Na u ’Moleli ea Tšepahalang oa Borena ba Molimo?

“Jehova, mesebetsi ea hao kaofela e tla u rorisa, bakhethoa ba hao ba u boke. Ba tla bolela khanya ea ’muso oa hao, ba tumise matla a hao.”—Pes. 145:10, 11.

1. Jesu o boletse ’muso oa Molimo ho isa kae?

HO TLOHA Mehleng ea Abele Jehova Molimo o ’nile a ba le bahlanka ba bang ba tšepahalang ba mo rorisang lefatšeng. Ea fetisisang ka botšepehi oa Jehova, Mora oa hae ea tsoetsoeng a le mong, Jesu Kreste, o ile a etella pele ho bolela ka matla a Jehova le ’muso oa hae o tla ba molemong oa batho bohle. Jesu o tlile e le Ea Romiloeng, ngoana ea neng a boletsoe e sa le pele oa Jesse le Davida, eo e neng e tla ba Morena, ’me ’muso oa Molimo ke oona oo a neng a o entse o etellang pele thutong ea hae. (Esa. 11:1, 10; Matt. 21:1-17) O ile a tlisa litaba tse molemo tsa ’Muso. Kaha o ne a le teng har’a batho, o tsebile ho ba bolella ka bohaufi ba ’Muso joalokaha a ne a o emetse, eena ea neng a khethetsoe borena, le ho ruta balateli ba hae ho batla ’Muso pele. (Luka 17:20, 21) Ha a ruta balateli ba hae hore na ba rapele joang, a hatisa ho tla ha ’Muso le hore ho tla bolela ho halaletsoa ha lebitso la Molimo, ka thato ea Molimo e etsoa lefatšeng joaloka leholimong.—Matt. 4:23; 6:9, 10, 33.

2. O susumellelitse ba bang ho ameha ka khang ea borena ba Jehova joang?

² Jesu a mema ba bang hore ba kopanele le eena ho bua ka litaba tse molemo tsa ’Muso o tlang. (Luka 9:1-6; 10:1-12) Balateli ba jesu ba utloisisa hore ho ba teng ha hae e le morena e ne e le ha nakong e tlang, joalokaha re ka bona potsong eo ba e botsitseng ho Mattheu 24:3: “Ak’u re bolelle: lintho tsee li tla etsahala neng? Pontšo e tla ba efe ea ho tla ha hao le ea ho fela ha mehla ea kajeno?” (Phet. e ncha) ’Me Jesu joale a tsebahatsa nako ea ho ba teng ha hae e le nako e khethehileng bakeng sa ho bua ka ’Muso, a supa hore hona ho tla etsoa lefatšeng lohle leo ho ahiloeng ho lona e le bopaki. Kaha re bone “pontšo,” rea tseba hore ho tloha ka 1914 Jesu ka ’nete o bile teng e le morena ea matleng, a busa har’a lira tsa hae.—Pes. 110:1; Ba-Heb. 10:12, 13; Matt. 24:14.

3. Pauluse o kopanetse joang ho boleleng borena ba Molimo?

³ “Ba tle ba tsebise bana ba batho liketso tsa hao tse phahameng, le boholo ba khanya ea borena ba hao. “Muso ao hao ke ’muso oa ka mehla eohle, ’me borena ba hao bo hlola ho isa melokong e sa feleng.” (Pes. 145:12, 13)

Barutuoa ba Jesu ba ne ba totobetse ho supiseng batho ’muso oa Molimo ka Jesu Kreste. Mohlala o motle oa sena o tlalehiloe ho Liketso 28:23, 30, 31, e bolelang ka ho bolela ha pauluse ka ’Muso ha a le litlamong Roma. Pelenyana o ne a ile a ngolla Bakorinthe hore Bakreste ke “manqosa a Kreste” le hore ba thusa batho hore ba ‘boelane le Molimo.’ (2 Ba-Kor. 5:20) Pauluse e le lenqosa o ne a lebelletsoe ho bua a sa tšabe letho a buella ’Muso le Morena eo a neng a mo emela, ’me o fetse a etsa joalo. Na u teng bakeng sa tšebeletso e joalo ea borena? Haeba ho joalo, na u ntse u bua u sa tšabe letho lebitsong la Morena le ’Muso?

4. Ke lintho life tse boletsoeng ke Pauluse le Johanne ba ba ba li ngola tseo joale re ka li tsebahatsang re le barapeli ba tšepahalang ba Jehova Molimo?

