11 MOSHE
“E-ea ho Faro”
MOSHE o ne a se a fetohile haholo. Kaha ho ne ho se ho fetile lilemo tse ngata a tlohile Egepeta, ho ka etsahala hore ebe o ne a se a sa nahane hore Jehova o tla sebelisa eena ho ntša Baiseraele bokhobeng. Ka nako ena, o ne a le lilemo li 80, a e-na le mosali le bara ba babeli. Ka lilemo tse 40, o ile a ithuta ho ba le boikokobetso ha a ntse a lisa mehlape ea ntate oa mosali oa hae sebakeng se chesang le se lehoatata, moo Bamidiane ba neng ba lula teng.
Jehova o ile a hlokomela hore Moshe o fetohile. Ka letsatsi le leng, ha Moshe a ne a le Thabeng ea Horebe (Sinai) Jehova o ile a etsa hore sehlahla se meutloa se tuke empa se sa che. Ha Moshe a se atamela, Jehova o ile a buisana le eena a sebelisa lengeloi la hae le matla. Molimo o ile a laela Moshe hore a khutlele Egepeta ’me a e’o lokolla batho ba hae moo. Jehova o ile a khothatsa Moshe ka ho re ho eena: “Ke Tla ba Seo ke Khethang ho ba Sona.” Mantsoe ana e ne e le karolo ea bohlokoa ea seo lebitso la Jehova le se bolelang. Kahoo, Jehova e ne e tla ba Mopholosi oa batho ba hae ba hateletsoeng, ka hore a etse eng kapa eng ho lokolla batho ba hae le ho ba etsa sechaba se matla.
Leha ho le joalo, Moshe o ne a le leqe ho ea Egepeta. O ne a utloa eka ha a tšoanelehe ho etella pele batho ba Molimo le hore a ka bua le Faro. Jehova o ile a lokisa pono ea hae a ba a matlafatsa tumelo ea hae ka ho etsa ntho e ’ngoe e hlollang. O ile a fa Moshe matla a ho etsa mehlolo ’me lena ke lekhetlo la pele ka Bibeleng moo Jehova a fang motho matla a ho etsa mehlolo. O ile a re Arone abuti oa Moshe e be mothusi le ’muelli oa hae. Moshe o ile a amohela kabelo eo le hoja a ne a ntse a le leqe ho e phetha. Moshe e ile ea e-ba mesia e leng monna ea khethiloeng ke Jehova hore a lopolle batho ba hae.—Baheb. 11:26.
Moshe le Arone ba ile ba khutlela Egepeta ho ea bua le Faro. Faro o ile a halefa haholo ha a utloa molaetsa oa bona. Ho e-na le hore a lokolle batho ba Molimo, o ile a etsa hore ba sebetse ka thata le ho feta. Jehova o ile a re Moshe a khutlele ho Faro ’me a mo bolelle hore o tl’o otla Baegepeta. Jehova o ile a qala ho ba otla ka ho etsa hore metsi a Noka ea Nile a fetohe mali. Leha ho le joalo, Faro ha aa ka a ba lumella hore ba tsamaee. Ha Faro a hana ho lokolla batho ba Molimo, Jehova o ile a bolella Moshe hore a ’ne a “ee ho Faro,” hore a e’o mo bolella ka kotlo e ’ngoe eo a neng a tla e tlisa Egepeta. Ka sebete Moshe o ile a ’na a ea. Empa morena eo ea ikhohomosang ha aa ka a mamela. Likotlo tse tlileng ka mor’a ea boraro li ile tsa ama Baegepeta feela, eseng batho ba Molimo.
Kotlo e ’ngoe le e ’ngoe e ile ea senola hore melimo ea Baegepeta, baprista ba bona ba maselamose le Faro ka boeena ba ne ba se na matla. Leha ho le joalo, Faro o ile a ’na a ba manganga, a hana ho lokolla batho ba Molimo. Kotlo ea borobong e ile ea etsa hore moo Baegepeta ba lulang teng ho be le lefifi le letšo-letšo le hoja moo Baiseraele ba lulang teng ho ne ho ntse ho e-na le khanya. Faro o ile a lumela ho lokolla batho ba Molimo le hoja hamorao a ile a fetola maikutlo a hae. O ile a lemosa Moshe hore ha a ne a ka tla hape ho eena, o ne a tla mo bolaea.
