May

Le hoja ho ka ba bohloko ha re khalemeloa, ho hana khalemelo ho ka re tlisetsa litholoana tse bosula. (Baheb. 12:11) Nahana ka mohlala oa o Kaine. Ha Molimo a bona hore Kaine o hloile moen’ae le hore o batla ho mo bolaea, o ile a re ho eena: “Ke hobane’ng ha u tuka ke bohale ’me ke hobane’ng ha sefahleho sa hao se sosobane? Haeba u fetoha hore u etse se molemo, na ho phahamisoa ho ke ke ha e-ba teng? Empa haeba u sa fetohe hore u etse se molemo, sebe se laletse monyako, ebile sea u lakatsa; na u tla se laola?” (Gen. 4:6, 7) Kaine ha aa ka a mamela. O ile a bolaea moen’ae eaba o khola litholoana tse bosula bophelo bohle ba hae. (Gen. 4:11, 12) Hoja Kaine o ile a mamela Molimo, a ka be a sa ka a phela habohloko joalo. Jehova ha a batle hore re utloe bohloko ho sa hlokahale. (Esa. 48:17, 18) Kahoo, re lokela ho ‘mamela taeo ’me re hlalefe.’​—Liprov. 8:33. w18.03 32 ¶18-20

Daniele o tsebile Jehova joang? Ho hlakile hore batsoali ba Daniele ba ile ba mo ruta ho rata Jehova le Lentsoe la Hae. O ile a rata Jehova bophelo bohle. Leha a se a holile, o ne a ntse a ithuta Lentsoe la Molimo. Daniele o ne a tseba Jehova le lintho tseo a ileng a li etsetsa sechaba sa Iseraele. Re bona bopaki ba taba ena thapelong eo a ileng a e etsa e amang maikutlo e tlalehiloeng ho Daniele 9:3-19. Iphe nako ea ho bala thapelo ena ’me u nahanisise ka eona. Ho ne ho se bonolo ho Mojuda ea tšepahalang hore a sebeletse Molimo a le Babylona. Mohlala, Jehova o ile a re ho Bajuda: “Le batlele motse oo ke entseng hore le ee kholehong ho oona khotso.” (Jer. 29:7) Empa o ile a ba laela hore ba rapele eena feela. (Ex. 34:14) Daniele o thusitsoe ke’ng ho mamela litaelo tseo ka bobeli? Kaha o ne a tseba Lentsoe la Molimo, o ile a ba le bohlale ba ho tseba hore o lokela ho mamela Jehova pele, ho latele babusi. Lilemo tse makholo hamorao, Jesu o ile a ruta thuto e tšoanang.​—Luka 20:25. w18.02 10 ¶11-12

Haeba u e-na le mathata a ho kula, ho hloka chelete kapa ho hlorisoa, ka linako tse ling ho ka ba thata hore u lule u thabile ha u ntse u sebeletsa Jehova. Kahoo, ho ithuta ka Noe, Daniele le Jobo ho ka u matlafatsa. Banna bana ba ne ba sa phethahala ba bile ba hlaheloa ke mathata a tšoanang le a rona, ao ka linako tse ling a neng a beha bophelo ba bona kotsing. Leha ho le joalo, ba ile ba lula ba tšepahala ’me ke mehlala e metle ea batho bao Jehova a ba nkang ba e-na le tumelo ba bile ba mo mamela. (Ezek. 14:12-14) Ezekiele o ile a ngola mantsoe a temana ea rona ea letsatsi ka selemo sa 612 pele ho mehla ea Kreste. (Ezek. 1:1; 8:1) Nako ea hore baahi ba Jerusalema ba felisoe e ne e se e le haufi. Ba ile ba felisoa lilemo tse hlano hamorao. Ke batho ba seng bakae feela ba ileng ba pholoha hobane ba ne ba e-na le makhabane a tšoanang le a Noe, Daniele le Jobo. (Ezek. 9:1-5) Ka tsela e tšoanang, le mehleng ena batho bao Jehova a bonang ba lokile joaloka Noe, Daniele le Jobo ba tla pholoha ha lefatše lena le timetsoa.—Tšen. 7:9, 14. w18.02 3-4 ¶1-3

Haeba u mocha, ipotse: ‘Na ke ea libokeng le tšimong hobane feela batsoali ba ka ba batla hore ke ee? Na ke iketselitse setsoalle le Jehova?’ Kaofela re lokela ho ikemisetsa ho sebeletsa Jehova haholoanyane ho sa tsotellehe hore na re bacha kapa re se re holile. Ha re etsa joalo, kamano ea rona le Jehova e tla matlafala. (Moek. 12:13) Ka mor’a ho itlhahloba hore na re lokela ho etsa liphetoho hokae, re lokela ho nka mehato e tla re thusa hore re li etse. Ho bohlokoa hore re be le kamano e ntle le Jehova kaha ho ka bolela bophelo empa ho se be le eona ho ka bolela lefu. (Bar. 8:6-8) Jehova ha aa lebella hore re phethahale e le hore re be metsoalle ea hae. A ka re thusa ka moea o halalelang. Empa re lokela ho sebetsa ka thata e le hore re be le kamano e ntle le Molimo. Le hoja ho bala Bibele ho le monate, ha rea lokela ho e bala ka sepheo sa ho itlosa bolutu joalokaha eka ke buka ea lipale. Re lokela ho sebetsa ka thata hore re ithute lintho tsa bohlokoa ho eona. w18.02 25 ¶10-11