⁴ Ha Pauluse a ntse a hlalosa lithuto tsa ’Muso o ne a bontša kamano pakeng tsa Jesu Kreste le Jehova Molimo tokisetsong ea ’Muso le hore Jehova ke eena Morena e moholo oa bokahohle. “Hloho ea Kreste ke Molimo.” (1 Ba-Kor. 11:3) Pauluse a boela a bolela hore na ho tla etsahala joang qetellong ea puso ea Kreste ea lilemo tse 1 000. (1 Ba-Kor. 15:24-28) Ho ea qetellong ea lekholo la pele la lilemo C.E., moapostola Johanne ea tšepahalang ka mokhoa o tšoanang o ile a ngola mantsoe a supelang pele liketso tsa nakong e tlang tse matla tsa Jehova, a bontša khanya ea borena ba hae. (Bona Tšenolo 12:9, 10; 19:6; 20:10, 14; 21:3, 4, 22-24.) Tsena ke lintho tseo rōna kajeno joaloka barapeli ba tšepahalang ba Jehova, re ka li tsebisang bana ba batho, re hatisa bohlokoa ba ’muso oa Molimo le seo o tla se etsetsa batho, hohle tlotlisong ea Jehova. ’Muso o tlameha ho hlalosoa le ho qaqisetsoa bana ba batho, hore ba bone hore ’muso oa Molimo ke eona tšepo feela ea bona. O tla tšoarella le ho tiisetsa melokong eohle e latellanang.a

5. (a) Bahlanka ba Jehova ba atisa ho talimana le eng? (b) Ho sa tsotellehe khanyetso nakong ea Ntoa ea I ea Lefatše batho ba Jehova ba tsebile ho etsa joang ho tloha ka nako eo?

⁵ Tlas’a tlhaku samekh, tlhaku ea bo15 litlhakung tsa Seheberu, Pesaleme ea 145:14 e re:

“Jehova o kokotlelisa bohle ba khothometsehang, o emisa ba inamisitsoeng.”

Ba rapelang Jehova ka botšepehi le ho bolela borena ba hae ba atisa ho thulana le khanyetso le mathata ka baka la ho tšepahala ha bona ho Jehova. (Gen. 3:15) Empa bopaki ba nakong e fetileng bo bontša kamoo Jehova, ha a tšepahala lipallong tsa hae a ileng a tšehetsa le ho thusa ba mo rapelang le ho ba phahamisa ha ba hatelletsoe. (Gen. khaoh. 15; bona hape mehlala e mengata bukeng ea Baahloli.) Lekholong lena la lilemo la bo20 ho isa qetellong ea 1980 re bone kamoo Jehova a loetseng masala a tlotsitsoeng le “linku tse ling” khatellong ea Babylona. Masala a tlotsitsoeng a ne a hatelletsoe haholo Ntoeng ea I ea Lefatše. Empa Jehova a ba phahamisa ka moea oa hae le lentsoe la ’nete. Nakoana kamor’a moo, kopanong ea bona ea 1922 ea Cedar Point, Ohio, ka botšepehi ba ikemisetsa ho tsebahatsa Morena le ’Muso. Jehova o ’nile a ba tataisa ho tloha ka nako eo, e le hore lebitso la hae le ’muso li tsebahatsoe lefatšeng ka bophara.

6. Jehova o etselitse batho ba hae tokisetso efe ea lijo?

⁶ “Mahlo a libopuoa kaofela a lebeletse uena, u li fa lijo ka nako e tšoanetseng.” (Pes. 145:15)

Barapeli ba tšepahalang ba Jehova ba hlile ba hloka lijo tsa bona tsa moea ka ho khethehileng mehleng ena. Ba ‘falimehetse seo ba se hlokang moeeng.’ (Matt. 5:3, NW) Ba talimile ka tšepo ho Jehova ka tokisetso ea hae ho ba lokisetsa lijo tse enneng moeeng. (Matt. 24:45-47) Tšepo ea bahlanka ba Molimo ntlheng ena e khotsofatsoa haholo ’me ba kholisehile hore Jehova o tla ’ne a ba fe lijo tsa moea tseo ba li hlokang kamehla hakana, ‘nakong ea teng.’

7. Jehova ke Mofani joang, haholo tabeng ea borapeli?

⁷ Tumellanong le seo, Pesaleme ea 145:16 e tsoela pele e re:

“U fuparolla seatla sa hao, u kholisa tse utloang kaofela.”

