August

Jesu o ne a lula a e-na le khotso le ha a hlorisoa hobane o ne a tseba hore o thabisa Ntate oa hae. O ne a lula a mamela Jehova le maemong a boima. O ne a nka ho sebeletsa Jehova e le eona ntho ea bohlokoa ka ho fetisisa bophelong ba hae. Pele a e-tla lefatšeng, Jesu e ne e le “mosebetsi ea hloahloa” oa Molimo. (Liprov. 8:​30) ’Me ha a le lefatšeng o ne a chesehela ho ruta batho ka Ntate oa hae. (Mat. 6:9; Joh. 5:​17) Mosebetsi oo o ne o thabisa Jesu haholo. (Joh. 4:​34-36) Re etsisa Jesu ka hore re mamele Jehova le hore ‘kamehla ho be le ho hongata hoo re ka ho etsang mosebetsing oa Morena.’ (1 Bakor. 15:​58) Ho “tšoareha ka matla” mosebetsing oa boboleli ho tla re thusa hore re se ke ra tšoenyeha ka mathata a rona. (Lik. 18:5) Mohlala, hangata batho bao re kopanang le bona tšimong ba na le mathata a fetang a rona. Empa ha ba ithuta ka Jehova ’me ba mamela melao ea hae, bophelo ba bona boa fetoha ebile baa thaba. Kamehla ha re bona batho ba etsa liphetoho tsena, rea kholiseha hore Jehova o hlokomela bahlanka ba hae. w19.04 10-11 ¶8-9

Ba ile ba etsa sohle seo ba ka se khonang hore ba hlole meea e khopo. Libuka tsa bona tsa boselamose li ne li le turu haholo. Empa ba ile ba li chesa ho e-na le ho li fa batho ba bang kapa ho ba rekisetsa tsona. Ba ne ba amehile haholo ka ho khahlisa Jehova ho e-na le ho ngongoreha ka chelete eo ba e sentseng. Re ka etsisa Bakreste baa ba Efese joang? Re lokela ho lahla eng kapa eng e ka ’nang ea re amahanya le tšebelisano le meea. E akareletsang thatho, kapa ntho efe kapa efe eo batho ba e roalang kapa ba nang le eona ka sepheo sa hore e ba sireletse meeeng e khopo. (1 Bakor. 10:​21) Hlahloba lintho tseo u ithabisang ka tsona ka hloko. Ipotse: Na ho na le ntho leha e le efe eo ke ithabisang ka eona e amanang le ho sebelisana le meea? Ikemisetse ho etsa liqeto tse tla u thusa ho ba hole le ntho efe kapa efe eo Jehova a e hloileng. Re lokela ho leka ka hohle hore re be “le kelo-hloko” ea hore re se ke ra siteloa Molimo.​—Lik. 24:​16. w19.04 22-23 ¶10-12

Baholo ba nahana ka ho teba ka lintho tse ’maloa ha ba utloela hore ho na le motho ea entseng sebe se tebileng. Mosebetsi o ka sehloohong oa baholo ke ho tlotlisa Jehova le ho sireletsa lebitso la hae. (Lev. 22:​31, 32; Mat. 6:9) Ba boetse ba amehile haholo ka ho thusa bohle ba ka phuthehong hore ba lule ba e-na le kamano e ntle le Jehova le ho tšehetsa ba anngoeng ke sebe seo se tebileng. Ho phaella moo, haeba motho ea entseng sebe a le ka phuthehong, baholo ba na le boikarabelo ba ho leka ho mo thusa hore a bake le hore a lokise kamano ea hae le Jehova haeba ho khoneha. (Jak. 5:​14, 15) Mokreste ea etsang sebe se tebileng e le hore a khotsofatse takatso ea hae e fosahetseng a ka tšoantšoa le motho ea kulang. Sena se bolela hore ha a sa na kamano e ntle le Jehova. Ka tsela e itseng, re ka tšoantša baholo le lingaka. Ba leka ka hohle ho “etsa hore ea sa ikutloeng hantle [e leng moetsi oa sebe] a fole.” Ba ka mo fa likeletso tse thehiloeng Bibeleng tse ka mo thusang ho lokisa kamano ea hae le Jehova, haeba feela a ikemiselitse ho baka e le kannete.​—Lik. 3:​19; 2 Bakor. 2:​5-10. w19.05 10 ¶10-11

Jehova a ka re fa takatso ea ho batla ho mo sebeletsa. A re re mohlomong ho na le Mokreste-’moho le uena ea hlokang thuso phuthehong ea heno kapa phuthehong e ’ngoe. Taba ena e ka etsa hore re ipotse, ‘Nka thusa joang?’ Kapa e ka ’na eaba u fuoe mosebetsi o thata ’me oa ipotsa hore na u tla khona ho o etsa hantle. Ka linako tse ling ka mor’a hore u bale litemana tse itseng tsa Bibele, u ka ’na oa ipotsa hore na u ka li sebelisa joang e le hore u thuse batho ba bang. Haeba ho na le lintho tseo re ntseng re nahana ho li etsa, Jehova a ka re thusa hore re batle ho li etsa. A ka boetse a re fa matla a hore re mo sebeletse. (Esa. 40:​29) O etsa joalo joang? Ka hore a re fe moea o halalelang e le hore re ntlafatse bokhoni boo re nang le bona. (Ex. 35:​30-35) Jehova a ka sebelisa mokhatlo oa hae ho re ruta ho etsa mesebetsi e itseng. U ka kopa thuso haeba u sa tsebe hantle hore na u ka etsa mosebetsi oo u o fuoeng joang. U ka boetse oa kopa ntate oa rona ea seatla se bulehileng hore a u fe “matla a fetang se tloaelehileng.”​—2 Bakor. 4:7; Luka 11:​13. w19.10 21 ¶3-4

