June

Jehova o susumetsoa ke lerato ha a re eletsa, a re ruta leha a re rupela e le hore re ka atamela haufi le eena ’me re phele ka ho sa feleng. Ka linako tse ling khalemelo ha e bolele feela ho eletsoa. Ha motho a entse sebe se tebileng, a ke ke a tšoaneleha ho fuoa likabelo tse itseng ka phuthehong. Ho ntse ho le joalo, khalemelo eo e bontša hore Jehova oa mo rata. Mohlala, e ka thusa motho hore a bone bohlokoa ba ho ithuta Bibele, ho nahanisisa ka lintho tseo a ithutileng tsona le ho rapela. Ha a etsa lintho tsena kamano ea hae le Jehova e tla matlafala. (Pes. 19:7) Ka mor’a nako e itseng, a ka boela a fumana likabelo. Esita le haeba motho a khaoloa, taba ena e bontša hore Jehova oa re rata hobane o sireletsa phutheho mekhoeng e mebe. (1 Bakor. 5:6, 7, 11) Kaha Jehova o re khalemela ka toka, motho ea khaotsoeng a ka utloisisa kamoo sebe sa hae se tebileng kateng ebe oa baka.​—Lik. 3:19. w18.03 24 ¶5-6

Molebeli oa chankana o ne a sa tsebe Lentsoe la Molimo. Kahoo, o ne a lokela ho tseba lithuto tsa motheo le ho utloisisa hore na ho bolela’ng ho ba mohlanka oa Molimo le ho ikitlaelletsa ho hlompha lithuto tseo Jesu a li rutileng. Lintho tseo a ithutileng tsona li ile tsa mo susumelletsa ho kolobetsoa ka mor’a nakoana. Ntle ho pelaelo o ile a tsoela pele ho eketsa tsebo ea hae esita le ka mor’a hore a kolobetsoe. (Lik. 16:25-33) Kahoo, u tla etsa’ng ha ngoan’a hao a batla ho kolobetsoa hobane a rata Jehova a bile a batla ho boloka litaelo tsa hae? U ka mo khothalletsa ho buisana le baholo e le hore ba bone hore na oa tšoaneleha ho kolobetsoa kapa che. Joaloka batho ba seng ba kolobelitsoe, ngoana le eena a ka tsoela pele ho eketsa tsebo ea hae ka hore a ithute ka Jehova bophelo bohle.​—Bar. 11:33, 34. w18.03 10 ¶8-9

Ha re ntse re sebetsa ka thata ho matlafatsa kamano ea rona le Jehova, moea o halalelang o tla re thusa hore re fetole tsela eo re nahanang ka eona. O tla re thusa hore hanyane ka hanyane re nahane lintho ka tsela eo Jesu a neng a nahana ka eona. O tla boela o re thuse ho qoba menahano e fosahetseng ’me re be le makhabane ao Jehova a batlang hore re be le ’ona. Ho nahana lintho ka tsela eo Jesu a nahanang ka eona, ho tla ama tsela eo re itšoarang ka eona ha re le mosebetsing kapa sekolong. Ho tla boela ho ame tsela eo re buang ka eona hammoho le eo re etsang liqeto ka eona letsatsi le letsatsi. Liqeto tsa rona li tla bontša hore re leka ho etsisa Jesu. Ha rea lokela ho etsa letho le tla senya kamano ea rona le Jehova. Re tla sireletsa kamano ea rona le Jehova esita leha ho hlaha maemo ao ho ’ona ho ka bang thata hore re lule re tšepahala. Pele re etsa liqeto re lokela ho nahana ka lipotso tse latelang: ‘Ke melao-motheo efe ea Bibele e ka nthusang? Jesu o ne a tla etsa’ng boemong boo? Jehova o tla thaba ha nka etsa qeto efe?’ w18.02 25 ¶12; 26 ¶14

Batho ba mehleng ea Enoke e leng ntate-moholo oa Noe, ba ne ba sa tšabe Molimo. Ba ne ba bile ba bua “lintho . . . tse tšosang” ka Eena. (Juda 14, 15) Batho ba bangata ba ne ba le mabifi. Ha e le hantle, mehleng ea Noe ‘lefatše le ne le tletse pefo.’ Mangeloi a khopo a ile a iketsa batho eaba a nyala basali ’me a e-ba le bana ba lifonthoane. (Gen. 6:2-4, 11, 12) Empa Noe eena ‘o ne a se na molato har’a batho ba mehleng ea hae. O ne a tsamaea le Molimo oa ’nete.’ (Gen. 6: 9) A re hlahlobeng seo mantsoe ana a se buang ka Noe. Taba ea pele ke hore Noe ha aa ka a tsamaea le Molimo ka lilemo tse 70 kapa 80 feela, e leng lilemo tseo batho ba mehleng ena ba li phelang. O ile a phela le batho bao ba khopo ka lilemo tse ka bang 600. (Gen. 7:11) Hape, ho ne ho se na phutheho eo a ka eang ho eona e le ho khothatsana le balumeli-’moho le eena, a bile a se na bana babo ba ka mo khothatsang. w18.02 4 ¶4-5