Ka makhetlo a mangata, Moshe o ile a lokela ho hlaha ka pel’a morena ea bohale le ea matla ka ho fetisisa lefatšeng
Ho ntse ho le joalo, Jehova o ile a roma Moshe ho Faro ka lekhetlo la ho qetela ’me Moshe o ile a ea. Kotlong ea ho qetela, matsibolo ’ohle a Egepeta a bana le a liphoofolo a ile a bolaoa. Faro o ile a qetella a inehetse kaha letsibolo la hae le ne le shoele. O ile a lumela hore Baiseraele ba tsamaee, a ba a kopa hore Moshe a mo hlohonolofatse. Qetellong, Baiseraele e ne e se e se makhoba ka mor’a lilemo tse 430 hantle ka mor’a hore Abrahama a fihle Naheng e Tšepisitsoeng. Ha Baiseraele ba tloha Egepeta, “sehlopha se seholo se tsoakaneng” se ile sa tsamaea le bona. Har’a sehlopha seo, ho ka etsahala hore Baegepeta ba bangata ba ne ba le teng. Empa Faro o ile a fetola monahano oa hae hape. O ile a bokella masole a hae a mangata eaba a lelekisa Baiseraele.
Ha Moshe le Baiseraele ba fihla lebopong la Leoatle le Lefubelu, ho ne ho bonahala eka ho felile ka bona. Baiseraele ba ne ba tšohile haholo. Moshe o ile a kopa thuso ho Jehova. Jehova o ile a araba thapelo ea Moshe ka ho etsa o mong oa mehlolo e ikhethang ka ho fetisisa. O ile a arola Leoatle le Lefubelu, a etsa hore Baiseraele ba tsamaee moo ho ommeng. Ha Faro a bona hore Baiseraele baa tsamaea, o ile a ba lelekisa le lebotho lohle la hae. Ha Baiseraele ba qeta ho tšela, Jehova o ile a etsa hore metsi a Leoatle le Lefubelu a khutle eaba a khama Faro hammoho le lebotho lohle la hae. Lebotho le matla ka ho fetisisa lefatšeng le ile la felisoa ka tsela eo.
Ho hang, Moshe ha aa ka a lebala liketsahalo tseo tse hlollang. Tumelo ea hae e ne e se e le matla ho feta pele. O ile a etella pele sechaba sa Molimo ka lilemo tse 40 ho fihlela ha a hlokahala a le lilemo li 120. O ile a se etella pele a ba a se hlokomela ka tumelo, lerato le ka sebete seo re ka se etsisang.
Bala litemana tsena:
U ka re’ng?
Tlalehong ee, Moshe o ile a bontša joang hore o sebete?
Etsa Lipatlisiso
1. Ha re tsebe lebitso la Faro ea neng a busa ha Baiseraele ba ne ba le bokhobeng Egepeta. Hape ho tla fihlela hona joale, ha ho na tlaleho ea Baegepeta e buang ka ho lokolloa ha Baiseraele. Leha ho le joalo, ke hobane’ng ha re kholisehile hore tlaleho ee ea Bibele ke ’nete? (g04 4/8 23 ¶3–24 ¶2)
2. Ke hobane’ng ha batho ba ne ba tšaba Faro? (w14 4/15 8 ¶1) A
PRISMA ARCHIVO/Alamy Stock Photo
Setšoantšo A: Setšoantšo sa khale se takiloeng leboteng sa Faro ea tlileng lilemo hamorao
3. Likotlo Tse Leshome li ile tsa tlotlolla melimo ea Baegepeta joang? (it “Melimo le Melimotsana” ¶24-26-wcgr)
4. Ke eng e bontšang hore Jehova o ile a bula tsela e sephara ka har’a Leoatle le Lefubelu? Ho ka etsahala hore ebe ho ile ha tšela Baiseraele ba bakae moo? (it “Baiseraele ba Tsoa Egepeta” ¶46-51-wcgr) B
Setšoantšo B: Setšoantšo sa Leoatle le Lefubelu se nkiloeng Sinai moo ho ka etsahalang hore ebe Baiseraele ba ile ba tšela teng
Nahana ka Seo u Ithutileng Sona
Mohlala oa Moshe o ka re khothatsa joang haeba re utloa eka re ke ke ra khona ho phetha kabelo eo Jehova a re fang eona? (Ex. 4:10; 7:6, 7)
Arone o ile a thusa Moshe ho phetha kabelo ea hae ka sebete. Rona re ka thusa bara le barali ba bo rona joang kajeno? (Ex. 4:14-16) C
Setšoantšo C
U ka etsisa sebete seo Moshe a ileng a se bontša joang tlalehong ee?
Iphe Nako ea ho Nahana ka Jehova le ka Morero oa Hae
U ithutile’ng ka Jehova tlalehong ee?
Tlaleho ee e amana joang le morero oa Jehova?
Ha Moshe a se a tsositsoe, u ka rata ho mo botsa eng mabapi le karolo ee ea bophelo ba hae?
Ithute Lintlha Tse Ling
Ithute hore na seo lebitso la Jehova le se bolelang se ka thusa bana joang hore ba be sebete.
Phihlelo ea Moshe e ile ea mo ruta eng ka makhabane a Jehova?