Ha ho makatse hore ebe lefatše lena le khothalletsa batho hore e be baithati. Buka e ’ngoe ea Encyclopedia e re lilemong tsa bo-1970, “libuka tse khothaletsang batho hore ba phele hamonate li ile tsa eketseha.” Tse ling tsa libuka tsena “li ile tsa khothaletsa babali ba tsona hore ha baa lokela ho fetola tsela eo ba phelang ka eona kapa ho nahana hore ho na le ho phoso ka bona.” Mohlala, e ’ngoe ea libuka tseo e re: “Ithate hobane u motle, u ratoa ke batho ebile u motho oa bohlokoa ka ho fetisisa.” Buka eo e re “motho o lokela ho iketsetsa qeto ea hore na o itšoara joang le hore o lokela ho etsa ntho e ’ngoe le e ’ngoe eo a e ratang ka nako eo a e batlang.” Na taba ee e ncha litsebeng tsa hao? Satane o ile a khothaletsa Eva hore a etse ntho e ’ngoe e tšoanang le ena. O ile a re Eva o tla ba “joaloka Molimo, [a] tsebe botle le bobe.” (Gen. 3:5) Mehleng ena, batho ba bangata ba iphahamisang ba lumela hore ha ho na motho leha e le ofe ea ka ba bolellang hore na ntho e itseng e nepahetse kapa e fosahetse, esita le Molimo. Mohlala, maikutlo ao a bona a bonahala tseleng eo ba talimang lenyalo ka eona. w19.05 23 ¶10-11

Ka nako e ’ngoe, mathata a ne a hloele Morena Davida setha. O ne a e-na le lintho tse ngata tse mo tšoenyang. O ne a ikutloa a le molato ka lebaka la libe tse ngata tseo a li entseng. (Pes. 40:​12) Mora oa hae eo a neng a mo rata o ile a mo tsohela matla, ’me qetellong mora eo o ile a hlokahala. (2 Sam. 15:​13, 14; 18:​33) Hape, e mong oa metsoalle ea hae ea hlooho ea khomo o ile a mo tsoa tlaase. (2 Sam. 16:​23–17:2; Pes. 55:​12-14) Lipesaleme tse ngata tseo Davida a ileng a li ngola li bontša kamoo a neng a utloile bohloko kateng le hore o ne a tšepile Jehova ka ho feletseng. (Pes. 38:​5-10; 94:​17-19) Neng-neng, mopesaleme e mong o ile a qala ho khalla bophelo ba batho ba khopo. E ka ’na eaba o ne a e-tsoa lelokong la Asafe ’me o ne a sebeletsa “ka sehalalelong se seholo sa Molimo.” Mopesaleme enoa o ne a hatelehile haholo maikutlong, e leng ntho e neng e etsa hore a lule a sa thaba a bile a sa khotsofala. O ile a ba a qetella a se a belaella litlhohonolofatso tseo a li fumanang ka ho sebeletsa Molimo.​—Pes. 73:​2-5, 7, 12-14, 16, 17, 21. w19.06 17 ¶12-13

Satane o lemoha takatso ea batho ea ho rata ho rua. Ke ha tlhaho hore re batle ho ithuta mesebetsi e itseng e tla re thusa ho hlokomela ba malapa a rona. (1 Tim. 5:8) Hangata re ithuta mesebetsi eo ka ho ea sekolong le ho ba baithuti ba hloahloa. Empa re lokela ho ba hlokolosi. Linaheng tse ngata, baithuti ba ithuta lintho tsa bohlokoa ha ba le sekolong, empa ba boetse ba ithuta lineano tsa batho. Mohlala, likolo li ruta baithuti hore ba se ke ba lumela hore Molimo o teng le hore ba se ke ba tšepa Bibele. Ba rutoa hore batho bohle ba bohlale ba lumela hore lintho tsohle li bile teng ka ho iphetola. (Bar. 1:​21-23) Lithuto tse joalo li hanyetsana le ‘bohlale ba Molimo. (1 Bakor. 1:​19-21; 3:​18-20) E se eka re ka ikemisetsa hore le ka mohla re se ke ra khelosoa ke “filosofi le thetso ea lefeela” tsa lefatše la Satane. (Bakol. 2:8) Lula u itebetse e le hore Satane a se ke a u khelosa. (1 Bakor. 3:​18) Le ka mohla u se ke oa lumella Satane hore a u lebatse Jehova. Tsoela pele u phela ka melao ea Jehova. U se ke oa lumella Satane hore a etse hore u iphapanyetse likeletso tsa Jehova. w19.06 5 ¶13; 7 ¶17