Ha ho mohla motho ea ratang chelete a khotsofallang eo a nang le eona. O lula a batla e eketsehileng ’me o sebetsa ka thata hore a e fumane. Leha ho le joalo, o qetella a “itlhabile hohle ka bohloko bo boholo.” (1 Tim. 6:9, 10; Moek. 5:10) Ke ’nete hore kaofela ha rona re hloka chelete hobane e ka re tsoela molemo ka tsela e itseng. (Moek. 7:12) Empa na re ka thaba e le kannete haeba re e-na le lintho tseo re li hlokang feela? Hantle haholo. (Moek. 5:12) Agure mora oa Jake o ile a re: “U se ke ua mpha bofutsana kapa maruo. E-re ke je lijo tseo ke li behetsoeng.” Ho bonolo ho utloisisa hore na ke hobane’ng ha a ne a sa batle ho futsaneha. O re lebaka ke hore a se ke a utsoa eaba o fosetsa Molimo. Empa ke hobane’ng ha a ne a rapella hore a se ke a rua? O ile a re: “E le hore ke se ke ka khora eaba kea u latola ’me ke re, ‘Jehova ke mang?’” (Liprov. 30:8, 9) Jesu o ile a re: “Ha ho eo e ka bang lekhoba la benghali ba babeli; kaha o tla hloea e mong ’me a rate e mong, kapa o tla khomarela e mong ’me a nyelise e mong. Le ke ke la ba makhoba a Molimo le a Maruo.”​—Mat. 6:24. w18.01 24 ¶9-11

Re etsa hore phutheho e lule e momahane ha re tšoarelana ka bolokolohi. Ha re etsa joalo, re bontša hore re ananela hore ebe Jehova o re tšoarela libe ka lebaka la sehlabelo sa Jesu. Ha Jesu a ne a bontša bohlokoa ba ho tšoarelana, o ile a bua ka pale ea morena le makhoba a hae. Pale ena e hlaha ho Matheu 18:23-34. Ipotse: ‘Na ke utloa ke batla ho etsa lintho tseo Jesu a li rutileng? Na ke utloisisa Bakreste-’moho le ’na le ho ba mamella? Na ke ikemiselitse ho tšoarela batho ba ntšiteloang?’ Ke ’nete hore ho na le libe tseo ho leng thata ho tšoarela motho ka tsona kaha ha rea phethahala. Empa pale eo Jesu a buileng ka eona, ea re ruta hore na Jehova o batla hore re etse’ng. Ho hlakile hore Jehova a ke ke a re tšoarela haeba re sa tšoarele Bakreste-’moho le rona ha ho e-na le mabaka a utloahalang a hore re ba tšoarele. Re lokela ho nahanisisa ka taba ena. Re lokela ho tšoarelana kaha ha re etsa joalo, phutheho e tla lula e momahane. w18.01 15 ¶12

Le hoja bophelo ba Daniele bo ne bo ka ba kotsing, ha aa ka a fa batho maikutlo a hore o khaolitse ho rapela Jehova. Kaha Daniele o ile a ba sebete, Jehova o ile a mo hlohonolofatsa le ho mo lopolla ka mohlolo sekoting sa litau. Ka lebaka leo, batho ba lulang Medo-Persia ba ile ba tseba ka Jehova. (Dan. 6:25-27) Ke joang re ka bang le tumelo e kang ea Daniele? E le hore re be le tumelo e matla, ha rea lokela ho bala Lentsoe la Molimo feela, empa re lokela ho le utloisisa. (Mat. 13:23) Re boetse re lokela ho tseba hore na Jehova o ikutloa joang ka lintho tse itseng. Kahoo, ha re bala Lentsoe la Molimo, ho bohlokoa hore re nahanisise ka lintho tseo re ithutang tsona. Hape, re rapele kamehla, haholo-holo ha re le mathateng. Re lokela ho ba le tumelo ea hore Jehova a ka re fa bohlale le matla ha re li kopa.​—Jak. 1:5. w18.02 10-11 ¶13-15

