December

Balateli ba Jesu ba ne ba tšepa Lentsoe la Molimo ’me ba etsa kahohle hore ba phele tumellanong le lona. (Joh. 17:6) Leha ho le joalo ba ile ba ferekana ha ba bona Jesu a khokhotheloa palong joaloka setlokotsebe empa Jesu o ile a hlokomela hore ha se hobane ba se na tumelo kapa ba sa rate Jehova empa ba ne ba hloka ho utloisisa Mangolo haholoanyane. (Luka 9:​44, 45; Joh. 20:9) Kahoo, o ile a ba thusa ho utloisisa Mangolo. A re boneng hore na o ile a etsa joang nakong eo a neng a tsamaea le barutuoa ba hae ba babeli ba neng ba ea Emmause. Jesu ha aa ka a bolella barutuoa ba hae hang ha a kopana le bona hore na ke mang, ho e-na le hoo o ile a qala ka ho ba botsa lipotso. Ebe ke hobane’ng ha a ile a etsa joalo? Mohlomong o ne a batla hore ba mo bolelle maikutlo a bona pele ’me ba ile ba feela ba mo bolella. Ba ile ba mo bolella hore ba ne ba nahana hore e tla ba eena morena oa Iseraele ’me a ba buse ho e-na le ho busoa ke Baroma. (Luka 24:​18-27) Jesu o ile a sebelisa Mangolo ho ba thusa ho utloisisa hore na boprofeta bo phethahetse joang. Mantsiboeeng ao, o ile a kopana le barutuoa ba bang ’me a ba hlakisetsa boprofeta bona. Luka 24:​33-48. w24.10 14 ¶9-10

Jesu o ile a ithuta lintho tseo a lokelang ho li bua le tseo a lokelang ho li etsa ho Ntate oa hae ea leholimong. Mokhatlo oa Jehova o etsisa Jesu ka ho sebelisa Lentsoe la Molimo ho re thusa ho tseba se nepahetseng le se fosahetseng le ho re tataisa bophelong. (2 Tim. 3:​16, 17) Khafetsa re hopotsoa ho bala Lentsoe la Molimo le ho sebelisa lintho tseo re ithutang tsona. Re rua molemo haholo ha re ithuta Bibele re sebelisa lingoloa tse thehiloeng ho eona. Ka mohlala, re khona ho bapisa seo re ithutang sona le tataiso eo re e fuoang ke mokhatlo. Ha re bona hore tataiso eo re e fuoeng e thehiloe Mangolong, re tšepa mokhatlo oa Jehova le ho feta. (Bar. 12:2) Jesu o ne a bolela ‘molaetsa o monate oa ’Muso oa Molimo.’ (Luka 4:​43, 44) Jesu o ile a boela a laela barutuoa ba hae hore ba bolele ka ’Muso. (Luka 9:​1, 2; 10:​8, 9) Mehleng ena batho bohle ba ka mokhatlong oa Jehova ba bolela molaetsa oa ’Muso, ho sa tsotellehe hore na ba lula hokae. w24.04 9 ¶5-7

Tsoela pele u tšepa tataiso e tsoang mokhatlong oa Jehova. Iseraeleng ea boholo-holo, Jehova o ile a sebelisa Moshe le Joshua ho fa batho ba hae tataiso. (Josh. 1:17) Baiseraele ba ne ba lula ba hlohonolofatsoa ke Jehova Molimo ha ba nka tataiso eo e tsoa ho eena. Lilemo tse makholo hamorao ha phutheho ea Bokreste e thehoa, Jehova o ile a sebelisa baapostola ba 12 ho fana ka tataiso. (Lik. 8:​14, 15) Hamorao, sehlopha seo se ile sa akareletsa le baholo ba Jerusalema. Ka ho latela tataiso ea banna bao ba tšepahalang, ‘liphutheho li ile tsa ’na tsa matlafala tumelong ’me tsa hola letsatsi le letsatsi.’ (Lik. 16:​4, 5) Mehleng ea kajeno, le rona rea hlohonolofatsoa haeba re latela tataiso eo Jehova a fanang ka eona a sebelisa mokhatlo oa hae. w24.07 10 ¶10

Jehova o ne a rata Morena Davida haholo hoo a ileng a ba a re ke ‘monna ea mo khahlisang.’ Empa Davida o ile a etsa libe tse tebileng tse kang bofebe le ho bolaea. Ho ea ka Molao oa Moshe, Davida o ne a lokela ho bolaoa. (Lev. 20:10; Num. 35:31) Empa Jehova o ile a ba mosa a batla ho thusa Davida hore a bake. O ile a etsa seo ka hore a romele moprofeta Nathane ho Davida le hoja Davida a ne a e-s’o ka a etsa letho le bontšang hore o bakile. Nathane o ile a bolella Davida papiso e entseng hore a bone na o entse lintho tse mpe hakae. Ka mor’a moo, Davida o ile a soaba haholo eaba o qetella a bakile. (2 Sam. 12:​1-14) O ile a ngola Pesaleme e amang pelo e bontšang hore o ne a bakile. (Pes. 51, sehlooho) Pesaleme eo e khothalitse batho ba bangata ba ileng ba etsa libe ’me ea ba susumeletsa hore ba bake. Kannete re thaba haholo hore ebe Jehova o ile a thusa Davida hore a bake. w24.08 10 ¶9

