July

Ha batho ba bang ba re buela mantsoe a hlabang kapa a re utloisang bohloko, re ka ’na ra sithabela. Taba eo ke ’nete haholo haeba motho ea re utloisitseng bohloko e le motsoalle kapa mong ka rona ea haufi. Ha re sebetsana le mathata,re ka ithuta mohlaleng oa Anna ea neng a utloisoa bohloko ke mohalitsong oa hae. (1 Sam. 1:​12) Le rona re ka qeta nako e ngata eo re e batlang re bua le Ntate oa rona ka matšoenyeho a rona le lintho tse re tšosang. Lithapelo tsa rona ha lia lokela hore ebe lithothokiso kapa re batle hore ebe tse phethahetseng. Ka linako tse ling, re ka ba ra lla ha re bolella Jehova lintho tse re tšoenyang. Ho ntse ho le joalo, Jehova a ke ke a ikutloa a khathetse ke ho re mamela. Ho phaella tabeng ea ho rapela ka mathata a rona, re boetse re lokela ho hopola keletso e hlahang ho Bafilipi 4:​6, 7. Ka ho khetheha, moapostola Pauluse o re bolella hore re lebohe Jehova lithapelong tsa rona. Re na le mabaka a mangata a ho leboha Jehova. Re ka mo leboha ka bophelo boo a re fileng bona, mesebetsi ea hae e hlollang, lerato la hae le tšepo e babatsehang eo a re fileng eona. w20.02 21 ¶3; 22 ¶6

Jehova o re file mpho ea ho bua. (Ex. 4:​10, 11; Tšen. 4:​11) O sebelisa Lentsoe la hae Bibele ho re thusa ho utloisisa hore na re ka sebelisa mpho eo ka tsela e nepahetseng joang. Re lokela ho lula re le malala-a-laotse ho bua ka Jehova le ka ’Muso oa hae. (Mat. 24:​14; Bar. 10:​14) Ha re etsa joalo, re tla be re etsisa Jesu. Le leng la mabaka a ka sehloohong leo Jesu a ileng a tla lefatšeng ka lona e ne e le ho bolella batho ’nete ka Ntate oa hae. (Joh. 18:​37) Empa re lokela ho hopola hore tsela eo re buang ka eona le eona ke ea bohlokoa. Kahoo, ha re bua le batho ba bang ka Jehova, re lokela ho etsa joalo ka “maikutlo a bonolo le ka tlhompho e tebileng” ’me re nahanele le maikutlo a bona le litumelo tsa bona. (1 Pet. 3:​15) Ha re etsa joalo, re tla be re sa bue le bona feela empa re tla be re ba ruta ’me mohlomong re ka ama lipelo tsa bona. Baholo ha baa lokela ho ba leqe ho bua le mora kapa morali’abo rona ea hlokang keletso. Empa ba lokela ho khetha nako e loketseng ea ho bua le motho e le hore ba se ke ba mo hlabisa lihlong. w20.03 18-19 ¶2-4

Re ka rapella’ng? Re ka kopa Jehova hore a “re fe tumelo e eketsehileng.” (Luka 17:5; Joh. 14:1) Re hloka tumelo hobane Satane o ikemiselitse ho hlasela Bakreste bohle. (Luka 22:​31) Tumelo e tla re thusa joang? E tla re thusa hore re tlohelle lintho matsohong a Jehova. Kaha re kholisehile hore Jehova o tla re thusa, re lula re e-na le khotso. (1 Pet. 5:​6, 7) Thapelo e re thusa hore re lule re e-na le khotso ho sa tsotellehe mathata ao re ka thulanang le ’ona. Nahana ka mohlala oa moholo e mong ea bitsoang Robert ea lilemo tse ka holimo ho 80. O re: “Bafilipi 4:​6, 7 e nthusitse ho mamella mathata a mangata ao ke thulaneng le ’ona bophelong. Ke ne ke e-na le mathata a lichelete. Hape ke ile ka qeta nako e itseng ke se ke se moholo.” Ke’ng esale e thusa mor’abo rona Robert hore a lule a e-na le khotso? O re: “Nako eohle ha ke tšoenyehile ke rapela Jehova. Ke lumela hore ho bua le Jehova khafetsa ha ke e-na le mathata ho nthusa hore ke be le khotso.” w19.04 9-10 ¶5-7

Ho hlekefetsa bana ka motabo ke sebe se siteloang Molimo. Ha motho a siteloa motho e mong o boetse o siteloa le Molimo. Ak’u nahane ka mohlala o Molaong oo Molimo a ile a o fa Baiseraele. Molao o ne o re motho ea qhekellang moahelani oa hae o itšoara “ka ho se tšepahale ho Jehova.” (Lev. 6:​2-4) Kahoo, ha Mokreste e mong ka phuthehong a hlekefetsa ngoana ka motabo, o etsa hore ngoana eo a se ke a mo tšepa, hape ha a tšepahalle Jehova. O boetse o senya Jehova lebitso. Ka lebaka leo, re lokela ho ela hloko hore ho hlekefetsa bana ka motabo ke sebe se tebileng le se siteloang Molimo, ’me ha rea lokela ho se emela. Limakasine tsa Molula-Qhooa le Tsoha! li na le lihlooho tse tšohlang hore na batho ba hlekefelitsoeng ka motabo ba ka sebetsana le boemo boo joang, hore na batho ba bang ba ka ba thusa le ho ba khothatsa joang le hore na batsoali ba ka sireletsa bana ba bona joang. Mokhatlo o koetlisitse baholo hantle mabapi le hore na ba lokela ho etsa’ng ha motho a hlekefelitse ngoana ka motabo. Mokhatlo o boetse o lula o hlahloba tsela eo baholo ba tšoarang batho ba hlekefelitseng bana ka motabo ka eona. w19.05 9 ¶8-9