Le haeba u le mokreste ea mocha lilemong ,u ka bona kamoo Jehova a leng molemo kateng ha u bua le batho ka lintho tseo u li lumelang, ebang ke sekolong kapa tšimong. Leha ho le joalo, ho ka ba thata ho bua ka Bibele le bana bao u kenang sekolo le bona hobane u ipotsa hore na ba tla re’ng, haholo ha u bua le bona e le sehlopha. Ke’ng e ka u thusang? Qala pele ka ho ipotsa hore na ke hobane’ng ha u lumela hore lintho tseo u ithutileng tsona Bibeleng ke ’nete. U ka ipha nako ea ho kena ho jw.org/st, oa sheba tataiso ea ho ithuta haeba e le teng ka puo ea hao. Tataiso eo e tla u thusa hore u nahanisise ka lintho tseo u ithutileng tsona Bibeleng, hore na ke hobane’ng ha u lumela hore ke ’nete le hore na u ka li hlalosetsa batho ba bang joang. U tla khona ho bua le bana bao u kenang sekolo le bona ka Jehova ha u lokiselitse hantle ebile u kholisehile hore lintho tseo u ithutileng tsona Bibeleng ke ’nete.—Jer. 20:8, 9. w17.12 26 ¶12, 14-15

Ha hoa lekana ho ruta ngoana oa hao feela ka batho le liketsahalo tse hlahang ka Bibeleng. Hopola hore Timothea le eena o ile a ‘susumelletsoa ho lumela.’ Polelo ea Segerike e sebelisitsoeng mona e bolela “ho kholiseha hore ntho e itseng ke ’nete.” Timothea o tsebile Mangolo a Seheberu “ho tloha boseeng,” e leng hore o a tsebile a sa le monyenyane haholo. Hamorao o ile a kholiseha hore Jesu ke eena Mesia. U ka thusa bana ba hao joang hore ba be le tumelo e matla joaloka Timothea? Ntlha ea pele, e-ba le mamello. Ho nka nako hore motho a be le tumelo e matla. Hape taba ea hore ebe uena u lumela ntho e itseng ha e bolele hore bana ba hao le bona ba se ba ntse ba e lumela. Ngoana ka mong o lokela ho sebelisa ‘matla a hae a ho nahana’ e le hore a kholisehe hore Bibele ke Lentsoe la Molimo. (Bar. 12:1) Uena u le motsoali, u ka thusa bana ba hao hore ba be le tumelo e matla, haholo-holo ha u araba lipotso tsa bona. w17.12 19 ¶3, 5-6

Maretha, eo e neng e le motsoalle oa Jesu e bile e le morutuoa oa hae, o ne a siame. Khaitseli ea hae, e leng Lazaro o ne a hlokahetse. Maretha o ne a ka tšelisoa ke’ng? Jesu o ile a re ho eena: “Khaitseli ea hao e tla tsoha.” (Joh. 11:20-23) Maretha o ne a kholisehile hore tsoho e tla etsahala nakong e tlang. Jesu o ile a etsa mohlolo eaba o tsosa Lazaro hona letsatsing leo. Ha rea lebella hore Jehova le Jesu ba re tsose hona joale ha re e-shoa. Empa na u kholisehile joaloka Maretha hore ho tla ba le tsoho ea bafu? E ka ’na eaba u hlokahalletsoe ke molekane, ’mè, ntate, ntate-moholo kapa nkhono. Mohlomong o hlokahalletsoe ke ngoana. U hloloheloa ho mo haka, ho bua le eena kapa ho tšeha le eena. Ho thabisang ke hore u ka bua ka phatla e phahameng joaloka Maretha oa re: ‘Kea tseba hore moratuoa oa ka o tla tsoha.’ Kaofela re lokela ho ba le mabaka a utloahalang a re kholisang hore bafu ba tla fela ba tsohe. w17.12 3 ¶1-2

Jesu o ne a rata Molao oa Moshe. Taba eo ha e re makatse hobane molao oo o ne o tsoa ho Ntate oa hae Jehova, e leng motho oa bohlokoa ka ho fetisisa bophelong ba Jesu. Temaneng ea letsatsi ea kajeno, Bibele e ile ea bolela esale pele hore na Jesu o ne a tla ikutloa joang ka Molao oa Jehova. Tsela eo Jesu a neng a etsa lintho ka eona e bontša hore Molao oa Jehova o phethahetse, o molemo ebile o lokela ho phethoa. (Mat. 5:17-19) E tlameha ebe Jesu o ile a utloa bohloko haholo ha bangoli le Bafarisi ba sebelisa Molao oa Ntate oa hae hampe. O ile a re ho bona: “Le fana ka karolo ea leshome ea koena le dille le kumine,” e leng se bolelang hore ba ne ba mamela esita le lintho tse nyenyane tse tlalehiloeng Molaong. Empa phoso e ne e le efe? Jesu o ile a re: “Empa le hlokomolohile litaba tse tōma haholo tsa Molao, e leng, toka le mohau le botšepehi.” (Mat. 23:23) Bafarisi ba ne ba batla feela ho etsa melao. Ba ne ba sa hlokomele se boleloang ke Molao ’me ba inka ba phahametse batho ba bang. Empa Jesu o ne a utloisisa hantle hore na Molao o ne o bolela’ng le hore na o ruta batho eng ka Jehova. w17.11 13 ¶1-2