Kaofela re ka lumellana hore ha ho bonolo ho ba motsoali. Haeba u holisa ngoana, rea u babatsa hore ebe u sebetsa ka thata ho mo thusa hore a be le tumelo e matla ho Jehova. (Deut. 6:​6, 7) Ha ngoana a ntse a hola, a ka qala ho botsa lipotso ka lintho tseo a ithutang tsona ka Bibeleng, tse akarelletsang melao ea Molimo ea boitšoaro. Qalong u ka ’na oa tšoenyeha ka lipotso tseo ngoana oa hao a nang le tsona. U ka ’na oa nahana hore o botsa lipotso tsena hobane tumelo ea hae e se e fokola ebile a se a sa tšepe Bibele. Leha ho le joalo, ’nete ke hore ha bana ba ntse ba hola, ba hloka ho botsa lipotso e le hore ba ka ikholisa hore seo ba se lumelang ke ’nete. (1 Bakor. 13:11) Ka hona, u se ke oa tšoenyeha. Nka lipotso tseo e le monyetla oa ho mo thusa hore a nahanisise ka lintho tseo a ithutang tsona ka Bibeleng le ho matlafatsa tumelo ea hae ho Molimo. w24.12 14 ¶1-2

Ho ne ho hlokahala hore Bakreste ba Baheberu ba be le tumelo e matla e le hore ba phonyohe mahlomola a neng a le haufi le ho ba teng Judea. (Baheb. 10:​37, 38) Jesu o ile a lemosa balateli ba hae hore ha ba bona Jerusalema e pota-potiloe ke masole, ba lokela ho balehela lithabeng. Keletso ena e ne e ama Bakreste bohle ba lulang Jerusalema le libakeng tse mahaeng. (Luka 21:​20-24) Ha batho ba lulang mahaeng ba hlaseloa ke masole, hangata ba ne ba balehela metseng e nang le marako joaloka Jerusalema e le hore ba sireletsehe. E ne e tla ba ntho e sa utloahaleng ho balehela lithabeng ’me ho etsa joalo ho ne ho tla hloka tumelo e matla. Bakreste ba Baheberu ba ne ba boetse ba lokela ho tšepa bao Jesu a ba sebelisang ho tataisa phutheho. Ho ka etsahala hore ba etellang pele ba ile ba fana ka litaelo tse tobileng tsa hore na ba balehe neng le ka mokhoa o joang.—Baheb. 13:17. w24.09 10 ¶9-10

Ha Jesu a le lefatšeng o ile a etsa mosebetsi oohle oo Ntate oa hae a neng a mo file oona. (Joh. 17:4) O ne a se na maikutlo a hore ke eena feela ea ka etsang mosebetsi oo Jehova a faneng ka oona. O ile a koetlisa le ba bang hore ba o etse. O ile a tšepela barutuoa ba hae ho etsa mosebetsi oa ho bolela, oa ho ruta litaba tse monate le oa ho hlokomela linku tsa Jehova. Ha ho ne ho hlokahala Jesu o ne a khalemela balateli ba hae a sa hlathe koana le koana empa o ne a etsa seo ka mosa. Ba bang ba barutuoa ba hae ba ne ba sa lumele hore o tsohile kahoo o ile a ba khalema e le hore ba be le pono e nepahetseng. (Luka 24:​25-27; Joh. 20:27) O ile a ba khothaletsa hore ba phathahane ka ho hlokomela linku tsa Jehova ho e-na le ho etsa chelete. (Joh. 21:15) A boela a ba hopotsa hore ba se ke ba ipapisa le ba bang ka phuthehong. (Joh. 21:​20-22) Ba bang ba bona ba ne ba e-na le maikutlo a fosahetseng ka ’Muso ’me o ile a ba thusa, hape a ba khothaletsa ho phathahana ka ho bolela litaba tse monate.—Lik. 1:​6-8. w24.10 15 ¶13-14

Ha re mamela Jehova, re tla phela ka ho sa feleng. Joalokaha Baiseraele ba ne ba le haufi le ho kena Naheng e Tšepisitsoeng, le rona re haufi haholo le ho kena lefatšeng le lecha leo Molimo a re tšepisitseng lona, moo re tla bona ha lefatše le fetoloa paradeise. (Esa. 35:1; Luka 23:43) Diabolose le bademona ba hae ba tla be ba felisitsoe. (Tšen. 20:​2, 3) Malumeli a bohata a rutang mashano ka Jehova, le ’ona a tla be a felisitsoe. (Tšen. 17:16) Mebuso ea batho e hatellang batho, e ke ke ea hlola e e-ba teng. (Tšen. 19:​19, 20) Paradeiseng, batho ba khopo ba ke ke ba e-ba teng. (Pes. 37:​10, 11) Batho bohle ba lulang paradeiseng ba tla mamela melao ea Jehova ’me ho tla ba le khotso. Kahoo, batho bohle ba tla ratana le ho tšepana. (Esa. 11:9) Eo e tla ba nako e thabisang haholo. Hape ha re mamela Jehova, re tla tsoela pele ho phela paradeiseng eseng ka lilemo tse makholo feela empa ka ho sa feleng.—Joh. 3:16. w24.11 9 ¶7