Lentsoe la Molimo le ka tšoantšoa le sabole e bohale e ka phunyang mashano a Satane. (Baef. 6:​17) Mohlala, Lentsoe la Molimo le bontšitse hore taba ea hore bafu ba ka khona ho bua le batho ba phelang ke leshano. (Pes. 146:4) Le boetse lea re hopotsa hore ke Jehova feela ea tsebang hore na ho tl’o etsahala’ng nakong e tlang. (Esa. 45:​21; 46:​10) Haeba re lula re bala Lentsoe la Molimo re bile re nahanisisa ka lona, re tla khona ho hana le ho hloea mashano ao meea e khopo e batlang hore re a lumele. U lokela ho hana ho etsa eng kapa eng e amanang le ho sebelisana le meea. Kaha re Bakreste ba ’nete, ha ho moo re kopanang teng le ho sebelisana le meea. Mohlala, ha re ee ho batho ba buang le bafu kapa ho leka ho bua le bafu ka tsela leha e le efe e ’ngoe. Re qoba litloaelo tsohle tsa mapato tse thehiloeng tumelong ea hore bafu ba ntse ba phela kae-kae. Hape ha re buisane le linohe kapa batho ba lepang bokamoso e le ho leka ho fumana hore na bokamoso ba rona bo eme joang. Rea tseba hore lintho tsena kaofela li kotsi le hore li ka re lihela ka liatleng tsa Satane le bademona ba hae. w19.04 21-22 ¶8-9

Batho ba mamelang bohlale ba lefatše lena ba nyefola tataiso eo Bibele e fanang ka eona tabeng ea boitšoaro, ba re ha e utloahale. Batho bao ba ka ’na ba botsa hore na ‘ke hobane’ng ha Molimo a re bopile re e-na le litakatso tsa ho etsa thobalano empa a boetse a re bolella hore re li hanele?’ Ba botsa potso eo hobane ba e-na le maikutlo a fosahetseng a hore motho e mong le e mong a ka etsa eng kapa eng eo a e batlang. Empa Bibele e bua ho fapaneng le hoo. E re re lokela ho loana khahlanong le litakatso tsa rona tse fosahetseng. (Bakol. 3:5) Ho feta moo, Jehova o file banyalani mpho ea lenyalo eo ho eona ba ka khotsofatsang litakatso tsa bona. (1 Bakor. 7:​8, 9) Ho fapana le batho ba nang le bohlale ba lefatše lena, Bibele e bua hantle ka thobalano. E re thobalano e ka ba mohloli oa thabo ho banyalani. (Liprov. 5:​18, 19) Leha ho le joalo, Bibele e re: “E mong le e mong oa lona a tsebe ho ruela sejana sa hae khalaletsong le tlhomphong, eseng takatsong ea botona kapa ea botšehali e chachehisang ka mohono”​—1 Bathes. 4:​4, 5. w19.05 22-23 ¶7-9

Molimo a ke ke a lumella mebuso hore e felise batho ba hae. Hobane ba jere lebitso la hae hape ba mametse taelo ea hae ea hore ba tsoe Babylona e Moholo. (Lik. 15:​16, 17; Tšen. 18:4) Ba boetse ba sebetsa ka thata ho thusa batho ba bang hore ba tsoe Babylona. Kahoo, bahlanka ba Jehova ba ke ke ba “amohela karolo ea likotlo tsa [Babylona.]” Leha ho le joalo, tumelo ea bona e ntse e tla lekoa. (Ezek. 38:​2, 8) Ka mor’a hore bolumeli ba bohata bo felisoe, bahlanka ba Jehova e tla be e le bona feela ba setseng. Satane o tla halefa hampe. O tla halefa hoo a tla sebelisa “lipolelo tse bululetsoeng” e leng mashano a tsoang ho bademona ho susumetsa mebuso hore e ikopanye e le hore e hlasele bahlanka ba Jehova. (Tšen. 16:​13, 14) Ho ikopanya hoo ha mebuso ho bitsoa “Gogo oa naha ea Magogo.” Ha mebuso e qala ho hlasela bahlanka ba Jehova, ho tla tšoana leha eka e fihlile sebakeng sane sa tšoantšetso se bitsoang Armagedone.​—Tšen. 16:​16. w19.09 11 ¶12-13

Mehleng ea Baiseraele, Satane o ile a sebelisa bolumeli ba bohata hore bo buelle boitšoaro bo bobe. Le kajeno o ntse a etsa joalo. Bolumeli ba bohata bo lumella boitšoaro bo bobe ebile boa bo buella. Ka lebaka leo, batho ba bangata ba reng ba sebeletsa Molimo ba hloleha ho ikobela melao ea hae e hlakileng. Ha moapostola Pauluse a ngolla Baroma lengolo, o ile a hlalosa hore na phello ea taba eo e bile efe. (Bar. 1:​28-31.) Tse ling tsa “lintho tse sa lokelang” ke mekhoa eohle ea boitšoaro bo bobe ho akareletsa le bosodoma. (Bar. 1:​24-27, 32; Tšen. 2:​20) Ke habohlokoa haholo hore re latele melao e hlakileng e ka Bibeleng! Lithuto tsa bohlale ba batho ha li tsamaisane le melao ea Molimo. Ha e le hantle, ke “mesebetsi ea nama.” (Bagal. 5:​19-23) Li ruta batho hore ba ikhohomose, ’me ba qetella e se e le “baithati.” (2 Tim. 3:​2-4) Boitšoaro bona bo fapane hole le tsela eo Molimo a batlang hore bahlanka ba hae ba itšoare ka eona.​—2 Sam. 22:​28. w19.06 5-6 ¶12-14

