Ho Phelela Boikhethelo ba Rona
1. Ho khomarela boikhethelong ba rōna ho hloka e mong le e mong ho rōna eng, joalokaha ho bontšoa ke Liproverbia 16:9 le 1 Petrose 1:13?
KA HO khetha bophelo bo letsohong la Molimo re boetse re khetha ho tsamaea ka tsela ea Molimo—tsela e feletseng le e khabane ea Bokreste. Re tlameha ho khomarela tseleng eo, e hlokang ho lumela litšepiso tsa Molimo, hammoho le boiteko le mamello. Empa boitekong boo re shebile ho Molimo hore o tataise liqeto tsa rōna, ha re ntse re tšoarelletse ka linako tsohle boikhethelong ba rōna ba pele bo ileng ba nahanoa ka hloko. Mangolo a re: “Pelo ea motho e itherela tsela, empa ke Jehova ea tsamaisang maoto.” (Liprov. 16:9) Petrose o bua tjena ka taba ena: “Itlameng matheka a likelello tsa lōna, le phele ka boitšoaro, le lete ka tšepo e tieang mohau oo le tla o tlisetsoa mohla Jesu Kreste a hlahang.”—1 Pet. 1:13.
2, 3. Ke eng se ka re thusang haholo hore re ‘tlame matheka a likelello tsa rōna’ bakeng sa bohato bo tiileng?
2 Re ka ‘itlama matheka a likelello tsa rōna’ hamolemo joang? Re ka tiisa joang hore re ‘bolokile likelello tsa rōna’ le hore ha re lahle leoto?
3 Pele, re ka nahanisisa ka tlhohonolofatso eo ho seng e lekanang le eona eo re nang le eona ka ho ba baamoheli ba ’nete ea Molimo. Re na le bophelo bo molemo hona joale, ka bolokolohi bo boholoanyane matšoenyehong, mesarelong le malimabeng tse fihleloang ke lefatše. Ha re fela re hlomoha, rea tseba hore na ke hobane’ng ha mahlomola a joalo a e-tla, ’me re boetse re hlokomela hore, haeba re mamella ka tumelo e feletseng le tšepo, re tla tsoa re le Bakreste ba molemo haholoanyane le ba ka sebelisoang haholoanyane. ’Me tšepo ea rōna ea tsoho e tlosa boholo ba tšabo ea lefu, le ea masoabi ka baratuoa ba shoang. E etsa lintho tsohle tse sa lakatseheng tseo re fetang ho tsona lefeela ha ho talingoa bophelo bo sa feleng bo ka pele. Jesu o itse ho barutuoa ba hae: “Ho lehlohonolo mahlo a bonang tseo le li bonang! hobane ke re ho lōna: Baprofeta ba bangata le marena ba ratile ho bona tseo le li bonang, ’me ha ba ka ba li bona, le ho utloa tseo le li utloang, ’me ha ba ka ba li utloa.”—Luka 10:23, 24.
4, 5. (a) Ke eng se neng se ka baka hore mangeloi a bontše khahleho e joalo litabeng tsa poloko ea motho, joalokaha ho bontša 1 Petrose 1:12? (b) Re tseba pono ea oona, rōna re ka ikutloa joang?
4 E, poloko eo re e thabelang ke moputso o ke keng oa lekanngoa, ’me Molimo o e tlisetsa batho ka tsela e babatsehang. Petrose o bolela hore baprofeta ba ne ba lakatsa ho tseba hore na e tla tla joang, le hore “mangeloi a lakatsa haholo ho nyarela ho tsona.” (1 Pet. 1:10-12) Rea tseba hore mangeloi a neng a le teng nakong ea ha ho theoa lefatše, le lilemo tse se nang palo le pele ho moo. (Jobo 38:7) A ne a bone khanya ea Molimo, bohlale le matla le litšobotsi tse ling tsa boleng ba hae mesebetsing e mengata-ngata ea pōpo. Empa mona lefatšeng e ne e le ntho e ’ngoe e ncha. Molimo o ne o ka boloka batho ba baetsalibe joang? Mangeloi a ne a thahasella sena haholo. A ne a lakatsa ho tseba kamoo sebe sa motho se neng se tla tšoareloa motheong oa sehlabelo sa motho, hobane a ne a e-s’o bone ha ntho e joalo e etsahala. Tšoaneleho e babatsehang ea mohau, tšobotsi e ntle haholo ea boleng ba Molimo, e ipiletsang le e khathollang pelo haholo ho feta matla kapa bohlale, e ile ea bontšoa ha a rōmela Kreste e le topollo ea batho. Hape, lerato la Molimo bakeng sa baetsalibe le ile la bontšoa ka hore a tataise ba lumelang ho Mora oa hae.