Ha u khetha taba leha e le efe eo u batlang ho bua ka eona, u nahane ka batho bao u tl’o bua le bona. Nahana hore na ba tla rua molemo hakaakang ha ba ithuta seo Bibele e se re rutang. Ha u ntse u bua le bona, ke habohlokoa hore u ba mamele ka hloko ’me u ananele maikutlo a bona. Ha u etsa joalo u tla ba utloisisa hantle ’me ba tla nolofalloa ho u mamela. Pele motho a lumela ho ithuta Bibele u ka ’na oa lokela ho qeta nako e itseng u etsa maeto a ho boela. Hobane’ng? Hobane ka linako tse ling u ka ’na oa fumana a le sieo lapeng kapa a se na nako. Hape, u ka ’na oa lokela ho khutlela ho motho ka makhetlo a ’maloa pele a ikutloa a phutholohile hore a ithute Bibele le uena. U hopole hore semela se khona ho hola hantle ha se nosetsoa khafetsa. Ka tsela e tšoanang, ha re bua le motho khafetsa ka Lentsoe la Molimo, seo se tla etsa hore a rate Jehova le Jesu haholoanyane. w19.07 14 ¶1; 15-16 ¶7-8

Jesu o ne a bolela’ng ha a cho joalo? O ne a sa re Bakreste ba tla thabela ho hlouoa. Ho e-na le hoo, o ne a re lemosa hore na re tla hlaheloa ke’ng. Ha re karolo ea lefatše lena. Re tataisoa ke lithuto tsa Jesu bophelong ba rona hape re etsa mosebetsi oo a neng a o etsa oa ho ruta batho Bibele. Ka lebaka leo, lefatše le re hloile. (Joh. 15:​18-21) Re batla ho thabisa Jehova. Kahoo, haeba batho ba re hloea hobane re rata Jehova, ke taba ea bona. Botumo boo re nang le bona ho batho ha se bona bo etsang hore re be ba bohlokoa ho Jehova. Ha re tsebe hore na re tla thulana le mahloriso neng kapa hore na ba boholong ba tla thibela mosebetsi oa rona neng. Leha ho le joalo, rea tseba hore re lokela ho itokisa esale hona joale ka hore re matlafatse kamano ea rona le Jehova, re be sebete hape re hlole bothata ba ho tšaba batho. Ha re roalla le sa sele, re tla khona ho sebeletsa Jehova le nakong e tlang. w19.07 6 ¶17-18; 7 ¶21

Ha re ithuta Bibele le batho ba sa lumeleng hore Molimo o teng, re lokela hore nako le nako re ba thuse ho tiisa tumelo ea bona ea hore Molimo o teng. Hape re lokela ho ba thusa hore ba tšepe Bibele. Ho ka ’na ha hlokeha hore re pheta-phete lithuto tse ling tsa Bibele. Nako eohle ha re ithuta Bibele le bona, re ka ’na ra lokela ho hlahloba bopaki ba hore Bibele ke Lentsoe la Molimo ka ho bua ka boprofeta ba Bibele bo ileng ba phethahala, hore na Bibele e lumellana joang le saense le histori kapa hore na e ka re thusa joang bophelong. Re thusa batho hore ebe barutuoa ba Kreste ka hore re ba rate ho sa tsotellehe hore na ke balumeli kapa che. (1 Bakor. 13:1) Ha re ntse re ba ruta, sepheo sa rona ke ho ba bontša hore Molimo oa ba rata le hore le eena o batla hore re mo rate. Selemo le selemo, batho ba likete bao pele ba neng ba se na thahasello ea bolumeli baa kolobetsoa hobane ba thusitsoe hore ba rate Molimo. Kahoo, e-ba le mamello ’me u bontše batho ba mefuta eohle hore oa ba tsotella. Ba mamele ka hloko. Leka ho utloisisa hore na ba ikutloa joang. Ba behele mohlala o motle e le hore u ba thuse hore ebe balateli ba Kreste. w19.07 24 ¶16-17

Barali ba Shalume ba ne ba le har’a batho bao Jehova a ileng a ba sebelisa ho lokisa marako a Jerusalema. (Neh. 2:​20; 3:​12) Le hoja Shalume e ne e le khosana, barali ba hae ba ne ba ikemiselitse ho etsa mosebetsi oo o thata le o kotsi. (Neh. 4:​15-18) Le mehleng ena, ho na le baralib’abo rona ba ikemiselitseng ho etsetsa Jehova tšebeletso e khethehileng, e kang ho ba kahong le mafapheng a lokisang mehaho e sebelisoang bakeng sa borapeli ba Jehova. Re hloka barali bana babo rona ba nang le boiphihlelo, ba chesehang le ba tšepahalang e le hore mosebetsi ona o atlehe. Jehova o ile a susumetsa Tabitha hore a ‘tlale liketso tse molemo le limpho tsa mohau’ haholo-holo bakeng sa bahlolohali. (Lik. 9:​36) Kaha o ne a le seatla se bulehileng a bile a le mosa, batho ba bangata ba ile ba utloa bohloko haholo ha a shoa. Empa ba ile ba thaba haholo ha moapostola Petrose a mo tsosa. (Lik. 9:​39-41) Re ka ithuta’ng ho Tabitha? Ho sa tsotellehe hore na re baholo, re banyane, re bo-’mè kapa bo-ntate, ho na le lintho tseo re ka li etsang ho thusa bara le barali babo rona. w19.10 23 ¶11-12