Batho ba bang ba ka ’na ba re: ‘Ha rea lokela ho itšoara ka thata. Re lokela ho thabela bophelo. Phoso ke efe ka ho robala le motho eo e seng molakane oa hao?’ Lentsoe la Molimo le re ho fosahetse ho etsa bohlola. (1 Bathes. 4:4-8) Jehova o na le tokelo ea ho re etsetsa melao hobane ke eena ea re bopileng. O re monna le mosali ba nyalaneng ke bona feela ba lokelang ho etsa thobalano. Jehova o re etselitse melao hobane oa re rata. Oa tseba hore haeba re e mamela, e tla re tsoela molemo. Lelapa le mamelang melao ea Jehova, le tla momahana, le hlomphane ’me le tšepane. Molimo o tla felisa batho ba tsebang melao ea hae empa ba sa e mamele. (Baheb. 13:4) Lentsoe la Molimo le re ruta ho qoba ho etsa thobalano le batho bao e seng balekane ba rona. Re lokela ho khetha lintho tseo re li shebang. (Mat. 5:28, 29) Kahoo, re lokela ho qoba ho sheba litšoantšo tse litšila hammoho le ho mamela ’mino o litšila.—Baef. 5:3-5. w17.11 22 ¶9-10

Barapeli ba Jehova esale ba rorisa Jehova ka ho mo binela lipina. Ha Baiseraele ba sa ntse ba sebeletsa Jehova ka botšepehi, ba ne ba nka ’mino e le karolo ea bohlokoa ea borapeli ba bona. Mohlala, ha Davida a lokisetsa tšebeletso e neng e tl’o tšoareloa tempeleng, o ile a khetha Balevi ba 4 000 hore ba binele Jehova. Har’a bona, ho ne ho e-na le ba 288 “ba koetliselitsoeng ho binela Jehova, kaofela e le litsebi.” (1 Likron. 23:5; 25:7) Ho bapala ’mino le ho bina e ne e le karolo ea bohlokoa ha ho neheloa tempele. Bibele e re: “Eitse hang ha liletsi tsa literompeta le libini li le joaloka motho a le mong ka ho etsa hore molumo o le mong o rorisang le ho leboha Jehova o utloahale, le hang ha li phahamisitse molumo ka literompeta le licymbala le ka liletsa tsa pina le ka ho rorisa Jehova, . . . khanya ea Jehova e ne e tletse ntlo ea Molimo oa ’nete.” E tlameha ebe batho ba neng ba le moo ba ile ba matlafala tumelong.—2 Likron. 5:13, 14; 7:6. w17.11 4 ¶4-5

Jesu o ne a tseba hore lithuto tsa hae li tla arola malapa le hore balateli ba hae ba tla hloka ho ba sebete ha ba hanyetsoa. Morero oa Jesu e ne e le ho phatlalatsa molaetsa oa Molimo eseng ho qhala malapa. (Joh. 18:37) Leha ho le joalo, barutuoa ba hae ba ne ba lokela ho tseba hore ho ne ho ke ke ha e-ba bonolo ho mo latela, haholo-holo haeba metsoalle le beng ka bona ba sa amohele molaetsa. Kaha balateli ba Jesu ba ne ba batla ho mo khahlisa, ba ile ba mamella ha beng ka bona ba ba khesa ’me ba ba soma. Ka ho etsa joalo, ba ruile molemo o moholo ho feta seo ba lahlehetsoeng ke sona. (Mar. 10:29, 30) Re lokela ho tsoela pele re rata beng ka rona leha ba re hanyetsa hobane re le barapeli ba Jehova. Empa re lokela ho rata Jehova le Jesu ho ba feta. (Mat. 10:37) Re lokela ho hopola hore Satane a ka etsa hore beng ka rona ba re sitise ho tšepahalla Jehova. w17.10 13 ¶3-6