Elia o ile a thulana le mathata a boima nakong eo a ntseng a sebeletsa Jehova. Jehova o ile a re Elia a fe Elisha e meng ea mesebetsi ea hae, ka ho etsa joalo, o ile a fa Elia motsoalle oa sebele ea neng a tla mo thusa nakong eo a nyahameng. Ka tsela e tšoanang, haeba re bolella motsoalle eo re mo tšepang lintho tse re tšoenyang, a ka re thusa ho mamella. (2 Mar. 2:2) Haeba u bona eka ha u na motsoalle eo u ka buang le eena, rapela Jehova hore a u thuse ho fumana Mokreste ea matla tumelong ea ka u khothatsang. Jehova o ile a thusa Elia hore a mamelle lintho tse mo tšoenyang le hore a mo sebeletse ka botšepehi ka lilemo tse ngata. Mohlala oa Elia o etsa hore re be le tšepo. Ka linako tse ling, re ka ’na ra imeloa ke mathata hoo re ka ikutloang re khathetse ’meleng le kelellong. Leha ho le joalo, haeba re itšetleha ka Jehova o tla re fa matla a tla re thusa ho tsoela pele re mo sebeletsa.​—Esa. 40:​28, 29. w19.06 15 ¶4; 16 ¶9-10

Re tla ba sebete esale hona joale ka hore re rute batho ka ’Muso oa Molimo. Hobane’ng? Hobane ha re ruta batho ka Jehova, re mo tšepa haholoanyane ebile ha re tšabe batho. Joalokaha mesifa ea rona e ba matla ha re ikoetlisa, ka tsela e tšoanang, le rona re ba sebete haholoanyane ha re bolela ka ntlo le ntlo, libakeng tsa sechaba, ka tsela e sa reroang le libakeng tsa khoebo. Haeba re ba sebete ho bolela ka ’Muso oa Molimo hona joale, re tla ba malala-a-laotsoe ho tsoela pele ka mosebetsi ona le ha ba boholong pusong ba o thibela. (1 Bathes. 2:​1, 2) Re ka ithuta ho hong mohlaleng oa morali’abo rona a bontšang hore o sebete ka tsela e ikhethang. Morali’abo rona Nancy Yuen o ne a le bolele ba limithara tse ka bang 1.5 feela empa o ne a le sebete. O ile a hana ho khaotsa ho bolela ka ’Muso oa Molimo. Ka lebaka leo, o ile tšoaroa eaba o koalloa teronkong e China ka lilemo tse ka bang 20. Ha a ntse a hlongoa lipotso ke ba boholong, ba ile ba re “ke motho ea manganga ka ho fetisisa” naheng ea bona. w19.07 5 ¶13-14

Ho na le batho ba labalabelang ho ithuta Bibele, empa batho ba bangata bao re kopanang le bona, qalong ba bonahala ba sa rate ho ithuta. Re ka ’na ra lokela ho ba khothaletsa hore ba rate ho ithuta. Re lokela ho itlhopha hantle ha re ea tšimong, e le hore re tle re atlehe. Khetha litaba tseo u tla bua ka tsona hantle, hore e tle e be tse tla khahla batho bao u tla kopana le bona. Ebe u rera hantle hore na u tla qala moqoqo joang. Mohlala, u ka ’na oa botsa mong’a ntlo hore: “Na u ka ntumella nke ke utloe maikutlo a hao tabeng ee? Boholo ba mathata ao re tobanang le ’ona mehleng ena a ama batho bohle lefatšeng. Na u nahana hore ho tla ke ho be le ’muso oa motho o tla rarolla mathata ’ohle a batho?” Ka mor’a moo u ka tšohla le eena Daniele 2:​44. Kapa u ka ’na oa re ho motho: “O nahana hore tsela e molemo ka ho fetisisa ea ho holisa bana ke efe? Nka thabela ho utloa maikutlo a hao tabeng ena.” Ka mor’a moo le ka tšohla Deuteronoma 6:​6, 7. Ha ho potang hore le rona rea thaba ha re atlehile ho thusa motho e mong hore e be molateli oa Kreste. w19.07 15 ¶4, 6-7

Mor’abo rona ea nang le nako e telele a pakela batho ba Asia bao e seng balumeli o re: “Ha e le hantle, sebakeng sena ha motho a re, ‘ha ke lumele hore Molimo o teng,’ o bolela hore ha a rapele melimo e rapeloang ke batho ba mona. Kahoo, maemong a mangata ke ee ke lumellane le bona hore melimo e mengata ke e iketselitsoeng ke batho ebile ha se ea ’nete. Ka mor’a moo, ke ba balla Jeremia 16:​20 ebe kea ba botsa: ‘Re ka tseba joang eo e leng molimo oa ’nete le ea iketselitsoeng ke batho?’ Ke ba mamela ka hloko ha ba araba ebe ke ba balla Esaia 41:​23 e reng: ‘Bolelang lintho tse tlang ka mor’a moo, e le hore re tsebe hore le melimo.’ Ebe ke qetella ka ho ba bontša mohlala oa lintho tseo Jehova a ileng a li bolela esale pele.” Mor’abo rona e mong o re: “Ke ba bontša mehlala ea Mangolo a Bibele a ka ba thusang bophelong, boprofeta ba Bibele bo ileng ba phethahala le melao ea tlhaho e laolang bokahohle. Ebe kea ba bontša hore lintho tsena kaofela li paka hore ho na le ’Mopi ea bohlale ea li entseng. Ha motho a se a lumela hore Molimo o teng, kea mo bontša hore na Bibele e re’ng ka Jehova.” w19.07 23-24 ¶14-15