Motho ha aa lokela ho tseba ntho e ’ngoe le e ’ngoe e ka Bibeleng pele a inehela ho Jehova ’me a kolobetsoa. Kaofela ha rona re lokela ho ikitlaelletsa ho eketsa tsebo ea rona esita le ka mor’a hore re kolobetsoe. (Bakol. 1:9, 10) Motho o lokela ho ba le tsebo e kae pele a kolobetsoa? Mohlala oa lelapa le leng la mehleng ea khale o ka thusa batsoali. (Lik. 16:25-33) Ha Pauluse a le leetong la hae la bobeli la boromuoa ka selemo sa 50, o ile a etela motseng oa Filipi. Ha a le moo, eena le Silase ba ile ba lahleloa chankaneng ka lebaka la liqoso tsa bohata. Bosiu ho ile ha e-ba le tšisinyeho ea lefatše eaba mamati a chankana aa buleha. Kaha molebeli oa chankana o ne a nahana hore batšoaruoa ba balehile, o ile a leka ho ipolaea. Leha ho le joalo, Pauluse o ile a mo thiba. Pauluse le Silase ba ile ba ruta molebeli oa chankana le lelapa la hae ka Jesu. Molebeli le lelapa la hae ba ile ba lumela lintho tseo ba ithutang tsona ’me ba bona ho le bohlokoa hore ba boloke litaelo tsa Jesu. Ba ile ba kolobetsoa ntle ho tšenyo ea nako. w18.03 10 ¶7-8

Jehova ke Molimo ea thabileng, batho ba mo rapelang le bona ba lula ba thabile. Bahlanka ba Molimo ha ba ithate ho feta tekano ebile ha ba thabele feela ho fuoa. Ho e-na le hoo, ba thabela ho fana. (Lik. 20:35; 2 Tim. 3:2) Ke’ng e ka re thusang ho itlhahloba hore na re ithata ho feta Molimo? Nahana ka keletso ena e hlahang ho Bafilipi 2:3, 4: “Le sa etse letho ka lebaka la ho rata likhang kapa ka lebaka la ho ipolelisa, empa ka ho ikokobetsa kelellong le nka hore ba bang ba le phahametse, le sa hlokomele lithahasello tsa litaba tsa lōna feela, empa hape le hlokomela lithahasello tsa ba bang.” Re lokela ho ipotsa: ‘Na ke mamela keletso ee? Na ke batla mekhoa ea ho thusa Bakreste-’moho le ’na hammoho le batho bao ke kopanang le bona tšimong?’ Ha se kamehla ho leng bonolo ho ipha nako ea ho thusa batho ba bang. Ka linako tse ling re ka lokela ho sebetsa ka thata ’me re itime lintho tseo re li ratang. Leha ho le joalo, ha ho letho le re thabisang ho feta ho tseba hore re thabisa Jehova. w18.01 23 ¶6-7

Re ka etsa joalo ka hore re ipotse lipotso tsena: ‘Na ehlile kea lumela hore mokhatlo oo ke oona feela oo Jehova a o sebelisang e le hore a phethe thato ea hae? Na ke etsa sohle se matleng a ka hore ke bolelle batho ka ’Muso oa Molimo? Na ka liketso ke bontša hore kea lumela hore re phela matsatsing a ho qetela le hore haufinyane puso ea Satane e tla felisoa? Na ke ntse ke e-na le tumelo e matla ho Jehova le Jesu joaloka ha ke sa tsoa kolobetsoa?’ (Mat. 24:14; 2 Tim. 3:1; Baheb. 3:14) Ho nahana ka lipotso tseo, ho tla re thusa ho hlokomela hore na kamano ea rona le Jehova e matla hakae. Bala lihlooho tse buang ka bohlokoa ba Sehopotso u be u nahanisise ka tsona. (Joh. 3:16; 17:3) Tsela feela ea hore re fumane bophelo bo sa feleng ke ka ho ithuta ka Jehova le ho ba le tumelo ho Jesu. U ka itokisetsa Sehopotso ka hore u bale lihlooho tse tla u thusa hore u atamele haufi le Jehova le Jesu. w18.01 13 ¶5-6

