November

Baholo ba bontša kutloelo-bohloko e tšoanang le ea Jehova ha ba sebelisana le motho ea tlositsoeng ka phuthehong. Ka mohlala, nakong e fetileng Jehova ha aa ka a emela batho ba hae hore e be bona ba tlang ho eena ho lokisa litaba. Ho e-na le hoo, e ile ea e-ba eena ea nkang bohato ba pele ba ho ba thusa le pele bona ba ka bontša matšoao a ho baka. Jehova o ile a bolella moprofeta Hosea hore a tšoarele mosali oa hae le hore a lule le eena hape, le hoja mosali eo a ne a ntse a etsa sebe se tebileng. Ka tsela eo, Jehova o ne a bontša batho ba hae kamoo a nang le kutloelo-bohloko kateng. (Hos. 3:1; Mal. 3:7) Kaha baholo ba etsisa Jehova, ba thabela ho bona ha motho ea entseng sebe se tebileng a baka a bile a khutlela ka phuthehong ’me ba mo thusa ka tsela e ke keng ea mo thatafalletsa hore a khutle. Hopola papiso eo Jesu a ileng a e etsa ea mora ea lahlehileng.Eitse ha ntate oa hae a mo bona, o ile “a matha a ea ho eena a mo haka eaba oa mo suna.” (Luka 15:20) Hlokomela hore ntate ha aa ka a emela hore mora oa hae a kope tšoarelo. Ho e-na le hoo, ke eena ea ileng a mathela ho mora oa hae hobane a mo rata. w24.08 27 ¶7-8

Joalokaha mantsoe a temana ea kajeno a bontša, Jehova ha a timane ka bohlale ba hae. O bo fa le batho ba bang. Hlokomela hore Jakobo o itse ha Jehova a fana ka bohlale, o fana ka bona “a sa ahlole,” kapa “a sa nyefole.” Le ka mohla, ha a etse hore re ikutloe re le basesaane ha re kopa tataiso ea hae. Ho e-na le hoo, o re khothaletsa hore re e batle. (Liprov. 2:​1-6) Na le rona re ka khona ho etsisa Jehova ka hore re arolele ba bang bohlale boo re nang le bona? (Pes. 32:8) Bahlanka ba Jehova ba na le menyetla e mengata ea hore ba arolele ba bang seo ba ithutileng sona. Ka mohlala, hangata re koetlisa ba bacha hore ba atlehe mosebetsing oa boboleli. Baholo ha ba fele pelo ha ba thusa bahlanka ba sebeletsang le bara ba bo rona ba kolobelitsoeng hore ba ithute ho etsa mesebetsi e itseng ka phuthehong. Bara le barali ba bo rona ba nang le boiphihlelo mosebetsing oa kaho le oa ho hlokomela libaka tsa rona tsa borapeli, ba koetlisa ba se nang boiphihlelo hore le bona ba atlehe ho etsa mosebetsi ona. w24.09 28-29 ¶11-12

E le hore u tšoanelehe ho ba moholo, u lokela ‘ho phela ka tsela eo ho seng motho ea ka u tšoaeang phoso.’ Sena se bolela hore Bakreste-’moho baa u hlompha hobane u itšoere hantle ebile ha ho letho leo ba ka u tšoaeang phoso ka lona. (1 Tim. 3:2) Ho ekelletsa moo, u lokela ho ba motho ea buuoang hantle ke batho bao e seng balumeli. Ke ’nete hore batho ba sa sebeletseng Jehova ba ka ’na ba nyatsa lintho tseo re li lumelang, empa ha oa lokela ho ba fa lebaka la ho belaella botšepehi kapa boitšoaro ba hao. (Dan. 6:​4, 5) Ipotse, ‘Na ke na le botumo bo botle ka phuthehong le ho batho ba sa sebeletseng Jehova?’ Haeba u ‘rata ho etsa lintho tse lokileng,’ u tla sheba makhabane ho batho ’me u ba babatse. (Tite 1:8) U boetse u thabela ho etsetsa batho lintho tse molemo, le tseo ba neng ba sa li lebella. Ke hobane’ng ha e le habohlokoa hore moholo e be motho ea ratang ho etsa lintho tse lokileng? Hobane o tla thabela ho sebelisa nako ea hae e ngata a etsa maeto a bolisa le ho etsa mesebetsi e meng ka phuthehong. (1 Pet. 5:​1-3) Le hoja ho hloka boitelo ho etsa mesebetsi eo, thabo e tlisoang ke ho sebeletsa ba bang, e feta hole lintho tseo re li tetseng.—Lik. 20:35. w24.11 20 ¶3-5