Lintho tsena tsa bohlokoa li akareletsa ho halaletsa lebitso la Jehova, ho phethahala ha litšepiso tsa hae le ho ba le khotso le bonngoe ka phuthehong. (Mat. 6:​9, 10; Joh. 13:​35) Haeba re etsa hore lintho tsena ebe tsona tsa bohlokoa bophelong ba rona, re tla be re bontša hore re rata Jehova. Moapostola Pauluse o ile a boela a re re lokela ho ‘hloka sekoli.’ Taba ena ha e bolele hore re ke ke ra etsa liphoso. Jehova a ka nka re se na sekoli haeba re leka ka hohle ho matlafatsa lerato la rona le ho nepisisa lintho tsa bohlokoa haholo. Tsela e ’ngoe eo ka eona re ka bontšang hore re rata batho ba bang ke ka hore re qobe ho etsa lintho tse ka ba khopisang eaba li senya kamano ea bona le Jehova. Taba ea hore re se ke ra khopisa ba bang e tebile haholo. Re ka khopisa batho ba bang joang? Ka boithabiso boo re bo khethang, tsela eo re aparang ka eona le ka mosebetsi oo re o khethang. Ho ka etsahala hore ebe lintho tsena ha li na phoso. Empa haeba re etsa liqeto tse khopisang batho ba bang, bothata bo hona moo.​—Mat. 18:6. w19.08 10 ¶9-11

Ho tloha ka 1935, haesale Lipaki Tsa Jehova li utloisisa hore bongata bo boholo bo ponong ea Johanne, bo entsoe ka sehlopha sa Bakreste ba tšepahalang ba nang le tšepo ea ho tla phela lefatšeng ka ho sa feleng. (Tšen. 7:​9, 10) E le hore bo pholohe matšoenyeho a maholo, bongata bo boholo bo lokela ho ithuta ka Jehova le ho mo sebeletsa pele Lilemo Tsa Sekete li qala. Bo lokela ho bontša tumelo e matla e le hore bo ka “atleha ho phonyoha lintho tsena tsohle tse reretsoeng hore li etsahale” pele ho Puso ea Kreste ea Lilemo Tse Sekete. (Luka 21:​34-36) Bongata bo boholo bo thabela tšepo eo bo nang le eona. Boa utloisisa hore Jehova ke eena ea etsang qeto ea hore na batho ba hae ba tla mo sebeletsa ba le leholimong kapa ba le lefatšeng. Batlotsuoa hammoho le bongata bo boholo, baa elelloa hore Jehova o ba fa moputso ka lebaka la lerato la leo a ba bontšitseng lona ka sehlabelo sa Jesu Kreste sa thekollo.​—Bar. 3:​24. w19.09 28 ¶10; 29 ¶12-13

Na u abetsoe kabelo e ncha? U ka khona ho etsa hore u atlehe kabelong ea hao e ncha. U se ke oa nka hore ha oa sebetsa hantle kabelong ea hao e fetileng, kapa hona hore ha u sa le oa bohlokoa. Lula u nahana ka litsela tse ngata tseo Jehova a ntseng a u thusa ka tsona hona joale ’me u tsoele pele u ithukhubetsa boboleling. Etsisa mohlala oa Bakreste ba tšepahalang ba mehleng ea baapostola. Hohle moo ba neng ba le ba teng, ba ne ba “pholletsa le naha ba bolela litaba tse molemo tsa lentsoe.” (Lik. 8:​1, 4) Haeba u tsoela pele ho paka, u ka ’na oa beha litholoana tse ntle. Mohlala, bo-pula-maliboho ba ileng ba lelekoa naheng e ’ngoe, ba ile ba ea naheng ea boahelani moo le teng ho neng ho hlokeha bahoeletsi ba bangata ba buang puo ea bona. Ka mor’a likhoeli tse seng kae feela, ho ile ha thehoa lihlopha tse ngata tsa puo eo bo-pula-maliboho bao ba neng ba e bua. Re lokela ho thabisoa ke hore ebe re na le kamano e ntle le Jehova. Kahoo, lula u le haufi le Jehova ’me u loanele hore e be eena ea u fang bohlale, ea u tataisang le ea u tšehetsang. U hopole hore ntho e ileng ea etsa hore u thabele kabelo ea hao ea nakong e fetileng, ke hobane u ile oa rata ho thusa batho ba sebakeng seo. Ikakhele ka setotsoana kabelong ea hao e ncha ’me u tle u bone ha Jehova a u thusa hore le eona u e rate.​—Moek. 7:​10. w19.08 24-25 ¶15-16