5 Joale, haeba mangeloi a nka mohau ona oa Molimo e le e ’ngoe ea lintho tse khōlō haholo pōpong eohle, ke ka matla a maholoanyane ho moo hakae, rōna, ba fumaneng mohau oo le phihlelo ea oona tsatsi le leng le le leng re lokelang ho o nka, re o thabele le ho o bea ka holim’a lintho tsohle! Ke tšusumetso efe e fetang eo eo re ka bang le eona ea ho thaba boikhethelong ba rōna le ho khomarela ho bona?
Thuto ea Bibele ke ea Bohlokoa Haholo
6. Tumellanong le 1 Petrose 2:2, 3, ho bala Bibele le ho ithuta eona ho lokela ho nka karolo efe bophelong ba rōna?
6 Rōna kajeno re ka etsa joang ho tiisa tšepo ea rōna? Petrose oa arabela: “Le lapele haholo, joale ka bana ba tsoang ho tsoaloa, lebese la moea, le sa tsoakoang, le tle le holele poloko ke lona; ha le fela le setse le latsoitse molemo oa Morena.” (1 Pet. 2:2, 3) Ke feela ka ho bala le ho ithuta ka tieo le ka hloko Bibele re ka bang le matla a moea ao re tlamehang ho ba le oona. Ha ho ka mokhoa o mong. Re tlameha ho bala Bibele e le rōna, re nahana ka seo e se bolelang, re e bala le malapa a rōna ’me re buisana ka linnete tsa eona. Ka ho etsa joalo, re tla hōlisa lerato le lengata bakeng sa lentsoe le ho le lapela haholoanyane. Haeba marena a Iseraele Molimo o ne o a hloka hore a ingolle Molao, oo ba neng ba e-na le oona mehleng ea bona, ’me ba o bale tsatsi le leng le le leng, ke joang rōna, ba nang le Mangolo a feletseng, a tsebang ho re hlalefisetsa ho bolokeha, re ka etsang hanyenyane?—Deut. 17:19, 20; 2 Tim. 3:15.
7, 8. (a) Batho ba ntlo ea thapelo ea Berea ba etsa joang ho fumana pabatso ea bomolimo? (b) Ke hobane’ng ha ho bala linnete tsa sebele tsa Bibele ka boeona e le habohlokoa hakana?
7 Ha baapostola ba ne ba bolela ‘litaba tse molemo’ ke bo-mang bao Molimo o ileng oa ba babatsa ka Lentsoe la oona? Batho ba tlung ea thapelo ea Berea, hobane, Bibele e re, “ba amohela lentsoe [la litaba tse molemo leo ba le bolelloang ke Pauluse le Silase] ka cheseho e kholo, ba botsisisa Mangolo ka matsatsi ’ohle, ho tseba hore na litaba tseo [tse neng li boleloa esita ke baapostola] li joalo ruri na?” (Lik. 17:10, 11) Lintho tsena ba li fetola tsa bona, ba sa mamele feela ka tumellano empa hape ba hlahloba motheo o tiileng oa Mangolo bakeng sa lintho tseo ba li amohetseng ka cheseho mehopolong le lipelong tsa bona.
8 Re tlameha ho latela tsela ea Baberea bao ba nang le ’nete. Hobane’ng? Hobane re ka ’na ra utloa ’nete e boleloa kapa e rutoa ke baruti ba batho, empa ha re e bala ka Bibeleng e fetoha matla a feletseng a susumetsang a nang le motheo o feletseng le oa ka mehla lipelong tsa rōna, hobane “Lentsoe la Molimo ke lentsoe le phelang, le matla, ’me le fetisa ka bohale lisabole tsohle tse leolitsoeng ka nqa tse peli; ’me lea hlaba, le ee ho kena le likhaohanong tsa pelo le tsa moea, le manonyellong le mokong; ’me le ahlola maikutlo le mehopolo ea pelo.” (Ba-Heb. 4:12) Ho bala Bibele ka mehla ho re thibela ho lula re le masea moeeng. Lentsoe la Molimo le kenya moea oa oona lipelong tsa rōna, le re etsa re be matla, re be ba hōlileng tsebong. Motheo oona oo o sebetsa ha re bolela ‘litaba tse molemo’ ho ba bang. Li na le matla a maholo ha re lumella batho hore ba ipalle Bibele ho feta ha re sebelisa mantsoe a rōna.