Ha u bala Bibele le lingoliloeng tse thehiloeng ho eona le ha u le libokeng, u utloa kamoo Jehova a thusitseng bahlanka ba bang ba hae hore ba lule ba mo tšepahalla. Hape, ha kamano ea hao le Jehova e ntse e e-ba matla, le uena u lokela ho bona kamoo a u thusang kateng bophelong ba hao. Ke joang u ileng oa bona hore Jehova o molemo? Tsela e ka sehloohong eo ka eona Bakreste bohle ba boneng hore Jehova o molemo ke ka hore ebe o ba memme hore ba be le kamano e ntle le eena hammoho le mora oa hae. Mohlomong mocha a ka re Jehova o hutse batsoali ba hae eaba eena o se a ba sala morao feela. Hopola hore ha u ne u kolobetsoa, u ile oa bontša hore joale u se u e-na le kamano e ntle le Jehova. Bibele e re: “Haeba leha e le mang a rata Molimo, enoa o tsejoa ke eena.” (1 Bakor. 8:3) Kahoo, lula u bontša hore u ananela monyetla oo a u fileng oona oa ho ba le kamano e ntle le eena. w17.12 26 ¶12-13

Ha u utloa lentsoe “taeo,” u ka ’na oa nahana ka ho ruta motho e mong. Empa taeo ha se feela ho ruta. E ka boela ea bolela ho eletsa, ho khalemela kapa ho fana ka kotlo. Ke kahoo ka linako tse ling ha Jehova a re laea a boetseng a re khalemelang kapa a re fang kotlo. Leha ho le joalo likotlo tsa hae ha se tse khopo kapa tse tla re ntša kotsi. (Baheb. 12:6) Bibele e re taeo e molemong oa rona. Ka linako tse ling ha Bibele e bua ka taeo e boetse e hlahisa mantsoe a kang tsebo, bohlale, lerato le bophelo. (Liprov. 1:2-7; 4:11-13) Ha e le hantle, morero oa ho “laea” ke ho rupela, feela joalokaha motsoali a ka rupela ngoana oa hae. Kaha re Bakreste, re karolo ea lelapa la Jehova. (1 Tim. 3:15) Re hlompha Jehova hobane ke Ntate oa rona ’me o na le tokelo ea ho re bolella se nepahetseng le se fosahetseng le ho re khalemela ha re sa mamele litaelo tsa hae. Hape haeba liketso tsa rona li sa thabise Jehova, khalemelo ea hae e ka re hopotsa hore re lokela ho lula re mo mamela kaha ke Ntate oa rona.—Bagal. 6:7. w18.03 23 ¶1; 24 ¶3

Haeba u mocha, u lokela ho etsa’ng ha u bona eka batsoali ba hao ha ba u utloisise le hore ba u etsa ngoana? Mohlomong u ka ba koatela hoo u ka bang oa ipotsa hore na ehlile ho molemo ho sebeletsa Jehova. Empa haeba u ka tlohela ho sebeletsa Jehova hobane feela u koatetse batsoali ba hao, hamorao u tla hlokomela hore batsoali ba hao le Bakreste-’moho le uena ba u tsotella ho feta mang kapa mang. Haeba batsoali ba hao ba ne ba sa u khalemele ho hang, mohlomong u ne u tla ipotsa hore na ehlile baa u rata. (Baheb. 12:8) Empa e ka ’na eaba u koatisoa ke tsela eo ba u khalemelang ka eona. Ho e-na le hore u ngongorehe ka hore na ba u khalemela joang, leka ho hlokomela hore na ke hobane’ng ha ba u khalemela joalo. Kahoo, lula u khobile matšoafo ’me u leke ka matla ho ithiba hore u se ke oa halefa ha ba u khalemela. Ikemisetse ho bontša hore u holile ka hore u amohele keletso eo u e fuoang, u sa halefe ebile u sa tšoenyehe haholo ka hore na u elelitsoe joang.—Liprov. 1:8.w17.11 29 ¶16-17

Mohlomong u bone bacha ba bang ba kolobetsoa empa hamorao ba khaotsa ho lumela hore melao ea Molimo e ba tsoela molemo. Ba bang ba bile ba khaolitse ho sebeletsa Jehova. Mohlomong le uena u tšoenyehile ka hore ngoana oa hao o tla qala ho sebeletsa Jehova hantle empa hamorao a khaotse ho mo sebeletsa joaloka pele. U ka thusa ngoana oa hao joang hore a ‘holele polokong’ ’me a se ke a furalla Jehova? (1 Pet. 2:2) Karabo e hlaha mantsoeng ao Pauluse a ileng a a ngolla Timothea a reng: “U tsoele pele linthong tseo u ileng ua ithuta tsona le tseo u ileng ua susumelletsoa hore u li lumele, u tseba hore na u ile ua ithuta tsona ho batho bafe le hore ho tloha boseeng u tsebile lingoliloeng tse halalelang [Mangolo a Seheberu], tse khonang ho u hlalefisetsa poloko ka tumelo mabapi le Kreste Jesu.” (2 Tim. 3:14, 15) Hlokomela hore Pauluse o bua ka (1) ho tseba lingoliloeng tse halalelang, (2) ho susumelletsoa ho lumela lintho tseo a ithutileng tsona le (3) ho hlalefisetsoa poloko ka tumelo mabapi le Kreste Jesu. w17.12 18-19 ¶2-3