Ke Jehova Molimo feela bokahohleng bohle eo ho eena ho seng moeli oa phano. Ke Ntate oa leholimo le Monei-Bophelo. Ho fana ha hae le mosa o lerato li bonoa mesebetsing eohle ea hae ea pōpo le litokisetsong tsohle tse molemo tseo a li etselitseng motho le libopuoa tse ling tsohle tse lefatšeng. A re apesitse ka bohlokoa ba borapeli, Jehova ka mosa o itšenotse boeena le merero ea hae bo batho, ba ineetseng ho Jehova Molimo, le ba kopanelang borapeling ba hae le tšebeletso, ba utloile letsoho le fanang haholo la Jehova haholoanyane. Liphihlelo tsohle tse joalo ke tse tiisang haholo ’me re ka tšepa hore Jehova o tla tsoela pele ho fana ka moea oa hae ho bahlanka ba hae ’me ho se mohla a tla khaotsa ho ba hopotsa, ho ba tataisa le ho ba thusa moeeng mehleng ena e thata.—Pes. 119:129.

8. Jehova o bontša botšepehi joang?

⁸ Kaha rea tšepahala ho Jehova, oa tšepahala ho rōna. Kahoo,

“Jehova o lokile litseleng tsa hae tsohle, o mohau liketsong tsa hae tsohle.” (Pes. 145:17)

Re fetohile bahlanka ba ineetseng ba Jehova le batšehetsi ba tšepahalang ba borena ba hae, re ka tšepa Molimo ka linako tsohle. O sebetsana ka toka le ka mohau le bahlanka ba hae. Litšoaneleho tsa hae tse hlollang ha li fetohe. Ka baka leo rea tseba hore hang ha re nka borapeli ba Jehova le tšebeletso ke tiiso hore ha ho mohla a tla re soetsa. Ruri oa ‘tšepahala liketsong tsohle tsa hae.’ Joale ke moo re nang le lebaka le leng le letle la ho bolella ba bang ka Jehova le litšoaneleho tse hlollang tsa hae le ho ba memela ho kopana le rōna bophelong bo ineetseng ba ho roka Jehova ka botšepehi.—Bapisa Pesaleme ea 107.

9. Tumelo e nka karolo efe ho bitseng Jehova, ’me Jehova a ka bitsoa joang?

⁹ Ka ho loketseng, re ka bolela mantsoe a latelang a mo rokang:

“Jehova o haufi le bohle ba mo rapelang, le bohle ba mo rapelang ka ’nete.”—(Pes. 145:18)

Ho ipiletsa ho Jehova ke ntho ea bohlokoa. Ho lokela ho etsoe ka tumelo ea ’nete. (Ba-Roma 10:10-15) Mopesaleme o hatisa kamoo Jehova a tlang haufi le ba mo bitsang ka tsela e nepahetseng, e leng e akarelletsang ho etsa ka tumelo. (Ba-Heb. 11:6) Ho ipiletsa ho Jehova hona hase lekunutu, e hlile ke polelo ea pontšeng pel’a batho hore re lumela ho Jehova le hore re mo tšepile. Pauluse o hatisa bohlokoa ba ho bolela ‘litaba tse molemo’ tsa lintho tse molemo le ho bolela molemong oa ba bang. Ho houoa ha thoko e eang ho Jehova ke ba ipiletsang ho eena ho ntse ho phahama ha baboleli ba bangata ba tšepahalang ba ‘litaba tse molemo’ ba ntse ba bolella ba bang ka Jehova. Ka ho ba tloaetsa Jehova le khanya ea hae le boholo ba hae, hammoho le borena ba hae, baroki ba haha tumelo ho batho bana e le hore le bona ba ka kopanela ho bitseng lebitso la Jehova le ho atamela ho eena. Tsela ea poloko e bulehetse bohle ba lakatsang joalo, ho sa khethoe moloko, ’mala kapa bochaba, ’me ha ho masoabi a hlahelang ba lumelang ho Jehova le ba mo bitsang ka ’nete. Ke ho hlollang hakaakang hore ebe Jehova o re lumelletse hore re amane le eena re be re be haufi le eena! Ho joalo ka ho khethehileng mehleng ena e thata ha ho hlaka hore ho feta leha e le neng pele hoa hlokahala ho itšetleha ho hang ka Jehova, Molimo oa poloko.