Pono ena e re fa tšepo ea hore Jehova a ke ke a lumella bokhopo har’a bahlanka ba hae. O tla bo felisa ka potlako. (1 Bakor. 5:13) Lengeloi le ile la re fa tšepo ea sena ha le ne le koahela seroto ka sekoahelo se boima ka potlako. Kahoo, pono ena e ne e fa Baiseraele ba mehleng ea Zakaria tšepo ea hore Jehova o tla boloka borapeli ba hae bo hloekile. Ka lehlakoreng le leng, pono ena e ne e hopotsa Bajuda hore ba lokela ho lula ba e-na le borapeli bo hloekileng. Jehova a ke ke a lumella bokhopo ho ba har’a bahlanka ba hae. Jehova o re file tokelo ea ho ba ka har’a mokhatlo oa hae o hloekileng ’me oa re sireletsa ebile oa re rata. Kaofela ha rona re na boikarabelo ba ho etsa hore mokhatlo oa hae o lule o hloekile. Bokhopo ha boa lokela ho ba teng har’a batho ba Molimo. w17.10 24 ¶14-15; 25 ¶17-18

Libuka tse qalang tsa Bibele tse 39 li ngotsoe ke Baiseraele kapa Bajuda. “Liphatlalatso tse halalelang tsa Molimo li ile tsa behoa tlhokomelong ea bona.” (Bar. 3:1, 2) Empa lilemong tsa bo-235 ho ea ho 284 mehleng ea bo-Daniele, Bajuda ba bangata ba ne ba se ba sa utloisise Seheberu. Hobane’ng? Hobane Alexandere e Moholo o ne a se a busa karolo e kholo ea lefatše. (Dan. 8:5-7, 20, 21) Kahoo, batho ba bangata ho akarelletsa le Bajuda, ba ile ba qala ho bua Segerike ho e-na le hore ba bue puo ea habo bona. Ba ne ba se ba sa utloisise Mangolo a ngotsoeng ka Seheberu. Bothata boo bo ne bo tla rarolloa joang? Bo ile ba rarolloa ka hore hamorao ho fetoleloe Bibele ka Segerike. Libuka tse ileng tsa fetoleloa li ile tsa tsejoa e le Septuagint ea Segerike, e leng phetolelo ea pele e nang le Testamente ea Khale e feletseng. w17.09 20 ¶7-9

Batsoali ba hloka ho ba sebete ’me ba hane ho sebetsa ka mor’a lihora tsa mosebetsi ka matsatsi ao ba eang tšimong, ba etsang borapeli ba lelapa le ka matsatsi a liboka. Ba tla be ba behela bana ba bona mohlala o motle ha ba etsa joalo. Hape, batsoali ba lokela ho ba sebete ha ba thusa bana ba bona ho etsa liqeto tse tla ba thusa hore ba sebeletse Jehova. Mohlala, batsoali ba bang ba tšaba ho khothalletsa bana ba bona ho nkela bopula-maliboho, ho thusa moo ho hlokehang bahoeletsi ba eketsehileng, ho sebetsa Bethele kapa kahong. Mohlomong batsoali ba tšaba hore ha ba se ba holile, bana ba bona ba ke ke ba khona ho ba hlokomela. Leha ho le joalo, batsoali ba lokela ho ba sebete ’me ba be le tumelo ea hore Jehova o tla phetha litšepiso tsa hae. (Pes. 37:25) Ha u thusa ngoana oa hao hore a tšepe Jehova ’me a itšetlehe ka eena, u bontša hore le uena u tšepa Jehova.—1 Sam. 1:27, 28; 2 Tim. 3:14, 15. w17.09 30 ¶14-15

U ka thusa bana ba hao joang hore ba khone ho ithiba hore ba se ke ba etsa lintho tseo Jehova a sa li rateng? Batsoali baa tseba hore ha ho bonolo hore bacha ba itšoare maemong ao. Batsoali ba lokela ho bontša bana ba bona ka liketso hore na ba ka ithiba joang. (Baef. 6:4) Kahoo, ha u bona hore bana ba hao ba sitoa ho itšoara linthong tse itseng, u lokela ho ipotsa hore na ebe u ba behela mohlala o motle. U se ke oa nahana hore bana ba hao ha ba hlokomele mohlala oa hao ha u ea tšimong le libokeng, kapa u etsa borapeli ba lelapa. U se ke oa tšaba ho hanela bana ba hao ka lintho tse itseng haeba ho hlokahala. Jehova o ile a behela Adama le Eva meeli e neng e ba ruta hore ba hlomphe bolaoli. Ka tsela e tšoanang, ha batsoali ba khalemela bana ba bile ba beha mohlala o motle, ba ba ruta hore ba khone ho itšoara. Ntho ea bohlokoa eo u ka e etsang ke ho ruta bana ba hao hore ba rate bolaoli ba Jehova le ho hlompha melao ea hae.​—Liprov. 1:5, 7, 8. w17.09 7 ¶17