Re ka khopisa batho ba bang joang? Nahana ka mohlala ona. Motho e mong ea neng a ntse a ithuta Bibele o ile a khona ho hlola bothata ba ho lemalla joala. O ile a bona hore o lokela ho bo tlohela ka ho feletseng. O ile a etsa liphetoho ’me a kolobetsoa. Ka letsatsi le leng, mor’abo rona e mong o ile a mo mema, ea re ha a le moo, o mo fa joala ’me a re ho eena: “Ho ba le boitšoaro ho tla u thusa hore u lekanyetse tsela eo u noang ka eona.” E ne e tla ba ntho e bohloko hakaakang haeba mor’abo rona a ne a ka mamela keletso eo e fosahetseng eaba o noa joala ’me a khutlela mekhoeng ea hae ea ho bo lemalla! Liboka li re thusa ho mamela litaelo tse hlahang temaneng ea letsatsi ea kajeno. Li re thusa ho bona hore na ke lintho life tseo Jehova a li nkang li le bohlokoa. Hape, li re thusa ho sebelisa lintho tseo re ntseng re ithuta tsona e le hore re hloke sekoli. Li boetse li etsa hore re rate Molimo le hore re rate Bakreste-’moho le rona. Haeba re rata Molimo le Bakreste-’moho le rona ka lipelo tsohle, re tla loanela hore re qobe ho ba khopisa. w19.08 10 ¶9; 11 ¶13-14

Batho ba bang ba ipuela feela empa ha se hore ke batho ba ipatlang. (Joh. 1:​46, 47) Ho sa tsotellehe hore na re batho ba ipuelang feela kapa che, kaofela ha rona re lokela ho loanela hore re be batho ba ikokobelitseng. Ak’u nahane ka moapostola Pauluse. Jehova o ile a mo sebelisa hore a thehe liphutheho tse ngata libakeng tse fapaneng. Ho ka etsahala hore ebe o ile etsa mosebetsi o moholo le ho feta baapostola ba bang ba Jesu Kreste. Ho ntse ho le joalo, Pauluse ha a ka a inka a phahametse Bakreste-’moho le eena. Pauluse o ne a nepile ha a re o na le kamano e ntle le Jehova ka lebaka la mosa o sa tšoanelang oo Jehova a mo bontšitseng oona, eseng hobane e le oa bohlokoa kapa ho na le hoo a ho finyeletseng. (1 Bakor. 15:​10) Pauluse o bontšitse mohlala o motle oa boikokobetso. Ha a ne a ngolla Bakorinthe lengolo, ha a ka a ipolelisa le hoja batho ba bang phuthehong eo ba ne ba mo khella fatše.​—2 Bakor. 10:​10. w19.09 3 ¶5-6

Lebaka leo ka lona ho ka bang thata ho mamela Jehova ke hobane re futsitse sebe ’me re etsa liphoso. Kahoo, ha se kamehla re batlang ho mamela Molimo. Ha Adama le Eva ba ja tholoana e thibetsoeng, ha baa ka ba mamela Molimo ’me ka ho etsa joalo ba iketsetsa qeto ea hore na ke sefe se nepahetseng le se fosahetseng. (Gen. 3:​22) Le kajeno, batho ba bangata ha ba batle ho mamela Molimo ebile baa ikhethela hore na ba batla ho etsa’ng. Ho ntse ho ka ba thata le ho bahlanka ba ratang Jehova hore ba mo mamele kamehla. Moapostola Pauluse le eena o ile a tobana le bothata boo. (Bar. 7:​21-23) Le rona joaloka Pauluse re batla ho etsa lintho tseo Jehova a li ratang. Empa kamehla re lokela ho loana ka thata hore re se ke ra etsa lintho tse fosahetseng. Ho ka boela ha e-ba thata ho mamela Jehova ka lebaka la mekhoa le litloaelo tsa moo re holetseng teng. Maikutlo a batho ba bangata ha a lumellane le thato ea Jehova. Kahoo, re lokela ho leka ka hohle hore re se ke ra ba le maikutlo a tšoanang le a bona. w19.09 15 ¶4-6

Re lokela ho hlokomela hore matla ao re nang le ’ona ho na le nako eo a felang. Ka hona, re tlameha ho ba seli ka hore na re leka ho etsa lintho life. Ka mohlala, re ka iqeta matla re bokella maruo. Hlokomela karabo ea Jesu ha monna e mong ea ruileng a mo botsa a re: “Ke etse’ng hore ke rue bophelo bo sa feleng?” E tlameha ebe e ne e le monna ea lokileng hobane Kosepele ea Mareka e tlaleha hore Jesu o ile “a ikutloa a mo rata.” Jesu o ile a mema monna eo ka mantsoe a hlahang temaneng ea letsatsi ea kajeno. Monna enoa o ne a batla ho latela Jesu empa o ne a sitoa ho tela matlotlo a hae a mangata. (Mar. 10:​17-22) Ka lebaka leo, o ile a hana ho jara joko ea Jesu ’me a tsoela pele ho sebeletsa “maruo.” (Mat. 6:​24) Uena u ka be u entse’ng? Ke ntho e ntle hore nako le nako re lule re nahana ka hore na ke lintho life tse tlang pele bophelong ba rona. Hobane’ng? E le hore re etse bonnete ba hore re sebelisa matla a rona ka bohlale. w19.09 24 ¶17-18

