“Ka Kōpo, Mamela Lentsoe la Jehova”

1, 2. Hangata batho ba latelang ‘tsela e ratoang’ ba na le maikutlo afe, hona ke hobane’ng ha u lokela ho fapana le bona?

KAJENO batho ba bangata ha ba batle ho mamela. Batho ba bangata ha ba leke feela le hore liqeto tsa bona li itšetlehe ka hore na ke sefe se nepahetseng kapa se fosahetseng. Ho e-na le hoo, tsela eo ba nahanang ka eona e ka akaretsoa ka mantsoe ana, ‘Etsa seo u se batlang’ kapa ‘Etsa eng kapa eng hafeela u ke ke ua kena khathatsong.’ U ka bona sena ha bakhanni ba sa hlomphe matšoao a tsela, bo-ramatsete ba tlōla melao ea lichelete ’me liofisiri tse phahameng li tlōla melao eo e ka ’nang eaba li ile tsa kenya letsoho ha e etsoa. Le mehleng ea Jeremia ho ne ho tloaelehile hore batho ba ithukhubetse joalo “tseleng e ratoang,” le hoja e fosahetse ebile e le kotsi.—Jer. 8:6.

² Ua hlokomela hore batho ba batlang ho khahlisa Molimo ea Matla ’Ohle ha baa lokela hore ba be se ba latela ‘tsela e ratoang’ feela. Taba ea bohlokoa ke hore Jeremia o ile a bontša phapang pakeng tsa ‘ba sa kang ba mamela lentsoe la Jehova’ le ba neng ba batla ho Mo mamela. (Jer. 3:25; 7:28; 26:13; 38:20; 43:4, 7) Re le batho ka bomong, re lokela ho hlahloba hore na maikutlo a rōna ke afe tabeng ena. Hobane’ng? Hobane Satane o hlasela barapeli ba ’nete ba tšepahalang ka tsela e sehlōhō haholo. O tšoana le noha e lulang e khutsitse e laletse phofu ea eona ebe ka ho panya ha leihlo ea e loma ’me e e ntša leqeba le ka ’nang la e bolaea. Ha re ikemiselitse ho mamela lentsoe la Jehova, seo se ka re suthisetsa hōle le noha eo e le hore e se ke ea re loma. Empa re ka matlafatsa boikemisetso ba rōna ba ho mamela Jehova joang? Libuka tseo Jeremia a li ngotseng li ka re thusa.

 3. Ke hobane’ng ha Jehova a lokeloa ke hore re mo mamele?

³ Ke hobane’ng ha Jehova a lokeloa ke hore re mo mamele ka hohle-hohle? Jeremia o bontša lebaka le leng ka hore a re ke “Moetsi oa lefatše ka matla a hae, Ea tiisang ka thata ka bohlale ba hae naha e behang.” (Jer. 10:12) Jehova ke ’Musi oa bokahohle. Ke eena eo re lokelang ho mo tšaba ho feta babusi ba bang kaofela. Ke eena ea nang le tokelo eohle ea ho batla hore re mamele melao ea hae e bohlale, ’me ha e le hantle e tla re tsoela molemo kamehla.—Jer. 10:6, 7.

4, 5. (a) Bajuda ba ile ba ithuta ’nete efe linakong tsa komello? (b) Baahi ba Juda ba ile ba senya “metsi a phelang” a tsoang ho Jehova joang? (c) U ka noa “metsi a phelang” ao Molimo a fanang ka ’ona joang?

⁴ Leha ho le joalo, ho phaella tabeng ea hore Jehova ke ’Musi oa Bokahohle, e boetse ke ’Moloki oa bophelo—oa bophelo ba rōna. Sena se ile sa hlakisetsoa Bajuda ba mehleng ea Jeremia ka tsela e totobetseng. Naha ea Egepeta e ne e itšetlehile haholo ka metsi a nōka ea Nile, empa ho ne ho se joalo Naheng e Tšepisitsoeng. Boholo ba nako, sechaba sa Molimo se ne se itšetlehile ka lipula tse neng li na ka linako tse itseng tsa selemo, ’me hangata metsi a phallang a ne a bokelloa lilibeng tse chekiloeng fatše. (Deut. 11:13-17) Ke Jehova feela ea neng a ka nesa pula hore e ngobetse mobu e le hore o ka beha. Ka lehlakoreng le leng, o ne a ka boela a thiba pula eo batho ba neng ba e hloka. Kahoo, mehleng ea Jeremia, Bajuda ba neng ba sa mamele ba ile ba hlaseloa ke komello ka lilemo tse latellanang ’me e ile etsa hore masimo a bona le lirapa tsa bona tsa morara li che ke letsatsi le liliba tsa bona tsa tlhaho le tse chekiloeng fatše li ome.—Jer. 3:3; 5:24; 12:4; 14:1-4, 22; 23:10.