Boprofeta bona bo hlahang temaneng ea kajeno bo phethahala hona joale ho feta leha e le neng pele. Molaetsa ona oa ’Muso o fumaneha ka lipuo tse fetang 1 000. Hape bongata ba batho ba phelang lefatšeng kajeno bo ka ithuta litaba tse monate tsa ’Muso oa Molimo websaeteng ea rona ea jw.org. Leha ho le joalo, Jesu o ile a bolella barutuoa ba hae hore ba ke ke ba “qeta mosebetsi oa ho bolela metseng le metsaneng” kapa ho bua le motho e mong le e mong pele a tla. (Mat. 10:23; 25:​31-33) Kahoo, re ke ke ra khona ho bolella motho e mong le e mong molaetsa oa ’Muso pele Jesu a tla ho tla ahlola batho. Batho ba limilione mehleng ena ba phela linaheng tseo mosebetsi oa ho bolela o thibetsoeng. Ho ekelletsa moo, motsotso o mong le o mong ho tsoaloa bana ba makholo. Re leka kahohle ho bolella batho “ba merabe eohle, lichaba tsohle . . . le lipuo tsohle” litaba tse monate. (Tše. 14:6) Ho ntse ho le joalo, ’nete ke hore re ke ke ra khona ho bolella motho e mong le e mong litaba tse monate pele bofelo bo fihla. w24.05 10 ¶6-7

Jesu o ne a bua ka tsela e tšelisang le e khothatsang ba bang. O ne a sa bue le balateli ba hae ka tsela e bohale. (Luka 8:​47, 48) O behile mohlala o motle hakaakang bakeng sa banna ba Bakreste. Jesu o laetse banna hore ba tšepahalle basali ba bona. O ile a qotsa mantsoe a Ntate oa hae ha a ne a re monna o lokela ho ‘khomarela mosali oa hae.’ (Mat. 19:​4-6) Leetsi la Segerike le sebelisitsoeng temaneng ena, le fetoletsoeng e le “ho khomarela” le bolela “ho manamisa ka glue.” Monna le mosali ba lokela ho momahana joalokaha eka ba khomarelitsoe ka glue. Ntho leha e le efe e ka ba arohanyang e ka ba siea ba lemetse bobeli ba bona. Haeba monna a momahane le mosali oa hae ka tsela eo, o tla qoba mefuta eohle ea pornography. O tla hana ho “sheba lintho tse se nang thuso” hang-hang. (Pes. 119:37) Ha e le hantle, o etsa selekane le mahlo a hae sa hore, ntle le mosali oa hae, a ke ke a sheba mosali leha e le ofe e le hore a be le takatso ea ho etsa thobalano le eena.—Jobo 31:1. w25.01 10 ¶12-13

Ho ka ba thata ho tseba hore na motho o bolela’ng ha a re o u tšoaretse. Tsela eo Jehova a re tšoarelang ka eona re le batho ba sa phethahalang, e fapane hole le tsela eo re tšoarelanang ka eona. Ha ho na motho ea ka tšoarelang joaloka Jehova. Mopesaleme o ile a re ka Jehova: “U tšoarela e le kannete e le hore batho ba u hlomphe.” (Pes. 130:4) Jehova o “tšoarela e le kannete.” Ke mohlala o motle oa kamoo re lokelang ho tšoarelana kateng. Litemaneng tse ling tsa Mangolo a Seheberu, bangoli ba bang ba Bibele ba sebelisa lentsoe le sebelisoang feela ha ho buuoa ka tsela eo Jehova a tšoarelang ka eona. Ha Jehova a re tšoarela, o hlakola libe tsa rona ka ho felletseng. Re ka boela ra ba metsoalle e haufi-ufi le eena. Kannete rea thaba hore ebe Jehova o re tšoarela ka pelo eohle leha re ntse re mo siteloa hangata. w25.02 8 ¶1-3