10. Ke hobane’ng ha Jehova a tla etsahatsa takatso ea ba mo tšabang?

¹⁰ “O fa ba mo tšabang ho ratoang ke bona, o utloa mehoo ea bona, ’me oa ba lopolla.” (Pes. 145:19)

Ba tšabang Jehova ka ’nete ba ineela ho eena ’me takatso ea bona ke ho etsa thato ea hae. Re na le lebaka la ho tšepa Jehova e le mohloli oa thuso ea rōna le poloko, ha re leka ho phethahatsa thato ea hae. “’Me tšepo e tiileng eo re nang le eona ho eena, ke hobane, ha re kōpa ntho ka ho rata ha hae, oa re utloa. ’Me ha re tseba hoba o re utloa ha re kōpa eng le eng, rea tseba hoba re na le tseo re li kopileng ho eena.” (1 Joh. 5:14, 15) Re hlokomela hore, mehleng ena, ke thato ea Jehova bakeng sa rōna hore re bolele litaba tse molemo tsa ’Muso le ho ntšetsa pele borapeli ba hae bo hloekileng. Takatso ea rōna e lokela ho ba hore batho ba tsebe ka khang e khōlō e amang borena ba Jehova bokahohleng, le hoja re hanyetsoa haholo ha re etsa joalo. Ka baka lena monyetla o bulehetse batho bohle hore ba amohele molaetsa oa Jehova le ho lumela ho eena, ba ithuta ka tiisetso ea hae lelapeng la motho le takatso ea hae ho bona batho bohle ba baka ’me ba bolokeha.

11. Jehova o arabela mehoo ea thuso e tsoang ho bahlanka ba hae joang?

¹¹ Ke kahoo re lakatsang ka matla ho bona mosebetsi ona oa ’Muso o ntšetsoa pele. Ha re sebetse re le bang. Re bahlanka ba Jehova ’me re sebetsa le eena. ‘Mehleng ena ea bofelo’ e thata re tlameha ho ipiletsa ho eena hore a re thuse, ’me ha re fihla tlhorong ea khang ’me “Gogo oa Magogo” a hlasela, joalokaha ho hlile ha boleloa ho Ezekiele 38 le 39, re tla tlameha ho itšetleha ka eena hore re sireletsoe le ho bolokoa. Morena Davida o ile a pholosoa ka litsela tse hlollang ha lira li ne li mo lelekisa. Kreste Jesu a tlameha ho tela bophelo ba hae mabapi le morero oa Jehova, empa a tsosoa ke Jehova. Kahoo Jehova o tseba ho hlōla likhatello leha e le life kapa khanyetso e ka tlisoang ke lira tsa ’nete, haesita le ho arabela mehoo ea bahlanka ba hae ba ka ’nang ba kena lefung le bao ho tla hlokahala hore ba bolokoe ka tsoho.

12. Ke hobane’ng ha ho sa hlokahale hore re tšohe ha ho felisoa ba khopo?

¹² Ho sala e le ’nete hore

“Jehova o boloka bohle ba mo ratang, empa o felisa ba babe kaofela.” (Pes. 145:20)

Kaha re fihlile tlhorong ea bokhopo ’me ‘mahlomola a maholo’ a haufi, ke lehlohonolo ho ba le mantsoe a tiisang joalo a hore Jehova o boloka bohle ba mo ratang. (Matt. 24:21) Ho fihlile nako ea hore ho felisoe ba khopo, ’me ba tlameha ho hlokomelisoa. Empa bahlanka ba Jehova ba reretsoe ho feta ‘mahlomola a maholo’ ha a liheloa ba khopo, ’me ka tsela ena ba bone ha Jehova a ba boloka. Ruri Jehova o rata ba tšepahalang ho eena ’me a ke ke a ba lebala nakong ea ha a halefela ba khopo. Li ngata lintho tseo e leng mehlala ka Mangolong ea liketso tse matla tsa Jehova ha a boloka le ho lopolla batho ba hae ka nako eo a otlang ba khopo ka eona. Ka ’nete, re lebeletse ka cheseho nako ea ha ho tla felisoa ba khopo ’me ba hanyetsang borena ba Jehova ba tla tlosoa.

13. (a) Jehova o alositse bahlanka ba hae ba kajeno joang? (b) Jehova o boloketse ba mo ratang eng?

