Bacha Baa Botsa . . .

Nka Etsa Joang Hore ho se Lebelloe Hore ke Tšoane le Ngoan’eso?

“Ke ne ke batla ho ikemela, empa kamehla ke ne ke ikutloa eka ke tlameha ho phela ho latela botumo ba Bo-ausi. Ke ne ke utloa hore nke ke ka finyella lintho tseo Bo-ausi ba li finyeletseng.”—Clare.

NA U na le abuti kapa ausi eo ho bonahalang a atleha nthong e ’ngoe le e ’ngoe? Na batsoali ba hao ba lula ba u khothalletsa hore u tšoane le eena? Haeba ho joalo, u ka ’na ua tšaba hore u tla lula u lebeletsoe hore u tšoane le eena—hore bohlokoa ba hao bo tla lula bo lekanngoa ka hore na u finyeletse hantle hakae seo ngoan’eno a se finyeletseng.

Baholoane ba Barrya ka bobeli ba tsoa sekolong se hlomphuoang haholo sa ho Koetlisetsoa Bosebeletsib ’me ba na le botumo bo botle ba Bokreste. Barry oa lumela: “Ha kea ka ka hlola ke itšepa kaha ke ne ke utloa hore nke ke ka finyella litekanyetso tsa bona mosebetsing oa boboleli kapa ke atlehe joaloka bona ha ke fana ka lipuo. Ke ne ke thatafalloa ke ho iketsetsa metsoalle eo e leng ea ka kaha ke ne ke hohoba feela ka mor’a baholoane ha ba menngoe. Ke ne ke nka hore batho ba mpa ba e-na le botsoalle ho ’na ka lebaka la boemo ba baholoane.”

Ho ithiba hore u se be mōna ha ho bonolo ha u e-na le ngoan’eno eo a rorisoang nako le nako. Mehleng ea Bibele, Josefa e monyenyane o ile a hlahella ho baholoane ba hae. Phello e bile efe ho banab’abo? “Ba qala ho mo hloea, ’me ba ne ba sa khone ho bua ka khotso le eena.” (Genese 37:1-4) Ho hlakile hore Josefa o ne a ikokobelitse. Empa mohlomong ngoan’eno eena a ka ’na a etsa hore u be le moea oa tlhōlisano le ho u hlaba, ka ho lula a u hopotsa ka lintho tseo a li finyeletseng.

Bacha ba bang ha ba le boemong bona ba khetha ho rabela—mohlomong ka boomo ba tlohelle limaraka tsa bona tsa sekolo hore li theohe, ba fokotse ho kopanela mesebetsing ea Bokreste kapa ba itšoare ka tsela e tšosang. Ba ka ’na ba nahana hore haeba ba sitoa ho etsa lintho hantle joaloka banab’abo bona, ho molemo hore ba hle ba tlohele. Empa ha nako e ntse e tsamaea, ho rabela ho tla u utloisa bohloko feela. U ka etsa joang hore ho se lebelloe hore u tšoane le ngoan’eno, ’me e le ka tsela e tla u siea u e-na le seriti?

U se ke Ua ba Nka ba Phahame

Ha u bona tlhokomelo eohle e lebisoang ho ngoan’eno, u ka ’na ua iphumana u se u lumela hore o phethahetse le hore le ka mohla u ke ke ua finyella boemo ba hae. Empa na seo ke ’nete? Bibele ha e hlathe koana le koana ha e re: “Bohle ba entse sebe ’me ba haelloa ke khanya ea Molimo.”—Baroma 3:23.

E, ho sa tsotellehe hore na banab’eno ba na le bokhoni bofe le lineo life, e ntse e le “batho ba nang le mefokolo e tšoanang le eo” re nang le eona. (Liketso 14:15) Ha ho na lebaka la hore u ba phahamise kapa u ba fetole melingoana ea hao. Motho o mong feela ea kileng a beha mohlala o phethahetseng, ke Jesu Kreste.—1 Petrose 2:21.

Ithute ho Itseng ho Bona!