Re ka re re atlehile ho etsa mosebetsi oa boboleli le hoja batho ba sa mamele molaetsa oa rona. Ke hobane’ng ha re ka cho joalo? Lebaka ke hobane re entse seo Jehova le Mora oa hae ba neng ba batla hore re se etse e leng ho bolela litaba tse monate. Le haeba re fumana batho ba sa batleng ho bua le rona, rea thaba hobane rea tseba hore re entse ntho e khahlisang Ntate oa rona. (Liprov. 27:11) Le rona rea thaba ha mohoeletsi a fumana motho ea thabelang molaetsa oa Bibele. Molula-Qhooa o tšoantša mosebetsi oa ho bolela litaba tse monate le ho batla ngoana ea lahlehileng. Batho ba bangata ba thusa hore a fumanoe ’me ba etsa joalo ka hore ba mo batle libakeng tsohle. Ha ngoana eo a fumanoa, ha se batho ba itseng feela ba thabang empa motho e mong le e mong ea neng a thusa oa thaba. Ka tsela e tšoanang, kaofela ha rona re thusa mosebetsing oa ho etsa hore batho e be barutuoa ba Jesu. Kahoo, kaofela ha rona ka phuthehong re lokela ho bolella batho litaba tse monate ’me rea thaba ha re bona e mong oa batho bao a qala ho tla libokeng. w24.04 18 ¶13-14

Ho tl’o etsahala lintho tse thabisang haufinyane. Jehova o tla re hlohonolofatsa ’me re tšepa hore re tla bona ha batho ba bangata ba batla ho mo sebeletsa pele mahlomola a maholo a qala. Ntho e re thabisang ke hore nakong ea mahlomola a maholo, ho tla ba le batho ba bangata ba khethang ho tsoa lefatšeng la Satane ’me ba sebeletse Jehova hammoho le rona. Pele nako eo e fihla, re na le mosebetsi oa bohlokoa oo re lokelang ho o etsa. Ke mosebetsi oo re ke keng ra hlola re o etsa hape. Kahoo, hona joale re na le tlotla ea hore re bolele litaba tse monate tsa ’Muso oa Molimo lefatšeng lohle. Ka nako e tšoanang re lokela ho tsoela pele re lemosa batho ka lintho tse tl’o etsahala haufinyane. Batho ba hloka ho tseba hore bofelo ba lefatše lena le khopo bo ntse bo atamela ka potlako. Kaha re rata litaba tse monate, re rata batho ’me ka ho fetisisa re rata Jehova Molimo le lebitso la hae. Re tla lula re bolela molaetsa ona o potlakileng ka cheseho le ka mafolofolo ho fihlela Jehova a re: “Ho lekane!” w24.05 19 ¶14-16

Bosiung ba ho qetela pele Jesu a bolaoa, o ile a ruta Petrose le baapostola ba bang thuto ea bohlokoa e amanang le boikokobetso. Baapostola ba hae ba ne ba maketse haholo hobane mosebetsi oo o ne o etsoa ke basebeletsi. Jesu o ile a hlobola seaparo sa hae sa ka holimo, a itlama ka thaole thekeng eaba o tšela metsi ka beisineng ka mor’a moo a qala ho ba hlatsoa maoto. (Joh. 13:​4, 5) E tlameha ebe ho mo nkile nako ho hlatsoa maoto a baapostola ba 12, ho akarelletsa le a Judase, eo hamorao a neng a tl’o rekisa Jesu. Ho ntse ho le joalo, Jesu o ile a phetha kabelo eo ka boikokobetso. Ka mamello Jesu o ile a ba hlalosetsa a re: “Na lea utloisisa hore na ke hobane’ng ha ke le hlatsoitse maoto? Le nepile ha le mpitsa Mosuoe le Morena. Joale haeba ’na Mosuoe le Morena ke le hlatsoitse maoto, le lona le tšoanela ho hlatsoana maoto.”—Joh. 13:​12-14. w25.03 10 ¶9-11

Ho ka ba thata hore re lule re le haufi le Jehova lefatšeng lena leo re phelang ho lona. Batho ba bangata ha ba lumele hore Molimo o teng. Hangata batho ba sa mameleng melao ea Molimo ba bonahala ba phela hamonate. Ha re bona tsela eo ba phelang ka eona, tumelo ea rona e ka lekeha. Le hoja re lumela hore Molimo o teng, re ka ’na ra ipotsa hore na o tla re thusa. Mongoli oa Pesaleme ea 73 le eena o ile a ikutloa ka tsela e tšoanang. O ile a bona batho bao a phelang le bona ba sa mameleng melao ea Molimo ba phela hamonate. Kahoo, o ile a qala ho ipotsa hore na ho sebeletsa Molimo ho na le molemo. (Pes. 73:​11-13) Ke’ng e ileng ea thusa mopesaleme hore a fetole tsela eo a neng a nahana ka eona? O ile a nahanisisa ka hore na ho tla etsahala’ng ka batho ba lebalang Jehova. (Pes. 73:​18, 19, 27) O ile a boela a nahana ka melemo ea ho sebeletsa Molimo. Le rona re ka nahana ka litlhohonolofatso tseo Jehova a re fileng tsona. w24.06 25 ¶16-17