Ba bang ha ba rate bolumeli hobane bo qobella batho ho ntša koleke, bo tšehetsa lipolotiki ebile bo ruta hore ha motho a e-shoa o ea liheleng. Ke kahoo batho ba bangata ba reng ba thabile ha ba se na bolumeli. Motho a ka thaba haeba a se bolumeling bo fosahetseng. Empa ha ho motho ea ka thabang haeba e se motsoalle oa Jehova, “Molimo ea thabileng.” (1 Tim. 1:11) Ntho e ’ngoe le e ’ngoe eo Molimo a e etsang, e molemong oa rona. Kaha re bahlanka ba hae, re thabile hobane re lula re thusa batho ba bang. (Lik. 20:35) Mohlala, nahana hore na bolumeli ba ’nete bo ka thusa lelapa joang hore le thabe. Bo re ruta ho rata balekane ba rona le ho ba hlompha. Hape bo re thusa ho ruta bana tlhompho ’me bo re ruta ho rata ba malapa a rona e le kannete. Borapeli ba ’nete bo ruta batho lefatšeng lohle hore ba sebetse ’moho ka khotso ’me ba ratane. w17.11 21 ¶6-7

Bahlanka ba bangata ba Jehova ba ikutloa joaloka Pauluse. Hobane’ng? Hobane re futsitse sebe ’me ha rea phethahala. Joale ka linako tse ling re ka ’na ra ikutloa re nyahame ha re hloleha ho phetha thato ea Jehova. Bakreste ba bang ba entseng libe tse tebileng ba nahana hore Jehova a ke ke a ba tšoarela. Ho sa tsotellehe hore na re ikutloa joang, Bibele e re ha re etsa Jehova setšabelo sa rona, ha rea lokela ho lula re ikutloa re le molato. (Pes. 34:22) Ka mor’a hore Pauluse a ikutloe a nyahame ha a hloleha ho khahlisa Jehova ka ho phethahetseng, o ile a re: “Ho lebohuoe Molimo ka Jesu Kreste Morena oa rōna!” (Bar. 7:25) Pauluse o ne a loanela ho khahlisa Jehova le ho lebala ka libe tseo a ileng a li etsa hobane a bakile. O ne a e-na le tšepo ea hore Jehova o mo tšoaretse ka sehlabelo sa Jesu. Re na le khotso le letsoalo le khutsitseng ka lebaka la sehlabelo sa Jesu. (Baheb. 9:13, 14) Kaha ke Moprista ea Phahameng, ‘o khona ho pholosa ka ho feletseng ba atamelang Molimo ka eena, hobane o phela kamehla ho ba kōpela ka tieo.’​—Baheb. 7:24, 25. w17.11 8 ¶1-2; 12 ¶15

Re ka phelela kano eo re e etselitseng Jehova joang? Ka hore “letsatsi le letsatsi” re lule re tšepahala ho sa tsotellehe hore na ntho e amang kamano ea rona le Jehova e nyenyane kapa e kholo hakae. (Pes. 61:8) Mohlala, u ka etsa’ng ha ngoana eo u kenang sekolo le eena kapa mosebetsi-’moho le uena a etsa lintho tse bontšang hore oa u rata? Na u tla tšepahala ’me u thabise Jehova? (Liprov. 23:26) Kapa haeba e le uena feela Paki heno, na u kopa Jehova hore a u thuse ho lula u phela ka melao ea hae? Na u lula u leboha Jehova hore ebe o re ratile le hore ebe o re file monyetla oa hore re busoe ke eena? Na u ipha nako ea ho bala Bibele kamehla? Re ile ra tšepisa ho etsa lintho tsena ha re ne re inehela ho Jehova. Ha re etsa sohle se matleng a rona ho mamela Jehova, re bontša hore rea mo rata ebile re inehetse ho eena ka ho feletseng. Re mo sebeletsa ka lipelo tsohle tsa rona eseng feela ho phetha molao. w17.10 23 ¶11-12

Mongoli e mong oa lipina ea tsebahalang o ile a re: “Mantsoe a etsa hore u nahane. Ha u mametse pina, e ka u ama. Empa ha u bina mantsoe a eona, a ka u finyella pelo.” Lipina tsa rona li rorisa Jehova, ’me mantsoe a tsona a bontša hore rea mo rata. Kahoo, ho bonolo ho utloisisa hore na ke hobane’ng ha ’mino o le bohlokoa haholo borapeling ba rona, ebang re bina re le bang kapa le Bakreste-’moho le rona. Na u soabela ho bina u phahamisitse lentsoe libokeng? Litsong tse ling bo-ntate ba soabela ho bina ka pel’a batho. Empa haeba baholo le bahlanka ba sebeletsang ba sa bine ’moho le phutheho libokeng, bahoeletsi ba ka ’na ba bona eka ho bina ha ho bohlokoa hakaalo. (Pes. 30:12) Ho bina ke karolo ea borapeli ba rona ho Jehova. Kahoo, ha rea lokela ho tsoa kapa re be sieo ha ho binoa kaha re ka lahleheloa ke karolo eo ea bohlokoa ea liboka. w17.11 3 ¶1-3