Bahlanka ba sebeletsang ba etsa mosebetsi oa bohlokoa liphuthehong. Moapostola Pauluse o ne a nka banna bana ba tšepahalang e le ba bohlokoa. Ka mohlala, ha a ne a ngolla Bakreste ba Filipi, ka ho khetheha o ile a lumelisa bahlanka ba sebeletsang hammoho le baholo. (Bafil. 1:1) Bara ba bo rona ba bangata ba kolobelitsoeng, ho sa tsotellehe hore na ba bacha kapa ba holile, ba thabela ho ba bahlanka ba sebeletsang. Ka mohlala, Mor’abo rona Devan o ne a le lilemo li 18 ha a ne a khethoa hore e be mohlanka ea sebeletsang. Mor’abo rona Luis eena o ne a le ka holimo ho lilemo tse 50 ha a ne a khethoa hore e be mohlanka ea sebeletsang. O ikutloa joang ka ho ba mohlanka ea sebeletsang? O re: “Ke ananela mosebetsi oo ke o etsang haholo joaloka mohlanka ea sebeletsang, haholo-holo ha ke nahana ka tsela eo phutheho e bontšitseng ka eona hore ea nthata.” Bahlanka ba sebeletsang ba bangata le bona ba ikutloa ka tsela ena. Haeba u mor’abo rona ea kolobelitsoeng ’me ha u e-s’o be mohlanka ea sebeletsang, ikemisetse ho ba eena. w24.11 14 ¶1-3

Morena Ezekiase oa Juda o ile a kula haholo ha a le lilemo li 39. Moprofeta Esaia o ile a mo bolella hore Jehova o itse o tl’o shoa. (2 Mar. 20:1) Ho ne ho bonahala eka ho felile ka Ezekiase. Ha a utloa molaetsa oo, o ile a utloa bohloko hoo a ileng a lla haholo. O ile a kopa Jehova ka tieo hore a mo thuse. Ha Jehova a utloa thapelo ea Ezekiase ’me a bona likhapha tsa hae, o ile a mo utloela bohloko eaba o re ho eena: “Ke utloile thapelo ea hao ’me ke bone meokho ea hao. Ke tl’o u folisa.” Jehova o ile a sebelisa Esaia ho fetisa molaetsa oa hore o tl’o eketsa bophelo ba Ezekiase le hore o tla pholosa Jerusalema letsohong la Baasiria. (2 Mar. 20:​4-6) Na u kula hoo u se nang tšepo ea hore u tla fola? Rapela Jehova, u mo bolelle hore na u ikutloa joang. O tla u mamela leha u ka rapela u ntse u lla. Bibele ea re tiisetsa hore Jehova “Ntate ea mohau le ea bonolo haholo” o tla re tšelisa mathateng ’ohle a rona.—2 Bakor. 1:​3, 4. w24.12 24 ¶15-17

E tla ba ntho e thabisang hakaakang ho amohela ba tla tsosoa. Hape nahana kamoo u tla thabela ho ithuta ka Jehova kateng linthong tse ngata tseo a li bopileng. (Pes. 104:24; Esa. 11:9) Ho thabisang le ho feta ke hore u ke ke oa hlola u etsa sebe. Kahoo, u tla khona ho sebeletsa Jehova ’me ho ke ke ha hlokahala hore u kope tšoarelo. Na u ka tela litlhohonolofatso tsee hore feela u “thabele ho etsa sebe ka nakoana”? (Baheb. 11:25) Ho hang. Lintho tseo re lokelang ho li tela hona joale, ha se letho ha li bapisoa le bophelo boo re tla bo phela ka nako eo. Hopola hore Paradeise e ke ke ea lula e le ntho feela eo re e letetseng. Qetellong e tla ba sebaka seo re phelang ho sona letsatsi le letsatsi. Lintho tsena kaofela li tla etsahala hobane Jehova o re ratile haholo hoo a ileng a fana ka Mora oa hae hore a re shoele. w25.01 29 ¶12

Har’a mehlala ea batho ba nang le tumelo bao ho buuoang ka bona lengolong la Baheberu, Moshe ke e mong oa batho ba ileng ba bontša tumelo e babatsehang. (Baheb. 3:​2-5; 11:​23-25) Moshe o ne a sa etsa phoso ka ho bontša tumelo ho Molimo hobane Molimo o ile a fana ka metsi le lijo ka mohlolo e le hore batho ba tsoele pele ba phela lefeelleng leo le omelletseng. (Ex. 15:​22-25; Pes. 78:​23-25) Le hoja Moshe a ne a e-na le tumelo e matla, hoo e ka bang selemo hamorao ka mor’a hore Jehova a ntše Baiseraele ka mohlolo Egepeta, ha aa ka a tšepa hore Jehova o na le bokhoni ba ho fa batho ba hae nama. Moshe o ne a bona eka ho ke ke ha khoneha hore Jehova a fane ka nama e lekaneng ho khotsofatsa batho bao ba limilione lefeelleng. Jehova o ile a botsa Moshe, a re: “Na letsoho la Jehova le lekhutšoanyane?” (Num. 11:​21-23, nal.) Ha e le hantle, Jehova o ne a botsa Moshe, a re: ‘Na u nahana hore ke tla hloleha ho etsa ntho eo ke reng ke tla e etsa?’ w25.03 26 ¶1-2