Mehleng ea Bibele, batho ba bang ba ne ba tšoara bana ba bo bona ba futsanehileng hampe ka hore ba batle phaello cheleteng eo ba ba alimileng eona. Hape baahloli ba bang ba ne ba nka tjotjo ebe ba ahlola batho ba se nang molato ka ho hloka toka. Jehova o hloile ha batho ba etsa lintho tsena.(Ezek. 22:12) Ke habohlokoa hore re itlhahlobe hore na re ikutloa joang ka chelete. Ipotse: ‘Na ke lula ke nahana ka chelete le lintho tseo nka li rekang ka eona? Haeba ke alimile chelete, na ke lieha ho e khutlisa hobane ke nka hore mong’a eona ha a e hloke hakaalo? Na ho ba le chelete ho etsa hore ke ikutloe ke le motho oa bohlokoa le ho etsa hore ho be thata hore ke be motho ea fanang? Na ke ahlola bara le barali ba bo rona ba nang le chelete ka hore ba rata chelete ho feta Jehova? Na ke khetha ho ba motsoalle oa batho ba nang le chelete feela?’ Re ka sireletsa setsoalle sa rona le Molimo ka hore re se ke ra ba batho ba ratang chelete. Ha re etsa joalo, Jehova a ke ke a re tlohela. w24.06 12-13 ¶17-18

E le hore re itšireletse litekong re lokela ho ba le takatso e matla ea ho etsa ntho e nepahetseng. Haeba re ithuta ho ‘hloea lintho tse fosahetseng le ho rata tse nepahetseng,’ re tla ikemisetsa le ho feta ho etsa ntho e nepahetseng. (Amose 5:15) Haeba re batla ho etsa lintho tse nepahetseng, re tla ba monyetleng o motle oa ho hlola le liteko. Re lokela ho phathahana ka ho etsa lintho tse tla etsa hore re rate Jehova le ho feta. Ha re le libokeng kapa tšimong, re etsa hore takatso ea rona ea ho thabisa Jehova e be matla le ho feta. (Mat. 28:​19, 20; Baheb. 10:​24, 25) Ha re bala Lentsoe la Molimo, re ithuta lona re bile re nahanisisa ka lona, re tla rata ho etsa lintho tse nepahetseng le ho feta re be re hloee ho etsa lintho tse fosahetseng. (Josh. 1:8; Pes. 1:​2, 3; 119:97) Hopola hore Jesu o ile a re ho barutuoa ba hae: “Le rapele le sa khaotse e le hore le se ke la oela molekong.” (Mat. 26:41) Kahoo, re fa Jehova monyetla oa hore a re thuse hape re matlafatsa boikemisetso ba rona ba ho mo thabisa.—Jak. 4:8. w24.07 17-18 ¶14-16

Batho ba koetlisang ba bang, ba tla be ba etsa hantle haeba ba etsisa tsela eo Jehova a fang ba bang bohlale ka eona. Hopola hore Jehova o thabela ho arolela ba bang bohlale ba hae. Ka tsela e tšoanang, re lokela ho arolela batho ba ntseng ba ithuta tsebo le boiphihlelo boo re nang le bona. Ha re timane ka tsebo eo re nang le eona hobane feela re tšaba hore motho eo re mo rutang o tla re nkela mosebetsi kapa boikarabelo bo itseng. Hape ha rea lokela ho ba le maikutlo a ho re: ‘Ha ho na motho ea nkoetlisitseng! Kahoo, e mong le e mong o lokela ho hela a itlamela.’ Maikutlo a joalo ha a lokela ho ba teng har’a batho ba Jehova. Ho e-na le hoo, ha re thabele feela ho fetisa tsebo eo re nang le eona, empa re ikemiselitse “ho tela bophelo ba rona” bakeng sa batho bao re ba koetlisang. (1 Bathes. 2:8) Ha re ruta ba bang lintho tseo re li tsebang, re batla hore ‘le bona ba tšoanelehe ho li ruta ba bang.’ (2 Tim. 2:​1, 2) Haeba re thabela ho koetlisa ba bang, kaofela ha rona re tla ba bohlale ’me re thabe. w24.09 29 ¶12-13

Haeba u utloa eka ha u na bokhoni bo itseng bo ikhethang, u se ke oa nyahama. E tlameha ebe u na le makhabane a matle a ka tsoelang phutheho molemo. Nahana ka mantsoe a Pauluse a hlahang ho 1 Bakorinthe 12:​12-30 ebe u kopa Jehova hore a u thuse. Mantsoe a Pauluse a bontša ka ho hlaka hore le uena joaloka mohlanka e mong le e mong oa Jehova, phutheho ea u hloka ebile u motho oa bohlokoa. Etsa sohle seo u ka se khonang ho sebeletsa Jehova le Bakreste-’moho le uena. Kholiseha hore baholo ba tla nahana ka bokhoni ba hao ’me ba u fe mosebetsi oo u tla khona ho o etsa. (Bar. 12:​4-8) Bakreste bohle e lokela ho ba metsoalle ea Jehova, ba thabele ho fa ba bang le hore ba phele ka tsela e thabisang Molimo. w24.11 17 ¶12-13