Ntlha e ’ngoe ke hore u leke ho nka boemo boo u leng ho bona e le monyetla oa hore u ithute ho itseng. Ka mohlala, nahana ka barab’abo Jesu Kreste le likhaitseli tsa hae. (Matheu 13:55, 56) Nahana feela hore na ba ka be ba ithutile eng ho ngoan’abo bona ea neng a phethahetse! Leha ho le joalo, “ha e le hantle barab’abo ba ne ba sa bontše tumelo ho eena.” (Johanne 7:5) Mohlomong boikhohomoso le mōna li ile tsa fetoha tšitiso tumelong ea bona. E bile barab’abo Jesu ba moea—barutuoa ba hae—ba ileng ba arabela ha a ba mema ka bolokolohi a re: ‘Ithuteng ho ’na.’ (Matheu 11:29) E bile feela ka mor’a hore Jesu a tsosoe bafung moo barab’abo ba nama qetellong ba ileng ba hlokomela hore na ba ka be ba ithutile hakaakang ho Jesu. (Liketso 1:14) Ho fihlela ka nako eo, ba ne ba lahlehetsoe ke menyetla e mengata e metle eo ka eona ba ka beng ba ithutile ho mor’abo bona ea neng a ikhetha.

Kaine o ile a etsa phoso e tšoanang. Moen’ae, Abele, e ne e le mohlanka ea ikhethang oa Molimo. Bibele e re, ‘Jehova o ile a talima Abele le nyehelo ea hae ka mokhoa o bontšang kamohelo.’ (Genese 4:4) Leha ho le joalo, ka mabaka a itseng, Molimo “ha aa ka a talima Kaine le nyehelo ea hae ka mokhoa leha e le ofe o bontšang kamohelo.” Kaine a ka be a ile a bontša boikokobetso ’me a ithuta ho moen’ae. Empa ho e-na le hoo, “Kaine a tuka ke bohale” ’me a qetella a bolaile Abele.—Genese 4:5-8.

Hase hore u tla qetella u le bohale ba mofuta oo ho ngoan’eno. Empa le uena u ka fetoa ke menyetla e babatsehang haeba u lumella boikhohomoso le mōna hore li u fifatse. Haeba u e-na le ngoan’eno ea ipabolang thutong ea lipalo le ea histori, ea thellang feela papaling e itseng eo u e ratang haholo, a tseba Mangolo ka mokhoa o ikhethang kapa a etsa hantle ha a fana ka puo, u lokela ho loantša ho ba mōna! Etsoe “mōna o bolisa masapo.” (Liproverbia 14:30; 27:4, Bibele ea Sesotho) Ho e-na le hore u hlabehe, leka ho ithuta ho ngoan’eno. Amohela taba ea hore o na le lineo kapa bokhoni boo u se nang bona. Lemoha tsela eo ngoan’eno a etsang lintho ka eona—kapa ho molemo le ho feta, u hle u mo kōpe hore a u thuse.

Barry ea boletsoeng pejana o ile a rua molemo mehlaleng e metle ea baholoane ba hae. O re: “Ke ile ka bona kamoo baholoane ba ka ba thabileng kateng kaha ba ne ba rata ho thusa batho ka phuthehong le mosebetsing oa boboleli. Kahoo, ke ile ka etsa qeto ea ho latela mohlala oa baholoane, ’me ke ile ka kopanela mosebetsing oa kaho ea Liholo Tsa ’Muso le Bethele. Phihlelo eo ke e fumaneng e entse hore ke itšepe hape e nthusitse ho hōlisa kamano ea ka le Jehova.”

Ho Fumana Seo U Ipabolang ka Sona

Mohlomong u tšaba hore ho etsisa litšoaneleho tse ntle tsa ngoan’eno ho tla bolela ho lahleheloa ke botho ba hao. Empa ha ho hlokahale hore ho be joalo. Moapostola Pauluse o ile a khothalletsa Bakreste ba lekholong la pele la lilemo: “E-bang baetsisi ba ka.” (1 Bakorinthe 4:16) Na see se ne se bolela hore Pauluse o ne a batla hore ba lahle botho ba bona? Le hanyenyane. Ho na le menyetla e mengata ea hore botho ba batho bo fapane. Taba ea hore ha u seithuti se ipabolang thutong ea lipalo joaloka ngoan’eno ha e bolele hore u na le bofokoli. Empa e bontša feela hore le fapane.

