Pono ea Bibele

U ka Hanela Litakatso Tse Fosahetseng Joang?

“Ha ke lakatsa ho etsa se nepahetseng, se sebe se teng ho ’na.”—BAROMA 7:21.

HO FETA moapostola leha e le ofe e mong, mohlomong Pauluse ea qotsitsoeng ka holimo, ke eena ea ileng a sebetsa ka thata ho buella litekanyetso tse phahameng tsa Bokreste. (1 Bakorinthe 15:9, 10) Ho ntse ho le joalo, o ile a lumela se boletsoeng ka holimo ka botšepehi. O bile le ntoa e tsoelang pele pakeng tsa kelello ea hae le litakatso tsa hae tse fosahetseng. Na u kile ua ikutloa ka tsela eo moapostola Pauluse a ileng a ikutloa ka eona? Ka sebele, joaloka libōpuoa tse sa phethahalang, ke mang ho rōna ea e-song ho ka a ikutloa ka tsela e tšoanang?

Ho ba bangata, ho loantšana le litakatso tse fosahetseng ho matla ka ho khethehileng. Ba bang ba loana le litakatso tsa ho khotsofatsa boitšoaro bo bobe ba ho kopanela liphate. Ba bang ba entsoe makhoba ke ho lemalla papali ea chelete, koae, lithethefatsi tse seng molaong kapa tahi. Ha re hlasetsoe ke litakatso tse kotsi le tse litšila, re ka li hanela joang? Ke thuso efe e teng? Na ntoa e khahlanong le litakatso tse fosahetseng e tla ke e fele?

Lerato—Senotlolo sa ho Hanela Litakatso Tse Fosahetseng

Jesu o ile a bua ka melao e ’meli e meholohali Molaong oa Moshe. Oa pele o ne o re: “U rate Jehova Molimo oa hao ka pelo ea hao eohle le ka moea oa hao oohle le ka kelello ea hao eohle.” (Matheu 22:37) Haeba re rata Molimo ka tsela eo Jesu a itseng re lokela ho mo rata ka eona, na ho Mo thabisa ha ea lokela ho ba takatso ea rōna e ka sehloohong? Haeba ho joalo, takatso eo e lokileng e ka re thusa ho loantša esita le litakatso tse fosahetseng tse matla! Ena hase khopolo-taba feela. Bakreste ba limilione ba loana ka katleho le litakatso tse fosahetseng letsatsi le leng le le leng. U ka hlaolela kamano e matla joalo le Molimo joang? Ka ho thuisa ka kananelo ka molemo oa hae joalokaha o bonoa pōpong ea hae, ka Bibeleng le litšebelisanong tsa rōna le eena.—Pesaleme ea 116:12, 14; 119:7, 9; Baroma 1:20.

Molao oa bobeli o moholohali oo Jesu a o qotsitseng e ne e le o reng: “U rate moahelani oa hao joalokaha u ithata.” (Matheu 22:39) Moapostola Pauluse o itse lerato “ha le itšoare ka mokhoa o sa hlompheheng” hape “ha le batle lithahasello tsa lona.” Kahoo lerato le joalo le se nang boithati le re thusa ho qoba boitšoaro leha e le bofe bo tla ntša ba bang kotsi. (1 Bakorinthe 13:4-8) Le ka hlaoleloa joang? Ka ho ipeha boemong ba ba bang le ka hore ka tieo re amehe ka maikutlo a bona le boiketlo ba bona ba ka ho sa feleng.—Bafilipi 2:4.

Ke Thuso Efe e Fumanehang?

Kaha Molimo oa utloisisa hore na re thatafalloa hakae ho etsa se nepahetseng, o fane ka thuso ka mekhoa e mengata. Ka Lentsoe la hae le ngotsoeng, Bibele, o re ruta ho hloea se sebe le ho mo fa tlhompho e nepahetseng. (Pesaleme ea 86:11; 97:10) Bibele e na le litlaleho tsa bophelo ba sebele tse bontšang phello e kotsi ea ho inehela litakatsong tse fosahetseng. Ho phaella moo, Jesu o itse Molimo o tla re fa moea oa Hae o halalelang, matla a maholohali bokahohleng, haeba re o kōpa. (Luka 11:13) O ka re matlafatsa boikemisetsong ba rōna ba ho rata ho etsa se lokileng. Tokisetso e ’ngoe ke ho tšehetsana le ho khothatsana hoo re ho fumanang ho Bakreste ba bang bao le bona ba hanelang litakatso tse fosahetseng. (Baheberu 10:24, 25) Ha litšusumetso tsena tse ntle li nkela tse fosahetseng sebaka, rea thusoa ntoeng ea rōna ea ho etsa se nepahetseng. (Bafilipi 4:8) Na mokhoa oo o hlile oa sebetsa?

Nahana ka Fidel, ea neng a tsebahala ka hore ke letahoa motseng oa habo. O ne a tsuba koae, a becha hape a loantša ba bang ha a tahiloe. Ho ithuta ha hae Bibele le ho kopanela le Lipaki Tsa Jehova ho ile ha mo thusa ho hlōla mekhoa eo. Hona joale o thabela bophelo bo molemo le mosali oa hae le bana ba bona ba babeli.

E mong a ka ’na a botsa, ‘Empa ho thoe’ng haeba ke khutlela ketsong eo e mpe?’ Moapostola Johanne o ile a bua ka taba eo. O ile a ngola: “Bana ba ka ba banyenyane, ke le ngolla lintho tsena hore le se ke la etsa sebe. Leha ho le joalo, haeba mang kapa mang a etsa sebe, re na le mothusi ho Ntate, e leng Jesu Kreste, ea lokileng. Ke sehlabelo sa poelano bakeng sa libe tsa rōna, empa leha ho le joalo eseng bakeng sa tsa rōna feela empa le bakeng sa tsa lefatše lohle.” (1 Johanne 2:1, 2) E, sehlabelo sa Jesu se koahela liphoso tsa motho ea bakang ’me ka botšepehi a loanela ho etsa liphetoho e le hore a ka thabisa Molimo. Ka lebaka la tokisetso eo, motho a ka ba le lebaka lefe le utloahalang la ho tela ho loanela ho etsa se nepahetseng?

Litakatso Tse Fosahetseng li Tla Hlōloa

Haeba re hōlisa ho rata ha rōna Molimo le moahelani ’me ha re sa na le monyetla, re sebelisa hamolemo thuso ea Molimo, le hona joale re ka atleha ho loantša litakatso tse fosahetseng. Ho feta moo, Lentsoe la Molimo le re tiisetsa hore ntoa ena e ke ke ea tsoela pele ka ho sa feleng. Haufinyane, ba sebelisang litokisetso tsa Molimo tsa moea hamolemo ha ba sa na le monyetla, ba tla phekoloa ka ho feletseng, nameng le moeeng. (Tšenolo 21:3-5; 22:1, 2) Ba tla lokolloa mojarong oa sebe le lefu leo se le bakang. (Baroma 6:23) Ka lehlakoreng le leng, ba ikemiselitseng ho tsoela pele ka litakatso tse litšila le tse kotsi ba tla behelloa ka thōko litlhohonolofatsong tseo.—Tšenolo 22:15.

Ke ho tšelisang hakaakang ho tseba hore re ke ke ra loana le litakatso tse fosahetseng ka ho sa feleng! Li tla tlosoa ka ho feletseng le ka ho sa feleng. Eo e tla ba ntho e khathollang hakaakang!