Na ho nepahetse hore re re ntho e ’ngoe le e ’ngoe e etsahetseng nakong ea Moroallo e emela lintho tse tla etsahala nakong e tlang? Karabo ke che. Hobane’ng? Ke hobane Bibele ha e re ho joalo. Ke ’nete hore Jesu o ile a bapisa ‘mehla ea Noe’ le ho ba teng ha hae. Empa o ne a sa re ntho e ’ngoe le e ’ngoe e etsahetseng mehleng ea Noe joaloka ho koaloa ha monyako oa areka, e ne e bontša lintho tse neng li tla etsahala ka tsela e kholoanyane nakong e tlang. (Mat 24:​37-39) Noe o ile a etsa’ng ha a utloa hore Jehova o tl’o timetsa lefatše? O ile a bontša hore o na le tumelo ka hore a hahe areka. (Baheb. 11:7; 1 Pet. 3:20) Ka tsela e tšoanang, ha batho ba utloa litaba tse monate tsa ’Muso oa Molimo ba lokela ho bontša tumelo ka ho etsa seo ba ithutileng sona. (Lik. 3:​17-20) Petrose o ile a re Noe o ne a “phatlalatsa litaba tse lokileng.” Mehleng ena rona re leka ho bolella batho bohle ba phelang lefatšeng litaba tse monate ’me re etsa seo ka cheseho. Empa ho sa tsotellehe hore na re leka ka matla hakae, re ke ke ra khona ho bolella motho e mong le e mong pele bofelo bo fihla. w24.05 8 ¶3-5

Re lokela ho batla mekhoa ea ho bontša metsoalle ea Jehova mosa le tlhompho. (Bar. 12:10) Re ka etsa seo joang? Ho ea ka Pesaleme ea 15:​4, tsela e ’ngoe eo motho e ka bang moeti tenteng ea Jehova ke ka hore ‘a phethahatse litšepiso tsa hae le haeba seo se ka etsa hore lintho li se ke tsa mo tsamaela hantle.’ Haeba re sa phethahatse litšepiso tsa rona, seo se utloisa batho ba bang bohloko. (Mat. 5:37) Ka mohlala, Jehova o lebeletse hore banyalani ba tšepahalle likano tseo ba li entseng ha ba ne ba nyalana. O boetse o thabisoa ke ha batsoali ba etsa boiteko bohle ba ho phethahatsa litšepiso tseo ba li etsetsang bana ba bona. Lerato leo re ratang Molimo le baahisani ba rona ka lona le tla re susumeletsa hore re etse sohle se matleng a rona hore re tšepahale. Tsela e ’ngoe eo re ka hlomphang metsoalle ea Molimo ka eona ke ka hore re be le kamohelo ea baeti le ho ba batho ba fanang. (Bar. 12:13) Nako eo re e qetang re ikhatholla le bara le barali ba bo rona e re thusa hore re matlafatse setsoalle sa rona le bona hape e re thusa hore re be haufi le Jehova. Ho feta moo, haeba re le batho ba amohelang baeti, re bontša hore re etsisa Jehova. w24.06 12 ¶15-16

Jehova o senolela batho ba ikokobelitseng ’nete. (Mat. 11:25) Re ile ra ikokobetsa ’me ra amohela thuso ea ho ithuta ’nete. (Lik. 8:​30, 31) Leha ho le joalo, re lokela ho ba hlokolosi hore re se ke ra ikhohomosa. Boikhohomoso bo ka etsa hore re nahane hore maikutlo a rona a nepahetse joaloka melao-motheo ea Mangolo le tataiso e tsoang mokhatlong oa Jehova. E le hore re lule re ikokobelitse, re lokela ho hopola hore na re fokola hakae ha re bapisoa le Jehova. (Pes. 8:​3, 4) Re ka boela ra kopa Jehova hore a re thuse hore re ikokobetse re be re be le moea oa ho batla ho ithuta. Jehova o tla re thusa hore re nke menahano ea hae e hlahang ka Lentsoeng la hae le e tsoang mokhatlong oa hae e le bohlokoa ho feta menahano ea rona. Ha u ntse u bala Bibele, batla bopaki bo bontšang hore Jehova o rata batho ba ikokobelitseng le hore o hloile boikhohomoso le boikakaso. Haeba u fumana boikarabelo bo eketsehileng bo etsang hore u be le matla a itseng, leka ka matla hore u lule u ikokobelitse. w24.07 10 ¶8-9

Ho tloha ka 1919, haesale Jesu a sebelisa sehlopha se senyenyane sa banna ba tlotsitsoeng ho hlophisa mosebetsi oa boboleli le ho fa balateli ba hae litaelo tse tsoang Lentsoeng la Molimo ka nako e nepahetseng. (Luka 12:42) Ho hlakile hore Jehova o hlohonolofatsa mosebetsi oa sehlopha seo. (Esa. 65:​13, 14) Haeba re ne re sa hlophiseha, re ne re ke ke ra khona ho etsa mosebetsi oo Jesu a re fileng oona. (Mat. 28:​19, 20) Ka mohlala, haeba bara ba bo rona ba ne ba sa hlophise hore tšimo eohle ea phutheho ea rona e sebetsoe, motho e mong le e mong o ne a tla ea tšimong moo a ratang. Libaka tse ling li ne li tla phetoa hangata ke bahoeletsi ba fapaneng, athe libaka tse ling tsona li ne li ke ke tsa sebetsoa ho hang. U nahana hore ke melemo efe e meng eo re e fumanang ka hore ebe re hlophisehile? Jesu o ntse a tsoela pele ho hlophisa batho ba Molimo le mehleng ena joalokaha a ne a etsa ha a ne a le lefatšeng. w24.04 8-9 ¶2-4