Re ke ke ra emisa ho bolella batho ka ’Muso oa Molimo ho fihlela ha Jehova a re ho lekane. Ho setse nako e kae hore batho ba ithute ka Jehova le Jesu? (Joh. 17:3) Ha re tsebe. Ntho eo re e tsebang ke hore pele matšoenyeho a maholo a qala, bohle ba nang “le tšekamelo e nepahetseng bakeng sa bophelo bo sa feleng” ba tla lumela ho ithuta ka Jehova le ho mo sebeletsa. (Lik. 13:​48) Re ka ba thusa joang pele ba siuoa ke nako? Jehova o sebelisa mokhatlo oa hae ho re fa lintho tsohle tseo re li hlokang ho ruta batho Bibele. Mohlala, beke le beke Seboka sa​—Bophelo ba Bokreste le Tšebeletso ea rona sea re koetlisa. Se re fa malebela a hore na re ka re’ng leetong la pele le maetong a ho boela. Ka mor’a hore u buisane le motho ea thahasellang, mo siele pampitšana kapa makasine eo a tla sala a e bala ho fihlela ha le kopana hape. Ke boikarabelo ba rona ho lula re phathahane mosebetsing oa ho ruta batho Bibele khoeli le khoeli. w19.10 9 ¶7; 10 ¶9-10

Simeone e ne e le ntate-moholo ea tšepahalang ea neng a lula Jerusalema. Jehova o ile mo tšepisa hore a ke ke a shoa pele a bona Mesia. Haesale Simeone a emetse ho tla ha Mesia ka lilemo tse ngata, kahoo e tlameha ebe o ile a khothala haholo ha Jehova a mo fa tšepiso eo. Kaha o ne a e-na le tumelo le mamello, Jehova o ile a mo putsa. Ka letsatsi le leng, o ile a susumetsoa ke moea o halalelang hore a ee tempeleng. Ha a le moo, o ile a bona ngoana e monyenyane e leng Jesu ’me Jehova o ile a sebelisa Simeone ho profeta ka ngoana enoa eo e neng e tla ba Kreste. (Luka 2:​25-35) Le hoja e ka ’na eaba Simeone o ile a shoa pele Jesu a qala tšebeletso ea hae, o ile a ananela hore ebe Jehova o ile a mo sebelisa ka tsela eo ’me likholo li sa tla bakeng sa hae. Lefatšeng le lecha, Simeone o tla bona kamoo puso ea Jesu e tla tlisetsa batho litlhohonolofatso kateng. (Gen. 22:​18) Le rona re ananela litsela leha e le life tseo Jehova a re sebelisang ka tsona tšebeletsong ea hae. w19.10 22 ¶7; 23 ¶12

Ebang u na le chelete e ngata kapa che, u lokela ho sireletsa pelo ea hao. Joang? Ka hore u se ke oa rata maruo. Hape u se ke oa lumella hore mosebetsi oa hao o be bohlokoa haholo ho feta ho sebeletsa Jehova. U ka tseba joang haeba bothata boo bo se bo u nanarela? Tse ling tsa lipotso tseo u ka ipotsang tsona ke tsena: ‘Na ka linako tse ling ke nahana ka mosebetsi oa ka ha ke le libokeng le tšimong? Na hangata ke tšoenyeha ka hore nakong e tlang ke eme hantle licheleteng? Na chelete le maruo li etsa hore re qabane le molekane oa ka? Na nka sebetsa mosebetsi oo batho ba bang ba o khellang fatše haeba feela o ntumella ho ba le nako e ngata ea ho sebeletsa Jehova?’ (1 Tim. 6:​9-12) Ha u ntse u nahanisisa ka lipotso tsena, u lokela ho hopola hore Jehova oa u rata le hore o fana ka tšepiso ena ho batho bohle ba inehetseng ho eena: “Ho hang nke ke ka u tlohela kapa ka u furalla.” Ke ka lebaka leo moapostola Pauluse a ileng a re: “Mokhoa oa lona oa bophelo e ke e be o se nang lerato la chelete.”​—Baheb. 13:​5, 6. w19.10 29 ¶10

Ha re sebetsa le Bakreste-’moho le rona ’me re bona makhabane a bona, re ithuta ho bona le ho atamela haufi le bona. Ka mohlala, u ee u ikutloe joang ha u le tšimong le motsoalle oa hao joale ka sebete a bua ka tumelo ea hae kapa a ruta batho ka Jehova le merero ea hae a kholisehile? E ka ’na eaba u ee u utloe u mo rata le ho feta. Morali’abo rona Adeline ea lilemo li 23 o ile a kopa e mong oa metsoalle ea hae e leng Morali’abo rona Candice hore ba il’o sebetsa tšimo e sa sebetsoeng hangata. O re: “Re ne re batla ho bolela ka cheseho le ho thabela tšebeletso ea rona haholoanyane. Re ne re hloka ho khothatsana e le hore re ka sebeletsa Jehova ka hohle kamoo re ka khonang.” Ba ile ba rua molemo joang ka ho sebetsa hammoho? Morali’abo rona Adeline o re: “Qetellong ea letsatsi ka leng, re ne re bua ka hore na re ikutloa joang, ka lintho tse ileng tsa re khothatsa le kamoo Jehova a ileng a re thusa ha re le tšimong. Re ile ra thabela ho ba le meqoqo e joalo ’me ra tsebana haholoanyane.” w19.11 5 ¶10-11