⁵ Le hoja Bajuda bao ba ne ba nka metsi a sebele e le a bohlokoa, ba ile ba hana “metsi a phelang” ao Jehova a neng a ba fa ’ona ntle ho tefo. Ba ile ba etsa sena ka hore ba tlōle Molao oa Molimo ka boomo ka hore ba tšepe lilekane tseo ba neng ba li entse le lichaba tse neng li ba potolohile. Joaloka batho ba tšelang metsi selibeng se chekiloeng fatše se phatlohileng le se ke keng sa boloka metsi ha a haella, Bajuda ba ile ba kotula litholoana tsa mesebetsi ea bona. (Bala Jeremia 2:13; 17:13.) Ka sebele re na le lebaka la hore re se ke ra itlisetsa tlokotsi ka hore re etse seo ba se entseng. Jehova o ntse a tsoela pele ho re tataisa haholo a sebelisa Lentsoe la hae le bululetsoeng. Ho totobetse hore “metsi [ao] a phelang” a re tsoela molemo haeba feela re ithuta litaba tsa ’ona kamehla re bile re ikitlaelletsa hore re phele ka ’ona.

 6. (a) Hlalosa hore na maikutlo a Morena Tsedekia e ne e le afe ka ho mamela Jehova. (b) Ke hobane’ng ha u nahana hore morena o ne a se bohlale?

⁶ Ha letsatsi la Molimo la hore Juda e ikarabelle le ntse le atamela, ho ile ha e-ba bohlokoa haholo hore batho ba mamele. Bajuda ka bomong ba ne ba lokela ho baka le ho qala ho mamela Jehova e le hore ba mo khahlise a be a ba sireletse. Morena Tsedekia o ne a lokela ho etsa sena. O ne a sa tiea tabeng ea ho etsa se nepahetseng. Ha batho ba ka tlaase ho eena ba ne ba mo bolella hore ba batla ho bolaea Jeremia, ha aa ka a ba sebete sa hore a ba hanyetse. Joalokaha re bone khaolong e fetileng, Jeremia o ile a pholoha tekong eo ea ho mo bolaea a thusoa ke Ebede-meleke ’me hamorao o ile a phehella Tsedekia a re: “Ka kōpo, mamela lentsoe la Jehova.” (Bala Jeremia 38:4-6, 20.) Ho hlakile hore e le hore a itsoele molemo, morena o ne a lokela ho iketsetsa qeto ea hore na o ne a tla mamela Molimo kapa che.

 7. Ke maemong afe moo ho mamela ha hao ho ka ’nang ha lekoa?

⁷ Ho mamela ke taba ea bohlokoa kajeno joalokaha e ne e le ea bohlokoa mehleng ea Jeremia. U ikemiselitse ka matla hakae ho mamela Jehova? Haeba u ne u ka oelana le litšoantšo tse litšila tse tsosang takatso Inthaneteng, na u ne u tla lula u li shebile kapa u ne u tla tsoa ho tsona ’me u loantše maikutlo a hore u li shebe? U tla etsa joang teng haeba motho eo e seng Mokreste a kōpa ho intša le uena, ebang ke mosebetsing kapa sekolong? Na u tla ba le sebete sa ho hana? Na libuka kapa liwebsaete tsa bakoenehi lia u hohela kapa ua li nyonya? Tabeng ena esita le maemong a mang, hopola mantsoe a Jeremia 38:20.

8, 9. (a) Ke hobane’ng ha ho le bohlale ho mamela ha baholo ba leka ho u thusa? (b) U lokela ho nka keletso eo baholo ba lulang ba e pheta joang?

⁸ Hangata Jehova o ne a ee a rome Jeremia ho sechaba sa Hae a se fa keletso e kang ena: “Ka kōpo, furallang, e mong le e mong tsela ea hae e mpe, ’me le etse hore litsela tsa lōna le mesebetsi ea lōna e be metle.” (Jer. 7:3; 18:11; 25:5; bala Jeremia 35:15.) Ka tsela e tšoanang, baholo ba Bakreste kajeno ba etsa sohle seo ba ka se khonang ho thusa balumeli-’moho le bona ba kotsing ea moea. Haeba ka nako e ’ngoe baholo ba u eletsa hore u qobe tsela e seng bohlale kapa e fosahetseng, ba mamele. Sepheo sa bona se tšoana le sa Jeremia.

