Ikemisetse ho Rua Moeeng
HORE motho e be morui ho hlokahala hore a etse boiteko. Ho joalo le tabeng ea ho rua moeeng. Mantsoe a builoeng ke Jesu a bontša sena, ha a ne a re: “Le ipolokele matlotlo leholimong.” (Matheu 6:20) Leruo la moea ha le itlele feela. Ho ba le bolumeli ho ke ke ha etsa hore motho e be ea ruileng moeeng, ho tšoana feela le motho ea nang le ak’haonte bankeng, seo ha se mo etse morui. Ho hlaolela ho ba le kamano e haufi le Molimo, ho hōla moeeng le ho ba le litšoaneleho tse ntle tsa moea ho hloka boikemisetso, nako, boiteko bo matla le ho itela.—Liproverbia 2:1-6.
Na U ka ba le Tsona ka Bobeli?
Na motho a ke ke a rua moeeng a ba a ba le botlallo ba lintho tse bonahalang? Ho ka ’na ha e-ba joalo, empa motho a ka atleha ho hahamalla ntho e le ’ngoe feela ho tsena. Jesu o itse: “Le ke ke la ba makhoba a Molimo le a Maruo.” (Matheu 6:24b) Hobane’ng? Hobane ho hahamalla leruo la moea le la lintho tse bonahalang hoa loantšana. E ’ngoe e kena-kenana le e ’ngoe. Ka hona, pele Jesu a bolella barutuoa ba hae hore ba ipolokele leruo la moea, o ile a re: “Khaotsang ho ipolokela matlotlo lefatšeng.”—Matheu 6:19.
Haeba motho a hlokomoloha keletso ea Jesu ’me a leka ho hahamalla leruo la moea le la lintho tse bonahalang, ho tla etsahala’ng? Jesu o itse: “Ha ho eo e ka bang lekhoba la benghali ba babeli; kaha o tla hloea e mong ’me a rate e mong, kapa o tla khomarela e mong ’me a nyelise e mong.” (Matheu 6:24a) Ha motho a li hahamalla ka bobeli, joale lintho tsa moea e ka ba tšitiso, esita le haeba motho a li etsa feela ho itlosa molato. Ho e-na le ho tšepa Molimo, motho a ka ba a tšepa chelete le lintho tseo e li rekang bakeng sa ho sebetsana ka katleho le matšoenyeho a bophelo. Ho joalokaha Jesu a itse: “Pelo ea hao e tla lula e le moo leruo la hao le leng hona teng.”—Matheu 6:21, Today’s English Version.
Mokreste e mong le e mong o lokela ho nahana ka ho teba ka keletso eo ea Bibele pele a etsa qeto ea hore na o tla sebelisa nako ea hae joang, a lebise tlhokomelo ea hae hokae. Taba ea hore Molimo ha a fane ka meeli e tobileng ea hore na Mokreste a ka ba le lintho tse kae ha e bolele hore temoso ea Hae ka meharo ha e tsamaisane le kotlo. (1 Bakorinthe 6:9, 10) Ba hlokomolohang keletso ea Bibele ’me ba ikemisetsa ho rua ba hula ka thata moeeng, kelellong le maikutlong, joalokaha re bone. (Bagalata 6:7) Ka lehlakoreng le leng, Jesu o itse ba elang hloko litlhoko tsa bona tsa moea ba tla thaba. (Matheu 5:3) Ka sebele ’Mōpi oa rōna le Mora oa hae ba tseba se re loketseng hore re thabe re be re be le boiketlo!—Esaia 48:17, 18.