Mehleng ea boholo-holo, lesole le ne le hlajoa ke lihlong ha le ne le ka khutlela hae le sa nka thebe ea lona. Rahistori oa Moroma ea bitsoang Tacitus o re: “E ne e e-ba thohako haeba lesole le ne le khutlela hae le sa nka thebe.” Lena ke le leng la mabaka ao ka ’ona masole a neng a tšoara lithebe ka thata. Re tšoara thebe ea rona ea tumelo ka thata ka hore re be teng libokeng tsa Bokreste kamehla le ho bolella batho ba bang ka Jehova le ’Muso oa hae. (Baheb. 10:​23-25) Re boetse re bala Bibele letsatsi le letsatsi le ho rapela Jehova hore a re thuse ho phela ka melao-motheo ea hae. (2 Tim. 3:​16, 17) Ka tsela ena, sebetsa le ha e le sefe seo Satane a tla se sebelisa khahlanong le rona se ke ke sa re ntša kotsi ho ea ho ile. (Esa. 54:​17) “Thebe e kholo ea tumelo” ea rona e tla re sireletsa. Ka sebete re tla sebetsa hammoho le Bakreste-’moho le rona. Re ke ke ra hlola ntoa eo re e loanang letsatsi le letsatsi feela empa re tla ba le tlotla ea ho ba ka lehlakoreng la Jesu ha a hlola Satane le bo-mphato ba hae.​—Tšen. 17:​14; 20:​10. w19.11 19 ¶18-19

Ha u ngola fatše lintho tseo u batlang ho li etsa, ho ba bonolo hore u li etse. (1 Bakor. 14:​40) Mohlala, baholo ba lokela ho khetha mor’abo rona e mong ea tla ngola lintlha, ea tla etsa mosebetsi o itseng le hore na mosebetsi oo o be o phethiloe neng. Ha baholo ba etsa joalo, ho tla ba bonolo hore ba etse lintho tseo ba rerileng ho li etsa. U ka etsa se tšoanang bophelong ba letsatsi le letsatsi. Mohlala, u ka etsa lethathamo la lintho tseo u batlang ho li etsa ’me u ngole ea bohlokoa ka holimo-limo. Ha u etsa joalo, u tla khona ho phetha lintho tseo u li rerileng hape u phethe le lintho tse ngata ka nako e khutšoanyane feela. Empa u tla lokela hore u ithukhubetse. U hloka ho sebetsa ka thata e le hore u etse lintho tsohle tseo u li ngotseng fatše le hore u qete tseo u li qalileng. (Bar. 12:​11) Moapostola Pauluse o ile a bolella Timothea hore a ‘ikitlaetse’ le hore a mamelle e le hore e tle e be mosuoe ea hloahloa. Re ka sebelisa keletso ena ea Pauluse nthong e ’ngoe le e ’ngoe eo re e etsetsang Jehova.​—1 Tim. 4:​13, 16. w19.11 29-30 ¶15-16

Ha Jehova a laela Moshe hore a etelle sechaba sa Iseraele pele ha se tsoa Egepeta, o ile a bolella Jehova hore ha a itšepe ’me ka makhetlo-khetlo a mo bolella hore o ikutloa a sa tšoanelehe. Tsela eo Jehova a ileng a arabela Moshe ka eona e ne e bontša hore o mosa ebile oa utloisisa hore na o ikutloa joang eaba oa mo thusa. (Ex. 4:​10-16) Kahoo, Moshe o ile a khona ho bolella Faro molaetsa o matla oa kahlolo oa Jehova. Moshe o ile a bona ha Jehova a sebelisa matla a hae ho pholosa Baiseraele le ha a felisa Faro hammoho le lebotho la hae Leoatleng le Lefubelu. (Ex. 14:​26-31; Pes. 136:​15) Ka mor’a hore Moshe a ntše Baiseraele Egepeta, ba ne ba lula ba korotla. Leha ho le joalo, Moshe o ile a bona mamello e tsotehang ea Jehova ha a sebelisana le sechaba sa hae seo a se ntšitseng bokhobeng. (Pes. 78:​40-43) O ile a boela a bona hore Jehova o ikokobelitse ka tsela e ikhethang ka mor’a hore a fetole monahano oa hae ha a mo kopa hore a etse joalo. (Ex. 32:​9-14) Ka mor’a hore Baiseraele ba tsoe Egepeta, kamano ea Moshe le Molimo e ile ea matlafala hoo e neng eka o bona Molimo.​—Baheb. 11:​27. w19.12 17 ¶7-9

Boholo ba barutuoa ba Jesu e ne e le Bagalilea. Kahoo, ho ne ho tla ba bonolo hore batho ba bangata ba be teng ha seboka seo se tšoareloa thabeng ea Galilea ho e-na le hore se be ha motho e mong Jerusalema. Hape, ka mor’a hore Jesu a tsosoe, o ne a se a kopane le barutuoa ba hae ba 11 ntlong e ’ngoe Jerusalema. Haeba Jesu a ne a batla ho laela baapostola ba hae feela hore e be bona ba etsang barutuoa, a ka be a ile a ba bolella taba eo a le Jerusalema ho e-na le hore a ba kope hammoho le basali bao le batho ba bang hore ba kopane le eena Galilea. (Luka 24:​33, 36) Taelo ena ea Jesu ea hore batho ba etse barutuoa e ne e sa fuoa Bakreste ba phelang mehleng eo feela. Re tseba joang? Jesu o ile a qetella ka hore ho bona: “Ke na le lona ka matsatsi ’ohle ho fihlela qetellong ea tsamaiso ea lintho.” (Mat. 28:​19, 20) Batho ba bangata mehleng ena ba etsa batho barutuoa. Nahana feela, selemo le selemo batho ba ka bang 300 000 e ba barutuoa ba Jesu, baa kolobetsoa ’me e ba Lipaki Tsa Jehova. w20.01 2 ¶1; 3 ¶5-6