Re tla lula re hlaheloa ke mathata hobane Jehova ha a e-s’o felise lefatše lena la Satane. Mesebetsi ha e eo, rea kula, rea hlorisoa, re hlaheloa ke likoluoa tsa tlhaho, rea utsoetsoa re bile re hlaheloa ke mathata a mang. Re lokela ho utloelana bohloko e le kannete e le ho bontša hore rea tšehetsana ha re e-na le mathata. Haeba re e-na le qenehelo e bonolo, re tla ba mosa ho batho ba bang. (Baef. 4:32) Haeba re etsa joalo, re tla khona ho etsisa Molimo ’me re tšelise batho ba bang. (2 Bakor. 1:3, 4) Re ka bontša joang hore re tsotella batho ba tsoang linaheng tse ling kapa Bakreste-’moho le rona ba kojoana li mahetleng? Re lokela ho ba amohela, re be metsoalle ea bona ’me re ba thuse hore ba ikutloe e le karolo ea phutheho. (1 Bakor. 12:22) Lipaki tse ngata li ithuta puo e ’ngoe hobane li tsotella batho ba tsoang linaheng tse ling. (1 Bakor. 9:23) Ka lebaka leo, Jehova o ile a li hlohonolofatsa. w17.08 23-24 ¶7-9

E mong le e mong oa rona o lokela ho ikemisetsa ho leta a sa fele pelo. Empa ke’ng e ka re thusang? Re lokela ho kopa Jehova hore a re fe moea o halalelang. Hopola hore ho ba le mamello ke karolo ea tholoana ea moea. (Baef. 3:16; 6:18; 1 Bathes. 5:17-19) Kopa Jehova hore a u thuse hore u mamelle u sa fele pelo. Hape, hopola hore na Abrahama, Josefa le Davida ba ile ba thusoa ke’ng hore ba letele litšepiso tsa Jehova ba sa fele pelo. Ba thusitsoe ke ho tšepa Jehova le ho ba le tumelo ho eena. Ha baa ka ba nahana feela ka hore na bona ba batla’ng. Ha re ntse re nahana kamoo lintho li ileng tsa ba tsamaela hantle kateng, seo se tla re thusa hore le rona re se ke ra fela pelo. Leha re ka thulana le mathata, re ikemiselitse ho leta. Ka linako tse ling re ka ’na ra re: “E tla ba halelele hakae, Jehova?” (Esa. 6:11) Empa ha re kopa hore Jehova a re fe moea o halalelang, re tla bua mantsoe a Jeremia a hlahang temaneng ea kajeno ea letsatsi. w17.08 7 ¶18-20

Ha Jesu e sa le ngoana, o ne a bapala. Lentsoe la Molimo le re ho na le “nako ea ho tšeha . . . le nako ea ho tlōla-tlōla.” (Moek. 3:4) Empa Jesu o ne a boetse a e-na le kamano e ntle le Jehova hobane o ne a ithuta Mangolo. Ha a le lilemo li 12, baruti ba ile ba makatsoa ke “kutloisiso ea hae le likarabo tsa hae.” (Luka 2:42, 46, 47) Ha Jesu a se a holile, e ne e le motho ea thabileng. O ne a thabisoa ke’ng? O ne a tseba hore Jehova o batla hore a “bolelle mafutsana litaba tse molemo . . . le [ho etsa] hore ba foufetseng ba boele ba bone.” (Luka 4:18) Kaha o ne a etsa lintho tseo Jehova a li batlang, o ne a lula a thabile. Jesu o ne a rata ho bolella batho ka Ntate oa hae ea leholimong. (Luka 10:21) Ka letsatsi le leng ka mor’a hore a rute mosali e mong ka bolumeli ba ’nete, o ile a re ho balateli ba hae: “Lijo tsa ka ke hore ke etse thato ea ea nthomileng le hore ke qete mosebetsi oa hae.” (Johanne 4:31-34) Kaha Jesu o ne a rata Jehova le batho, o ne a lula thabile. Ka tsela e tšoanang, le uena u tla thaba. w17.07 23 ¶4-5

Tsela eo Jesu a neng a utloela batho bohloko ka eona ha a le lefatšeng, e bontša hantle hore na Jehova o ikutloa joang ka batho. (Joh. 5:19) Jesu o ne a rometsoe lefatšeng hore a tšelise batho ba “robehileng lipelo” le “bohle ba siameng.” (Esa. 61:1, 2; Luka 4:17-21) Ke kahoo a neng a tsebahala ka ho utloela batho bohloko le ho labalabela ho ba thusa. (Baheb. 2:17) Bibele e re “Jesu Kreste oa tšoana maobane le kajeno, le ka ho sa feleng.” (Baheb. 13:8) Kaha Jesu “Moemeli ea ka Sehloohong oa bophelo” o tseba hantle hore na ho joang ho siama, “o khona ho phallela ba ntseng ba lekoa.” (Lik. 3:15; Baheb. 2:10, 18) Jesu o ntse a utloisisa bohloko ba ho shoeloa ’me o tla re tšelisa “ka nako e nepahetseng.”​—Baheb. 4:15, 16. w17.07 13 ¶6-7; 14 ¶10