Kaine e ne e le mora oa letsibolo oa Adama le Eva. O ile a futsa mekhoa e mebe ho batsoali ba hae. Bibele e boetse e re ka eena: “Mesebetsi ea hae e ne e le mebe.” (1 Joh. 3:12) E ka ’na eaba ke lona lebaka le entseng hore Jehova a se ke “a amohela Kaine le nyehelo ea hae.” Ho e-na le hore Kaine a fetole mekhoa ea hae, o ile “a halefa haholo ’me a utloa bohloko.” Jehova o ile a etsa’ng ka mor’a moo? O ile a bua le Kaine. (Gen. 4:​3-7) Jehova o ile a eletsa Kaine ka mosa ’me a mo bolella hore o tla mo hlohonolofatsa haeba a ka fetoha. O ile a boela a mo lemosa hore khalefo ea hae e tla etsa hore qetellong a etse sebe. Ka masoabi Kaine o ile a hana ho mamela. Ha aa ka a lumella Jehova hore a mo thuse ho baka. Empa na manganga a Kaine a ile a etsa hore Jehova a khaotse ho thusa baetsalibe ba bang hore ba bake? Le letho! w24.08 10 ¶8

Moshe o ile a hopotsa sechaba sa Iseraele hore se letetsoe ke bokamoso bo thabisang. Jehova o ne a tla hlohonolofatsa Baiseraele ka hore ba phele nako e telele naheng eo a neng a ba tšepisitse eona. Naha eo e ne e le ntle, e beha litholoana tse ngata. Ha Moshe a ba hlalosetsa ka naha eo, o ile a re: “Metse e meholo le e metle eo le sa kang la e haha, matlo a tletseng lintho tsa mefuta eohle tse ntle tseo le sa kang la li sebeletsa, liliba tseo le sa kang la li cheka, lirapa tsa morara le lifate tsa mohloaare tseo le sa kang la li lema.” (Deut. 6:​10, 11) Ntho e ’ngoe eo Moshe a ileng a e etsa ke ho lemosa Baiseraele. E le hore ba ’ne ba tsoele pele ho phela naheng eo e ntle, ba ne ba lokela ho mamela melao ea Jehova. Moshe o ile a ba khothaletsa hore ba “khethe bophelo” ka hore ba mamele Jehova ba be ba “mo khomarele.” (Deut. 30:20) Leha ho le joalo, Baiseraele ha baa ka ba mamela Jehova. Kahoo, ha nako e ntse e ea, Molimo o ile a lumella Baasiria ho ba hlola ’me hamorao a lumella le Bababilona hore ba ba hape ’me ba ba ise botlamuoeng.—2 Mar. 17:​6-8, 13, 14; 2 Likron. 36:​15-17, 20. w24.11 9 ¶5-6

Batho ba bangata mehleng ena ba re ba lumela ho Jesu ebile ba mo bitsa mopholosi oa bona. (Joh. 6:29) Leha ho le joalo, qalong batho ba bang bao Jesu a ileng a bua le bona ha a ne a le Galilea, ba ne ba lumela ho eena empa hamorao ba ile ba khaotsa. Hobane’ng? Batho ba bangata har’a letšoele leo ba ne ba latela Jesu hobane feela a ne a ba fa lintho tseo ba li batlang. Ba ne ba ipatlela hore a ba folise ka mohlolo, a ba fe lijo le ho ba ruta ka lintho tseo ba neng ba thabela ho li utloa. Leha ho le joalo, Jesu o ile a bontša hore ho ne ho hlokahala se fetang seo e le hore motho e be morutuoa oa hae oa ’nete. Jesu o ne a sa tlela lefatšeng hore feela a tl’o fa batho lintho tseo ba li batlang. Ba ne ba lokela ho amohela memo ea hae ea hore ba tle ho eena, ka hore ba ikemisetse ho mamela lintho tsohle tseo a neng a li ruta.—Joh. 5:40. w24.12 12 ¶12-13