Kaofela ha rona re batla ho ba le khotso bophelong, eseng matšoenyeho. Re thaba haholo hore ebe re na le “khotso ea Molimo.” Khotso eo e khona ho sireletsa monahano le maikutlo a rona. (Bafil. 4:6, 7) Ka lebaka la boinehelo ba rona, re thabela ho ba le “khotso le Molimo” kapa kamano e ntle le eena. (Bar. 5:1) Leha ho le joalo, nako ea hore Molimo a tlise khotso ka ho feletseng lefatšeng ha e-s’o fihle. Re phela linakong tsa ho qetela ’me ho na le mathata a mangata haholo a tlisang matšoenyeho. Re pota-potiloe ke batho ba mabifi. (2 Tim. 3:1-4) Re boetse re lokela ho loana le Satane le lithuto tsa bohata tseo a li buellang. (2 Bakor. 10:4, 5) Empa bothata bo bong ke hore beng ka rona bao e seng Lipaki, ba ka luka khotso ea rona. Ba ka ’na ba soma bolumeli ba rona kapa ba re qosa ka hore re qhala malapa. Hape ba ka re tšosa ka hore ba tla re ntša lelokong haeba re sa tlohele ho ba Lipaki. w17.10 12 ¶1-2

Taba ea hore lipuo lia fetoha ha nako e ntse e e-ea, e boetse e ama tsela eo Bibele e fetoleloang ka eona. Ha nako e ntse e e-ea, Bibele eo phetolelo ea eona e neng e le bonolo e ka qetella e sa utloahale. Mohlala oa taba ena ke Bibele ea King James Version e qalileng ho hatisoa ka selemo sa 1611. Batho ba bangata ba ne ba e rata haholo. Mantsoe a neng a sebelisitsoe ho eona a ile a ama puo ea Senyesemane. Ha King James Version e qala ho fihla, batho ba bangata ba ne ba e utloisisa. Empa ka mor’a lilemo, mantsoe a mang a ne a utloahala e le a khale ’me ho ba thata ho a utloisisa. Ho etsahetse ntho e tšoanang le ka Libibele tse ling. Re leboha Jehova haholo hore ebe re na le Phetolelo ea Lefatše le Lecha ea Mangolo a Halalelang hobane e sebelisa puo eo re e utloisisang. Bibele ena e fetoletsoe ka lipuo tse fetang 150, kahoo batho ba ka khona ho ipalla eona ka puo ea bona. Kaha e sebelisitse mantsoe a bonolo le a utloahalang, molaetsa oa eona o ama lipelo tsa rona. w17.09 19 ¶5-6

Bacha ba hloka ho ba sebete ha ba etsa qeto ea hore ba lule ba itšoere hantle, ea hore na metsoalle ea bona e tla ba bo-mang, hore na ba tla ikhatholla ka eng le hore ba kolobetsoe. Ba hloka ho ba sebete hobane ba tla be ba le khahlanong le Satane eo e leng sera sa Molimo. E ’ngoe ea liqeto tseo bacha ba lokelang ho li etsa ke hore na ba tla etsa’ng bophelong ha ba se ba holile. Linaheng tse ling, bacha ba khothalletsoa ho kena sekolo e le hore ba fumane mesebetsi e patalang hantle. Ka lebaka la mathata a lichelete, linaheng tse ling, bacha ba utloa ba tlameha ho sebetsa ka thata e le hore ba tle ba thuse ba malapa a habo bona. Jehova o tla hlohonolofatsa bacha bao ka sebete ba etelletsang ’Muso pele bophelong ba bona. Jehova o tla boela a ba thuse ho hlokomela ba malapa a bona. Ha Timothea a sa le mocha, o ile a sebeletsa Jehova. Le uena u ka sebeletsa Jehova bocheng ba hao.​—Bafil. 2:19-22. w17.09 29-30 ¶10-12

Ho ithuta bibele ho ka thusa Bakreste ho ba le boitšoaro. Joang? Ka Bibeleng ho na le litlaleho tse re rutang ka melemo le mathata a ho itšoara ka litsela tse itseng. Jehova o ngotse litlaleho tsena ka morero. (Bar. 15:4) Ke bohlale ho ithuta tsona le ho thuisa ka tsona. Nahanisisa ka hore na li ka sebetsa joang ho uena le ho lelapa la hao. Rapela Jehova hore a u thuse hore u sebelise likeletso tse tsoang Lentsoeng la hae. Haeba u hlokomela hore u lokela ho ntlafatsa tsela eo u itšoarang ka eona, amohela. Ka mor’a moo, kopa thuso ea Jehova ’me u shebe hore na u ka ntlafatsa joang. (Jak. 1:5) Ha u ntse u batlisisa ka har’a lingoliloeng tsa rona, u tla fumana lihlooho tse ka u thusang tabeng ena. w17.09 6 ¶15-16