⁹ Baholo ba ka ’na ba u hopotsa melao-motheo ea Mangolo eo ba seng ba ntse ba u bontšitse eona. Hlokomela hore ha ho mohla ho pheta keletso ho leng bonolo, empa ho etsa joalo ho ba thata le ho feta haeba motho ea hlokang thuso a bontša hore o na le maikutlo a tšoanang le a Bajuda ba bangata ba ileng ba utloa mantsoe a Jeremia. Leka ho nka boiteko ba ho u thusa boo baholo ba bo etsang ka makhetlo, e le tsela eo Jehova a bontšang lerato ka eona. Hape, hlokomela hore ho ka be ho sa ka ha hlokahala hore Jeremia a phete litemoso tsa hae haeba batho ba ne ba ile ba etsa se loketseng. Ka sebele, tsela ea ho qoba hore keletso e lule e phetoa ke ho e sebelisa hang-hang.

10. Ke hobane’ng ha Jehova a sa tšoarele libe a sa inahana?

¹⁰ Tsamaisong ena ea lintho re ke ke ra mamela Jehova ka ho phethahetseng, ho sa tsotellehe hore na re leka ka thata hakae. Kahoo, rea mo leboha ka hore ebe o ikemiselitse ho re tšoarela ha re fosa. Ho ntse ho le joalo, hase hore o tšoarela libe a sa inahana. Hobane’ng? Hobane Jehova o nyonya sebe. (Esa. 59:2) Ka lebaka leo, o batla ho tiisa hore re lokeloa ke hore a re tšoarele.

11. Ke hobane’ng ha ho ke ke ha etsahala hore motho a etse sebe ka lekunutu ebe oa chophola?

¹¹ Joalokaha re bone, Bajuda ba bangata ba mehleng ea Jeremia ba ne ba tloaetse ho se mamele Molimo, kahoo ba ne ba bapala ka mamello le mohau oa hae. Na ebe e mong oa bahlanka ba Molimo kajeno a ka ba le tloaelo e joalo? E, a ka ba le eona, haeba a iphapanyetsa likhopotso tsa Jehova ’me a tloaela ho etsa sebe. Maemong a mang sena se ’nile sa etsahala pepenene, joalokaha motho e mong a kena lenyalong la bofebe. Empa le haeba batho ba bang ba sa bone sebe seo motho a se etsang, motho eo ea sa mameleng Jehova o nkile tsela e kotsi. Motho ea phelang bophelo ba boikaketsi a ka ’na a re, ‘Ha ho na motho ea tla tseba seo ke se etsang.’ Leha ho le joalo, ’nete ke hore Molimo o bona se ka likelellong le lipelong tsa batho ebile o bona le seo ba se etsang sephiring. (Bala Jeremia 32:19.) Ke sefe se lokelang ho etsoa haeba motho a hlile a sitetsoe Molimo?

12. Ka linako tse ling baholo ba tlameha ho etsa’ng e le hore ba sireletse phutheho?

¹² Bajuda ba bangata ba ne ba nyefola thuso eo Jehova a neng a ba fa eona nako le nako ka Jeremia. Ka tsela e tšoanang, kajeno motho ea entseng sebe se tebileng a ka ’na a se ke a baka, a ba a hana thuso ea baholo. Maemong a joalo, baholo ba lokela ho latela tataiso ea Mangolo e le hore ba sireletse phutheho, ka hore ba khaole mofosi. (1 Bakor. 5:11-13; sheba lebokose le nang le sehlooho se reng, “Ho Phela ho se na Molao,” se leqepheng la 73.) Empa na seo se bolela hore ha ho sa na tšepo ka motho eo, ’me Jehova a ke ke a hlola a mo amohela? Che. Le hoja e ne e le khale Baiseraele ba fetohetse Molimo, o ile a ’na a re: “Khutlang, lōna bara ba koenehileng. Ke tla folisa boemo ba lōna ba bokoenehi.” (Jer. 3:22)a Jehova o mema bafosi hore ba khutlele ho eena. Ha e le hantle, o ba laela hore ba etse joalo.

