“Molisa ea Molemo” le “Mohlatsoana”
“Mohlatsoana, se tšabe, hobane ho khahlile Ntat’a lōna ho le fa ’muso.”—Luka 12:32.
1. Mopesaleme Davida le moprofeta Esaia ba tšoantša Jehova e le eng joaloka mohlokomeli?
EO E kileng ea e-ba moshanyana oa molisana oa Bethlehema, Morena Davida, o qalile e ’ngoe ea lipesaleme tsa hae tse bululetsoeng ka mantsoe ana: “Jehova ke molisa oa ka, nke ke ka hloka letho.” (Pes. 23:1) Mongoli oa habo oa Bibele, moprofeta Esaia, le eena o kile a tšoantša Jehova le molisa, a re: “O tla alosa mohlape oa hae ka mokhoa oa molisa, o tla bokella likonyana matsohong a hae.” (Esa. 40:11) Empa Jehova o na le molisa ea tlas’a hae. Ka ho loketseng o mo bitsa “mohlanka oa ka Davida.”
2. (a) Davida eo Ezekiele 37:24, 25 e sebetsang ho eena ke ofe? (b) Jesu o sebelisitse boprofeta ba Zakaria 13:7 joang, hona joalo hobane’ng?
2 Lilemo tse makholo-kholo hoba Morena Davida a shoe, Jehova a bululela mongoli e mong oa Bibele, Ezekiele, hore a profete: “Mohlanka oa ka Davida e tla ba morena oa bona, e be molisa oa bona bohle; . . . ’me mohlanka oa ka Davida e tla ba morena oa bona ka mehla.” (Ezek. 37:24, 25) Boprofeta boo e tlameha ebe bo supa ho molisa ea tlase oa Jehova, Davida e Moholoanyane, Jesu Kreste. Bosiung ba la 14 Nisane, 33 C.E., ha Jesu Kreste a ekoa le ho kenngoa litlamong le ho isoa ka pel’a lekhotla ke lira tsa hae, moo ho ile ha phethahala boprofeta ba Zakaria 13:7: “Uena lerumo, tsohela molisa oa ka, e leng monna e leng mohaeso, ho bolela Jehova oa makhotla. Otla molisa, linku li tle li qhalane.” Jesu Kreste ka boeena o ile a sebelisa boprofeta boo ka tsela eo.—Matt. 26:31; Mar. 14:27.
3, 4. (a) Ke hobane’ng ha sebe se ile sa sala le Bajode bao ba ileng ba ngangisana le eena ka ho phekola ha hae monna ea tsoetsoeng e le sefofu? (b) Hamorao, moketeng oa mariha oa khakolo ea tempele, ke hobane’ng ha Jesu a sa ka a balella Bajode ba manganga har’a “linku” tsa hae?
3 Jesu Kreste ka baka leo o ne a nepile, e se ea ikakasang, ha a itšoantša le molisa ’me a ipitsa “molisa ea molemo.” (Joh. 10:6, 11, 14) Hona ho etsahetse tabeng ea ha a ne a phekola ka mohlolo motho ea neng a tsoetsoe a foufetse. Batho bahabo ba sa lumelang ba phehisana khang le eena ka sena, ’me ba mo botsa: “Na le rōna re lifofu na?” Ke eng se ileng sa latela potso ee e phephetsang? “Jesu a re ho bona: Hojane le lifofu, le ka be le se na sebe; empa joale le re: Rea bona; sebe sa lōna se sala ke hona.” (Joh. 9:40, 41) Nakoana hamorao, nakong ea mokete oa ho khakoloa ha tempele ea Jerusalema, mariheng (Tšitoe) a 32 C.E., Jesu a re ho Bajode ba bang ba sa lumelang ba neng ba mo potapotile:
4 “Mesebetsi eo ke e etsang ka lebitso la Ntate ke eona e mpakang. Empa lōna ha le lumele, kahobane ha le linku tsa ka, joale ka ha ke se ke le boleletse. Linku tsa ka li utloa lentsoe la ka; kea li tseba, ’me lia ntatela. ’Na ke li fa bophelo bo sa feleng, ’me li ke ke tsa timela le ka mohla o le mong, ’me ha ho motho ea ka li utlang letsohong la ka. Ntate ea ’neileng tsona o moholo ho bohle; ’me ha ho motho ea ka li utlang letsohong la Ntate. ’Na le Ntate, re bang feela.”—Joh. 10:19-30.