Pauluse o fana ka keletso ena e sebetsang: “E mong le e mong a ke a leke seo mosebetsi oa hae o leng sona, joale o tla ba le sesosa sa thabo e khaphatsehang mabapi le eena a le mong, eseng ka ho ipapisa le motho e mong.” (Bagalata 6:4) Ke hobane’ng ha u sa ntlafatse litsebo tse ikhethang tseo u nang le tsona le bokhoni ba hao? Ho ithuta puo e ’ngoe, ho bapala seletsa sa ’mino, kapa ho tseba ho sebelisa k’homphieutha ho ka u thusa hore u be motlotlo ka uena, hape ho ka ’na ha etsa hore u be le tsebo ea bohlokoa. U se ke ua khathatseha ka ho etsa lintho ka tsela e phethahetseng! Ithute ho etsa lintho ka tsela e tsoileng matsoho, ho ba hlokolosi le ho ba ea nang le bokhoni. (Liproverbia 22:29) Ka tlhaho u ka ’na ua se sekamele nthong e itseng, empa Liproverbia 12:24 e re “matsoho a ba khothetseng a tla busa.”

Leha ho le joalo, ntho eo ka ho khetheha u batlang ho e ntlafatsa ke bomoea ba hao. Tsebo ea lintho tsa moea ke ea bohlokoa ho feta hōle lineo leha e le life tse ka hapang thahasello ea ba bang. Nahana ka Esau le Jakobo ba mafahla. Esau o ile a rorisoa haholo ke ntate oa hae hobane e ne e le “monna ea tsebang ho tsoma, monna oa naheng.” Qalong, e ka ’na eaba ho ne ho le bonolo ho hlokomoloha mor’abo, Jakobo, kaha e ne e le “monna ea sa tšoauoeng phoso, ea lulang litenteng.” (Genese 25:27) Esau o ile a hlōleha ho hōlisa bomoea ba hae ’me a lahleheloa ke litlhohonolofatso. Jakobo o ile a hlaolela lerato la lintho tsa moea ’me Jehova a mo hlohonolofatsa haholo. (Genese 27:28, 29; Baheberu 12:16, 17) Re ithuta’ng ho see? Hōlisa bomoea ba hao, ‘leseli la hao le ke le khanye’ ’me “tsoelo-pele ea hao e [tla] bonahala ho batho bohle.”—Matheu 5:16; 1 Timothea 4:15.

Clare ea boletsoeng pejana o re: “Ke ne ke khotsofaletse ho etsisa bo-ausi ba ka feela. Empa joale ka etsa qeto ea ho latela keletso ea Mangolo ea hore ke ‘atolohe’ leratong. Ke ile ka sebetsa tšebeletsong ea tšimo le batho ba fapaneng ka phuthehong, ’me ka batla mekhoa e sebetsang ea ho thusa ba hlokang ka phuthehong. Ke ile ka boela ka memela bara le barali beso ba lilemo tse sa tšoaneng lapeng ’me ka ba phehela. Hona joale ke thabela ho ba le metsoalle e mengata e sa tšoaneng, ’me ke batla ke itšepa haholoanyane.”—2 Bakorinthe 6:13.

Nako le nako, batsoali ba hao ba ka ’na ba oela bofokoling ba ho u bolella hore u leke ho tšoana le khaitseli ea hao kapa ngoan’eno. Empa, ho lemoha hore batsoali ba hao ba u batlela se molemo ho ka fokotsa bohloko. (Liproverbia 19:11) Leha ho le joalo, ho ka ba molemo hore u bolelle batsoali ba hao ka tlhompho hore na u ikutloa joang ha ba u bapisa le ba bang. Mohlomong ba tla leka ho fumana litsela tse ling tsa ho bontša hore ba amehile ka uena.

Le ka mohla u se ke ua lebala hore Jehova Molimo o tla u ela hloko haeba u mo sebeletsa. (1 Bakorinthe 8:3) Barry o qetella litaba ka ho re: “Ke fumane hore ha ke tsoela pele ke sebeletsa Jehova, ke lula ke thabile kamehla. Hona joale batho ba bona seo ke leng sona ’me ba nthata ke le joalo, joalo feela ka ha ba rata baholoane ba ka.”

[Mongolo o botlaaseng ba leqephe]

[Setšoantšo se leqepheng la 12]

Na hangata tlhokomelo e lebisoa ho ngoan’eno?

[Setšoantšo se leqepheng la 13]

Hōlisa lineo tseo u nang le tsona le lintho tseo u li thahasellang

[Setšoantšo se leqepheng la 13]

‘Leseli la hao le ke le khanye’ ka ho hōlisa tsebo ea hao ea lintho tsa moea