Thapelo ea Hae ea Arabeloa

Bibele e fana ka bopaki ba hore mangeloi a tataisa ba bolelang ‘litaba tse molemo.’ (Lik. 8:26-38; Tšen. 14:6, 7) Kahoo ho loketse hore Lipaki tsa Jehova li mo rapele hore a li thuse le ho li atlehisa mosebetsing oa tsona oa ho bolela. Ntlheng ena, mosali oa Mokreste Trinidad o tlaleha hore:

“E ne e le hoseng ho batang, pula e na ha ke tloha lapeng ho ea kopana le sehlopha sa tšebeletso ea tšimo. Boikutlo ba ka bo ne bo lumellana le boemo ba leholimo, kaha ke ne ke ikutloa ke tepeletse. . . . Eare ha ’na le molekane oa ka re tsamaea, ka rapela Jehova ka pelong ea ka hore ke kopane le motho e mong ea neng a tla thahasella kannete ho ithuta Bibele. Ke ne ke sa ntsane ke rapela ha re fihla hekeng ea pele. Ra kokota ’me ha hlaha moroetsana a re re kene.”

Moqoqo oa Bibele oa qaleha ’me moroetsana a memeloa ho ea sebokeng sa Bokreste. A fela a ea, a bile a ntse a ipha molemo oa thuto ea lehae ea Bibele e lokiselitsoeng ke Paki molemong oa hae. A chesehela ho fetisetsa ho ba bang lintho tse molemo tseo a ithutang tsona, a qala ho tsamaisa thuto ea Bibele le ’mè oa hae le motsoalle. Moroetsana a tsoela pele kapele moeeng ’me a kolobetso tšoantšetsong ea boineelo ba hae ho Jehova Molimo.

Ka ho hopola tse fetileng, Paki ea bolela: “Hangata ke ee ke hopole kamoo ke neng ke ikutloa kateng hoseng hoo ha pula ’me ke lebohe Jehova ka ho arabela thapelo ea ka ka ho etsa hore ke kopane le e mong a thahaselle kannete ho ithuta Bibele.”

E, Lipaki tsa Jehova li nka ka ho teba haholo mosebetsi oa tsona oa ho kopanela ‘litaba tse molemo’ le ba bang, kamehla li rapela hore Molimo o li tataise le ho li hlohonolofatsa mosebetsing oo. Na u lakatsa ho ithuta ’nete ea Lentsoe la Molimo? Haeba ho joalo, u se ke ua tsila-tsila ho bolela takatso ea hao ka lekhetlo le latelang ha Paki e fihla lapeng ha hao.