Ke eng e ka thusang monna ho khaotsa ho hlekefetsa mosali oa hae le ho mo theola seriti? A ka leka ka matla ho etsisa Jesu. Tsela eo a neng a tšoara barutuoa ba hae ka eona, ke mohlala o motle oa kamoo banna ba lokelang ho tšoara basali ba bona kateng. Re tl’o bona hore na banna ba ka ithuta eng tseleng eo Jesu a neng a bua le baapostola ba hae ka eona le kamoo a neng a ba tšoara kateng. Jesu o ne a tšoara baapostola ba hae ka mosa le ka tlhompho. Ha ho mohla a neng a bua le bona ka bohale kapa a iketsa ’mampoli. O ne a sa sebelise matla a hae ho etsa hore ba ikutloe ba le basesaane kapa ba mo tšaba. Ho e-na le hoo, o ile a ba sebeletsa ka boikokobetso. (Joh. 13:​12-17) O ile a re ho barutuoa ba hae: “Le ithute ho ’na hobane ke bonolo ebile ke ikokobelitse ’me le tla khatholoha.” (Mat. 11:​28-30) Hlokomela hore Jesu o ne a le bonolo. Ha se hore ha motho a le bonolo oa fokola. Ho e-na le hoo, o matla haholo hoo a khonang ho itšoara. Leha a ka a halefisoa, o lula a khobile matšoafo le ho laola maikutlo a hae. w25.01 10 ¶10-11

Ha bofelo ba lefatše lena bo ntse bo atamela, re ka lebella hore maemo a moruo a tla ba mabe le ho feta. Maemo a sa tsitsang a lipolotiki, lintoa, likoluoa tsa tlhaho, mafu a seoa a macha a ka etsa hore re iphumane re sebelisitse chelete ka tsela eo re neng re sa e nahana, re lahlehetsoe ke mosebetsi, thepa ea rona kapa matlo a rona. Ke eng e ka re thusang hore re etse liqeto ka tsela e bontšang hore re tšepa letsoho la Jehova? Mohato oa pele le o ka sehloohong ke ho bolella Jehova lintho tse u tšoenyang. Mo kope bohlale ba ho etsa liqeto tse nepahetseng le ho lula u khobile matšoafo e le hore u se ke oa “tšoenyeha ho sa hlokahale” ka boemo ba hao. (Luka 12:​29-31) Mo kope ka tieo hore a u thuse ho khotsofalla lintho tsa motheo tseo u nang le tsona. (1 Tim. 6:​7, 8) Etsa lipatlisiso lingoloeng tsa rona e le hore u ka bona hore na u ka sebetsana le mathata a lichelete joang ka katleho. Batho ba bangata ba ruile molemo lintlheng tse hlahang ho jw.org tse buang ka taba ea ho sebetsana le mathata a moruo. w25.03 28-29 ¶10-11

Nako e ne e fihlile ea hore Balichaba ba sa bollang e be karolo ea batho ba Molimo. Moapostola Petrose o ile a fuoa kabelo ea hore a rute Molichaba ea bitsoang Korneliase, e leng e mong oa Balichaba ba pele ba ileng ba fetoha Bakreste. Bajuda ba ne ba sa rate ho ikopanya le Balichaba, ke kahoo Petrose a neng a lokela ho lokisa tsela eo a nahanang ka eona e le hore a khone ho phetha kabelo ea hae. Ha Petrose a hlokomela hore na thato ea Molimo ke efe ka taba ena, o ile a lokisa tsela eo a bonang lintho ka eona. Ke kahoo ha a ne a romeloa kabelong eo a ileng a ea a “sa tsila-tsile.” (Lik. 10: 28,29) O ile a ruta Korneliase le ba lelapa la hae ’me ba ile ba kolobetsoa. (Lik. 10:​21-23, 34, 35, 44-48) Lilemo hamorao, Petrose o ile a khothalletsa Bakreste-’moho le eena hore ba “nahane ka tsela e tšoanang.” (1 Pet. 3:​8, nal.) Joaloka batho ba Jehova, re ka nahana ka tsela e tšoanang ka hore re ithute tsela eo Jehova a nahanang ka eona ka Lentsoeng la hae. w25.03 9-10 ¶7-8

Tsela eo batho ba nahanang ka eona e ntse e suthela hole le tsela eo Jehova a nahanang ka eona. (Liprov. 17:15) Kahoo, ho bohlokoa haholo hore re elelloe menahano ena re be re e hanyetse. Ha rea lokela ho lumella bahanyetsi hore ba re nyahamise le ho etsa hore re tlohele ho sebeletsa Jehova. Moapostola Pauluse o ile a khothaletsa Bakreste ba Baheberu hore ba tsoele pele ho hola, ’me le rona re lokela ho etsa se tšoanang. Sena se bolela hore re lokela ho ithuta Bibele ka hloko e le hore re tsebe Jehova le tsela eo a nahanang ka eona. Re lokela ho tsoela pele re ntse re etsa lintho tsena le ka mor’a hore re kolobetsoe. Ho sa tsotellehe hore na re na le nako e kae re le Bakreste, kaofela ha rona re lokela ho tsoela pele ho bala le ho ithuta Lentsoe la Molimo kamehla. (Pes. 1:2) Ha re etsa joalo, re tla khona ho matlafatsa tumelo ea rona, e leng ntho eo Pauluse a ileng a re Bakreste ba Baheberu ba lokela ho ba le eona.—Baheb. 11:​1, 6. w24.09 10 ¶7-8