Re lokela ho mamela Jehova hobane ke ’Mopi oa rona. Ka lebaka leo, o na le tokelo ea ho re bolella hore na re etse’ng kapa re se ke ra etsa’ng. (Tšen. 4:​11) Lebaka le leng la bohlokoa la ho mamela Jehova ke hobane puso ea hae ke eona e nepahetseng. Ho tloha mehleng ea khale haesale batho ba busa batho ba bang. Empa ha re bapisa puso ea Jehova le ea batho, Jehova oa ipabola hobane ke ’Musi ea bohlale, ea lerato, ea mohau le ea mosa. (Ex. 34:6; Bar. 16:​27; 1 Joh. 4:8) Re ikokobeletsa Jehova ka ho etsa sohle se matleng a rona ho mo mamela linthong tsohle. Hape re qoba ho itšepa. (Liprov. 3:5) Ha re ithuta haholo ka makhabane a Jehova, ho ba bonolo hore re ikokobeletse eena. Hobane’ng? Hobane makhabane ana a hae ke ’ona a mo susumeletsang ho etsa lintho ka tsela eo a li etsang ka eona. (Pes. 145:9) Ha re tsoela pele ho ithuta ka Jehova re tla mo rata le ho feta. ’Me haeba re mo rata re ke ke ra hloka melao e mengata ea hore na re etse’ng kapa re se ke ra etsa’ng. w19.09 14 ¶1, 3

Satane o imetsa batho ka meroalo eo ba sitoang ho e jara. Ka mohlala, o batla hore re lumele hore Jehova a ke ke a re tšoarela libe tsa rona le hore ha a re rate. Leshano lena le ka etsa hore re nyahame. (Joh. 8:​44) Empa ha re tla ho Jesu libe tsa rona lia tšoareloa. (Mat. 11:​28) ’Nete ke hore Jehova o re rata haholo. (Bar. 8:​32, 38, 39) Mojaro oo Jesu a reng re o jare o fapane le mejaro e meng eo re tlamehang ho e jara. Ka mohlala, batho ba bangata ha ba tsoa mosebetsing oa boipheliso ba khutla ba khathetse ba bile ba sa thaba. Empa ha re tsoa mosebetsing oa Jehova le Jesu re khutla re khotsofetse. Ka linako tse ling, re ka ’na ra ikutloa re khathetse’me re tlameha ho iqobella ho ea libokeng tsa mantsiboea. Empa hangata ha re khutla libokeng re khutla re khatholohile ebile re le matla. Hoa tšoana le ha re ea tšimong le ha re ithuta Bibele. Boiteko boo re bo etsang boa re khatholla ’me bo re fa matla. w19.09 20 ¶1; 23-24 ¶15-16

Jehova o lebelletse hore ka nako ena e khutšoanyane e setseng pele “letsatsi” la hae le fihla, re phathahane mosebetsing oa boboleli. Re lokela ho etsa bonnete ba hore kamehla ho ba le ho ‘hongata hoo re ka ho etsang mosebetsing oa Morena.’ (1 Bakor. 15:​58) Ha Jesu a bua ka lintho tsohle tsa bohlokoa tse tla etsahala matsatsing a ho qetela, o ile a boela a re: “Hape, litaba tse molemo li lokela ho boleloa lichabeng tsohle pele.” (Mar. 13:​4, 8, 10; Mat. 24:​14) Ak’u nahane feela, nako le nako ha u ea tšimong, u kenya letsoho ho phethahatseng boprofeta bona ba Bibele. Selemo le selemo ho na le batho ba bangata ba qalang ho ithuta ka ’Muso oa Molimo. Mohlala, nahana kamoo palo ea bahoeletsi e eketsehileng kateng lefatšeng ka bophara mehleng ena. Ka 1914, ho ne ho e-na le bahoeletsi ba 5 155 linaheng tse 43. Hona joale, ho na le bahoeletsi ba ka bang limilione tse 8.5 linaheng tse 240. Ho ntse ho le joalo, mosebetsi oa rona ha o e-s’o fele. Re lokela ho lula re bolella batho hore ’Muso oa Molimo ke oona feela o tla rarolla mathata ’ohle a batho.​—Pes. 145:​11-13. w19.10 8 ¶3; 9-10 ¶7-8

Jehova o ile a sebelisa Barzilai hore a thuse Morena Davida. Davida le batho ba neng ba e-na le eena ba ne ba “lapile ’me ba khathetse ebile ba nyoriloe” ha ba ntse ba baleha mora oa hae e leng Absalome. Le hoja Barzilai a ne a se a tsofetse, eena hammoho le batho ba bang ba ile ba beha bophelo ba bona kotsing e le hore ba thuse Davida le batho ba neng ba e-na le eena. Barzilai ha a ka a etsa qeto ea hore Jehova a ke ke a hlola a mo sebelisa hobane a se a ile haholo lilemong. Ho e-na le hoo, o ile a sebelisa lintho tseo a neng a e-na le tsona ho thusa bahlanka ba Molimo ba neng ba hloka thuso. (2 Sam. 17:​27-29) Re ithuta’ng mohlaleng oa hae? Ho sa tsotellehe hore na re lilemo li kae, Jehova a ka re sebelisa ho thusa Bakreste-’moho le rona ka litlhoko tsa bona tsa mantlha, ebang ke ba naheng ea habo rona kapa ba linaheng tse ling. (Liprov. 3:​27, 28; 19:​17) Le haeba re sa khone ho ba thusa ka ho toba, re ka ntša monehelo o tla ba thusa nakong eo ba hlokang thuso.​—2 Bakor. 8:​14, 15. w19.10 21 ¶6