9. Ke phello efe e mpe e ka hlahisoang ke liteko le mathata ho rōna, ’me ke eng e ka re thusang ho qoba phello e mpe joalo?
9 Ha a thathamisa hore na rōna re le Bakreste re lokela ho etsa joang ho tiisa hore polokeho ea rōna e qetella e hlahile, le hore re ka fumana moputso o tsoang ho Molimo, lengolong la hae la pele moapostola Petrose o re eletsa hore re se ke ra nyahama tlas’a mathata, liteko le mahloriso. Re se ke ra lumella lintho tsena li re halefise le ho re etsa batho ba sa utloeng, ntle ho moeli. Kaha re rekiloe ka ntho ea bohlokoa ka ho fetisisa, mali a Jesu Kreste, ea ileng a jara libe tsa rōna ha a eshoa lebitsong la rōna, re lokela ho “shoa” tabeng ea libe. Re hlokomela hore ka ho amohela sehlabelo sa pheko sa Kreste bakeng sa libe tsa rōna re lumela hore re ke ke ra hlola re tsoela pele ho etsa libe. Kahoo mekhoa eohle ea bobe, thetso, boikaketsi, mohono le hloeano ha lia lokela ho etsoa le ka motsotso feela.—1 Pet. 2:1.
10. Re ka latela keletso ea moapostola joang hore mekhoa e litšila e se ke ea “boleloa” le ho boleloa har’a rōna?
10 Moapostola Pauluse o bolela taba ka matla haholo, hore lintho tse etsoang ke lefatše le tseo mohlomong Mokreste a ileng a li etsa pele a tseba ’nete li mpe hoo li sa lokelang le “ho boleloa” har’a Bakreste. (Ba-Ef. 5:3) Koana, Pauluse o ile a fela a ‘bolela’ lintho tse hananang le mangolo, empa e le feela ha a li bolela bobe ba tsona. Leha ho le joalo, o ne a eletsa Bakreste hore ba se ke ba lula ho tsona, ba li hlalosa ka ho li qapollisa, ba bua ka hore na lintho tsena li etsoa ka mokhoa ofe, kapa hona ho li sebelisa e le taba eo ba qoqang ka eona. Motho ea ileng a etsa lintho tsena nakong e fetileng a se ke a li hopola ka mokhoa oa ho ikhotsofatsa nameng, empa o lokela ho li soabela.—Ba-Roma 6:21.
11. Ho 1 Petrose 4:8, 9, ke polelo life tse molemo tsa tumelo ea rōna tse hatisoang ke Petrose e le tsa kameho e khōlō ho rōna, ’me lintho tse joalo li tla bonahala joang?
11 Ho phaella moo, ho sa le ho hongata tseleng ea Mokreste e isang tšepong e ka pele ho feta feela ho qoba lintho tse mpe. Moapostola Petrose, ho 1 Petrose 4:8, 9, oa ngola: “Haholo-holo, le ratane ka phehello, hobane lerato le apesa libe tse ngata. Le amohelane boeting le sa khanane.” Tšoanelo ea rōna ho banab’abo rōna ke e sa feleng, haholo ba amanang le rōna tumelong. Lerato la rōna le tla hlokomoloha liphoso tse ngata le libe ho baena ba rōna. Bakreste ba ’nete ha ba tsamaee ba batla liphoso tsa ba bang; leha e le hore ba belaella kapa ba ahlole e mong hobane ba bona liphoso ho eena. Na re chesehela ho amohelana boeting? Na re itokiselitse ho itella ho ba mosa le ho thusa ba bang? Kapa na rea korotla ha linako tse joalo li hlaha? Haeba re etsa joalo, re ikamoha thabo eohle eo re neng re ka ba le eona ’me hape re lahleheloa ke moputso oo re neng re tla o fumana bakeng sa ho etsa botle. Lintho tse sa tsoeng botebong ba pelo ha li khahlise Molimo.