Satane o lula a batla ho etsa hore re khaotse ho rata matlotlo a molemo ao Jehova a re fileng ’ona ’me a ka atleha ho etsa joalo. Re ka ea le khongoana holimo ra nahana hore re ka atleha bophelong ha re e-na le mosebetsi o re patalang chelete e ngata re bile re e-na le maruo. Moapostola Johanne o ile a re: “Lefatše lea feta ’me ho joalo le ka takatso ea lona.” (1 Joh. 2:15-17) Kahoo re lokela ho loanela hore re lule re rata matlotlo ao Jehova a re fang ’ona. Re lokela ho ikemisetsa ho tela eng kapa eng e ka re sitisang ho rata ’Muso oa Molimo. Re lule re sebetsa ka thata mosebetsing oa boboleli ’me re loanele ho lula re o rata le ho lula re batla ho ithuta lintho tse ncha ka Bibeleng. Ha re etsa joalo, re tla ba le ‘letlotlo le sa feleng le ka mohla maholimong, moo lesholu le sa atameleng kapa hona hore tšoèlè e je.’​—Luka 12:33. w17.06 13 ¶19-20

Jehova ha a hatelle batho bao a ba busang. Batho ba busoang ke eena ba na le bolokolohi ebile ba thabile. (2 Bakor. 3:17) Davida o ile a re: “Ho hlompheha le bokhabane li ka pel’a [Molimo], matla le thabo li sebakeng sa hae.” (1 Likron. 16:7, 27) Mopesaleme Ethane o ile a re: “Ho thaba batho ba tsebang mohoo oa thabo. Jehova, ba ntse ba tsamaea leseling la sefahleho sa hao. Ba ithabela lebitsong la hao letsatsi lohle. Ba phahamisoa ho lokeng ha hao.” (Pes. 89:15, 16) Ha re lula re nahanisisa ka lintho tse molemo tseo Jehova a li etsang, re tla kholiseha le ho feta hore o lokela ho re busa. Kaha Jehova ke eena ea re bopileng, oa tseba hore na ke lintho life tseo re li hlokang e le hore re thabe ’me o re fa tsona. Lintho tseo a batlang hore re li etse li molemong oa rona, esita le haeba ho hlokahala hore re itele.​—Esa. 48:17. w17.06 29 ¶10-11

Morali’abo rona e mong oa Engelane o ne a labalabela ho ba le bana empa a sa khone ho ba le bona. Ha a fihla lilemong tseo ho tsona a neng a se a sa khone ho ba le bana ho hang, o ile a utloa bohloko hobane o ne a batla ho ba le bana ka nako eo. Eena le mohats’a hae ba ile ba etsa qeto ea ho holisa ngoana eo e seng oa bona. Leha ho le joalo, o re: “Ho ile ha feta nako e telele pele ke tšeliseha hobane le hoja ke ne ke e-na le ngoana, e ne e se eo ke mo tsoetseng.” Ke ’nete hore Bibele e re mosali “o tla sireletsoa ka ho tsoala bana.” (1 Tim. 2:15) Empa ha se hore o tla fumana bophelo bo sa feleng ka ho ba le bana. Mantsoe ao a mpa a bolela hore ’mè o tla qoba ho seba batho ba bang le ho itšunya-tšunya litabeng tsa bona hobane o ba le mosebetsi o mongata oo a o etsang oa ho hlokomela bana ba hae le lelapa la hae.​—1 Tim. 5:13. w17.06 5-6 ¶6-8

Na Elihu o ne a bolela hore tšebeletso eo re e etsetsang Molimo ke ea lefeela? Che. O ne a bolela hore tšebeletso eo re mo etsetsang eona ha e mo thuse ka letho. Jehova ha a hloke letho. Re ke ke ra mo ruisa kapa ra mo ekeletsa matla. Leha ho le joalo, makhabane, litalenta kapa bokhoni boo re nang le bona ke letlotlo le tsoang ho Molimo ’me o ela hloko tsela eo re le sebelisang ka eona. Jehova o nka hore ha re rata bahlanka ba hae, ho tšoana le ha re mo rata. Liproverbia 19:17 e re: “Ea bontšang mohau ho ea tlaase o alima Jehova, ’me O tla mo buseletsa tšoaro ea hae.” Na lengolo lee le bolela hore kamehla Jehova oa hlokomela ha re hauhela batho ba bang? Na ’Mopi o inka a kolota batho ba hauhelang ba bang ebe o ba lefa ka ho ba hlohonolofatsa? E, Mor’a Molimo o ile a netefatsa sena.—Luka 14:13, 14. w17.04 29 ¶3-4