Haeba ho e-na le motho ea ileng a re utloisa bohloko nakong e fetileng, ho ka ’na ha e-ba thata hore re phutholohele batho ba bang. (Liprov. 18:​19) Kapa mohlomong re ka ’na ra bona eka ha re na nako le matla a ho etsa metsoalle e haufi. Leha ho le joalo, ha rea lokela ho nahana hore re ke ke ra khona ho etsa metsoalle e joalo. Haeba re batla hore Bakreste-’moho le rona ba re tšehetse ha re hlaheloa ke mathata a boima, re lokela ho tiisa setsoalle sa rona le bona esale hona joale. Tsela e ’ngoe ea bohlokoa eo re ka etsang joalo ka eona ke ka ho ba bolella hore na re nahana’ng le hore na re ikutloa joang. (1 Pet. 1:​22) Jesu o ile a bontša hore o tšepa metsoalle ea hae ka hore a bue le bona ka ntho e ’ngoe le e ’ngoe a sa pate letho. (Joh. 15:​15) Re ka mo etsisa ka hore re bolelle metsoalle ea rona lintho tse re thabisang, tse re tšoenyang le tse re koatisang. Ha u mamela ka hloko ha motho e mong a ntse a bua le uena, u ka ’na oa hlokomela hore le na le maikutlo a tšoanang, le nahana ka ho tšoana ebile le batla lintho tse tšoanang bophelong. Ha u joetsa metsoalle ea hao hore na u ikutloa joang le hore na u nahana’ng ’me le uena u e mamela, setsoalle sa lona se tla tiea le ho feta.​—Liprov. 27:9. w19.11 4 ¶8-9

Ka matšoenyeho a maholo, molaetsa oo re o phatlalatsang o ka ’na oa fetoha. Hona joale, re bolela litaba tsa ’Muso oa Molimo hape re leka ho etsa barutuoa. Empa ka nako eo, molaetsa oo re tla o phatlalatsa o ka ’na oa otla sepekere hloohong. Bibele e o tšoantša le sefako se seholo. (Tšen. 16:​21) Re ka ’na ra bolela hore puso ea Satane e haufi le ho felisoa. Ka nako eo, re tla utloa hore na ke molaetsa ofe oo re tla o bolela le hore na re tla o bolela joang. Na ebe re tla sebelisa mekhoa e tšoanang kapa, na re tla fetola maoa? Re tla boka ha li oroha. Ho sa tsotellehe hore na re sebelisa mekhoa efe, re ka ’na ra ba le tokelo ea hore ka sebete re phatlalatse molaetsa oa Jehova oa kahlolo. (Ezek. 2:​3-5) Ho ka ’na ha etsahala hore ebe molaetsa oo re tl’o o phatlalatsa o tla etsa hore baeta-pele ba lefatše ba batle ho re koala melomo ka ho feletseng. Joalokaha re itšetlehile ka Jehova hona joale ha re etsa mosebetsi oa boboleli, le nakong eo re tla itšetleha ka eena hore a re thuse. Re kholisehile hore Molimo oa rona o tla re fa matla a hore re etse thato ea hae.​—Mik. 3:8. w19.10 16 ¶8-9

Poleloana e reng “ba khelositsoe,” e bontša hore re ka qetella re tsepamisitse likelello tsa rona linthong tseo re sa li hlokeng. Re ka qetella re se re oetse “lerabeng le litakatsong tse ngata tse se nang kelello.” (1 Tim. 6:9) Kahoo, re lokela ho hopola hore Satane o sebelisa litakatso tseo ho fokolisa tumelo ea rona. A re re mohlomong re na le chelete ea ho reka lintho tse ngata. Na re tla be re etsa phoso ha re reka lintho tseo re li batlang empa ha e le hantle re sa li hloke? Che. Empa ak’u nahane ka lipotso tsena: Esita le haeba u khona ho reka ntho e itseng, na u tla ba le nako le matla a ho e sebelisa le ho e lokisa? Hape, na ha u na qetella u se u rata lintho tseo u nang le tsona ho feta tekano? Na ho rata maruo ho ka etsa hore re be joaloka monna e mong ea ileng a hana memo ea Jesu ea ho sebeletsa Molimo haholoanyane? (Mar. 10:​17-22) Kannete ho molemo hore re phele ka tsela e tla re lumella hore re sebelise nako le matla a rona ho etsa thato ea Molimo. w19.11 17-18 ¶15-16

Molimo a ka u fa matla a hore u etse liqeto u be u li phelele. (Bafil. 2:​13) Kahoo, rapela Jehova hore a u fe matla a hore u li phethe. Kopa Jehova hore a u fe moea o halalelang o tla u fa matla ao u a hlokang. Lula u rapela le haeba u ke ke oa arabeloa hang-hang. Etsoe le Jesu o ile a re: “Le ’ne le kope, ’me le tla fuoa [moea o halalelang].” (Luka 11:​9, 13) Hape, iketsetse moralo. U hloka moralo e le hore u phethe ntho e ’ngoe le e ’ngoe eo u batlang ho e etsa. Ka mor’a moo, u lokela ho latela moralo oo. Ka tsela e tšoanang, ha u etsa qeto, ngola fatše lintho tsohle tse tla u thusa ho e phetha. Haeba ho na le mosebetsi o thata oo u lokelang ho u etsa, u etse hanyane ka hanyane e le ho bona ha u se u khathile tema. Moapostola Pauluse o ile khothalletsa Bakorinthe hore ba behelle monehelo ka thoko “letsatsi le leng le le leng la pele la beke” ho e-na le ho o bokella nakong eo a fihlang. (1 Bakor. 16:2) Ho etsa mesebetsi hanyane ka hanyane ho ka u thusa hore u se ke oa ba le maikutlo a hore u ke ke oa khona ho e phetha. w19.11 29 ¶13-14