Sebelisa Lineo tsa Hao ka Nepo
12. (a) Ke bo-mang ba fumanang ‘lineo’ tse thusang ka phuthehong, ’me na bohle ba lebelletsoe ho ba le matla a tšoanang? (b) Ke ka tsela efe bana ba fetohang “liabi” tsa Molimo, hona ka boikarabelo bofe?
12 Petrose hape o bua ka lineo tsa rōna kamoo li ka sebelisoang. E mong le e mong o na le matla nthong eitseng, empa ha ho ea nang le matla linthong tsohle. Hape, ba bang ba na le lineo ka bongata ho feta ba bang. Re ke ke ra lebella hore ba bang ba etse kamoo re ka etsang, kapa hore ba tšoane le rōna ho hang. Petrose o re: “E mong le e mong, kamoo neo eo a e abetsoeng e leng kateng, a n’o sebeletsa ba bang ka eona, kamoo ho loketseng liabi tse ntle tsa mehauhelo e mengata ea Molimo.” (1 Pet. 4:10) Haeba motho a ena le matla a ho thusa phutheho, o tlameha ho inka e le seabi sa Molimo ha a sebelisa neo eo. O tseba hore neo e tsoa ho Molimo, eena ea fanang ka ntho e ’ngoe le e ’ngoe e ntle le e phethahetseng. Motho ea nang le neo o fetoha seabi se ikarebellang ho ea faneng ka eona le morena oa hae ka hore na o e sebelisa joang. (1 Ba-Kor. 4:2; Jak. 1:17) Ke ka mosa o sa tšoanelang oa Molimo a e fumaneng, ’me mosa ona o sa tšoanelang o lokisetsa phutheho ea Bokreste lintho tseo e li hlokang. Mosa ona o sa tšoanelang o bontšoa ka litsela tse ngata, ka batho ba fapaneng ka phuthehong ba fana ka se hlokoang. Haeba motho a e-na le matla ’me a sa a sebelise molemong oa phutheho, o hlōlehile ho beng seabi ha hae.
13. Ke ka tsela efe ba buang ka phuthehong ba biletsoang ho ‘bua joalokaha eka ke lipolelo tse tsoang ho Molimo’?
13 Moapostola o tsoela pele ho hlalosa mefuta ea lineo le hore na li ka sebelisoa joang. O re: “E mong ha a bua, a ee ka lipolelo tsa Molimo.” (1 Pet. 4:11a) Hona ha ho bolele hore ha a bua a ikutloe hore ka mehla o nepile le hore batho ba etse kamoo a bolelang. Empa ha a bua a se ke a fana ka maikutlo a hae kapa a etse lipolelo tse se nang bopaki. A nepisise hore seo a se buang ke ’nete—hore ka ho tiileng se theiloe lipolelong tsa Molimo ’me se tumellanong le moea oa Bibele—hore a ka paka seo a se buang ka Bibele. Ke ka tsela ena feela e ka bang thuso ho e mong.
14. (a) Tumellanong le 1 Petrose 4:11, motho a ka “sebeletsa” ba bang ka phuthehong joang? (b) Ke eng eo ea joalo a lokelang ho e hopola ka mehla ha a sebeletsa joalo, ’me o tla putsoa joang?
14 Tabeng ea ho bua, Petrose joale o retelehela liketsong ha a re: “E mong ha a sebeletsa ba bang, a etse ka matla a hlahisoang ke Molimo.” (1 Pet. 4:11a) Setho sa phutheho se nang le lintho tsa nama hore se thuse moena ea hlokang kapa mohaelani, kapa ea nang le monyetla oa ho etsa-tšebeletso ea ho thusa, se ka holisa tšoaneleho ea lerato har’a baena. Haeba a e-na le tšoaneleho e joalo, a ka fana ka thuso a hlokomela hore monyetla le mokhoa o li neiloe ke Molimo. Hona ha ho khahlise Molimo feela, empa ho etsa tšebeletso ea Bokreste e bee, hobane Molimo o tla hlohonolofatsa ea sebetsang ka boikokobetso. Motho ka boeena o tla putsoa ka tekanyo e khōlō ea tumelo le monyetla oa ho finyella ho hong, joalokaha maele a re: “Ea tsebang ho fana o tla nona; ea nosetsang o tla nosetsoa le eena.”—Liprov. 11:25.