Ke’ng hape e ka re thusang hore re rate Lentsoe la Molimo? Ha re ea libokeng kamehla, re tla rata Lentsoe la Molimo le ho feta. Ha re le libokeng, re ithuta Bibele beke le beke re sebelisa Molula-Qhooa. Ena ke tsela e ka sehloohong eo re ithutang Bibele ka eona. Re lokela ho lokisetsa hantle e le hore re utloisise seo re ithutang sona Molula-Qhooeng. Ha re lokisetsa re ka bala Mangolo ’ohle a hlahang serapeng. Morao tjena re se re ka daonlouda Molula-Qhooa websaeteng ea jw.org kapa ra o bala ho JW Library ka lipuo tse ngata. Lisebelisoa tse ling tsa elektronike li re lumella ho fumana Mangolo kapele. Empa ho sa tsotellehe hore na re bala Molula-Qhooa hokae, re lokela ho bala Mangolo ao ka hloko ’me re nahanisise ka ’ona e le hore re rate Lentsoe la Molimo haholoanyane. w17.05 20 ¶14

Ka mor’a ho kolobetsoa, re lakatsa ho tsoela pele re phela tumellanong le boinehelo ba rona ho Molimo. Ha ho kamoo re ka fetohelang boitlamo ba hore re tla sebeletsa Molimo bophelo bohle. Haeba motho a se a sa batle ho sebeletsa Jehova kapa ho phela bophelo ba Bokreste, a ke ke a re boinehelo ba hae bo ne bo sa bolele letho. Hobane ha a inehela o ne a bontša hore o tla sebeletsa Molimo ka pelo eohle. Haeba a etsa sebe se tebileng, o tla ikarabella ka pel’a Jehova le phutheho. Le ka mohla, re se ke ‘ra tlohela lerato leo re neng re e-na le lona pele.’ Ho e-na le hoo, re batla hore Jesu a re ka rona: “Ke tseba liketso tsa hao, le lerato le tumelo le bosebeletsi le mamello ea hao, le hore liketso tsa hao tsa morao li feta tsa pele.” (Tšen. 2:4, 19) E se eka re ka tsoela pele ka cheseho re phelela boinehelo ba rona ho Molimo. Ha re etsa joalo re tla thabisa Jehova. w17.04 6-7 ¶12-13

“Na moahloli oa lefatše lohle a ke ke a etsa se nepahetseng?” (Gen. 18:25) Ha Abrahama a botsa potso eo, o ne a bontša hore o kholisehile hore Jehova o tla ahlola Sodoma le Gomora ka toka. O ne a kholisehile hore Jehova a ke ke a sebetsa ka ho hloka toka ka hore a “bolaee motho ea lokileng le ea khopo.” O ne a sa amahanye Jehova le ho hloka toka. Abrahama o ne a kholisehile joalo hobane a tseba hore Jehova ke mohloli oa toka le ho loka. Ha e le hantle, mantsoe a Seheberu a fetoletsoeng e le “toka” le “ho loka” hangata a hlaha ’moho ka Mangolong a Seheberu. Ha e le hantle, ha ho na phapang pakeng tsa toka le ho loka. Kaha Jehova ke eena mohloli oa toka, tsela eo a etsang lintho ka eona e tla lula e e-na le toka. Ho feta moo, ho latela Lentsoe la hae, “o rata ho loka le toka.”​—Pes. 33:5. w17.04 18 ¶1-2

Batsoali, mohlala oa lona o ka thusa bana ba lona ho fumana bophelo bo sa feleng. Ha bana ba lona ba bona hore le ‘batla ’muso pele,’ ba tla tšepa Jehova ka linako tsohle. (Mat. 6:33, 34) Ka hona, etsang hore ho sebeletsa Jehova e be ntho ea bohlokoa ka ho fetisisa bophelong ba lona ho e-na le ho batla maruo. Le se ke la ithatafalletsa bophelo ka likoloto. Batlang “letlotlo leholimong” e leng ho khahlisa Jehova, ho e-na le ho batla maruo kapa “thoriso ea batho.” (Mar. 10:21, 22; Joh. 12:43) Le se ke la hlokela bana ba lona nako. Ba bolelleng hore lea thaba ha ba khetha ho sebeletsa Jehova ho e-na le ho khetha ho ipatlela kapa hona ho le batlela maruo. Le se ke la beha bana ba lona tlas’a khatello ea hore ba sebetse ka sepheo sa hore le tle le hlabe khobe ka lemao. Hopolang hore “bana ha baa tšoanela ho bolokela batsoali ba bona, empa batsoali ba tšoanela ho bolokela bana ba bona.”—2 Bakor. 12:14. w17.05 8-9 ¶3-4