Na u mocha ’me u na le lefu leo ngaka e u boleletseng hore le tla ’ne le u qete matla hanyane ka hanyane? Na u se u holile’me u sokola mosebetsi? Kapa, na u se u tsofetse ’me ha u sa khona ho sebeletsa Jehova joaloka pele? Haeba u na le bothata bo tšoanang le bo boletsoeng ka holimo, u ka ’na oa ikutloa u se na thuso. Maemo ao a ka etsa hore u se ke oa thaba, u ikhalale ’me a etsa hore likamano tsa hao le batho ba bang li senyehe. Tsela eo batho ba phelang ka eona e bontša hantle hore na Satane o ikutloa joang ka bophelo. Haesale a tšoara batho joaloka lintho tse se nang thuso. Ka bokhopo bohle o ile a re Eva o tla lokoloha haeba a sa mamele Molimo le hoja a ne a tseba hantle hore phello ea ho se mamele Molimo ke lefu. Haesale e le eena ea laolang lefatše lena. Kahoo, ha ho makatse hore ebe baeta-pele ba bangata ba lefatše lena ha ba nke bophelo e le ba bohlokoa ebile ha ba tsotelle hore na batho ba bang ba ikutloa joang. Empa ho fapana le Satane, Jehova eena o batla hore re ikutloe re le batho ba bohlokoa, ebile oa re tšehetsa ha re thulana le mathata a ka etsang hore re ikutloe re se na thuso.​—Bar. 12:3. w20.01 14 ¶1-4

Jeremia o phetse lilemo tse 40 kapa ho feta har’a batho ba sa tšepahaleng ba neng ba akareletsa baahisane ba hae, mohlomong le batho bao a neng a amana le bona ba neng ba lula motseng oa habo oa Anathothe. (Jer. 12:6) Leha ho le joalo, o ne a sa itšehle thajana. Ha e le hantle, o ile a joetsa mongoli oa hae e leng Baruke hore na o ikutloa joang ’me le rona rea tseba hobane maikutlo ao a hae a ngotsoe ka Bibeleng. (Jer. 8:​21; 9:1; 20:​14-18; 45:1) Ha Baruke a ntse a ngola lintho tsohle tse etsahaletseng Jeremia, e tlameha ebe ka bobeli ba ile ba ratana haholo le ho hlomphana. (Jer. 20:​1, 2; 26:​7-11) Ka sebete, Jeremia o ile a lemosa Baiseraele ka lilemo tse ngata hore na ho tl’o etsahala’ng ka Jerusalema. (Jer. 25:3) Jehova o ile a boela a ipiletsa ho Baiseraele hore ba bake eaba o re Jeremia a ngole litemoso tsa Hae moqolong. (Jer. 36:​1-4) E ka ’na eaba Jeremia le Baruke ba sebelitse ’moho ka likhoeli tse ’maloa ’me e tlameha ebe ba ne ba buisana ka lintho tse ba matlafatsang tumelo ha ba ntse ba etsa mosebetsi oo Jehova a ba fileng oona. w19.11 2-3 ¶3-4

Re lokela ho tšoara bara le barali babo rona ba tlotsitsoeng joang? Ke phoso ho nkela motho e mong holimo haholo, esita le haeba e le Mokreste ea tlotsitsoeng. (Mat. 23:​8-11) Bibele e re khothalletsa ho etsisa tumelo ea baholo empa ha e re re etse motho le ha e le ofe moeta-pele oa rona. (Baheb. 13:7) Ke ’nete hore Bibele e re baholo ba bang ba tšoaneloa ke “tlhompho e habeli.” Lebaka ke hobane ba “okamela ka tsela e ntle” hape ba “sebetsa ka thata ho bueng le ho ruteng” e seng hobane e le batlotsuoa. (1 Tim. 5:​17) Haeba re rorisa batlotsuoa ho tlola, re ka etsa hore ba ikutloe ba le basesaane. Ho hobe le ho feta ke hore re ka etsa hore ba qetelle ba se ba ikhohomosa. (Bar. 12:3) Ho hang ha re batle ho etsa letho le ka etsang hore barab’abo Kreste ba tlotsitsoeng ba etse phoso e kholo hakaalo!​—Luka 17:2. w20.01 29 ¶8

Pauluse o ne a e-na le mabaka a mangata a ho tšoenyeha. Mathata ao ba neng ba thulana le ’ona a ne a mo tetebetsa haholo a bile a etsa hore a lule a tšoenyehile. (2 Bakor. 2:4; 11:​28) Bahanyetsi ba hae ba ile ba mo otla hangata le ho mo lahlela chankaneng. O ne a boetse a tlameha ho mamella mathata a tšoenyang a kang “ho haelloa ke lijo.” (Bafil. 4:​12) Hape, ha u hopola hore Pauluse o ile a robeheloa ke sekepe ka makhetlo a ka bang mararo, u ka inahanela feela hore na o ne a tšoenyeha ho le hokae hore a nke leeto ka sekepe. (2 Bakor. 11:​23-27) Joale, Pauluse o ile a thusoa ke’ng ha a ne tšoenyehile? Pauluse o ne a tšoenyeha ha balumeli-’moho le eena ba thulana le mathata empa ha a ka a rarolla mathata a bona a le mong. O ne a ikokobelitse. O ile a kopa batho ba bang hore ba thuse liphutheho le ho li hlokomela e leng banna ba tšepahalang ba kang Timothea le Tite. Mosebetsi oo bara bao babo rona ba ileng ba o etsa, o ile oa etsa hore Pauluse a se ke a tšoenyeha haholo.​—Bafil. 2:​19, 20; Tite 1:​1, 4, 5.w20.02 23 ¶11-12

