Pono ea Bibele

Na Molimo o Lokela ho Rapeloa ka Litšoantšo?

“Ke ne ke rutiloe hore litšoantšo li tla etsa hore ke ikutloe ke le haufi le Molimo.”—Mack.

“Ntlo ea rōna e ne e tletse litšoantšo tsa bolumeli. Re ne re nahana hore sena se etsa hore ntlo ea rōna e khahlise Molimo.”—Herta.

“Re ne re khumamela litšoantšo tse itseng. Re ne re sa nahane hore na seo se etsa hore Molimo a ikutloe joang.”—Sandra.

U NAHANA’NG ka lipolelo tsee? Batho ba bangata ba lumela hore litšoantšo li ba thusa hore ba rapele Molimo. Na maikutlo aa a nepahetse? Habohlokoa le ho feta, Molimo o ikutloa joang ka taba ee? Nahana ka seo Lentsoe la hae le ngotsoeng, e leng Bibele e Halalelang le se bolelang ka taba ena.

Kamoo Molimo a Talimang Litšoantšo Tsa Bolumeli

Litšoantšo le matšoao a bolumeli li emela ntho leha e le efe e rapeloang kapa e hlomphuoang ka tsela ea borapeli. Li akarelletsa lifapano, liemahale, lifolakha, kapa ntho leha e le efe ea tse leholimong kapa lefatšeng.a Lifolakha le tsona li ka hlomphuoa ka tsela ea borapeli.

Ho sebelisoa ha lintho tsena borapeling ho qalile lilemong tse likete tse fetileng. Kahoo, ka 1513 B.C.E., ha Molimo a fa sechaba sa Iseraele se sa tsoa thehoa Melao e Leshome, o ile a bolela ka ho hlaka hore na o talima litšoantšo tse sebelisoang borapeling joang. O ile a re: “U se ke ua iketsetsa setšoantšo se betliloeng kapa sebōpeho se tšoanang le ntho leha e le efe e holimo maholimong kapa e tlaase lefatšeng kapa e metsing ka tlas’a lefatše. U se ke ua li inamela kapa ua hlohlelletsoa hore u li sebeletse, hobane ’na Jehova Molimo oa hao ke Molimo ea batlang boinehelo bo khethehileng.”—Exoda 20:4, 5.

Ela hloko lintho tse peli tseo Molimo a li thibelang: Ea pele ke hore batho ba hae ba ne ba sa lokela ho etsa litšoantšo tsa borapeli; ea bobeli, ba ne ba sa lokela ho “li inamela” kapa ho li sebeletsa. Ke hobane’ng ha ’Mōpi oa rōna a thibela batho ho etsa litšoantšo? Lebaka le leng leo batho ba sa lokelang ho etsa litšoantšo tsa Molimo ka lona ke hore “ha ho motho ea boneng Molimo ka nako leha e le efe.” Jehova hase motho oa nama empa ke oa moea ’me o phela sebakeng sa moea. (Johanne 1:18; 4:24) Lebaka le leng leo batho ba sa lokelang ho etsa litšoantšo tsa ntho leha e le efe ka lona ke hore Molimo o batla “boinehelo bo khethehileng.” O re: “Nke ke ka fa e mong khanya ea ka, kapa ka fa litšoantšo tse betliloeng thoriso ea ka.” (Esaia 42:8) Ka lebaka lena, ho boetse ho fosahetse ho etsa setšoantšo e le hore se u thuse ha u rapela. Ha moeta-pele oa Baiseraele ea bitsoang Arone a ne a etsa seo, Jehova o ile a utloa bohloko bo tebileng.—Exoda 32:4-10.

Ke Hobane’ng ha Batho ba sa Lokela ho li Inamela?

Bibele e re ka litšoantšo: “Li na le melomo, empa ha li bue; li na le mahlo, empa ha li bone; li na le litsebe, empa ha li utloe.” E phaella ka ho fana ka temoso ena ea bohlokoa: “Ba li etsang ba tla ba feela joaloka tsona”—ba ke ke ba phela!—Pesaleme ea 115:4-8.

