Lipotso Tse Tsoang ho Babali
● Ke ka baka la’ng ha tokollo ea Molula-Qhooa ea June 15, 1980, (maqephe 26, 27) e bua hore “selekane se secha” se haufi le ho fela tšebetsong ea sona, ha Ba-Heberu 13:20 e bua hore selekane sena ke “se sa feleng”?
Molula-Qhooa o itse: “Ka ho totobetseng selekane se secha se haufi le ho fela tšebetsong ea sona bakeng sa morero oa ho hlahisa Baiseraele ba moea ba 144 000 ba honyellang kamohelo ea Molimo hore ba ka kopanela le Jesu Kreste ’musong oa leholimo, ’muso oa sebele oa bohlokoa bakeng sa batho. Ha ba ho qetela ba Baiseraele bana ba amohelehang ba moea ba khaotsa ho ba ‘batho’ ka baka la lefu la lefatšeng le tsoho ho ea ’musong oa leholimo, ke hona bobuelli ba Jesu Kreste bo tlang ho khaotsa le bona.”
Hlokomela hore mona Molula-Qhooa ha oa bolela hore melemo ea selekane se secha e tla khaotsa. Ba phelang lefatšeng ba tla amohela molemo o sa feleng hobane selekane sena se secha se tla be se phethile morero oa sona oa ho hlahisa bana ba moea ba Molimo ba 144 000 ba tlang ho busa hammoho le Kreste e le majalefa a hae maholimong. Ho etsa papiso: A re re monna o etsa selekane le e mong ho mo hahela ntlo. Ntlo e ahuoa ho latela litaelo tsa eona, e-ea lefelloa ’me selekane sa bona sea phethahatsoa, empa melemo ea selekane seo e tsoela pele ka ho sa feleng hobane ntlo e ntse e sebelisoa.
Ho Ba-Heberu 13:20 moapostola Pauluse o bua ka Jehova a tsosa “Morena oa rona Jesu, molisa e moholo oa linku, ka mali a selekane se sa feleng [ka Segerike, di·a·theʹke ai·oʹni·os].” Hlaloso ea The Emphatic Diaglott ea polelo ena e re “Mali a Selekane sa aionia” (interlinear: “nako e sa feleng”). Polelo e tšoanang ea Segerike e ile ea sebelisoa ke bafetoleli ba Bibele ea Septuagint Version ha ba fetolela mantsoe a Seheberu berithʹ ʹoh·lamʹ ho Exoda 31:16, mabapi le molao oa Sabbatha (karolo ea Molao oa selekane) o neng o fihla bofelong ba ona, le hoja liphetolelo tse ngata li bua ka sena e le “selekane se sa feleng.” (Ex. 31:17, LXX; Ba-Kol. 2:13-16) Ka tsela e tšoanang, selekane se ileng sa etsoa le Aarone le bara ba hae e ne e le “selekane sa boprista bo sa feleng [Seheberu, ʹoh·lamʹ; Segerike, ai·o·niʹa]” (American Standard Version) e ne e le “sa ka mehla le ka mehla” (New World Translation).—Ex. 40:15; Num. 25:13; Ba-Heb. 7:11, 12.
Lentsoe la Seheberu oh·lamʹ le le tšoanang le lona la Segerike ai·o·ni·os le fana ka khopolo ea ntho e sa khaotseng kapa ntho e bang teng ka ho sa feleng. Selekane sa Molao sa Moshe le selekane sa boprista sa ba-Levi se ile sa fihla bofelong ba sona nakong e neng e sa tsejoe, ’me se ne se sebelelitse morero oa sona, empa melemo ea sona e ne e sa fele. Ka ho tšoanang, selekane se secha se tla fihla bofelong ba sona ha batlotsuoa bohle ba tsosetsoa bophelong bo se nang ho shoa ba leholimo.