Khetho eo U ke Keng Ua Ikoahlaela Eona
U tla khetha ho hahamalla eng, Molimo kapa maruo? Ke ’nete hore re lokela ho hlokomela lintho tse itseng tseo re li hlokang nameng. Lengolong la pele la Pauluse leo a neng a le ngolla Timothea, o ile a re: “Ka sebele haeba leha e le mang a sa lokisetse hore ho be le lintho tse hlokahalang bakeng sa bao e leng ba hae, ’me haholo-holo bakeng sa litho tsa lelapa la hae, o latotse tumelo ’me o mobe ho feta motho ea se nang tumelo.” Pauluse o ile a boela a khothalletsa Bakreste hore ba behe tšepo ea bona ho Molimo ’me “ba rue mesebetsing e metle,” ho e-na le ho beha tšepo ea bona cheleteng. (1 Timothea 5:8; 6:17, 18) U tla thahasella eng haholo? U tla hahamalla eng? Har’a mesebetsi e metle eo Pauluse a buileng ka eona ke mosebetsi oa ho bolela le ho etsa barutuoa oo Jesu a laetseng barutuoa ba hae hore ba o etse. (Matheu 28:19, 20) Ha Bakreste ba ikhethela ho phela bophelo bo bobebe, eseng hore ba name maoto le ho thabela bophelo, empa ho ba le karolo e eketsehileng mosebetsing ona oa bohlokoa, ‘ba ipolokela ka mokhoa o sireletsehileng motheo o motle bakeng sa ka moso,’ lefatšeng le lecha leo Molimo a le tšepisitseng. Esita le hona joale, ba fumana hore maruo a moea “a molemo hakaakang ho feta khauta!”—1 Timothea 6:19; Liproverbia 16:16; Bafilipi 1:10.
Nahana ka phihlelo ea Eddie, eo litho tsa lelapa labo e ileng ea e-ba Lipaki Tsa Jehova ha a sa le monyenyane. Ka nako e ’ngoe lelapa labo le ile la lahleheloa ke thepa kaofela ’me la tlameha ho siea lehae la lona. Eddie oa hlalosa: “Pele ke ne ke ee ke ipotse hore na ebe ho tla etsahala’ng haeba re ka ba boemong boo re hlokang leha e se e le eng. Joale re ne re le boemong boo. Na ua tseba hore na ho ile ha etsahala’ng? Letho! Re ne re ntse re e-ja, re e-noa ’me re apara. Jehova o ile a re fa lintho tseo re li hlokang, ’me ka mor’a nako maemo a rōna a ile a ntlafala. Phihlelo ena e nthutile hore ke nke tšepiso ea Jesu ka ho teba eo a faneng ka eona ho Matheu 6:33—ea hore haeba re beha ’Muso oa Molimo pele bophelong, ha ho hlokahale hore re tšoenyehe ka lintho tseo re li hlokang nameng.” Kajeno Eddie ke mosebeletsi ea tsamaeang oa nako eohle, eena le mosali oa hae. Ba na le lintho tseo ba li hlokang nameng. Ntho ea bohlokoa haholoanyane ke hore ba ruile moeeng.
Melemo e ke Keng ea Bapisoa le Letho
Ho fapana le matlotlo a lefatšeng ao masholu a ka a utsoang, maruo a moea ke a ka ho sa feleng. (Liproverbia 23:4, 5; Matheu 6:20) Ke ’nete hore katleho ea moea ha e bonahale habonolo. Ha ho bonolo ho bona hore na motho o se a hatetse pele hakae leratong, thabong le tumelong ea hae ho tšoana le khatelo-pele ea hae licheleteng. Empa moputso oa ho rua moeeng o ke ke oa bapisoa le letho. Jesu ha a bua ka barutuoa ba hae ba neng ba tla tlohela matlo a bona le masimo a bona, ke hore mokhoa oa bona oa boipheliso e le hore ba fumane nako ea lintho tsa moea, o ile a re: “Kannete ke re ho lōna, Ha ho ea siileng ntlo kapa barab’abo kapa baralib’abo kapa ’mè kapa ntate kapa bana kapa masimo ka lebaka la ka le ka lebaka la litaba tse molemo ea ke keng a fumana halekholo hona joale nakong ena, matlo le barab’abo le baralib’abo le bo-’mè le bana le masimo, hammoho le mahloriso, ’me tsamaisong ea lintho e tlang a fumane bophelo bo sa feleng.”—Mareka 10:29, 30.
U tla beha eng pele bophelong ba hao? Molimo kapa maruo?
[Setšoantšo se leqepheng la 8]
Na u hahamalla ho rua nameng . . .
[Setšoantšo se leqepheng la 9]
. . . kapa ho rua moeeng?