeng oa Mahanaime o ka lehlakoreng le ka bochabela la Nōka ea Jordane. Mohlomong a imetsoe ke masoabi, ho tepella maikutlo le matšoenyeho, o ile a kōpa Jehova ka matla ka thapelo, a re: “Oho, Jehova, u etse keletso ea Akitofele lefeela.” (2 Samuele 15:11-15, 30, 31) Leha ho le joalo, Davida o ile a etsa ho eketsehileng ho feta ho rapela feela. O ile a tlatsetsa ka tsela ea sebele phellong e atlehileng ea thapelo ea hae. Joang?

Tlatsetso ea hae e ile ea qala nako e telele pele ho liteko tseo a ileng a tobana le tsona. Ka lilemo tse ngata, esita le pele e e-ba morena, Davida o ile a ipaka e le morapeli ea tšepahalang ka ho sa sekisetseng oa Jehova. (1 Samuele 16:12, 13; Liketso 13:22) O ile a ba haufi-ufi le Molimo. Ka hona, ha Davida a le tlas’a teko o ne a e-na le tumelo ea hore Jehova o tla utloa thapelo ea hae ’me a arabele ka tsela e loketseng.

Hoa tšoana le kajeno. Hangata mokhoa o ka sehloohong oa ho tlatsetsa phellong ea lithapelo tsa rōna ke ho latela keletso ea Bibele e le tsela e tloaelehileng ea bophelo. Ho khomarela ka botšepehi joalo melao-motheong e fanoeng ke Molimo ho tsoala kamano e haufi le eena. Ho ba haufi le Molimo tjena le tsela ea tumelo ho lokela ho ba teng pele liteko li qala. Ho lokela ho ba joaloka motheo o matla oo ntlo e lokelang ho hahuoa holim’a oona; o lokela ho ba teng pele ho behoa moaho o boima holim’a oona. Ka hona re ka tlatsetsa—esita le hona joale, pele liteko li fihla—phellong e atlehileng ea lithapelo tsa rōna tse ngata.

Phetha Karolo e Mafolo-folo!

Le hoja e le ’nete hore kamano ea Davida le Molimo e ile ea phetha karolo ea bohlokoa, o ile a boela a hlokomela hore e ke ke ea e-ba moshebelli feela ea sa etseng letho mabapi le ho phethahatsoa ha thapelo ea hae. Ho fapana le hoo, Davida o ile a phetha karolo e mafolo-folo joalokaha ho bonahala khatong e bohlale e ileng ea latela thapelo ea hae.

Har’a metsoalle ea Davida e tšepahalang ka ho sa sekisetseng e ne e le mo-Arke ea bitsoang Hushai. Hushai o ile a kopana le morena ea balehang Thabeng ea Mehloaare. Le hoja Hushai a ne a lakatsa ho tsamaea le Davida ho ea palehong, o ile a ikokobeletsa khothaletso ea Davida ea hore a sale motseng. O ne a lokela ho etsa eka o tšepahala ka ho sa sekisetseng ho Absalome, a leke ho nyopisa keletso ea moeletsi oa lehlaba-phio Akitofele, ’me a tsebise Davida se etsahalang. (2 Samuele 15:32-37) Joalokaha ho lebelletsoe, Hushai o ile a atleha ho hapa tšepo ea Absalome. Joale Jehova o ne a tla kenella.

Akitofele ea masene, le hoja a tletse mano, o ile a hlahisa morero o bohlale. O ile a khothaletsa Absalome hore a mo fe banna ba 12 000 hore a hlasele Davida bosiung bona boo ha a ntse a baleha, a ferekane ’me a ka hlaseleha habonolo—polao e neng e tla tiisa phetohelo e atlehileng! Leha ho le joalo, ka ho makatsang, Absalome o ile a batla keletso ho Hushai tabeng ena. O ile a eletsa Absalome hore a iphe nako ea ho bokella lebotho le leholo la banna, le laoloang ke Absalome ka boeena. Ka tataiso ea Jehova, keletso ea Hushai e ile ea amoheloa. Akitofele, ka ho hlakileng a hlokomela hore ho latela keletso ea Hushai ho ne ho bolela ho hlōloa ka ho feletseng, o ile a khutlela lapeng la hae ’me a ipolaea.—2 Samuele 17:1-14, 23.

Ho ne ho se na pelaelo hore Jehova o arabetse thapelo ea Davida—feela joalokaha a ne a rapetse. Mohlala oa Davida oa ho sebetsa tumellanong le thapelo ea hae o fana ka thuto ea bohlokoa ho bohle ba batlang thuso ea Molimo ka thapelo.

Jehova o Tla Phetha Karolo ea Hae

Ke ’nete hore Jesu o ile a ruta balateli ba hae ho rapella bohobe ba bona ba letsatsi le letsatsi ’me a tšepisa hore haeba ba etelletsa lithahasello tsa Molimo pele, O ne a tla hlokomela litlhoko tsa bona. (Mattheu 6:11, 33) Ka mohlala, haeba motho a hloka mosebetsi, o tlameha ho sebetsa tumellanong le thapelo ea hae bakeng sa ho iphelisa ka ho etsa sohle seo a ka se khonang ho fumana kapa ho iketsetsa mosebetsi.

Ho sa tsotellehe hore na re rapella eng, matla a rōna a ho tlatsetsa phellong a fapana haholo. Ho na le linako tseo ka tsona re ka etsang ho hongata le linako tseo ka tsona re ka etsang ho honyenyane haholo, haeba ho hlile ho e-na le seo re ka se etsang. Ntlha ea bohlokoa hase seo re ka khonang kapa re ke keng ra khona ho tlatsetsa ka sona empa ke hore na re etsa se matleng a rōna kamoo re ka khonang.

Re ka kholiseha hore Jehova o tseba maemo le matla a rōna. O hlokomela ka ho feletseng seo re ka khonang ho se etsa, ’me le ka mohla a ke ke a batla hore re etse seo re ke keng ra khona ho se finyella. Ebang re ka khona ho etsa ho hoholo kapa ho honyenyane haholo, Jehova o tla koala sekheo sa khaello leha e le efe. O ananela le ho tšehetsa boiteko ba rōna ’me o tla sebetsa tumellanong le bona e le ho finyella phello e molemohali bakeng sa bohle ba amehang.—Pesaleme ea 3:3-7.

Ha a le tsietsing, Morena Davida o ne a ka re ka kholiseho: “Poloko e tsoa ho Jehova! Lehlohonolo la hao ha le ke le be holim’a sechaba sa hao.” (Pesaleme ea 3:8) E se eka kholiseho ea rōna matleng a Jehova hammoho le ho tlatsetsa ha rōna ka ho phetha karolo ea rōna, e khōlō kapa e nyenyane, li ka lebisa phellong e atlehileng ea lithapelo tsa rōna.