Lipotso Tse Tsoang ho Babali
● Ke eng se boleloang ho Amose 5:5, e reng, “Le se ke la batla Bethele”?
Baiseraele ba ’muso oa ka leboea ba ne ba chesehela ho phehella borapeli ba bohata haholo. Hona ho totobala mantsoeng a tobisitsoeng ho bona ke moprofeta Amose: “E-eang Bethele, le sebe; le atise ho seba Gilgale. Hlahisang mahlabelo a lōna hosasa; ka tsatsi la boraro, le hlahise karolo ea leshome ea tseo le li ruileng. Teboho tsa lōna tsa secheso li etseng ka tse lomositsoeng; le laele le likabelo tse eeng li ntšuoe ka ho ithatela ha motho, hobane ke moo le ithatelang, lona bana ba Iseraele; ho itsoalo ke Morena Jehova.”—Amose 4:4, 5.
Bethele e ne e le setsi sa borapeli ba bohata. Ke hona moo Jeroboame, morena oa pele oa ’muso oa ka leboea a ileng a emisa namane ea gauda. (1 Mar. 12:28-30) Gilgale le eona e tlameha ebe e ile ea fetoha sebaka sa borapeli ba bokoenehi. Ka baka leo, ho nyehela ha Iseraele mahlabelo Bethele le Gilgale e ne e hlile e le ho siteloa Jehova.
Ke ho hlokomelehang hore borapeling ba bona ba litšoantšo Baiseraele ba ile ba boela ba nka mekhoa e meng e neng e hanana le Molao. Molao o ne o re: “Leha le hlahisetsa Jehova nyehelo efe le efe, e se ke ea etsoa ka litomoso.” (Lev. 2:11) Leha ho le joalo Baiseraele ba koenehileng ba nyehela lintho tse lomositsoeng e le ‘sehlabelo sa teboho.’ Ka ho tšoanang, moea ’ohle o neng o potelletse ka mahlabelo a boithatelo e ne e le hore a se tsebahale. Baiseraele ba neng ba rapela litšoantšo, leha ho le joalo, ba a etsa pontšeng. Ba ne ba rata borapeli ba bona ba bohata, empa Jehova o ne a bo hloile.
Kahoo, ka ho tsoela pele tseleng ea bona e sa tšepahaleng, Baiseraele ba ne ba ke ke ba pholoha ho phethahala ha likahlolo tsa Jehova. Ke feela ka ho tlohela borapeli ba bohata le ka ho khutlela ho Jehova ka pako ba neng ba ka ba le tšepo ea ho pholoha, ke ka baka leo moprofeta Amose a ileng a bululeloa hore a bolele hore: “Hobane Jehova o itse ho ntlo ea Iseraele: Mpatleng, le tle le phele! Le se ke la batla Bethele, le se ke la ea Gilgale, le se ke la fetela Beerseba [ke hore, motseng ona o hare oa Simeone]; hobane Gilgale o tla isoa kholehong, Bethele a etsoe lefeela [ka ho totobetseng lefeella le neng le tla tlatsa ba fetang ho lona ka tšabo ea tumela-khoela]. Batlang Jehova, le tle le phele, e se re mohlomong a oela ntlo ea Josefa [’muso oa meloko e leshome, bana ba bara ba Josefa Efraime le Manasse e le eona karolo e khōlō ea oona] joale ka mollo, ’me mollo oo oa felisa Bethele, ho se motho ea o timang.”—Amose 5:4-6; Joshua 19:1, 2.
E ne e se ka ho nka maeto a bolumeli a eang Bethele, Gilgale le Beerseba, ena eohle e le metse ea ’muso oa ka leboea oa Iseraele, moo Baiseraele ba neng ba ka ba le tšepo ea ho pholoha tlokotsi. Ho batla mohau oa Molimo libakeng tsena ho ne ho tla tlisa bohale ba Molimo holim’a batho feela. Bethele, Gilgale le Beerseba, hammoho le lihalalelo tsa tsona li ne li tla fetoha lefeela. Tšepo feela ea Iseraele e ne e le ‘ho batla Jehova,’ ho khutlela ho eena ka pelo eohle.
Ho joalo le kajeno, ho sa tsotellehe hore na ke ka cheseho e kae batho ba tlang ho phehella mekhoa ea bolumeli, haeba eo e se tumellanong le ’nete ea Lentsoe la Molimo, ha se ea molemo oa letho.