“Botho bo bocha” ke makhabane ao re lokelang ho ba le ’ona e le hore re ka “bōptjoa ho ea ka thato ea Molimo.” (Baef. 4:24) Hoa khoneha hore re be le makhabane ao hobane Jehova o re bopile ka setšoantšo sa hae. (Gen. 1:26, 27; Baef. 5:1) Ka mor’a hore Pauluse a re eletse hore re be le makhabane a Jehova, o ile a re ho hloka leeme ke a mang a makhabane ao. O ile a re ha ho “Mogerike kapa Mojuda, lebollo kapa ho se bolle, osele, Moskitha, lekhoba, motho ea lokolohileng.” Ke hobane’ng ha Bakreste ba sa lokela ho khethollana ka maemo a lichelete kapa morabe ka phuthehong? Hobane balateli ba Jesu ba ’nete kaofela ba “bonngoeng.” (Bakol. 3:11; Bagal. 3:28) Batho ba nang le makhabane ana ba hlompha batho bohle, ho sa tsotellehe maemo a bona a lichelete le hore na ke Bakreste-’moho le bona kapa che.​—Bar. 2:11. w17.08 22 ¶1; 23 ¶3-4

Jehova ha aa lebella hore re etse lintho tseo eena a sa ikemisetsang ho li etsa. O re bontšitse mohlala oa ho se fele pelo. (2 Pet. 3:9) Mohlala, lilemong tse likete tse fetileng serapeng sa Edene, Satane o ile a qosa Jehova ka hore ke ’musi ea hlokang toka. Kahoo, haesale Jehova a letile a sa fele pelo a emetse nako eo ka eona lebitso la hae le tlang ho halaletsoa. Ha nako eo e fihla, o tla hlohonolofatsa batho “bohle ba mo lebeletseng.” (Esa. 30:18) Jesu le eena o ne a ikemiselitse ho leta. Le hoja a ile a fela a lula a tšepahala ’me a fana ka bophelo ba hae e le sehlabelo ka selemo sa 33, o ile a qala ho busa ka 1914. (Lik. 2:33-35; Baheb. 10:12, 13) Hape o lokela ho ema ho fihlela Puso ea Lilemo Tse Sekete e fetile e le hore lira tsohle tsa hae li felisoe. (1 Bakor. 15:25) Empa re kholisehile hore o tla be a sa emela lelea. w17.08 7 ¶16-17

Morali’abo rona Susi o re: “Esita le ka mor’a selemo mora oa rona a hlokahetse, re ntse re utloile bohloko bo tebileng.” Mor’abo rona e mong eena o re ha molekane oa hae a hlokahala, o ile a utloa bohloko boo a sa khoneng ho bo hlalosa. Ha se bona feela ba ileng ba utloa bohloko bo joalo. Batho ba bangata ka phuthehong ba hlokahalletsoe ka tšohanyetso ke batho bao ba ba ratang. Haeba u hlokahalletsoe kapa u tseba motho ea hlokahalletsoeng, u ka ’na oa ipotsa hore na batho ba siameng ba ka thusoa joang hore ba tšelisehe. Hangata batho ba ee ba re ha nako e ntse e e-ea ho tla loka. Empa na ho bolela hore ka mor’a nako bohloko boo bo tla fela? ’Mè e mong ea hlokahalletsoeng ke molekane o re: “Ke ithutile hore bohloko bo ka kokobela ho latela hore na u sebelisa nako ea hao joang.” Joalokaha bohloko ba leqeba bo kokobela ha le hlokomeloa, bohloko ba ho hlokahalloa bo ka kokobela haeba motho ea utloileng bohloko a tšelisoa. w17.07 12-13 ¶1-3

Jehova o u khothalletsa ho etsa liqeto life? Haeba u batla ho thaba, u lokela ho ithuta ka eena u be u mo sebeletse. Ke eona ntho eo a re bopetseng eona. (Pes. 128:1; Mat. 5:3) Ha re tšoane le liphoofolo tse bopetsoeng feela ho ja, ho noa le ho ikatisa. Molimo o batla hore u phele bophelo ba hao ka tsela e tla u thabisa. ’Mopi oa hao ke “Molimo oa lerato,” “ea thabileng,” ea bileng a bopileng batho “ka setšoantšo sa hae.” (2 Bakor. 13:11; 1 Tim. 1:11; Gen. 1:27) Ha u mo etsisa, u tla thaba. Na u kile oa hlokomela hore ke ’nete ha Bibele e re: “Ho fana ho tlisa thabo e khōlō ho feta ho amohela”? (Lik. 20:35) Ehlile mantsoe ao ke ’nete. Kahoo, Jehova o batla hore ha u khetha hore na u tla etsa’ng ka bophelo ba hao, u etse joalo u nahanne ka batho ba bang hammoho le eena.​—Mat. 22:36-39. w17.07 23 ¶3

Kaha re bahlanka ba Jehova, oa re hlompha ebile o re hlokomela ho feta kamoo re ka itlhokomelang kateng. Jehova o rata e mong le e mong oa bahlanka ba hae. Ka mohlala, ho ile ha ba le nako eo ka eona Jehova a neng a sebelisa baahloli ho pholosa sechaba sa hae ho ba lireng. Nakong eo, Ruthe e ne e se Moiseraele. Empa o ile a tela lintho tse ngata hore e be morapeli oa Jehova. Jehova ha aa ka a mo tlolisa mahlo. O ile a mo hlohonolofatsa ka ho mo fa molekane a ba a mo fa mora. Ho feta moo, ha Ruthe a se a tsositsoe bafung, o tla tseba hore mora oa hae o ne a le lelokong la Mesia. Hape, o tla thaba haholo ha a fumana hore pale ea bophelo ba hae e ngotsoe ka har’a Bibele bukeng e bileng e rehelletsoeng ka eena.​—Ruthe 4:13; Mat. 1:5, 16. w17.06 28-29 ¶8-9