13. Haeba motho a batla ho khutlela ho Jehova, o lokela ho hlokomela eng?

¹³ E le hore motho a khutlele ho Molimo joalokaha Jeremia a bontšitse, o lokela ho ipotsa, ‘Ke entse’ng?’ Joale, a nahanne ka melao-motheo ea Mangolo, o lokela ho amohela karabo e tšepahalang eo a tla e fumana. Bajuda ba neng ba sa bake ba mehleng ea Jeremia ba ile ba qoba ho ipotsa potso eo. Ba ile ba hana ho amohela hore na libe tsa bona li ne li le khōlō hakae, kahoo Jehova o ne a ke ke a ba tšoarela ’me ha aa ka a ba tšoarela. (Bala Jeremia 8:6.) Ho fapana le seo, mofosi ea bakileng oa hlokomela hore ka hore ebe ha aa ka a mamela Jehova, o entse hore lebitso la Molimo le rohakoe hammoho le phutheho ea Bokreste. Motho ea bakileng e le kannete o utloisoa bohloko haholo ke mathata ao e ka ’nang eaba o a baketse batho ba se nang molato. O lokela ho hlokomela hore ke feela ha a amohela hore na liketso tsa hae li bakile mathata a makae moo Jehova a tla mamela ha a kōpa tšoarelo. Leha ho le joalo, ho na le lintho tse ngata tse hlokahalang e le hore motho a boele a amoheloe ke Molimo.

14. Motho o ‘khutlela ho Jehova’ joang? (Akarelletsa le lebokose le nang le sehlooho se reng, “Pako ke Eng?”)

¹⁴ Motho ea bakileng e le kannete o hlahloba sepheo sa hae, litakatso tsa hae le mekhoa ea hae. (Bala Lillo Tsa Jeremia 3:40, 41.) O tla hlahloba hore na ke likarolong life tsa bophelo moo a fokolang teng, mohlomong tabeng ea ho tloaelana le batho ba bong bo fapaneng, tabeng ea ho noa joala kapa ho tsuba koae, tabeng ea ho sebelisa Inthanete kapa ea ho sebetsa litaba tsa hae tsa khoebo. Feela joalokaha ’m’a lelapa a hloekisisa le lik’honeng tse sa bonahaleng ka kichineng ea hae e le hore a boloke lelapa la hae le hloekile, motho ea bakileng le eena o lokela ho sebetsa ka thata hore a hloekise menahano ea hae le liketso tseo a li etsang sephiring. O lokela ho ‘khutlela ho Jehova’ ka hore a etse lintho tseo Molimo a li lebeletseng le hore a phele tumellanong le melao-motheo ea Hae. Bajuda ba bang ba mehleng ea Jeremia ba ile ba khutlela ho Jehova “ka bohata.” Ba ne ba iketsa eka ba bakile empa ha ho mohla ba ileng ba fetola lipelo tsa bona kapa bophelo ba bona. (Jer. 3:10) Ho fapana le bona, motho ea batlang tšoarelo e le kannete ha a leke ho thetsa Jehova hammoho le phutheho ea Hae. Ho e-na le hore feela a batle ho sireletsa lekoko la hae kapa hore a batle ho boela a thabela botsoalle le beng ka eena kapa batho ba bang ka phuthehong, o batla ho furalla liphoso tsa hae ka hohle-hohle e le hore a tšoanelehe hore Molimo a mo tšoarele a be a mo amohele.

15. Motho ea bakileng e le kannete o rapela Molimo ka lithapelo tsa mofuta ofe?

¹⁵ Thapelo ke karolo ea bohlokoa ea pako. Mehleng ea boholo-holo ho ne ho tloaelehile hore motho a phahamisetse matsoho leholimong ha a rapela. Kajeno, ha motho ea bakileng e le kannete a rapela, o ‘phahamisetsa pelo ea hae hammoho le liatla tsa hae ho Molimo,’ joalokaha Jeremia a boletse. (Lillo 3:41, 42) Ha mofosi a ikoahlaela seo a se entseng, seo se mo thusa hore a etse hore boitšoaro ba hae bo lumellane le kōpo ea hae ea tšoarelo. Lithapelo tsa hae hase tsa boikaketsi, li tsoa botebong ba pelo.