Anna o ile a kopana le mathata a mangata a neng a mo utloisa bohloko a bile a etsa hore a lle. Monna oa hae o ne a e-na le mosali e mong, eo lebitso la hae e leng Penina ’me mosali eo o ne a hloile Anna. Ho hobe le ho feta ke hore Anna o ne a sa khone ho ba le bana, ha Penina eena a ne a e-na le bana. (1 Sam. 1:​1, 2) Penina o ne a lula a utloisa Anna bohloko hobane a sa khone ho ba le bana. “Anna o ne a utloile bohloko haholo” hoo a neng “a lla a bile a sa je.” (1 Sam. 1:​6, 7, 10) Anna o ile a thusoa ke’ng? O ile a rapela Jehova tabernakeleng. O ile a kopa Jehova ka tieo a re: ‘E se eka u ka bona bohloko boo ke leng ho bona ’me oa nkhopola.’ (1 Sam. 1:11) Jehova o ile a bona bohloko boo a bo utloang, a utloa ha a lla ’me hamorao o ile a mo thusa hore a be le bana.—1 Sam. 1:​19, 20; 2:21. w24.12 21 ¶5-7

Tefo ea topollo e re ruta hore Jesu o rata batho e le kannete, haholo-holo balateli ba hae. (Joh. 13:1) Ka mohlala, Jesu o ne a tseba hore tse ling tsa lintho tseo a neng a tla li etsa ha a le lefatšeng li ne li tla ba thata, haholo-holo tsela e bohloko eo a neng a tla shoa ka eona. Empa o ne a ikemiselitse ho li etsa hobane a rata batho haholo eseng hobane feela a laetsoe. Jesu o ile a bontša hore o rata batho ka hore a ba bolelle litaba tse monate, a ba rute le ho ba thusa. Le letsatsing leo a neng a tl’o bolaoa ka lona, o ile a ipha nako ea ho hlatsoa maoto a baapostola ba hae, a ba khothatsa le ho ba fa litaelo. (Joh. 13:​12-15) Leha a se a khokhothetsoe palong, o ile a khothatsa setlokotsebe se neng se khokhothetsoe haufi le eena a ba a kopa Johanne hore a hlokomele ’mè oa hae. (Luka 23:​42, 43; Joh. 19:​26, 27) O ile a bontša hore o rata batho ka tsela eo a neng a ba tšoara ka eona le ka hore a ba shoele. w25.01 23 ¶11

Bibele e sebelisa papiso ho re thusa ho utloisisa hore na motho o ikutloa a lokolohile hakae ha a tšoaretsoe e le kannete. E re kaha ha rea phethahala, re “makhoba a sebe.” Empa re leboha Jehova hore ebe oa re tšoarela, kaha seo se etsa hore re be makhoba a ‘lokolotsoeng sebeng.’ (Bar. 6:​17, 18; Tšen. 1:5) Kannete ho tseba hore Jehova oa re tšoarela, ho etsa hore re ikutloe re thabile haholo joalokaha eka re lokollotsoe bokhobeng. Kaha Jehova o fane ka Mora oa hae e le sehlabelo, ho joalokaha eka o re folisitse. (1 Pet. 2:24) Ha re etsa sebe, re senya setsoalle sa rona le Jehova. Leha ho le joalo, Jehova a ka re tšoarela ra boela ra ba metsoalle ea hae ka lebaka la sehlabelo sa Jesu. Feela joalokaha motho ea neng a kula hampe a thaba haholo ha ngaka e mo folisa, le rona re thaba haholo ha Jehova a re amohela ’me re boela re e-ba metsoalle ea hae hobane a re tšoaretse. w25.02 11 ¶16-17

Papisong ea litalenta, Jesu o bua ka makhoba a mabeli a ileng a tšepahalla mong’a ’ona le le leng le sa kang la mo tšepahalla. (Mat. 25:​14-30) Makhoba a mabeli a ileng a tšepahala a emela Bakreste ba tlotsitsoeng ba tšepahalang. Mong’a makhoba ke Jesu ’me o mema makhoba a ileng a tšepahala hore a thabe le eena. Ba fumana moputso oa bona e leng tsoho ea pele. (Mat. 25:​21, 23; Tšen. 20:5b) Leha ho le joalo, mohlala o mobe oa lekhoba le botsoa ke temoso ho Bakreste ba tlotsitsoeng. Joang? Ba lokela ho sebetsa ka thata. Joaloka papisong ea baroetsana ba leshome, papisong ea litalenta Jesu o ne a sa re batlotsuoa ba tla ba botsoa. Le hona mona o ne a mpa a hlalosa hore na ho tla etsahala’ng ka bona haeba ba ka felloa ke cheseho. Haeba ba ne ba ka etsa joalo, ba ne ba ke ke ba tšoaneleha ho kena ’Musong o leholimong. w24.09 22 ¶10; 23 ¶12-13