¹³ Nakong ena eohle ea ‘mehla ea qetello’ bahlanka ba Jehova ba ’nile ba kōpa thuso ho eena le ho bontša hore baa mo rata. Jehova o bolokile le ho tataisa bahlanka ba hae har’a mathata a mangata, haholo nakong ea Ntoa ea II ea Lefatše ha mosebetsi o ile oa thibeloa likarolong tse fapaneng tsa lefatše ’me ho le teng ba likete likampong tsa mahloriso le lichankaneng. Mahoo-hoo le oona a hlasela likarolong tse ngata tsa lefatše. Empa ho boleloa ha litaba tse molemo tsa ’Muso ha ’na ha ea pele, ’me Jehova a ba mosa ho bahlanka ba hae ha a ntse a eketsa ’me a tšelisa ka ho ba atisa lefatšeng lohle. Ke morero oa Jehova hore puso ea ’Muso oa Kreste Jesu e atolohele lefatšeng lohle. Ho tla ba teng bafo ba ’muso oo ba phelang lefatšeng e le “bongata bo boholo” ba “linku tse ling” bo tla feta mahlomoleng, kamor’a moo ba tla tlatsoa ke ba bangata ba tsoang mabitleng ka tsoho. Kahoo ho felisoa ha ba khopo e ke ke ea e-ba tlokotsi ho bahlanka ba Jehova. Ho e-na le hoo, Jehova o tla arabela lerato leo a le bontšitsoeng ke bahlanka ba hae ’me o tla alosa le ho bontša lerato, mohau le mosa. Hape leratong la hae, o boloketse “linku tse ling” tsa hae paradeise e babatsehang ea lefatšeng moo ba tla thabela bophelo bo sa feleng. (Luka 23:43) Ho khaoloa ha khang e khōlō ea borena ba Jehova ba bokahohle ho bolela tlhohonolofatso feela bakeng sa ba ratang Jehova ’Me ho tla fana ka monyetla oa ho ananela Jehova haholoanyane ha lilemo li ntse li feta. E tla ba ho hlollang hakaakang ho phela nakong ea ha ho phethahatsoa temana e qetellong ea Pesaleme ea 150 ha “tse phefumolohang kaofela” li tla roka Jehova ’me bokhopo bohle bo be sieo!—Pes. 150 Tem. 6.

14. Re ka bua ka mahlohonolo afe a tsoang ho Jehova?

¹⁴ Ak’u hetle morao haeba u ka khona ’me u bone mahlohonolo a mangata ao Jehova a re neileng oona. Bona kamoo a re hlohonolofalitseng ka lijo tse enneng tsa moea. Ananela haholo tokelo e tsotehang eo a re fileng eona hore re be bahlanka ba hae hona joale le litebello tsohle tse hlollang tsa kamoso. Kaha tebello e teng ea hore re be baphonyohi ba Harmagedone, thabelang ho lebella nako ea ha tsoho le mosebetsi o babatsehang oa hore ka nako eo ho tsebisoe le ho ruta ba tsoang mabitleng. Ba bangata ho bona ba tla be ba ithuta ka Morena e Moholo Jehova ka lekhetlo la pele. Ba tla tlameha ho tseba hore na ke ka baka la mang ba boetseng ba phelang hape. Ba tla bolelloa ke mang? na e mong le e mong ho rōna a ke ke a thabela ho etsa joalo? E, re hlile re lebelletse ho roka Jehova ka ho sa feleng.

15. Litokelo tsa rōna mabapi le borena ba Molimo ke life?

¹⁵ Ho thoe’ng ka nako ea hona joale? U etsa’ng ka khang e khōlō ea borena ba Jehova? Na u har’a ba tšepahalang ba tšepang jehova le ba buang ka khanya ea borena ba hae letsatsi le letsatsi? E se eka e mong le e mong har’a rōna e ka ba motšehetsi ea tšepahalang oa borena ba Jehova ba Jesu Kreste, Davida e Moholoanyane, Mora oa hae eo a ’meileng teroneng, ’me e se eka re ka ikemisetsa ka pelo eohle boikemisetsong ba rōna ho roka Jehova pontšeng joaloka Morena Davida, ea itseng:

“Molomo oa ka a o ke o bolele lithoko tsa Jehova, libopuoa tsohle li ke li boke lebitso la hae le khethehileng ka mehla le mehla.”—Pes. 145:21.

[Mongolo o botlaaseng ba leqephe]

[Setšoantšo tse leqepheng la 21]

Ba tšepahalang ba bua ka khanya ea borena ba Jehova