5. Ho Johanne 10:1-5, Jesu o tšoantšitse selelekela se mo tsebahalitseng ho Iseraele le eng?
5 Bana ba sa lumelang ha baa ka ba hana feela bopaki bo neng bo beoa ke mesebetsi ea Jesu ho mo tsebahatsa, empa hape ba hana bopaki ba selelekela sa Jesu, monna ea ileng a tsebahatsa Jesu ho Baiseraele e le Messia, Kreste. Jesu o ile a supa bohlokoa ba hore molisa oa ’nete a be le bopaki bo joalo, ha a re: “Ka ’nete-nete ke re ho lōna: Ea sa keneng ka monyako lesakeng la linku, a mpa a tlōlela teng kahosele, ke lesholu le senokoane. Empa ea kenang ka monyako, eena ke molisa oa linku. Molebeli oa monyako o ee a ’mulele ’me linku li utloe lentsoe la hae, ’me a bitse linku tsa hae ka mabitso a tsona, a li ise kantle. Ere hobane a ntše linku tsa hae, a li etelle pele, ’me linku li mo latele, kahobane li tseba lentsoe la hae. Osele li ke ke tsa mo latela, empa li ka ’malehela, kahobane li sa tsebe lentsoe la osele.”—Joh. 10:1-5.
“LESAKA” LE “MOLEBELI OA MONYAKO”
6. Ke hobane’ng ha “lesaka” la tšoantšetso leo a kenyellelitsoeng ho lona e se tokisetso ea Selekane sa Molao?
6 “Lesaka” le “molebeli oa monyako” joale li bolela eng, kaha ke mona Jesu e bile ’metli Nazaretha ’me ha ho mohla a kileng a alosa linku tsa sebele-bele? Pele ho tsohle, “lesaka” le ne le sa emele tokisetso ea Selekane sa Molao seo Jehova Molimo a neng a se emisitse le sechaba sa Iseraele ka Moshe e le mokena-lipakeng. Ruri ho ne ho sa hlokahale hore Jesu a kenyelletsoe tokisetsong ea Selekane sa Molao ke “molebeli oa monyako” ea itseng oa Mojode, kamoo ho leng kateng. Jesu o ne a tsoaletsoe tokisetsong eo. Ba-Galata 4:4, 5; e re: “Empa nako ha li phethehile, Molimo o romile Mor’a oona, ea tsoetsoeng ke mosali, a hlahetse pusong ea molao, a tle a lopolle ba ka tlas’a molao.” Ho ba lopolla ka theko, Jesu o ile a shoa.
7. (a) Ke ka letsatsi lefe ka 33 C.E., moo Jehova a ileng a felisa tokisetso ea Selekane sa Molao le Iseraele, hona hobane’ng? (b) Ke hobane’ng, ho tloha ka Pentekonta ea 33 C.E. ho ea pele ho neng ho se tokisetso ea Selekane sa Molao eo Jesu a neng a ka etella pele Bajode ka eona?
7 E le hore a ka hlahisa theko ho Molimo, Jesu a tsosoa bafung ka letsatsi la boraro a ne a shoele ka 33 C.E. Ka letsatsi la mashome a mane ha ho baloa ho tloha mohla a tsohileng Jesu a nyolohela leholimong. Matsatsi a leshome hamorao ha tla letsatsi la mokete oa Bajode oa selemo oa Pentekonta, Sivan 6, 33 C.E. Ka letsatsi leo Molimo oa mo sebelisa ho tšolla moea o halalelang holim’a barutuoa ba hae ba letileng Jerusalema. Hona ha bolela hore o hlahile moo Molimo o leng teng ho fana ka molemo oa sehlabelo sa hae se phethahetseng sa botho e le hore a ka lopolla batho bohle ba rekisitsoeng sebeng, ho akarelletsa Bajode. Ka ho loketseng, ka letsatsi leo, Jehova Molimo a felisa selekane sa Molao ’me a se nkela sebaka ka selekane se secha se tšepisitsoeng, a sa se etse le Bajode empa barutuoa ba tsoetsoeng ka moea ba Mokena-lipakeng, Jesu Kreste. (Ba-Kol. 2:13, 14) Kahoo ha hoa ka ha hlola ho sa ba teng selekane sa Molao sa Bajode seo Molisa Jesu a neng a ka etella Bajode ba lumelang pele ka sona.