Kaofela ha rona re batla ho itlhokomela le ho hlokomela ba malapa a rona ka lintho tseo ba li hlokang. (Moek. 7:12; 1 Tim. 5:8) Ho hlakile hore pele re khetha mosebetsi, re tla nahana ka hore na re tla khola bokae. Leha ho le joalo, haeba motho a amehile ka mokholo feela ha a khetha mosebetsi, o tla be a tsamaea ka pono feela. Haeba re tsamaea ka tumelo, re tla nahana ka kamoo mosebetsi oo re o khethang o tla ama setsoalle sa rona le Jehova kateng. Ipotse: ‘Na mosebetsi oo o tla etsa hore ke etse lintho tseo Jehova a li hloileng?’ (Liprov. 6:​16-19) ‘Na o tla ntšitisa ho sebeletsa Jehova kapa mohlomong o tla etsa hore ke qete nako e ngata ke le hole le ba lelapa?’ Haeba karabo ea hao ke e, ho ka ba bohlale hore u se ke oa amohela mosebetsi oo, le haeba ho le thata ho fumana mosebetsi. Kaha re tsamaea ka tumelo, re etsa liqeto tse bontšang hore re kholisehile hore Jehova o tla re hlokomela ka tsela e itseng ka lintho tseo re li hlokang.—Mat. 6:33; Baheb. 13:5. w25.03 21 ¶5-6

Re lokela ho leka ho ba le boikutlo boo Jehova a nang le bona ka Bakreste-’moho le rona. Re ka thusoa ke hore re se ke ra sheba liphoso tsa bona empa re shebe lintho tse ntle tseo ba li etsang. Re ka leka ho lokisa litaba pakeng tsa rona ka tsela e lerato. Ha re etsa joalo, batho ba bang ba tla batla ho ba karolo ea mokhatlo oa Jehova hobane ba batla ho bontšoa lerato le ho tšoaroa ka mosa. Re tla lula re ananela hore Jehova o entse hore re be karolo ea mokhatlo oa hae. Motho e mong le e mong ea batlang ho lula a khatholohile, a thabile a bile a ikutloa a sireletsehile, o lokela ho lula e le karolo ea mokhatlo oa Jehova. Empa re lokela ho ba seli hobane Satane o etsa sohle seo a ka se khonang hore a re ntše ka hare ho mokhatlo oa Jehova. (1 Pet. 5:8; Tšen. 12:9) Ha rea lokela ho mo lumella hore a atlehe. A re sebetseng ka thata e le hore re sireletse khotso eo re nang le eona ka hare ho mokhatlo oa Jehova. w24.04 24-25 ¶18-19

Batsoali, le ka kenya ka ho bana ba lona cheseho bakeng sa borapeli ba Jehova. Ruta bana ba hao ka lipuo le ka mohlala hore lintho tsa moea tse kang ho ithuta Bibele, ho ea libokeng le ho kopanela tšebeletsong ea tšimo li tla pele. Ho seng joalo, bana ba hao ba ka ’na ba etsa qeto ea hore ho ba e mong oa Lipaki Tsa Jehova ke karolo ea “bolumeli ba lelapa” feela. Ka lebaka leo, ba ka ’na ba beha borapeli ba ’nete sebakeng sa bobeli kapa ba bo tlohela ka ho feletseng. Na motho ea khaolitseng ho sebeletsa Jehova ha a na tšepo? Che, hobane a ka baka ’me a sebeletsa Jehova hape. E le hore a etse joalo, ho ka ’na ha hlokahala hore a tlohele boikhohomoso ’me a amohele thuso ea baholo. (Jak. 5:14) Boiteko boo a bo etsang ba hore e be motsoalle oa Jehova hape ha se ba lefeela! w24.07 25 ¶18-19

Le ka etsa’ng e le hore le itšoare hantle ha le ntse le ratana? Ha le ntse le ratana, maikutlo a lerato a ba matla haholo. Ke’ng e tla le thusa hore le se ke la etsa lintho tse sa thabiseng Jehova? Qobang ho bua ka thobalano, ho ba bang le ho noa haholo. (Baef. 5:3) Lintho tsena li ka etsa hore takatso ea lona ea ho etsa thobalano e be matla ’me ho be thata hore le etse se nepahetseng. Ho ka ba molemo hore le lule le buisana ka hore na le ka etsa’ng e le hore le lule le itšoere hantle ha le ntse le ratana. (Liprov. 22:3) Ha le ntse le ratana haholoanyane, le ka khetha ho bontšana lerato ka tsela e loketseng. Leha ho joalo, haeba le e-ba le takatso e matla ea ho etsa thobalano ho tla ba thata hore le etse qeto e nepahetseng. (Sefela 1:2; 2:6) Hape ho bontšana lerato ho ka etsa hore le thatafalloe ke ho itšoara hantle ebe le etsa boitšoaro bo bobe. (Liprov. 6:27) Kahoo, ha le qala feela ho ratana le lokela ho buisana ka hore na ke lintho life tseo le tla li etsa le tseo le ke keng la li etsa e le hore le ka mamela melao-motheo ea Bibele.—1 Bathes. 4:​3-7. w24.05 29 ¶10-11