Ka 1970 mor’abo rona Peter o ne a le lilemo li 19 ’me a sa tsoa qala ho sebetsa Bethele naheng ea Brithani. Ha a ntse a bolela litaba tse molemo ka ntlo le ntlo, o ile a kopana le ntate e mong ea ka bang lilemo li 50 ea hlahlabalitseng litelu. Peter o ile a mo botsa hore na a ka rata ho ithuta Bibele. Ntate eo o ile a mo araba ka ho makala a re eena ke moruti. O ile a ba a botsa Peter a re: “Mpolelle hee moshana, hana buka ea Daniele e ngotsoe ka puo efe ha e ne e qala ho ngoloa?” Peter a mo bolella hore karolo e itseng ea eona e ile ea ngoloa ka puo ea Searame. Peter o re: “Ntate eo o ile a makala ha ke mo fa karabo e nepahetseng. Ha ke fihla hae ke sheba limakasine tsa Molula-Qhooa le Tsoha! tsa likhoeli tse fetileng, ke ile ka fumana sehlooho se bontšang hore buka ea Daniele e fela e ngotsoe ka Searame. Ke ile ka makala haholo ha ke bona hore ke nepile karabo.” (Dan. 2:4) Moea o halalelang o ka fela oa re hopotsa lintho tseo re ithutileng tsona Bibeleng.​—Luka 12:11, 12; 21:13-15. w17.06 13 ¶17

Matšoenyeho a mang a hlaha ha monna le mosali ba hlokomela hore ba tl’o ba le ngoana. Ba thabelang hore ba tl’o ba le ngoana, le bona ba tšoenyeha ka bophelo ba ’mè le lesea nakong eo a ntseng a lebeletse le ha ngoana a hlaha. Ba boetse ba tšoenyeha ka hore na ba tla sebelisa chelete e kae ho holisa ngoana. Esita leha ngoana a se a le teng, ho ba le lintho tse ling tseo ba tšoenyehang ka tsona. ’Mè a ka ’na a qeta nako e ngata a hlokomela ngoana. Ka lebaka leo, hangata ntate o utloa eka ’mè o mo hlokela nako kaha o se a qeta nako e ngata a shebane le ngoana. Ntle ho moo, kaha lelapa le se le eketsehile, boikarabelo ba ntate boa eketseha hobane o boetse o lokela ho hlokomela ngoana ka lintho tseo a li hlokang. Bothata bo bong bo hlahelang banyalani ke hore ba batla ho ba le bana empa ha ba khone ho ba le bona. Mosali a ka ’na a imeloa haholo kelellong ha a sa khone ho ba le bana. w17.06 4 ¶1; 5 ¶5-6

Kaha re Bakreste, re rata Lentsoe la Molimo hobane ke lona feela le re rutang ’nete. Ha Jesu a rapela Ntate oa hae, o ile a re: “Lentsoe la hao ke ’nete.” (Joh. 17:17) Kahoo, re lokela ho tseba Lentsoe la Molimo e le hore re le rate. (Bakol. 1:10) Leha ho le joalo, ho tseba Lentsoe la Molimo feela ha hoa lekana. Hlokomela kamoo Pesaleme ea 119 e re thusang kateng ho utloisisa hore na ho rata Lentsoe la Molimo ho bolela’ng. (Pes. 119:97-100) Re lokela ho ipha nako ea ho lula re nahanisisa ka lintho tseo re ithutileng tsona Bibeleng. Ha re hlokomela kamoo re ka ntlafatsang kamano ea rona le Jehova kateng, re tla rata Lentsoe la Molimo le ho feta. Hape re ka thabela ho rutoa ke Jehova joalokaha re thabela ho ja lijo tse lutlisang mathe. Kaha re nka nako ha re ja lijo tseo re li ratang, ka tsela e tšoanang, re lokela ho nka nako ha re ithuta Bibele. Ha re etsa joalo, re tla rata “mantsoe a thabisang” a Lentsoe la Molimo ’me ho tla ba bonolo ho hopola seo re ithutileng sona.—Moek. 12:10. w17.05 19-20 ¶11-12