8. (a) Ke eng, ka baka leo, e neng e emeloa ke “lesaka”? (b) Kahoo, bana ba tlhaho ba Abrahama ba ne ba lebelletse eng?
8 Leseling la se ka holimo, potso e-ea itlhahisa ka mokhoa o phehellang haholo, Ha e le hantle “lesaka” le boletsoeng ke Jesu ho Johanne 10:1 le hlile le tšoantšetsa eng? Ntle ho potso le tlameha le be le emela ntho e ’ngoe ea pelenyana le e utloahalang le e nkang nako eohle ho feta selekane sa Molao sa 1513 B.C.E. Seo e ne e le selekane sa Abrahama. Ha hlooho ea lelapa Abrahama a tšela Nōka ea Eufrate ho kena ka Lefatšeng la Pallo ka 1943 B.C.E., tšepiso ea Molimo ea qala ho sebetsa ho eena le bana bao a neng a tla ba tsoala: “Ke tla hlohonolofatsa ba u hlohonolofatsang, ke rohake ba u rohakang, ’me mefuta eohle ea lefatše e tla hlohonolofalla ho uena.” (Gen. 12:3) Lilemo hamorao, ha Abrahama a bontša hore o utloisisa ho nyehela mora oa hae Isaaka e le sehlabelo, Molimo oa phaella tšepisong ea oona: “Lichaba tsohle tsa lefatše li tla itlhohonolofatsa lelokong la hao, ka baka la hobane u mametse lentsoe la ka.” (Gen. 22:17, 18) Ho tloha ka nako eo ho ea pele bana ba Abrahama ba qala ho lebella “peō” eo hore e tle. Kahoo “lesaka” le ne le tšoantšetsa tokisetso ea selekane sa Abrahama. Ba kang linku ba kopelletsoeng ka hare ba ne ba tla tšoantšetsa ba emetseng “peō” e tšepisitsoeng hore e tle.
9. Ke mang eo “molebeli oa monyako” a neng a ke ke a mo tlohela hore a mo fete ho kena ka ‘lesakeng’?
9 Hore na bao ba kang linku ba tsebile ka “peō” e sa le pele kapa che, ba ne ba tla e amohela ha ba e tsebisoa ’me e hlahisoa ho bona. Mang kapa mang ea neng a leka ho inkela “linku” tseo ka mekhoa ea bolotsana e le hore a ka li tlatlapa e ne e tla be e le “lesholu le senokoane.” “Molebeli oa monyako” oa lesaka o ne a ke ke a tsebahatsa Messia kapa Kreste ea joalo oa bohata. Mang kapa mang ea fetang pel’a ‘molebeli eo oa monyako’ le ka “monyako” e tla be e le “molisa” oa ’nete, “peō” ea Abrahama.
10. “Molebeli oa monyako” a ipaka hore ke mang, hona ka boprofeta bofe?
10 Leha ho le joalo, “molebeli oa monyako” e ne e le mang? O ipakile ho ba Johanne Mokolobetsi, monna oa lelapa la boprista la leloko la Levi. Molimo o ne o tšepisitse hore o tla rōmela selelekela pele ho “peō” e tšepisitsoeng ea Abrahama. Ho Malakia 3:1 ho hlile ha boleloa hore: “Bonang, ke ea roma lenqosa la ka, le tle le hleke tsela pel’a ka; ’me hang, Morena eo le ’matlang o tla kena tempeleng ea hae, e leng lengeloi la selekane leo le le lakatsang. Bonang, oa tla, ho bolela Jehova oa makhotla.” (Mar. 1:1-11) Johanne ka baka leo o ne a lebelletse ho tla ha ‘peō ea Abrahama’ e tšepisitsoeng ’me, ka ho loketseng, e ne e le motho ea kang nku ka mokhoa o tšoanang le ba neng ba le ka lesakeng la tokisetso ea selekane sa Abrahama. Leha ho le joalo, Johanne a bolaoa kamor’a selemo kapa ho feta-feta moo a qalile tšebeletso ea hae e khethehileng. Kahoo a se ke a tšoarella ho fihlela ka Pentekonta ea 33 C.E. ho ba e mong oa “mohlatsoana” oa majalefa a tlotsitsoeng a ’muso oa leholimo.—Matt. 11:11-14; 14:1-12; Luka 12:32; Ba-Gal. 3:16.
11. (a) Jesu a tiisa joang hore Johanne Mokolobetsi ke selelekela sa hae? (b) Jesu e ne e le “lenqosa” la selekane sefe ha a kena le Morena Jehova ka tempeleng?