Re ka ’na ra nahana hore re tseba Jehova hobane feela re tseba lebitso la hae, lintho tseo a ileng a li bua le tseo a ileng a li etsa. Empa ho tseba Jehova hantle ho akareletsa lintho tse ngata. Re lokela ho qeta nako re ithuta ka Jehova le makhabane a hae. Ha re etsa joalo, re tla utloisisa hore na ke hobane’ng ha a bua lintho le ho li etsa. Hape re tla tseba hore na Jehova o rata tsela eo re nahanang ka eona le ho etsa lintho. Hang ha re se re tseba hore na Jehova o batla re etse’ng, re tla etsa joalo. Batho ba bang ba ka ’na ba re soma ha re batla ho sebeletsa Jehova ’me ba ka ’na ba re hanyetsa le ho feta ha re qala ho ea libokeng. Empa haeba re tšepa Jehova, a ke ke a re lahla kherehloa. Re tla be re haha setsoalle se tla ba teng ho ea ho ile. Na re ka khona ho tseba Jehova hantle? E, re ka khona. w19.12 16-17 ¶3-4

Ka linako tse ling batsoali ba ka utloa ba imetsoe ke mathata ao ba tobanang le ’ona ha ba ntse ba holisa bana, empa bana ke mpho e tsoang ho Jehova. Jehova o lula a le malala-a-laotsoe ho le thusa. O rata ho le mamela ha le bua le eena. O arabela lithapelo tsa lona ka Bibele, ka lingoliloeng le ka mehlala le likeletso tsa batsoali ba nang le boiphihlelo tabeng ea ho holisa bana. Batho ba bangata ba re ho holisa ngoana ke mosebetsi oa lilemo tse 20 empa ’nete ke hore motsoali e tla lula e le motsoali. Har’a lintho tsa bohlokoa tseo batsoali ba ka li fang bana ba bona ke hore ba ba rate, ba be le nako le bona le ho ba tataisa ka melao-motheo ea Bibele. Ke ’nete hore bana ba ke ke ba utloa ka ho tšoana. Leha ho le joalo, ba bangata ba ileng ba holisoa ke batsoali ba ratang Jehova ba ikutloa joaloka Morali’abo rona Joanna Mae oa Asia ea ileng a re: “Kea thaba hore ebe batsoali ba ka ba ile ba nthusa hore ke rate Jehova. Ha baa nketsa motho feela tjee! empa ba nkentse motho ea nang le boikarabelo.” (Liprov. 23:​24, 25) Bakreste-’moho le rona ba limilione le bona ba ikutloa joalo. w19.12 27 ¶21-22

Ho bonolo ho fumana bara le barali babo rona ba hlokang ho tšelisoa. Leha ho le joalo, re lokela ho batlana le mekhoa e fapa-fapaneng e le hore re tšelise batho ba bang, le haeba re tšaba ho etsa joalo. Re ka khona ho atleha ho tšelisa batho ba bang haeba feela re hlile re le batho ba tsotellang. Kaha bofelo bo ntse bo atamela, bophelo bo tla ba boima ’me le lefatše le tla senyeha le ho feta. (2 Tim. 3:​13) ’Me re tla lula re hloka ho tšelisoa hobane ha re ea phethahala ebile re lula re etsa liphoso. Moapostola Pauluse o ile a khona ho lula a mamella bophelo bohle ba hae a tšepahala, ka lebaka la matšeliso ao a ileng a fumana ho Bakreste-’moho le eena. Ha re etsisa mehlala ea bona, le rona re tla khona ho thusa bara le barali babo rona hore ba tiee tumelong.​—1 Bathes. 3:​2, 3. w20.01 12-13 ¶17-19

Batlotsuoa ha baa lebella ho tšoaroa ka tsela e fapaneng le batho ba bang. (Bafil. 2:​2, 3) Baa tseba hore ha Jehova a ne a ba tlotsa, ha a ka a etsa hore batho ba bang ba tsebe. Kahoo, Mokreste ea tlotsitsoeng ha a makale ha batho ba bang ba sa lumele hang-hang hore o tlotsitsoe. Oa tseba hore Bibele e re ruta hore re se ke ra potlakela ho lumela motho ea reng Molimo o mo file boikarabelo bo khethehileng. Mokreste ea tlotsitsoeng ha a batle ho ikhulela mahlo a batho kahoo, ha a tsamaee a ntse a joetsa batho hore o tlotsitsoe. ’Me ho hang a ke ke a ithorisa ka taba eo. (1 Bakor. 4:​7, 8) Bakreste ba tlotsitsoeng ha ba batlane le batlotsuoa ba bang e le hore ba ka bua ka ho tlotsoa ha bona kapa hona ho kopana bakeng sa ho ithuta Bibele hammoho. (Bagal. 1:​15-17) Ha ba ne ba ka etsa joalo, phutheho e ne e ke ke ea momahana. Ba ne ba tla be ba etsa lintho khahlanong le moea o halalelang o thusang batho ba Molimo hore ba lule ba e-na le khotso hape ba momahane.​—Bar. 16:​17, 18. w20.01 28 ¶6-7