Jehova o boetse o lebeletse hore le eena re mo mamele. Re lokela ho mamela Jehova hobane ke ’Mopi oa rona, o re file bophelo hape ke motsoali ea bohlale ka ho fetisisa. Lebaka le ka sehloohong leo re mamelang Jehova ka lona ke hobane rea mo rata. (1 Joh. 5:3.) Le hoja re e-na le mabaka a mangata a ho mamela Jehova, ha a re qobelle ho etsa joalo. Jehova o re file bolokolohi ba ho ikhethela, kahoo oa thaba ha re khetha ho mo mamela hobane re mo rata. Batsoali ba batla hore bana ba bona ba sireletsehe. Ke ka lebaka leo ba ba behelang melao. Ha bana ba mamela melao eo, ba bontša hore ba mamela batsoali ba bona hape baa ba hlompha. Kahoo, ke habohlokoa le ho feta hore re tsebe melao ea Ntate oa rona re be re e mamele. Ha re etsa joalo, re bontša hore re rata Jehova le ho mo hlompha hape re itsoela molemo. (Esa. 48:​17, 18) Empa batho ba sa mameleng Jehova ba khola litholoana tse bosula.​—Bagal. 6:​7, 8. w20.02 9-10 ¶8-9

Joaloka Abigaile, re lokela ho ba sebete ha re bua le motho haeba re bona hore o etsa ntho e ka etsang hore a etse sebe se tebileng. (Pes. 141:5) Re lokela ho mo hlompha empa re boetse re lokela ho ba sebete. Ha re eletsa batho re bontša hore re metsoalle ea ’nete. (Liprov. 27:​17) Ke habohlokoa hore baholo ba be sebete ha ba bua le bahoeletsi ba entseng phoso. (Bagal. 6:1) Ka boikokobetso, baholo baa tseba hore le bona ha baa phethahala ’me ho na le nako eo ka eona ba tla hloka ho eletsoa. Empa taba eo ha e sitise baholo ho khalemela batho ba hlokang ho khalemeloa. (2 Tim. 4:2; Tite 1:9) Ha ba fa motho keletso, ba leka ho sebelisa mpho ea bona ea ho bua ka ho mo ruta ka tsela e bohlale le ka mamello. Lerato ke lona le ba susumetsang hore ba mo thuse. (Liprov. 13:​24) Empa ntho ea bohlokoa eo ba batlang ho e etsa ke ho hlompha Jehova, ka hore ba tšehetse melao ea hae le ho sireletsa phutheho.​—Lik. 20:​28. w20.03 20 ¶8-9

Jehova o ile a etsa hore Moshe a lopolle Baiseraele. Empa o ile a mo sebelisa neng? Na e ne le nakong eo Moshe a neng a ikutloa a tšoaneleha, ka mor’a ho “rupeloa ka bohlale bohle ba Baegepeta”? (Lik. 7:​22-25) Che, ke feela ka mor’a hore Jehova a thuse Moshe hore ebe monna ea ikokobelitseng le ea bonolo a ileng a mo sebelisa. (Lik. 7:​30, 34-36) Jehova o ile a fa Moshe sebete sa hore a bue le morena ea matla ka ho fetisisa oa Egepeta. (Ex. 9:​13-19) Rea ithuta hore Jehova o sebelisa bahlanka ba hae ba itšetlehang ka eena hore a ba fe matla le ba lekang ho mo etsisa. Haesale ho tloha khale Jehova a sebelisa bahlanka ba hae ka litsela tse ngata tse fapaneng. Uena a ka u sebelisa joang? Ho itšetlehile ka hore na u ikemiselitse ho sebetsa ka thata hakae. (Bakol. 1:​29) Haeba u ikemiselitse ho sebelisoa ke Jehova, a ka etsa hore u be moevangeli ea chesehang, mosuoe ea hloahloa, u khone ho tšelisa ba bang, u tsebe mosebetsi, u tšehetse ba bang le hore u be eng kapa eng eo a e hlokang e le hore a phethe thato ea hae. w19.10 21 ¶5; 25 ¶14

Metsoalle e molemo e tla re thusa hore re lule re tšepahalla Jehova. E le hore re be le metsoalle e joalo, re lokela ho ba batho ba molemo. (Mat. 7:​12) Mohlala, Bibele e re khothalletsa hore re thuse batho bohle empa haholo-holo ba “hlokang.” (Baef. 4:​28) Ha re amehile ka ho thusa batho ba bang, re tla thaba. (Lik. 20:​35) Metsoalle ea rona e tla re tšehetsa ha re hlaheloa ke mathata hape e tla re thusa hore re lule re e-na le khotso. Joalokaha Elihu a ile a mamela ha Jobo a mo bolella mathata a hae le rona metsoalle ea rona e re mamela ka hloko ha re e bolella mabina-bine a lipelo tsa rona. (Jobo 32:4) Ha rea lokela ho lebella hore e re etsetse liqeto, empa e ka ba bohlale hore re e mamele ha e re fa keletso e hlahang ka Bibeleng. (Liprov. 15:​22) Joalokaha Morena Davida a ile a ikokobetsa ha metsoalle ea hae e mo thusa le rona ha rea lokela ho hana ha metsoalle ea rona e re thusa. (2 Sam. 17:​27-29) Kannete metsoalle e joalo ke mpho e tsoang ho Jehova.​—Jak. 1:​17. w19.04 11 ¶12; 12 ¶14-15