11 Ha a bua ka karolo e nkiloeng ke Johanne Mokolobetsi ho sebetsahaleng ha morero oa Jehova, Jesu a re ho Bajode: ‘Ke eena ea boletsoeng moo ho ngoliloeng, ho thoe: Bona, ke roma pel’a sefahleho sa hao lenqosa la ka le tlang ho u lokisetsa tsela.’ (Matt. 11:10) Kahoo Jesu a sebelisa boprofeta ba Malakia 3:1 ho Johanne Mokolobetsi e le ea rōmetsoeng pele ho “lengeloi la selekane.” Jesu Kreste, ea nang le Morena Jehova ho kena ka tempeleng ho e hlahloba, ke eena lenqosa kapa lengeloi, e seng la selekane sa Molao, empa la selekane sa Abrahama. Ba ka tokisetsong ea Selekane sa Abrahama ba neng ba lumela boprofeta ba Jehova ba ne ba lebelletse ho tla ha “lenqosa” la Messia.
12. Johanne Mokolobetsi o itse’ng ka hore na o ‘tsebile’ ea ka sehloohong oa ‘peō ea Abrahama’ joang?
12 Ka ea ka sehloohong le e moholo oa ‘peō ea Abrahama,’ Johanne Mokolobetsi o itse: “Ke bone Moea o theoha leholimong, o kang leeba, oa ba oa lula holim’a hae. Le ‘na ke ne ke sa mo tsebe; empa ea nthomileng ho kolobetsa ka metsi, ke eena ea neng a mpoleletse, a re: Eo u tla bona Moea o theohela ho eena, ’me o lula holim’a hae, ke eena ea kolobetsang ka Moea o Halalelang. Le ’na ke bone, ’me ke pakile hore enoa ke Mor’a Molimo.”—Joh. 1:31-34.
13. (a) Johanne Mokolobetsi o butse “monyako” neng ho ea ho Molisa oa ’nete? (b) Johanne joale o ne a supa ho ‘peō ea Abrahama’ ea mofuta ofe?
13 Jesu ha a ka a koekoetla ho kena ka “monyako” ha a kena ka lesakeng. Ha a le lilemo li 30 a ea ho Johanne Mokolobetsi ho ea qoelisoa metsing. Hoba a qete matsatsi a mashome a mane lefeelleng tlas’a teko, ka sebete a khutlela moo Johanne Mokolobetsi a neng a le teng a e-na le barutuoa ba hae ba ’maloa. Ha a atamela “molebeli oa monyako” oa tšoantšetso oa lesaka la Selekane sa Abrahama, Johanne a mo bona a e-tla ’me a hoa: “Bonang, ke Konyana ea Molimo e tlosang libe tsa lefatše.” (Joh. 1:29, 36) E seng Konyana e tlosang sebe sa sechaba sa Iseraele, empa “Konyana ea Molimo e tlosang libe tsa lefatše.” Johanne Mokolobetsi kahoo a bula “monyako” oa tšoantšetso o eang ho Molisa oa ’nete ea neng a e-na le bopaki bo hlokahalang bo mo khethollang bo tsoang ho Molisa oa Bokahohle, Jehova Molimo. Ha a lebisa tlhokomelo ea barutuoa ba hae ho Jesu ea tlang, Johanne o ne a sa supe feela Mojode ea bolotseng le ngoana oa nama ea tsoileng ho Abrahama. Che, o ne a supa ho Motlotsuoa, ngoana ea tsoetsoeng ka moea oa Abrahama e Moholoanyane, Jehova Molimo. E ne e le ea moholo kapa ea ka sehloohong oa “peō” ea Abrahama oa Ieholimo eo ka eena malapa ’ohle a lefatše a neng a tla itlhohonolofatsa.
14. (a) Ha a atamela “lesaka” na Jesu o ne a batla feela Bajode ba tlhaho le batho ba bang ka kakaretso? (b) Molisa oa Bochabela bo Hare o ne a bitsa nku ka bomong joang hore e tle ho eena?