Re lokela ho thusa batho ba nang le mathata, ho akarelletsa le bao e seng Lipaki. (Luka 10:33-37) Re ka ba thusa ka ho bua le bona ka molaetsa oa Bibele. Moholo e mong ea seng a thusitse batho ba bangata ba tsoang linaheng tse ling o re: “Ke habohlokoa hore re ba tsebise li sa tloha feela hore re Lipaki Tsa Jehova le hore mosebetsi oa rona o ka sehloohong ke ho ba thusa hore ba be le kamano e ntle le Molimo, eseng ho ba thusa ka liaparo le lijo feela. Ho seng joalo, ba bang ba ka bua le rona hobane feela ba batla hore re ba thuse.” Ha re rata Bakreste ba balehileng linaheng tsa habo bona, ho tla ba le litla-morao tse thabisang. (Pes. 146:9) Morali’abo rona e mong o re bana ba hae ba bane ba ile ba baleha Eritrea ka lebaka la mahloriso. Ba ile ba fihla Sudan ka mor’a ho qeta matsatsi a robeli ba tsamaea lehoatateng. O re: “Bara le barali babo rona ba ile ba ba amohela joalokaha eka ke beng ka bona. Ba ile ba ba fa lijo, liaparo, bolulo le chelete ea ho palama. Ha ho na motho ea ka amohelang batho bao a sa ba tsebeng ntlong ea hae, hobane feela a kena kereke le bona. Empa Lipaki Tsa Jehova li ile tsa ba amohela.”—Joh. 13:35. w17.05 7 ¶17, 19-20

“Na monna ea shahlileng a ka ba le thuso ho Molimo, e le hore leha e le ofe ea nang le temohisiso a ka ba le thuso ho eena? Na Ea Matla ’Ohle o thabisoa ke letho ka hore ebe u lokile, kapa o rua letho ka hore ebe u etsa hore tsela ea hao e be e sa tšoauoeng phoso?” (Jobo 22:1-3) Na u ka rata ho tseba likarabo tsa lipotso tsee? Ha Elifaze oa Motemane a botsa Jobo lipotso tsena, o ne a kholisehile hore karabo ea tsona ke che. Motsoalle oa hae Bildade oa Moshuha, o ile a re motho e ke ke ea e-ba ea lokileng ka pel’a Molimo. (Jobo 25:4) Metsoalle ena ea Jobo e ile ea re boiteko ba rona ba ho sebeletsa Jehova ka botšepehi ke ba lefeela le hore Jehova o re nka re le litšoèlè, litšenyane kapa liboko. (Jobo 4:19; 25:6) Jehova o ile a bontša hore na o ikutloa joang ha a khalemela Elifaze, Bildade le Tsofare hobane ba ne ba buile leshano ka eena, a ba a bontša hore o amohela Jobo ka ho ’mitsa ‘mohlanka oa hae.’ (Jobo 42:7) Kahoo, re kholisehile hore Molimo o nka batho e le ba bohlokoa. w17.04 28 ¶1-2

Re se re phetse lefatšeng lena nakong e telele hoo re seng re sa bone kamoo lintho tse etsahalang li re bakelang khatello ea maikutlo kateng. Nahana ka mohlala ona, batho ba lulang pel’a seteishene sa terene ba qetella ba se ba sa utloe lerata le etsoang ke terene. Batho ba lulang pel’a moo ho qhalloang toti teng, ba qetella ba se ba sa utloe monko o mobe o tsoang moo. Ka tsela e tšoanang, le rona re phetse lefatšeng lena nako e telele hoo re seng re sa hlokomele hore na lintho tsena li re ama hakae. Empa ha mahlomola ana a felisoa, re tla imoloha e le kannete. Bophelo bo tla ba joang ha mahlomola a se a le sieo? Hlokomela tšepiso e hlahang temaneng ea rona ea kajeno. Na mantsoe ao ha a u khothatse? Ke sona seo Jehova a u batlelang sona. Kahoo, etsa sohle se matleng a hao hore u lule haufi le Jehova Molimo le mokhatlo oa hae mehleng ena ea bofelo. Lula u nahana ka tšepo eo u nang le eona ’me u bolelle ba bang ka eona. (1 Tim. 4:15, 16; 1 Pet. 3:15) Ka tsela eo, u ka kholiseha hore u ke ke oa felisoa hammoho le lefatše lena le seng le ntse le ahlotsoe. Empa u tla lula u thabile ’me u tla phela ka ho sa feleng. w17.04 13 ¶16-17

Ho bonolo ho lumellana le taba ena empa ho ka ba thata ha e le rona ba utloisitsoeng bohloko. Ha seo se etsahala, na re tla sheba lintho ka tsela eo Jehova a li shebang ka eona? Mohlala, u tla etsa’ng ha u hlokomela hore moholo o leeme? Na u tla itumella ho khopiseha ha moholo a bua mantsoe a u utloisang bohloko hobane a bua a sa nahana? Ho e-na le hore u etse qeto ea hore o lokela ho tlosoa boholong, na u tla mamella ’me u letele Jesu hlooho ea phutheho hore a lokise bothata? Ho e-na le hore u mo ahlole, na u ka nahana ka lilemo tseo a li qetileng a sebeletsa Jehova ka botšepehi? Haeba mor’abo rona ea u sitetsoeng a tsoela pele e le moholo kapa a bile a fuoa boikarabelo bo eketsehileng, na u tla thaba le eena? Haeba u ikemisetsa ho tšoarela batho ba bang, u etsisa Jehova ea sebetsang lintho ka toka.​—Mat. 6:14, 15. w17.04 27 ¶18