16. Ke hobane’ng ha e le ntho e utloahalang hore motho a khutlele ho Molimo?

¹⁶ Ha ho pelaelo hore ua hlokomela hore ha moetsalibe a amohela liphoso tsa hae e le kannete ho ka ’na ha hlokahala hore a ikokobetse. Empa taba ea bohlokoa ke ena: Jehova o batla hore baetsalibe ba khutlele ho eena. Ha Molimo a bona hore motho o bakile ho tsoa botebong ba pelo, seo se mo susumetsa pelo. Oa ‘lubeha’ ka lebaka la qenehelo hobane o batla ho tšoarela batho bohle ba bakelang libe tsa bona, joalokaha a ile a tšoarela Baiseraele ba neng ba khutla kholehong. (Jer. 31:20) Ruri hoa khothatsa ho tseba hore Molimo o fa batho ba mo mamelang tšepo ebile o ba tšepisa khotso! (Jer. 29:11-14) Ba ka boela ba ba har’a bahlanka ba Molimo ba itetseng.

17, 18. (a) Barekabe e ne e le bo-mang? (b) Joalokaha ho bontšitsoe leqepheng la 77, ba tsebahala ka eng?

¹⁷ Ho mamela Jehova ka hohle-hohle ke tsela e molemo. Re ka bona seo mohlaleng oa Barekabe ba mehleng ea Jeremia. Lilemong tse fetang makholo a mabeli pele ho moo, ntate-moholo oa bona oa Mokene Jonadabe, ea ileng a tšehetsa Jehu ka botšepehi, o ne a ba file melao e ’maloa e ba thibelang ho etsa lintho tse itseng. Molao o mong e ne e le o ba thibelang ho noa veine. Barekabe ba ile ba ’na ba mamela Jonadabe leha e ne e le khale a shoele. E le ha a batla ho bona hore na ba tla etsa joang, Jeremia o ile a ba isa ntlong ea ho jela ka tempeleng eaba o beha veine ka pel’a bona ’me o ba phehella hore ba e noe. Ba ile ba re ho eena: “Re ke ke ra noa veine.”—Jer. 35:1-10.

¹⁸ Barekabe ba ne ba nka ho mamela moholo-holo oa bona eo e neng e le khale a shoele e le taba ea bohlokoa. Barapeli ba Molimo ba ’nete ba lokela ho mamela litaelo tsa Molimo ea phelang, ka mafolofolo le ho feta. Boikemisetso ba Barekabe ba hore ba mamele bo ile ba thabisa Jehova, ’me bo ile ba bontša hore ba ne ba fapane hōle le Bajuda ba neng ba sa mamele. Molimo o ile a tšepisa Barekabe hore o ne a tla ba sireletsa tlokotsing e neng e tla. Ha re sebelisa taba eo ho rōna kajeno, na ha se taba e utloahalang hore ba mamelang Jehova ka hohle-hohle, ba kholisehe hore o tla ba sireletsa nakong ea matšoenyeho a maholo?—Bala Jeremia 35:19.

19. Molimo a ka u sireletsa joang haeba u mo mamela?

¹⁹ Ha rea lokela ho nahana hore Molimo o ne a sireletsa batho ba hae ba nakong e fetileng feela. Le hona joale Jehova o sireletsa batho ba mo mamelang likotsing tsa moea. Feela joalokaha lerako le phahameng le ne le sireletsa metse ea boholo-holo ha e ne e hlaseloa, molao oa Molimo o sireletsa batho ba ithutang oona le ba lulang ba o sebelisa bophelong ba bona. Na u tla lula ka hare ho marako a sireletsang a melao ea Molimo ea boitšoaro? U ka kholiseha hore lintho li tla u tsamaela hantle haeba u etsa joalo. (Jer. 7:23) Ho na le liketsahalo tse ngata tse bontšang hore seo ke ’nete.—Sheba lebokose le nang le sehlooho se reng, “Ho Mamela Jehova Hoa Sireletsa.”

20, 21. (a) Ha u ntse u sebeletsa Jehova u ka kholiseha ka eng? (b) Morena Jojakime o ile a etsa’ng ha a utloa molaetsa oa Molimo oo a neng a o bolelloa ke Jeremia?