14 Ka baka leo o ne a lokela ho lumelloa ke “molebeli oa monyako” ho kena ka ‘lesakeng’ la tšoantšetso, tokisetso ea Selekane sa Abrahama. E ne e le molisa oa ’nete, ’me ha a ka a tla a batla Bajode kapa batho ba bang ka kakaretso, empa a batla ba neng ba tla arabela monyetla oa ho ba le eena karolo ea ‘peō ea Abrahama’ e entsoeng ka litho tse ngata eo mahlohonolo a neng a tla tlela lichaba tsohle ka eona. Boholo ba Bajode ba tlhaho bo ile ba mo hana, empa a amoheloa ke masala a Bajode ba tlhaho. Bana e bile “linku” tse mametseng lentsoe la hae. Kahoo, ha a bitsa ‘linku tsa hae ka lebitso,’ tsa arabela, ’me a li isa makhulong. Bochabela bo Hare molisa o ne a atisa ho rea nku e ’ngoe le e ’ngoe lebitso.
15. (a) Molisa o ne a bitsa linku tsa hae ka kakaretso joang, ka nako e le ’ngoe, ’me ke joang li neng li ke ke tsa thetsoa hore li latele “basele”? (b) Oo ke mohlala o motle kajeno oa mang hore a o latele?
15 Leha ho le joalo, ha molisa a batla ho bokella mohlape oa hae hammoho ka nako e le ’ngoe, o ne a li bitsa ka mokhoa o akaretsang, molumo o kang Dr-r-r-r-r-rt a o lekanyetsa molumong o itseng le ka mokhoa oo ho seng motho e mong oa molisana ea ka o etsisang. Ke kahoo, “ere hobane a ntše linku tsa hae, a li etelle pele, ’me linku li mo latele,” hobane li khetholla lentsoe la hae le ke keng la etsisoa ke e mong osele. Litsebe tsa tsona li lethoethoe ka ho lekaneng ho lemoha “basele” le baikhakanyi. Li ke ke tsa thetsoa hore li latele “basele” ba joalo ba belaetsang ’me, mohlomong ba bileng ba nang le bobe. Ona ke mohlala o motle bakeng sa ba kang linku ba etsang “mohlatsoana,” bao e leng thabo ho Abrahama e Moholoanyane ea amohelang ho ba nea ’Muso, hore ba o latele ka hloko.
16. Ke hobane’ng ha Bajode ba sa ka ba utloisisa se boleloang ke papiso eo Jesu a e buileng ho bona ka molisa le mohlape oa hae?
16 Na rōna kajeno re utloisisa se boleloang ke seo Jesu a neng a se bua moo? Ha e le ka Bajode ba sa lumelang ba neng ba le tokisetsong ea Selekane sa Molao, ha baa ka ba utloisisa hore na papiso eo Jesu a neng a e etsa e lokela joang. Joalokaha tlaleho e bolela: “Jesu a ba bolella papiso eo, empa bona ha ba ka ba utloisisa tsee a ba bolellang tsona hore na ke life.” (Joh. 10:6) Ha baa ka ba tseba lentsoe la Molisa oa Messia, ’me le eena ha a ka a ba tseba le ho ba bitsa ka mabitso a bona a botho. Bofofu boo ba ipaketseng bona ka boomo ba ba thibela ho mo tseba. E se eka rōna kajeno re ke ke ra tšoana le bona.
“MONYAKO OA LINKU”
17. Ho ea ka Johanne 10:7-10, Jesu a boela a itšoantša ka tšobotsi efe ea lesaka?
17 Ntlheng ena Jesu a fetola kaheho ea puo ho bontša tšobotsi e ’ngoe ea bohlokoa ea taba. “Jesu a boela a re ho bona: Ka ’nete-nete ke re ho lōna: Ke ’na monyako oa linku. Bohle ba tlileng pele ho ’na, e ne e le masholu le linokoane, empa linku ha lia ka tsa ba utloa. Ke ’na monyako; ekare ha motho a kena ka ’na, o tla bolokeha; o tla ’ne a kene, a ’ne a tsoe, a bone makhulo. Senokoane ha se tle ha e se ho utsoa, le ho hlaba, le ho timetsa feela; ’na ke tlile hore li be le bophelo, li bo bone ka ho fetisisa.”—Joh. 10:7-10.
18. (a) Ke mang lefatšeng ea lekang ho iketsa joaloka molebeli oa monyako ho Jesu joaloka “monyako” oa tšoantšetso? (b) Ke ka sehlopha sefe Jesu a buileng ka sona e le tšobotsi ea ‘ho fela ha lefatše’ ’me na se sebeletsa e le molebeli oa monyako ho Jesu e le “monyako”?