Ka ho tšoanang, Molimo o ile oa bolela hore tšepiso ea oona ho Abrahama, mabapi le ‘peo e tšepisitsoeng’ e ne e tla ba “selekane se sa feleng” [Seheberu, ʹoh·lamʹ; Segerike, Septuagint, ai·oʹni·on]; “selekane se sa feleng” (American Standard Version). (Gen. 17:7; 22:18) Ka hore Jehova a felise selekane sa Molao ka hore Jesu a khokhotheloe thupeng ea hlokofatso, selekane se secha sa nka sebaka sa sona e le selekane se tlatsetsang selekane sa Abrahama. Ka ho “sa feleng” selekane le Abrahama se tla phethahatsoa ha motho oa ho qetela oa sehlopha sa bobeli sa ‘peo ea Abrahama’ a fumana moputso leholimong ’me “peo” ena—Kreste le babusi hammoho le eena ba 144 000—ba phethahatsa kabelo ea bona ea lilemo tse sekete ea ho fana ka melemo e bolokang bophelong le ’muso o phethahetseng bakeng sa batho.—Ba-Gal. 3:16, 19, 29; Tšen. 14:1; 20:6; 1 Ba-Kor. 15:24, 28.
● Moapostola Pauluse o ne a bolela’ng ha a ngola hore ho ba teng ha lihlopha tse arohaneng har’a Bakorinthe ho tla bonahatsa batho ba amohelehang?
Ho theiloe litlalehong tseo a neng a li fumane ka ba bang, moapostola Pauluse a ngola: “Ha le phuthehela kerekeng, ke utloa hoba liphaphang li teng ho lōna; ’me ka nqa e ’ngoe ke kholoa hoba ho joalo, hobane likhaohano le tsona e ka khona li be teng har’a lōna, hore ho tle ho bonahale bao e leng ba sebele har’a lōna.”—1 Ba-Kor. 11:18, 19.
Moapostola o ne a hlokomela hore litlaleho hase kamehla li fanang ka sebopeho se feletseng sa boemo ba sebele. Leha ho le joalo, ka baka la tsebo ea hae ea botho ka phutheho ea Korinthe, o tsebile hore boitsebiso boo a bo bolelloang bo na le motsoako oa ’nete. Ke ka baka leo a neng a ka re “ka nqa e ’ngoe ke kholoa hoba ho joalo.” A fihlela qeto ea hore ho tlameha ho be teng lihlopha kapa likarohano har’a Bakorinthe. Leha ho le joalo, boteng ba likarohano tsena bo ne bo tla bontša hore na ke batho bafe ba amohelehang mahlong a Molimo.
Ha ho hlaha lihlopha, hangata batho ba bang ba leka ho iphumanela balateli. Moea oa bona oa ho se khotsofale o tla phakisa o iponahatse. Empa batho bao e leng bahlanka ba amohelehang ba Ea Holimolimo ba tsoela pele ho thusa balumeli hammoho le bona ka boikokobetso. Ka lipolelo tsa bona le liketso, ba bontša hore ba khotsoe hore hlooho ea phutheho ea Bokreste ke Morena Jesu Kreste. Ba ke ke ba ikamahanya le lihlopha tse phahamisang batho ba sa phethahalang; leha e le hore ba tla batla ho rorisoa ke batho.
Batho bao e leng bahlanka ba amohelelang ba Molimo e le kannete ba qoba ho tlatsetsa ho hōlisoeng ha lihlopha le ho ameha ka eng kapa eng ho tsona. Hape, ha lihlopha li e-ba teng, batho ba amohelehang joalo ba etsa sohle seo ba ka se etsang ho hōlisa kopano le lerato. E, ba ratang ’nete ba tla totobala ka ho qoba moea oa mekha le ka ho tsoela pele ho thusa ba bang ho ananela bohlokoa ba kopano tlas’a bohlooho ba Jesu Kreste. Ka tsela ena lihlopha kapa likarohano li hlile li sebeletsa ho khetholla balumeli ba ’nete, batho ba nang le sepheo se hloekileng.