Haeba re nka Jehova e le Molimo oa sebele, ho tla ba bonolo hore re mo tšepahalle. Ke sona seo Josefa a ileng a se etsa. Kaha Molimo e ne e le oa sebele ho eena, o ile a hana ho etsa boitšoaro bo bobe bo amanang le thobalano hobane o ne a sa batle ho mo utloisa bohloko. (Gen. 39:9) E le hore Jehova e be oa sebele ho rona, re lokela ho ipha nako ea ho rapela le ho bala Lentsoe la hae. Ha re etsa joalo, setsoalle sa rona le eena se tla ba matla. Joaloka Josefa, ha re e-na le setsoalle se matla le Jehova re ke ke ra batla ho etsa ntho leha e le efe e tla mo utloisa bohloko. Ho bonolo ho batho ba lebalang hore Jehova ke Molimo ea phelang hore ba khaotse ho mo tšepahalla. Nahana ka se ileng sa etsahalla Baiseraele ha ba ne ba le lefeelleng. Ba ne ba tseba hore Jehova o teng empa ba ile ba qala ho belaela hore o ne a tla ba hlokomela ka lintho tseo ba li hlokang. (Ex. 17:​2, 7) Kahoo, ba ile ba fetohela Molimo. Ho hlakile hore ha re batle ho etsisa mohlala oa bona o mobe.—Baheb. 3:12. w24.06 24 ¶14-15

Re phela mehleng ea bofelo ’me re lebeletse hore re tla lla hangata kaha mathata a ntse a hloa manolo holimo. Jehova oa bona ha re lla ebile o utloa bohloko. O bona likeleli tsa rona. Kahoo, ha re tobane le maemo a re utloisang bohloko, re tšollele lipelo tsa rona ho eena. E se eka le ka mohla re ka se ikarole ho bara le barali ba bo rona ba re ratang. Hape e se eka re ka tsoela pele re bala Bibele e le hore re ka fumana matšeliso a tsoang ho Jehova. Re kholisehile hore ha re tsoela pele re mameletse ka botšepehi, Jehova o tla re putsa. Moputso oo o akarelletsa tšepiso e thabisang ea hore nakong e tlang o tla hlakola meokho eohle ea rona e bakoang ke ho utloa bohloko, ho soetseha le ho nyahama. (Tšen. 21:4) Ka nako eo, re tla lla likeleli tsa thabo. w24.12 20 ¶3; 24 ¶19

Jehova o re khethile hore re be Lipaki tsa hae hape o tšepisa ho re thusa hore re be sebete. (Esa. 43:​10,11) Nahana ka litsela tsena tse ’nè tseo a re thusang ka tsona. Ea pele, Jesu o lula a e-na le rona kamehla ha re bolela litaba tse monate. (Mat. 28:​18-20) Ea bobeli, Jehova o sebelisa mangeloi ho re thusa. (Tšen. 14:6) Ea boraro, Jehova o re file moea oa hae o halalelang e le ho re thusa hore re hopole lintho tseo re ithutileng tsona. (Joh. 14:​25, 26) Ea bone, Jehova o boetse o re file bara le barali ba bo rona hore ba sebetse le rona. Kaha Jehova oa re thusa ebile Bakreste-’moho le rona baa re tšehetsa, re na le lintho tsohle tseo re li hlokang e le hore re atlehe ha re bolela litaba tse monate. Na u ikutloa u nyahame ha u sa fumane batho malapeng a bona? Ipotse: ‘E ka ’na eaba batho ba ile hokae?’ (Lik. 16:13) ‘Na ba mosebetsing kapa ba lishopong?’ Haeba ho joalo, na u ka fumana batho ba bangata bao u ka buang le bona ha u paka seterateng? w24.04 17 ¶10-11

Haeba u hlooho ea lelapa ’me u batla ho tšoaneleha ho ba moholo, botumo ba lelapa la hao bo ama litšoaneleho tsa hao. Kahoo, u lokela ho ba “motho ea laolang lelapa la [hao] hantle.” Sena se bolela hore u lokela ho tsebahala u le monna ea lerato le ea etsang liqeto tse nepahetseng bakeng sa lelapa la hae. Taba ena e boetse e bolela hore u tšoara borapeli ba lelapa kamehla, u etsa bonnete ba hore lelapa la hao le ea libokeng hape u le thusa hore le sebetse ka thata mosebetsing oa boboleli. Haeba u ntate ea nang le bana ba ka tlase ho lilemo tse 18 ’me ba le tlas’a tlhokomelo ea hao, e lokela ho ba “bana ba mamelang le ba itšoereng hantle.” (1 Tim. 3:4) U lokela ho ba ruta le ho ba koetlisa ka lerato. Ho hlakile hore u batla ba thabe, ba tšehe ’me ba bapale joaloka bana ba bang. Empa u lokela ho ba ruta hore ba u mamele, ba hlomphe batho ba bang le hore ba itšoare hantle. U boetse u lokela ho sebetsa ka thata ho thusa bana ba hao hore ba be le kamano e ntle le Jehova, ba sebelise seo ba ithutang sona ka Bibeleng le hore ba qetelle ba kolobelitsoe. w24.11 22 ¶10-11