15. Molimo o ka tlotlisoa joang ka Jesu Kreste ka hore re sebelise boabi ba rōna ka botšepehi?
15 Phetho ea sehlooho ea ho sebelisa lineo tsa rōna le matla ka tsela ee ke efe? Na e re atametsa haufi haholoanyane le ho bona ka botlalo tšepo ea rōna? E, hobane e totobatsa ntho e ka sehloohong eo re ileng ra qala ka eona ha re tla etsa boikhethelo ba ho sebeletsa Molimo. Ke hore: “Molimo o tlotlisoe nthong tsohle ka Jesu Kreste.” (1 Pet. 4:11b) Ha re etsa mesebetsi e metle e tumellanong le Bibele, Kreste oa tlotlisoa, hobane ke ka eena re nang le ho ema pel’a Molimo, re talimile polokeho. ’Me Molimo oa tlotlisoa, hobane ke eena ea qalileng ketso ea ho romela Mora oa hae; ka hona ha re tlotlisa Kreste re boetse re tlotlisa Molimo.
Kamoo Mahlomola a re Sebeletsang Molemo
16. Ke hobane’ng ha Mokreste a ka ba le lebaka la ho thaba leha a talimane le mahloriso kapa likhatello?
16 Tsela ena ea bophelo e tlotlisa Jehova Molimo le Mora oa hae Jesu Kreste, ’me joale e re nea thabo ha re ba sebeletsa. Re ka khotsofala le ho hlasimolloa ke tsebo ena. Likhatello li ka ’na tsa e-ba ngata, le oona mathata le mahloriso. Leha ho le joalo, re ka boloka thabo tseleng eo re phelang ka eona. Moapostola Petrose o bua ho hongata mangolong a hae a mabeli ka mahlomola—sesosa, morero le phello ea ho mamella ka botšepehi. O ile a ngolla Bakreste ba mehleng ea hae ka tšepo ea bona le tšireletso ea Molimo eo a ba neileng eona, a re: “Ke sona seo le se thabelang haholo, leha empa joale le sa ntse le hlomohile ke meleko e mengata, leha empa e le ka motsotso o mokhutšoanyane kamoo ho le tšoanetseng; hore tumelo ea lōna, ha e se e lekiloe, e leng e fetisang hole gauda e timelang, athe le eona e ee e lekoe ka mollo, e tle e le fetohele poko, le hlompho, le khanya, mohla Jesu Kreste a hlahang.”—1 Pet. 1:6, 7.
17, 18. (a) Ke hobane’ng ha moapostola Petrose, ha a bua ka mahlomola a Mokreste, a itseng “ha ekaba ke thato ea Molimo”? (b) Joaloka moapostola Pauluse, Mokreste kajeno a ka talima mahlomola a tlisoang ke ho tšoarella ka tieo boikhethelong bo entsoeng joang?
17 Khaolong ea boraro ea lengolo la hae la pele, Petrose o hlokomelisa ka mahlomola a Bakreste ’me o re: “Hobane, ha ekaba ke thato ea Molimo hore le utloisoe bohloko, ho ka fetisa hore le bo utloe le ntse le etsa hantle, e seng hampe.” (Tem. 17) Ke hobane’ng ha a re bohloko bo joalo “ha ekaba ke thato ea Molimo”? Oa hlalosa: “Baratuoa, ha ho e-na le ho kang mollo har’a lōna hore le lekoe ke oona, se makaleng joale ka hola le hlahetsoe ke ntho e ka tsotoang; empa ereka ha le nkile kabelo mahlomoleng a Kreste, thabang hore, mohla khanya ea hae e bonahalang, le tle le thabe ka nyakallo e fetisisang. Ha le nyefoleloa lebitso la Kreste, le lehlohonolo; hobane Moea oa khanya, Moea oa Molimo, o lutse holim’a lōna.”—1 Pet. 4:12-14; bapisa Liketso 5:41, 42.