²⁰ Ebang ke litho tsa lelapa, basebetsi-’moho le uena kapa bana bao u kenang sekolo le bona, kapa ke ba boholong sebakeng seo u lulang ho sona, bahanyetsi ba etsa hore ho sebeletsa Molimo ho be thata. Leha ho le joalo, u ka kholiseha hore haeba maemong ’ohle u mamela Jehova ka hohle-hohle, o tla u tšehetsa leha u thulana le maemo a thata ka ho fetisisa. U se ke ua lebala hore Molimo o ile a tšepisa Jeremia hore o ne a tla mo matlafatsa ha a ne a thulana le khanyetso e matla ’me Jehova o ile a fela a etsa joalo. (Bala Jeremia 1:17-19.) Tšehetso ea Molimo e ile ea totobala nakong ea Morena Jojakime.

²¹ Ke babusi ba ’maloa ba Iseraele ba ileng ba hanyetsa babuelli ba Molimo ka bohale bo kang ba Jojakime. Re ka bona sena tabeng ea moprofeta Uria oa mehleng ea Jeremia. Morena Jojakime ea khopo o ne a ikemiselitse hore a mo lelekise leha a se a le linaheng tse ling. Ha Uria moprofeta oa Jehova a khutlisoa, morena o ile a mo bolaea. (Jer. 26:20-23) Selemong sa bone sa puso ea Jojakime, Jehova o ile a laela Jeremia hore a ngole mantsoe ’ohle ao A neng a a buile ho fihlela nakong eo le hore a a balle holimo tempeleng. Jojakime o ile a fumana moqolo oa Jeremia ’me a re molaoli oa lekhotla a mo balle oona. Ha a ntse a o balloa, morena o ile a o tabola eaba o lahlela likotoana tsa oona mollong, le hoja likhosana tse ling li ile tsa mo phehella hore a se ke a etsa joalo. Ka mor’a moo o ile a romela banna hore ba e’o tšoara Jeremia le Baruke. Ho ile ha etsahala’ng? “Jehova a ba boloka ba patiloe.” (Jer. 36:1-6; bala Jeremia 36:21-26.) Jehova ha aa ka a lumella Jojakime hore a ntše banna bao ba babeli ba tšepahalang kotsi.

22, 23. Se etsahetseng ho Paki e ’ngoe ea Asia bohareng se u bontša eng ka tšehetso eo Molimo a fanang ka eona?

²² Haeba Jehova a bona ho hlokahala, a ka pata le bahlanka ba hae ba kajeno hore ba se ke ba hlaheloa ke kotsi. Empa hangata, o ba fa sebete le bohlale ba hore ba mo mamele le hore ba tsoele pele ba bolela litaba tse molemo. ’Mè ea se nang molekane eo re tla mo bitsa Gulistan, o na le bana ba bane. O ile a tšehetsoa ke Jehova. Ka nako e itseng e ne e le eena feela Paki sebakeng se seholo sa Asia bohareng moo ba boholong ba leng khahlanong le mosebetsi oa ho bolela ka ’Muso. Phutheho e haufi le moo a lulang, e bohōle ba lik’hilomithara tse fetang 400, kahoo, hase hangata Gulistan a kopanang le Bakreste ba hōlileng moeeng. Ho sa tsotellehe seo hammoho le mathata a mang, o bolela ka ntlo le ntlo ’me o fumana batho ba bangata ba ratang molaetsa. Ho latela tlaleho ea morao tjena, o ne a khannela batho ba ka bang 20 lithuto tsa Bibele ’me a hlokomela sehlopha se ntseng se hōla sa linku tsa Jehova.

²³ Joalokaha Molimo a ile a thusa Jeremia le Lipaki tse kang Gulistan, o malala-a-laotsoe ho u thusa hammoho le bahlanka ba bang ba mo mamelang. Ikemisetse ho mamela eena e le ’Musi ho e-na le batho. Joale, khanyetso le litšitiso tse ling li ke ke tsa u thibela hore u rorise Molimo a le mong feela oa ’nete phatlalatsa ka pel’a batho ba tšimong ea heno.—Jer. 15:20, 21.

24. Ho mamela ho u tsoela molemo joang hona joale?

²⁴ Re ke ke ra fumana thabo le khotsofalo ea ’nete haeba re phela re sa itšetleha ka ’Mōpi. (Jer. 10:23) Ka mor’a hore u ithute seo Jeremia a se ngotseng ka ho mamela, na u bona litsela tseo ka tsona u ka lumellang Jehova hore a tsamaise mehato ea hao ka botlalo? Melao ea Hae e fana ka tataiso eo e leng eona feela e ka etsang hore motho a thabe ka botlalo ’me a atlehe. Jehova o re: “Mamelang lentsoe la ka . . . e le hore lintho li ka le tsamaela hantle.”—Jer. 7:23.