Ha re ntse re sebeletsa Jehova ka matla haholoanyane, re tla bona kamoo a re tšehetsang kateng ’me re tla mo tšepa le ho feta. (1 Bakor. 3:9) Hopola hore Jehova ha a bapise bokhoni ba hao le ba batho ba bang. O ananela lerato leo u mo ratang ka lona. Oa thaba ha a bona hore u ananela mpho ea bohlokoa eo a faneng ka eona, e leng tefo ea topollo. (1 Sam. 16:7; Mar. 12:​41-44) Tefo ea topollo ke eona feela e etsang hore re tšoareloe libe, re be metsoalle ea Jehova le hore re be le tšepo ea ho phela ka ho sa feleng. E se eka re ka lula re bontša hore re ananela lerato la Jehova le mo susumelitseng hore a re fe litlhohonolofatso tsena. (1 Joh. 4:19) Hape e se eka re ka boela ra bontša hore re ananela Jesu, ea re bontšitseng lerato ka ho re shoela. w25.01 31 ¶16-18

Leka ho nahana ka maikutlo a mongoli oa Pesaleme ea 73. O ne a bona eka batho ba bang ba atlehile ebile ha ba na mathata. (Pes. 73:​3-5, 12) Taba ena e ne e etsa hore a utloe eka ho sebeletsa Jehova ha ho mo tsoele molemo. O ne a lula a “khathatsehile letsatsi lohle.” (Pes. 73:​13, 14) O ile a thusoa ke eng? Mopesaleme eo o ile a kena ka sehalalelong sa Jehova. (Pes. 73:​16-18) Eare ha a le moo a khona ho nahana hantle. O ile a elelloa hore le hoja batho bao ba bonahala eka ba phela hamonate, bokamoso ba bona bo lerootho. Ka mor’a moo, o ile a ba le khotso hobane a hlokomela hore ho sebeletsa Jehova ke ntho ea bohlokoa bophelong. Kahoo, o ile a ikemisetsa ho tsoela pele a sebeletsa Jehova.—Pes. 73:​23-28. w24.10 26 ¶11-12

Jehova o re khethile hore re be “lipaki” tsa hae. (Esa. 43:​10-12) Lilemo tse ’maloa tse fetileng, lengolo le tsoang ho Sehlopha se Busang le ile la re: “Ka sebele ha ho na tlotla e fetang ea hore ebe re bitsoa Lipaki Tsa Jehova.” Ke hobane’ng ha re ka cho joalo? Nahana ka mohlala o latelang. A re re u qosoa ka hore u entse ntho e fosahetseng ’me u hloka paki e tla u buella lekhotleng ho bontša hore seo u qosoang ka sona ha se ’nete le hore u motho ea lokileng ea ke keng a etsa ntho e joalo. U ne u tla khetha mang? Ho hlakile hore u ne u tla khetha motho eo u mo tsebang le eo u mo tšepang le ea nang le botumo bo botle kaha batho ba tla mo kholoa. Hore ebe Jehova o re khethile hore re be Lipaki tsa hae ho bontša hore o re tseba hantle ’me oa re tšepa hore re tla bolella batho ba bang hore ke eena feela Molimo oa ’nete. Re ikutloa re le motlotlo hore ebe re Lipaki tsa hae ’me re sebelisa monyetla o mong le o mong oo re o fumanang ho tsebisa batho lebitso la hae le ho bontša hore lintho tse mpe tseo batho ba li buileng ka eena ha se ’nete. Ha re etsa joalo, re tla be re etsa se boleloang ke lebitso la rona e leng ho ba Lipaki Tsa Jehova.—Bar. 10:​13-15. w24.05 18 ¶13

Jesu o ne a thabisoa haholo ke ho sebeletsa ba bang. Ka le leng ha Jesu a ntse a thusa batho ba bangata ka hore a ba rute ka Molimo, o ile a boela a ba thusa ka lintho tseo ba li hlokang. Ka mohlolo o ile a etsa hore ho be le lijo eaba o re barutuoa ba hae ba li abele batho. (Mar. 6:41) Ka ho etsa joalo, o ile a ruta barutuoa ba hae ho sebeletsa ba bang. O ile a boela a ba bontša hore mesebetsi e kang eo e bohlokoa. Nahana feela hore na baapostola ba ile ba thaba hakae ha ba sebetsa le Jesu ho aba lijo tsena tseo Jesu a neng a li entse ka mohlolo ho fihlela “bohle ba ja ba khora.” (Mar. 6:42) Rea tseba hore lena e ne e se lekhetlo la pele Jesu a etsa hore litlhoko tsa batho ba bang li tle pele ho tsa hae. O ile a sebeletsa batho bophelo bohle ba hae ha a le lefatšeng. (Mat. 4:23) Jesu o ne a thaba a bile a khotsofala ka lebaka la ho ruta batho le ho ba thusa ka lintho tseo ba li hlokang. w24.11 16 ¶10-11