Ho ka ’na ha etsahala hore batho ba bang bao bolumeli ba bona bo felisitsoeng ba koatele Lipaki Tsa Jehova ha li ntse li itsoella pele ka mosebetsi oa tsona. Kaha ba tla be ba koatile, u se u ka inahanela feela hore na ke lintho tsa mofuta ofe tseo ba tla li bolella batho, esita le melaetsa e ba tla e ngola Inthaneteng. Baeta-pele ba lefatše le ’musi oa bona e leng Satane, ba tla re hloea hobane bolumeli ba rona ke bona feela bo sa felisoang. Ba tla be ba sa fihlela morero oa bona oa ho felisa ntho eo ho thoeng ke bolumeli lefatšeng. Kahoo, ba tla lebisa tlhokomelo ea bona ho rona. Mothating ona, baeta-pele ba lefatše e tla ba Gogo oa Magogo. Ba tla ikopanya ebe ba hlasela bahlanka ba Molimo. (Ezek. 38:​2, 14-16) Re ka ’na ra tšoenyeha ka hore na ho tla etsahala’ng ka matšoenyeho a maholo, haholo-holo hobane ha re tsebe lintlha kaofela. Ntho eo re e tsebang ke hore ha rea lokela ho tšoha matšoenyeho a maholo. Jehova o tla re fa litaelo tse tla re thusa.​—Pes. 34:​19. w19.10 16-17 ¶10-11

Ha re be le boikutlo feela ba teboho empa re bontša ka mantsoe le liketso hore re leboha Jehova. Taba ena e etsa hore re fapane le batho ba mehleng ena. Batho ba bangata ha ba lebohe Jehova ka lintho tseo a ba etsetsang tsona. Letšoao le leng le bontšang hore re phela “matsatsing a ho qetela” ke la hore batho ha ba na teboho. (2 Tim. 3:​1, 2) Ha re batle ho ba le mekhoa eo e mebe! Jehova o batla hore bana bohle ba hae ba momahane. Ha e le hantle, haeba re ratana, taba eo e bontša hore re Bakreste ba ’nete. (Joh. 13:​35) Re lumellana le mopesaleme ea ileng a re: “Bonang! Kamoo ho leng hotle le kamoo ho khahlisang kateng ha bara ba motho ba lula hammoho bonngoeng!” (Pes. 133:1) Ha re rata Bakreste-’moho le rona, re bontša hore re rata Jehova. (1 Joh. 4:​20) Ke ntho e thabisang ho ba har’a bara le barali babo rona ba mosa le ba nang le qenehelo.​—Baef. 4:​32. w20.02 9 ¶6-7

Mathata a Anna ha a ka a ea moriting ka ho panya ha leihlo. O ne a ntse a tlameha ho phela le mohalitsong oa hae e leng Penina. ’Me ha ho na kae-kae ka Bibeleng moo e reng Penina o ile a fetoha. Kahoo, Anna o ile a tlameha ho mamella mantsoe a hlabang habohloko a mohalitsong eo oa hae. Ho ntse ho le joalo, Anna o ile a khona hore a lule a e-na le khotso. Ka mor’a hore Anna a lahlele moroalo oa hae ho Jehova, ha aa ka a hlola a ituba ka mathata a hae. O ile a lumella Jehova hore a mo khothatse le ho mo tšelisa. Ha nako e ntse e-ea, Anna o ile a hlohonolofatsoa ka bana. (1 Sam. 1:​2, 6, 7, 17-20) Re tla lula re e-na le khotso le haeba matšoenyeho a rona a sa ee moriting. Le hoja re ka rapela Jehova ka lipelo tsohle tsa rona ra ba ra ea libokeng kamehla, a mang a mathata a rona a ke ke a fela hang-hang. Mohlaleng oa Anna, re bone hore ha ho na letho le ka sitisang Jehova ho re tšelisa. Le ka mohla Jehova a ke ke a re lahla ’me haufinyane o tla re putsa ka hore ebe re ile ra tšepahala.​—Baheb. 11:6. w20.02 22 ¶9-10

Baholo ha ba leqe ho bontša motho melao-motheo e ka mo thusang hore a etse lintho ka bohlale. Ke hobane’ng ha ho le bohlokoa hore ba be sebete hore ba bue ha ho hlokeha? Nahana ka mohlala oa Eli. Moprista ea Phahameng Eli o ne a e-na le bara ba babeli bao a neng a ba rata haholo. Empa bara ba hae ba ne ba sa hlomphe Jehova. Kaha e ne e le baprista, ba ne ba etsa mosebetsi oa bohlokoa haholo. Ba ne ba sebeletsa tabernakeleng. Ba ile ba sebelisa matla ao ba a filoeng hampe, ba sa hlomphe mahlabelo a neng a etsetsoa Jehova ’me ba iketsetsa borata ka ho etsa thobalano pepenene. (1 Sam. 2:​12-17, 22) Ho ea ka Molao oa Moshe, bara ba Eli ba ne ba lokela ho bolaoa empa Eli o ile a ba khalemela habobebe feela eaba o ba lumella ho tsoela pele ba sebeletsa tabernakeleng. (Deut. 21:​18-21) Jehova o ile a ikutloa joang ka tsela eo Eli a ileng a sebetsa litaba ka eona? O ile a re ho eena: ‘Ke hobane’ng ha u hlompha bara ba hao ho mpheta?’ Jehova o ile a etsa qeto ea ho bolaea bara bao ba khopo.​—1 Sam. 2:​29, 34. w20.03 19 ¶4-5