Ho rapela litšoantšo ho boetse ho bontša ho hloka toka. Ipotse, ‘Ke ne ke tla ikutloa joang haeba ke file ngoana oa ka mpho e theko e boima ’me eena a leboha motho eo a sa mo tsebeng kapa a bile a leboha ntho e sa pheleng?’ Sena se ka ’na sa u thusa ho utloisisa hore na ’Mōpi le Monehi-Bophelo oa rōna o ikutloa joang ha ba bang—ho akarelletsa litšoantšo tse se nang bophelo—ba fuoa tlotla e mo tšoanelang le borapeli bo lokelang ho lebisoa ho eena.—Tšenolo 4:11.

Hape ak’u nahane kamoo ho theolang motho seriti kateng—motho ea entsoeng ka setšoantšo sa Molimo—hore ebe o rapela ntho e sa pheleng! (Genese 1:27) Moprofeta Esaia o ile a ngola ka batho ba neng ba etsa sona seo, a re: “Ba inamela mosebetsi oa matsoho a motho, o entsoeng ke menoana ea hae. Motho oa lefatše oa inama, ’me motho oa kokobela, ’me [Jehova Molimo] u ke ke ua khona ho ba tšoarela.”—Esaia 2:8, 9.

Se halefisang Molimo le ho feta ka borapeli ba bohata ke hore ha e le hantle ke borapeli ba bademona—e leng lira tsa Molimo. Deuteronoma 32:17 e re ha Baiseraele ba ne ba furalla Jehova ba rapela litšoantšo, ba ile “ba qala ho etsetsa bademona mahlabelo, eseng Molimo.”

Na balateli ba Jesu Kreste ba pele ba ne ba rapela litšoantšo kapa ba li sebelisa hore li ba thuse ho rapela? Che! Moapostola oa Jesu ea bitsoang Johanne o ile a ngola: “Bana ba banyenyane, le itebele litšoantšong tse rapeloang.” (1 Johanne 5:21) Buka ea Early Church History to the Death of Constantine e re: “E ka ’na eaba ha ho ntho leha e le efe eo barutuoa ba pele ba neng ba e nyonya ho feta borapeli ba litšoantšo.”

Borapeli bo Nepahetseng

Jesu o ile a re: “Barapeli ba ’nete ba tla rapela Ntate ka moea le ka ’nete, etsoe, ka sebele, Ntate o batla ba joalo hore ba mo rapele.” (Johanne 4:23) Molimo o batla hore re mo tsebe—re tsebe lintho tseo a li ratang, tseo a sa li rateng, melao ea hae le seo a re reretseng sona. (Johanne 17:3) Ha e le hantle, lena ke lona lebaka leo a entseng hore Bibele e ngoloe ka lona. (2 Timothea 3:16) Ho phaella moo, kaha Molimo ‘ha a hōle le e mong le e mong oa rōna,’ re ka mo rapela ka nako leha e le efe, sebakeng leha e le sefe, re sa hloke thuso ea litšoantšo tsa bolumeli.—Liketso 17:27.

Sandra, eo ho qotsitsoeng mantsoe a hae pejana, o ile a re: “Ha ke kena ka Holong ea ’Muso ea Lipaki Tsa Jehova, ha kea ka ka bona litšoantšo tsa borapeli. Lipaki li ile tsa mphetlela Bibele tsa mpontša litšobotsi tsa Molimo le lintho tseo a batlang hore li etsoe. Ka tsela eo, ke ile ka ithuta kamoo nka rapelang kateng e le hore Molimo a nkutloe. Hona joale kea tseba hore ke na le tsebo e nepahetseng ka ’Mōpi le hore ke na le kamano e ntle le eena.” Ruri Sandra o ithutile kamoo ’nete ea Bibele e khathollang ebile e lokollang batho kateng. (Johanne 8:32) Le uena u ka ithuta seo.

[Mongolo o botlaaseng ba leqephe]

NA U KILE UA IPOTSA?

◼ Ke hobane’ng ha re lokela ho qoba mefuta eohle ea borapeli ba litšoantšo?—Pesaleme ea 115:4-8; 1 Johanne 5:21.

◼ Molimo oa ’nete o lokela ho rapeloa joang?—Johanne 4:24.

◼ U ka ithuta ’nete ka Molimo joang, hona u ka rua molemo joang?—Johanne 8: 32; 17:3.