Nako ea ho Lebella ka Sebete
Lekholong la borobeli la lilemo B.C.E. ho ne ho le teng boemo bo bobe haholo har’a Baiseraele. Moprofeta Mikea o ile a bolela hore: “Jo ’na! ke joale ka serapa, ha ho kotutsoe litholoana tsa sona, joale ka tšimo ea merara e khoahlapisoang, ha e kotutsoe: ha ho sa le lesihla la morara le ka jeoang, leha e le selopotsiea sa feiga se lakatsoang ke moea oa ka! Motho oa bokhabane o timetse lefatšeng, ha ho sa le ea lokileng har’a batho. Bohle ba lalla hore ba tšolle mali, e mong le e mong o tsoma ngoana’bo ka leraba. Ba kena ka matsoho a mabeli bobeng, hore ba bo phethe: morena oa qela, moahloli o ahlolela moputso, e moholo eena o bolela takatso e mpe ea moea oa hae; hammoho ba sothanya litaba. Ea fetang ba bang ka molemo o joale ka tšehlo, le ea ba fetang ka ho loka o hlaba le ho fetisa lekhoakhoa la meutloa.”—Mik. 7:1-4.
Ka ho totobetseng Mikea o ne a bua ka eena ka boeena joalokaha eka ke sechaba se entsoeng motho. Sechaba se ne se tšoana le tšimo ea lifate tsa litholoana le morara e kotutsoeng. Eo ho sa salang le lesihla la morara ho eona. Ha ho feiga le e ’ngoe e lakatsehang. Hona e ne e le papiso e loketseng hobane batho ba tšepahalang le ba khabane ba ne ba fumanoa ka thata. Bongata bo ne bo tsoile pelo ke mali a bana babo bona. Tlholisano e ne e le e sisimosang. Ho ne ho sa nahanoe letho ka boiketlo ba ba bang. Lerato le ne le haella ho hang. Hore ba phethe thato ea bona, batho ba ne ba loha mano a ho chea bana babo bona, ba ba tsoma joalokaha eka ke ka letlooa. Matsoho a bona a ne a kene ka ho feletseng bobeng. Ho sena ba ile ba ipakahatsa ba itloaelitse, ‘ba ho etsa hantle.’
Tšenyeho boitšoarong e ne e fihlile bophahamong bo fetisisang har’a batho. Mahosana kapa baeta-pele ba sechaba ba ne ‘ba batla ho hong,’ ka meharo ba batla matšeliso. Baahloli ba ne ba amohela limpho ’me ba sotha toka. Barui le ba tsebisahalang ba ne ba bolela seo e leng takatso ea bona, ’me baahloli ba lumellana le litakatso tsa bona. Ka tsela ena, mahosana, baahloli le banna ba bang ba nang le lentsoe ba ne ba sebelisana mererong e khopo, ‘ba lohellana.’ Le ea molemohali ho bona o ne a tšoana le tšehlo kapa lekhoakhoa la meutloa. Tšehlo le moutloa li ka hahola liaparo le ho hlaba nama habohloko tsa ea fetang ho tsona. Ka mokhoa o tšoanang, le banna ba se nang molao mehleng ea Mikea ba ne ba le mano, ba hlaba ba bile ba le kotsi. Ka lebaka la boemo bo bobe hakaalo, Mikea o na a ka bua tjena ho Baiseraele: “Letsatsi le boletsoeng ke liboholi tsa hao, letsatsi la kotlo ea hao le tlile; ke moo ba tla tsieleha.” (Mik. 7:14) “Liboholi” e ne e le baprofeta. Kahoo, ‘letsatsi la liboholi’ mohlomong le ne le supa nako ea ha Jehova a ne a tla nka bohato ka ba khopo phethahatsong ea se neng se boletsoe ke baprofeta. Ho phethahatsoa ha kahlolo ea Jehova ho ne ho tla ‘tsielehisa’ kapa ho makatse batho ba se nang molao.
Tšenyeho e ne e le mpe hoo le likamano tsa lelapa li neng li sa kopanye batho leratong. Moprofeta ka baka leo o ne a ka buisana le Baiseraele bahabo ka mantsoe a latelang: “Se tšepeng molekane, se ithetseng ka motsoalle; lebela menyako ea molomo oa hao [hore na u bua eng] pel’a ea robetseng sefubeng sa hao; hobane mora o nyelisa ntat’ae, morali o tsohela ’m’ae matla, ngoetsi e loantša matsal’a eona, ’me ba ntlo ea motho ke bona bao e leng lira ho eena.”—Mik. 7:5, 6.
Inahanele, metsoalle ea motho—mosali, ntate, ’mè le bana ba se ba sa tšeptjoe. Hona ka ntlong ea hae, o ne a tla ba le lira.
Boemo bo joalo ba litaba bo ne bo ke ke ba tsoela pele ho hang. Bo ne bo biletsa hore Molimo oa toka Jehova, o nke bohato. Leha ho le joalo, ho ne ho hlokahala ho lebella ka sebete. Boprofeta bo re: “Empa ha e le ’na, ke tla talima ho Jehova, ke lebelle Molimo oa poloko ea ka; Molimo oa ka o tla nkutloa.”—Mik. 7:7.
Le rōna kajeno ka mokhoa o tšoanang re lokela ho lebella Jehova Molimo ka sebete hore a nke bohato khahlanong le bokhopo bohle. Kahlolo ea hae e iphetetsang holim’a tsamaiso ea hona joale ea lintho e tla phethahatsoa hantle joalokaha kahlolo ea hae khahlanong le Baiseraele ba sa utloeng e ile ea phethahatsoa, le hona ho tla etsoa haufi!