Ha maemo a ntse a mpefala ‘mehleng ena ea bofelo,’ re tla ba le menyetla e eketsehileng ea ho thusana. Re ka boela ra tšelisa bana ba bo rona le ho ba bontša hore rea ba rata. Tsela e ’ngoe eo re ka etsang sena ka eona ke ka ho etsa hore ba ikutloe ba amohelehile ha ba le libokeng. Kahoo, ha ba le libokeng, re lokela ho etsa sohle seo re ka se khonang ho etsa hore ba ikutloe ba ratoa, ba khatholohile ebile ba sireletsehile. Baholo ba ka thusa Bakreste-’moho le bona ba hlahetsoeng ke mathata. Ha bara le barali ba bo rona ba hlahetsoe ke likoluoa kapa ba hloka thuso e potlakileng ea tsa bongaka, baholo ke bona batho ba pele ba ho ba thusa. Ba boetse baa ba khothatsa le ho ba fa tataiso e tsoang ka Bibeleng. Ha moholo a tsebahala e le motho ea bonolo, ea utloisisang le ea ikemiselitseng ho mamela, ho tla ba bonolo hore bara le barali ba bo rona ba mo kope thuso. Makhabane ana a etsa hore Bakreste-’moho ba ikutloe ba ratoa ebile a ba nolofaletsa ho sebelisa keletso e thehiloeng Bibeleng eo moholo a ka ba fang eona.—1 Bathes. 2:​7, 8, 11. w24.06 29 ¶12-13

Ha rea lokela ho nahana hore Jehova ha a na maikutlo hobane feela e le ea matla ’ohle. Kaha Jehova o re bopile re tšoana le eena ’me re e-na le maikutlo, ho hlakile hore le eena o na le maikutlo. Bibele e re o ‘utloa bohloko.’ (Pes. 78:​40, 41) E tlameha ebe Jehova eena o ile a utloa bohloko bo fetang ha a shebile batho ba bolaea Mora oa hae ka sehloho. Tefo ea topollo e re ruta hore Jehova o re rata ho feta mang kapa mang, esita le ho feta beng ka rona kapa metsoalle ea rona. (Bar. 8:​32, 38, 39) Re ka kholiseha hore Jehova o re rata ho feta kamoo re ithatang kateng. O batla ho re tšoarela libe le hore re phele ka ho sa feleng ho feta kamoo rona re batlang kateng. Ntho eo a ikopelang eona feela ke hore re bontše tumelo mphong ena le hore re mo mamele. Tefo ea topollo ke mpho ea bohlokoa e bontšang hore Jehova o re rata haholo.—Moek. 3:11. w25.01 22 ¶8-9

Kaofela ha rona re etsa liqeto re itšetlehile ka hore na re bona’ng, re utloa’ng le hore na re ikutloa joang. Lintho tseo re li bonang le tseo re li utloang li ka re thetsa. Le haeba li ke ke tsa re thetsa, haeba re tsamaea ka pono feela re ka qetella re se re iphapanyetsa thato ea Molimo kapa keletso ea hae. (Moek. 11:9; Mat. 24:​37-39) Leha ho le joalo, ha re tsamaea ka tumelo, re ipeha monyetleng o motle oa ho etsa liqeto “tse khahlisang Morena.” Ha re mamela keletso e tsoang ho Molimo, re tla thaba e le kannete ’me re be le khotso. (Pes. 16:​8, 9; Esa. 48:​17, 18) Hape, ha re tsoela pele ho tsamaea ka tumelo, re tla phela ka ho sa feleng. (2 Bakorinthe 4:18) Re ka tseba joang hore na re tsamaea ka tumelo kapa ka pono? E le hore u tsebe, u ka ipotsa lipotso tsena: Ke tataisoa ke eng ha ke etsa liqeto? Na ke tataisoa feela ke lintho tseo ke li bonang kapa ke tataisoa ke likeletso tsa Jehova? w25.03 20-21 ¶3-4

Kaofela ha rona re na le boikarabelo ba ho thusa batho ba bang hore e be karolo ea mokhatlo oa Jehova. Re ka khona ho etsa sena ka hore re etsise Jehova. Jehova ha a qobelle batho hore e be karolo ea mokhatlo oa hae empa o ba “hulela” ho eena ka tsela e bonolo. (Joh. 6:44; Jer. 31:3) Ha batho ba lokileng ba ithuta ka Jehova le ka makhabane a hae, ho ba bonolo hore ba atamele ho eena. Botho ba rona le tsela eo re itšoarang ka eona e ka thusa batho ba bang joang hore e be karolo ea mokhatlo oa Jehova? Tsela e ’ngoe ke ka hore re bontše Bakreste-’moho le rona lerato ’me re ba tšoare ka mosa. Ha motho a qala ho tla libokeng, re batla hore a ikutloe ka tsela e tšoanang le eo batho ba neng ba ile libokeng mehleng ea Bakreste ba Korinthe ba neng ba ikutloa ka eona. Ba ile ba re: “Kannete Molimo o na le lona.” (1 Bakor. 14:​24, 25; Zak. 8:23) Kahoo, re lokela ho tsoela pele re mamela keletso eo re e fumanang temaneng ea kajeno. w24.04 23-24 ¶16-17