Re batla hore Bakreste-’moho le rona ba re tšepe ’me ba kholisehe hore re ka ba thusa, haholo-holo ha ba e-na le mathata. (Liprov. 17:17) Re ka etsa’ng e le hore re tsebahale re le batho ba tšepahalang? Re ka leka ho etsisa Jehova letsatsi le letsatsi. Ka mohlala, re lokela ho phethahatsa litšepiso tsa rona hape re be batho ba bolokang nako. Phutheho e rua molemo joang ha baholo ba tšepahala? Bahoeletsi baa khothala ha ba tseba hore ba ka khona ho bua le baholo neng kapa neng ha ba hloka thuso. Hape ba tla ikutloa ba ratoa ha ba tseba hore baholo ba ikemiselitse ho ba thusa. Ho feta moo, bahoeletsi ba tla tšepa baholo ha ba fana ka keletso e thehiloeng Bibeleng le lingoloeng tseo mohlanka ea tšepahalang a fanang ka tsona ho e-na le ho fana ka keletso e thehiloeng maikutlong a bona. Hape bara le barali ba bo rona ba tla tšepa moholo haeba a sa tsamaee a ntša makunutu a bona ebile a tšepahalla seo a itseng o tla se etsa. w24.06 30 ¶14-15

Mehleng ena ha rea lebella hore Jehova a tlose mathata ’ohle a rona empa o tla lula a re thusa. (Pes. 41:3) Jehova o sebelisa moea oa hae o halalelang ho re fa matla, bohlale le khotso ea kelello e le hore re ka mamella. (Liprov. 18:14; Bafil. 4:13) O boetse o re tšelisa ka ho re fa tšepo ea hore nakong e tlang ha ho motho ea tla kula. (Esa. 33:24) Ha re nyahame, mantsoe a Jehova a hlahang ka Bibeleng a ka re tšelisa le ho re thusa hore re lule re khobile matšoafo. (Bar. 15:4) Morali oa bo rona ea lulang Afrika Bophirimela, o ne a lula a lla ka mor’a hore a bolelloe hore o na le kankere. O re: “Lengolo le ntšelisang ka ho khetheha ke Esaia 26:3. Lengolo lena le nkholisa hore Jehova a ka re thusa ho khoba matšoafo le ho mamella mathata.” Na ho na le lengolo leo ka ho khetheha le u tšelisang ha u tobane le maemo a thata a etsang hore u se ke oa ba le tšepo? w24.12 24 ¶17-18

Ena ke tsela eo Jehova a ikutloang ka eona ka batho ba mo lahlileng ’me baholo ba etsa sohle seo ba ka se khonang ho etsisa Jehova. Ba batla hore nku e lahlehileng e “khutlele hae.” (Luka 15:​22-24, 32) Ha moetsalibe a baka, Jehova, Jesu, mangeloi le phutheho kaofela baa thaba. (Luka 15:7) Re se re ithutile hore Jehova ha a lumelle baetsalibe ba sa bakeng hore ba lule ka phuthehong. Leha ho le joalo, seo ha se bolele hore o ba qhalla matsoho. O batla hore ba khutlele ho eena. Tsela eo Jehova a ikutloang ka eona ka baetsalibe ba bakileng e hlalositsoe ho Hosea 14:​4, e reng: “Ke tla ba folisa ’me ba tla tšepahala. Ke tla ba rata ka pelo eohle hobane ha ke sa ba halefetse.” Maikutlo ana a Jehova a susumelletsa baholo ho potlakela ho thusa motho ea bontšang matšoao a ho baka, leha e ka ba ke a manyenyane feela. A boetse a thusa le ba tlohetseng Jehova hore ba khutle kapele. w24.08 28 ¶8-9

Ha se kamehla batho ba bang ba bontšang kananelo ha ba thusitsoe. Ka linako tse ling, re ka tela nako, matla le lintho tseo re nang le tsona ho thusa motho e mong empa ka mor’a moo ha bonahala eka ha a bontše kananelo. Ha seo se etsahala, re ka etsa’ng hore re lule re thabile ebile re sa nyahame? Hopola, thabo ea rona ha ea itšetleha ka hore na batho baa leboha kapa che. (Lik. 20:35) Re ntse re ka khona ho thabela ho ba batho ba fanang, le hoja ho bonahala eka ba bang ha ba ananele seo re ba etsetsang sona. Re ka thusoa ke eng? Re amehe ka ho etsisa Jehova. O fa batho bohle lintho tse molemo, ho sa tsotellehe hore na baa li ananela kapa che. (Mat. 5:​43-48) Jehova o tšepisa hore haeba re fana ‘re sa lebella hore re pataloe, moputso oa rona o tla ba moholo.’ (Luka 6:35) Kahoo, u se ke oa ikutloa u nyahame haeba ka linako tse ling batho ba sa bontše hore ba ananela seo u ba etselitseng sona. Hopola hore Jehova o tla u hlohonolofatsa ka lebaka la ho etsetsa ba bang lintho tse molemo, hobane Jehova “o rata motho ea fanang a thabile.”—Liprov. 19:17; 2 Bakor. 9:7. w24.09 29 ¶14-16