18 Le hoja Mokreste a ka ikhethela ho se hlomohe, ’me a sa tsome ho shoela-tumelo, o thabela ha a biletsoa ho hlomoha ka baka la ho latela Morena oa hae, Kreste ka botšepehi. Ha ho hlompho e khōlō e ka tlelang Mokreste ho feta ho shoela tumelo ea hae. Pele a khetha tsela ea ho latela Kreste, e akarelletsang thohako e ngata le mahlomola, moapostola Pauluse e ne e le motho ea neng a e-na le tebello e phahameng haholo ea botumo, hlompho le boemo. Hlokomela kamoo a ileng a hlalosa boikutlo ba hae tabeng: “Empa tse neng li le moruo ho ’na, ke li entse tšenyehelo ka baka la Kreste. Ke fela ke lekanya hoba ntho tsohle ke tšenyehelo, ha li ka bapisoa le boholo ba ho tseba Jesu Kreste, Morena oa ka, eo ke lahlileng tsohle ka baka la hae, ’me ke li etsa lithōle, ke tle ke rue Kreste; . . . ke tle ke tsebe Jesu Kreste, le matla a tsoho ea hae, le ho kopana le eena mahlomoleng a hae, ke tle ke tšoane le eena lefung la hae.” (Ba-Fil. 3:7-10) Pauluse o ne a lakatsa ho tšoana le Kreste lintlheng tsohle, a ho nka e le khanya e fetisang haeba a ka bitsoa ho tla shoa joaloka Kreste.
19, 20. (a) Molimo o lumella mahlomola a joalo hore a oele bahlanka ba hae ho fihlela kae? (b) Ke joang bohale ba bahanyetsi le bahlorisi li ka sebeletsang hore Molimo o tlotlisoe qetellong? (c) Ke lebaka lefe le leng ka tekanyo ea mahlomola a lumelletsoeng ke Molimo le ka re khothalletsang ho mamella?
19 Ho feta moo, Petrose ha a supe feela hore moputso o teng, empa hore ha Molimo o lumella mahlomola o a lumella feela ho isa moo a re rutang le ho re khalemela ka tsela eo re e hlokang ka bomong. Mopesaleme o ngolile: “Khalefo ea motho e tla u fetohela thoriso.” (Pes. 76:10) Haeba Molimo o lumella hore motho a bontše bohale ba hae ho rōna, re ka tiisa hore ho hlomoha ha rōna kapa lefu li tla sebeletsa molemo. Hase feela hore ho rōna e tla ba thuto, empa hape Molimo o tla tšoephola morero oa ba babe ka ho etsa hore ba bang ba tlotlise Molimo ka ho lemoha ho hlomoha ha rōna ka botšepehi lebitsong la hae. Ho feta moo, mahlomola ke a nakoana ’me a tla fela.
20 Kahoo Petrose o tšelisa Bakreste, a re: “Empa Molimo oa mehauhelo eohle, o re bilelitseng ka Jesu Kreste ho rua khanya ea oona e sa feleng, ha le se le utloile bohloko ka litšiuoana, o tla le etsa ba phethehileng, o le tiise, o le fe matla, o le thee.”—1 Pet. 5:10.
21. (a) Ke lipotso life tseo joale re ka ipotsang tsona ka ho molemo? (b) Ke lintlha life tse tiisang tseo moapostola Petrose a li etsang qetellong ea lengolo la hae la bobeli?
21 Na u ikutloa hore u entse boikhethelo bo nepahetseng? Na u ikutloa hore u ka khomarela boikhethelo boo, e seng feela ka mamello e sa ikutloeng ea se tlang, empa hape le ka ho sebeletsa ka mafolofolo? Na u ithaopela ho etsa ka matla ho sebelisa lineo tsa hao ho thusa baena ba hao? Na u na le takatso, e, cheseho ho thusa ba bang ho ithuta ‘litaba tse molemo’ ’me ba ikhethele ka ho tšoanang ’me na u ithaopela ho ba thusa ho ema ba tiile ha ba latela boikhethelo boo ba bo etsang? Petrose o re tšelisa le ho re tiisa ka mantsoe a qetellang a lengolo la hae la bobeli: “Ha e le lōna, baratuoa, ha le se le itsebetse tseo pele, itebeleng, le se tšohe le hulanngoa le ba bang ke thetso ea ba manyala bao, ’me la timelloa ke ho tiea ha lōna; le mpe le hole mohaung le tsebong ea Jesu Kreste, Morena le ’Moloki oa rōna. Ho eena e be khanya joale le mehleng e sa feleng!”—2 Pet. 3:17, 18.
[Setšoantšo se leqepheng la 26]
Ho ipalla Bibele ka bōrōna ho ka thusa ho hatisa ’nete lipelong tsa rōna
[Litšoantšo tse leqepheng la 27]
Ho fana thuso e loketseng, tiisa hore keletso eo u fanang ka eona e theiloe Bibeleng
[Setšoantšo se leqepheng la 28]
Ho sebelisa matla a rōna ho thusa ho hōlisa lerato ’me ho hlohonolofatsoa ke Molimo