Jehova—Tšireletso e Phahameng
Naheng ea Amerika e ka Boroa eo e neng e le mohlanka oa mokha a ithuta le Lipaki tsa Jehova, a amohela ’nete ea Bibele ’me a kolobetsoa. Khoeling eona eo a emisoa ke masole a sepolesa ha a le tseleng a ea lapeng ’me a botsoa hore a hlahise karete ea hae ea boitsebahatso. Hoba a e hlahise a laeloa hore a kene ka terakeng ea masole. A kōpa mohlanka ea ikarabellang hore na a ka tsebisa mosali oa hae empa a bolelloa hore ho ke ke ha etsahala. Ho bonahala hore ka baka la likamano tsa hae tsa nakong e fetileng le mokha o ne a belaelloa ka hore ke Lekomonisi.
A tlangoa mahlo ’me a khannoa ho ea sebakeng se kopetsoeng ka terata e metsu moo ho neng ho le teng banna ba ka bang 100 bao le bona ba neng ba belaelloa hore ke Makomonisi, hammoho le likebekoa tse ling, ho kopanyelletsa le ea neng a qositsoe ka ho bolaea banna ba tšeletseng, hape ho na le mongoli. Ha bosiu bo fihla ha ’na ha bata, empa banna bana ba se ke ba neoa lintho tsa ho robala, eaba baa ikhara ’me ba robala joaloka liphoofolo fatše. Hoseng ka le latelang e mong oa bahlanka ba ’muso a ba kolokisa ’me a ba laela ho bina pina ea sechaba le ho lumelisa folaga. Paki ea hana ho li etsa ka bobeli, e leng seo ka baka la sona mohlanka oa ’muso a ileng a mo soma.
Batšoaruoa ba ne ba fumana lijo hang ka letsatsi motšehare o moholo. Ba bang ba hlokomela hore Paki e rapela ka khutso pele e ja, ’me ba qala ho e soma, ba bile ba e tloka-tloka. Ka letsatsi la boraro sena se etsahala sekebekoa sa sekoeta sa tla ho bona, ’me sa re: “Ke letsatsi la boraro joale ke le mametse banna. E mong feela ea tla bua ho hong ho hobe ka monna enoa ke oa bosupa eo ke tla mo fenetha. Ha ke soasoe, ke tla fumana tsela ea ho le koala melomo ka ho sa feleng!” Hona tsatsing leo monna e mong a bitsa ba bang hammoho ’me a kōpa Paki hore na e ka ba rapella, ’me ka letsatsi le latelang ba mo kōpa hore a rapele pele ba ja. Kamor’a nako, a tseba ho pakela banna bana kaofela.
Motšehare oa mantsiboea tsatsi le leng le le leng batšoaruoa ba ne ba nkuoa ho ea botsoa. Ba bang ha ho mohla ba kileng ba ba bona hape. Ha mongoli a khutla, a bonahala mahlo a hae a tletse likeleli ’me ho bonahala a sa tsebe hore na o ne a le hokae. Ho sa le joalo, mosali oa Paki o ne a lekile ntle ho thuso ho fumana boitsebiso ka ho nyamela ha monna oa hae.
Ka letsatsi la borobong e ne e le nako ea Paki. Ea tlangoa mahlo ’me ea isoa moo ho botsoang teng moo e ileng ea shapuoa haholo le ho botsoa ka lihora tse robeli. Karabelong ea lipotso tsa bona, ea ba bolella ka Jehova le ho se nke lehlakore ha Bokreste.
Qetellong, ea bolelloa hore e tla fanyehoa. Ba e botsa hore na e na le mantsoe a ho qetela. Ea ba kōpa hore ba bolelle mosali oa eona hore na ho etsahetse joang ka eena. Ba e botsa hore na ha e tšabe ho shoa e le nyenyane hakana. A arabela: “Hoja la ntšoara likhoeling tse seng kae tse fetileng ke lumela hore ke ne ke tla tšaba ho shoa haholo. Empa Bibele e bolela hore lefu le tšoana le ho robala. ’Me ka tieo ke lumela hore Jehova o tla tsosa bafu. Ka letsatsi le leng, le lōna, Monghali, le tla shebana le lefu.”
Joale ba mo isa moo ho bolaeloang, Paki e rapela Jehova hore a e matlafatse ho tšepahala le hore Molimo o hlokomele mosali oa hae le bana. Ba mo akhela khole molaleng. Ha laeloa hore ho lokolloe monyako o tla mo lihela tlase, empa a mpa a oela maotong a hae feela. E ne e le leqheka. Kamor’a moo eena le ba bang ba tlangoa mahlong, ba tlangoa matsoho ka mahlaahlela ’me ba isoa libakeng tseo ba neng ba nkiloe ho tsona matsatsing a robong a fetileng. E ne e le Sontaha, eaba o leba Holong ea ’Muso moo a ileng a fumana mosali oa hae le bana. Ho bile joalokaha eka o tsoha bafung.
Ruri Jehova o ne a ipakile ho ba ‘tšireletso e phahameng’ bakeng sa Paki ena e sa tsoa kolobetsoa matsatsing ao a teko.—Pes. 144:1, 2.