18 A re hlokomeleng hore Jesu ha a bue ka “molebeli oa monyako” mabapi leha e le eena “monyako.” Ha a bue ka hoo ho thoeng ke “moemeli oa Kreste,” hlooho eitseng ea sehlopha sa bolumeli e ipolelang hore ha e fose. Jesu o itse: “Ke ’na monyako oa linku.” ’Me likhoeli hamoraonyana a boela a eketsa ka hore: “Ke ’na tsela, le ’nete, le bophelo; ha ho motho ea ka tlang ho Ntate, ha e se ka ’na.” (Joh. 14:6) Hona ha ho lahle taba ea hore, ha Jesu a fana ka boprofeta ba hae bo bolelele ka ‘pontšo ea ho tla ha hae, le ea ho fela ha lefatše,’ o hlile a bolela ka “mohlanka ea khabane, ea bohlale,” eo morena oa hae a neng a tla mo ‘khethela ho hlokomela mesebetsi eohle ea hae.’ (Matt. 24:3, 45-47) Empa hona ho supa sehlopha sa “mohlanka” sa balateli ba hae ba khabane le ba bohlale bao a neng a ba abela bolebeli holim’a lintho tsa hae tse bonahalang tse mona lefatšeng, haholo ‘nakong ena ea bofelo ba lefatše.’ Leha ho le joalo, khetho e joalo ha e etse sehlopha sena sa “mohlanka” “molebeli oa monyako” oa Jesu.
19. Bao ba ka lesakeng la tokisetso ea Selekane sa Abrahama ba etsa mohlape o moholo hakae, ’me pholoho ea bona e ka ho kena ka tsela efe?
19 Jesu ke “monyako” oa tšoantšetso ho balateli bao ba kang linku bao e leng karolo le eena ea ‘peō ea Abrahama.’ Kahoo ba ka ‘lesakeng’ la tokisetso ea selekane sa Abrahama. Kaofela, ba etsa “mohlatsoana,” ka papiso, ba 144 000 feela tlas’a Jesu Molisa oa bona. Kamoo ho leng kateng, ba etsa meloko e 12 ea Iseraele oa moea, ’me ba ema Thabeng ea Sione ea moea le Jesu Kreste, “Konyana” ea Molimo. (Luka 12:32; Tšen. 7:1-8; 14:1-5) Poloko ea bona e tsoa ho beng ha bona majalefa a leholimo, e seng ka ho ba moemeli e mong oa Kreste, empa ho eena eo e leng “monyako oa linku.” Hobane Jesu o itse: “Ha motho a kena ka ’na, o tla bolokeha; o tla ’ne a kene, a ’ne a tsoe, a bone makhulo.” (Joh. 10:9) A buella “mohlatsoana” o nang le tšepo ea leholimo, moapostola Pauluse o bua ka “Jesu Kreste, Morena oa rōna; e leng eena eo hape re boneng ka eena, ka tumelo, katamelo mohaung ona, oo re emeng ho oona, ’me re ithorisetsa tšepong ea khanya ea Molimo.”—Ba-Roma 5:1, 2; Ba-Ef. 2:18; 3:12.
20. Molisa ea tlase oa Jehova o eme a fapane joang le “bo-Kreste ba bohata, le baprofeta ba bohata” ba ‘tlileng pele’ ho eena?
20 Boprofeteng ba hae ka ‘bofelo ba lefatše,’ Jesu o hlile a bolela hore “bo-Kreste ba bohata, le baprofeta ba bohata” ba tla hlaha ka ho thetsa hohoholo. Bana ‘ba tlile pele’ ho Kreste oa ’nete, ’me batho ba thetsitsoeng ba latetseng baiphahamisi ba joalo ba utsoitsoe bolumeling ’me ba hlabiloe le ho bolaoa moeeng, haeba ho sa etsahala ka sebele. (Matt. 24:3, 24, 25; Joh. 10:8, 10) Ka lehlakoreng le leng, Jesu o tlile e le mopholosi oa bophelo, le ho tla lokisetsa libopuoa tse batho ho thabela bophelo haholoanyane ho feta kamoo ho leng kateng hona joale, bophelo phethehong ka ho sa feleng le tlas’a litokisetso tse sireletsehileng tse entsoeng ke Molisa e Moholo ho bohle, Jehova Molimo. Kahoo molisa oa hae ea tlase ea itetseng, Jesu Kreste, ke eena eo re ka mo latelang, haeba re lakatsa ho fumana bophelo bo sa feleng re le “linku” tsa Molimo.