Ke Mang ea Tla Roka Morena?
“Ke tla u holisa, Molimo oa ka, Morena oa ka! ke tla boka lebitso la hao ka mehla le ka ho sa eeng kae. Ke tla u boka ka matsatsi ’ohle, ke rorise lebitso la hao ka mehla le mehla, le ka ho sa feleng.”—Pes. 145:1, 2.
1. Morena Davida o itseng ka Jehova e le Morena oa hae, hobane’ng?
MORENA Davida o ile a ngola lipolelo tsa thoriso tse eang ho Morena oa hae oa leholimo, Jehova Molimo. Ho ba bang ho ka ’na ha bonahala e le ho sa tloaelehang hore morena oa lefatše a bue ka matla hakana a buella e mong hore ke Morena ea mo phahametseng. Empa mabaka a Davida a ho etsa joalo e ne e le a matle. Lipolelo tsa hae li ne li tsoaloa ke ho ananela Morena eo, Jehova. Davida o ne a le bonolo bo tsoaloang ke bohlale ka pel’a Morena enoa. (Jak. 3:13) Davida e ne e le morapeli ea tšepahalang oa Jehova ’me a amana haufi haholo ka ho hlollang le ‘Morena enoa oa marena.’—Dan. 2:47.
2, 3. (a) Tse ling tsa lipolelo tsa kananelo tsa Davida ka Jehova tseo e leng mehlala Lipesalemeng ke life? (b) Tse ling tsa lintlha tse boleloang ke Davida ho 1 Likronike mabapi le Jehova le borena ba hae ke life?
2 Lipolelong tse ngata tsa Davida tse Mangolong re bona se neng se mo etsa hore a ananele Jehova Molimo, Morena oa hae hakana. Pesaleme ea 19 e bontša ho ananela ha Davida Jehova e le ’Mōpi, Monei-molao le Molopolli. Pesaleme ea 24 e bolela hore Jehova ke Mong a lefatše le Morena ea khanyang, Ea matla. Ho Pesaleme ea 103:19 Davida o bolela hore o ananela borena ba Jehova, a re: “Jehova o beile terone ea hae maholimong, ’me borena ba hae bo busa lintho tsohle.” Joale Davida o mema mangeloi le batho ho boka kapa ho roka Jehova. Sefela sa Davida se ngoliloeng ho 1 Likronike 16:8-36 sa teboho se phahamisa kamoo Davida a neng a ananela Jehova.
3 Pelenyana puso ea Davida e felella o ile a hlalosa boikutlo boo a bileng le bona bophelong bohle ba hae ka pel’a batho bohle ba hae, a re: “Oho, Jehova, Molimo oa Iseraele ntat’a rōna, u bokoe ka ho sa feleng le ka ho sa feleng! Oho, Jehova, boholo, le matla, le letlotlo, le hlōlo, le khanya, ke tsa hao! Hobane tsohle tse maholimong le lefatšeng ke tsa hao. Borena le bona ke ba hao, Jehova, ’me u phahametse tsohle u le morena. Leruo le khanya li tsoa ho uena, ’me u rena holim’a tsohle. Matla le bonatla li matsohong a hao, hape u na le matla letsohong la hao a ho hōlisa le a ho tiisa ntho tsohle. ’Me joale, Molimo oa rōna, rea u boka, re rorisa lebitso la hao le khanyang.”—1 Likron. 29:10-13.
KHANG EA BORENA
4. Ho etsahetse eng mehleng ea Samuele hore Iseraele e be le morena oa motho, ’me lichaba tse potolohileng Iseraele e bile leraba ho eona joang?
4 Borena ba Jehova ba fetoha khang Iseraeleng nakoana pele ho tsoaloa Davida. Ke ho ea qetellong ea boahloli ba Samuele, joalokaha ho bonoa ho 1 Samuele 8:4-20. Feela ke eng e ileng ea susumelletsa batho ba selekane ba Jehova hore ba kōpe morena ea tla ba busa ’me kahoo ba lahla Jehova? Ba bolella Samuele hore ba batla ho tšoana le lichaba tse ling tsohle. Jehova a ba lemosa ka Samuele hore na theko ea hoo e tla ba efe ea hore ba lakatse ho tšoana le lichaba ka ho ba le morena oa motho holim’a bona. Ka sebele, ba ne ba le molemong haholo ha Jehova e le Morena oa bona.—Bona hape Deuteronoma 4:7.
5. Borena e bile khang joang mehleng ea Gideone?
5 Khang e ne e ile ea hlaha pele sechabeng sa Iseraele ha Jehova a etsa hore batho ba hlōle Bamediane tlas’a taolo ea Gideone: “Batho ba Iseraele ba re ho Gideone: U re buse, e le uena, le mor’a hao, le setloholo sa hae, etsoe u re namoletse matsohong a ba-Midiane. Gideone a re ho bona: Ha e le ’na, nke ke ka le busa, le eena mor’a ka a ke ke a le busa. Jehova ke eena ea tla le busa.” (Baahl. 8:22, 23) Gideone ka botšepehi a leleka kōpo ea sechaba sa Iseraele ’me a tiisa borena ba Jehova holim’a bona. Leha ho le joalo, nakoana hoba Gideone a shoe, e mong mora oa hae ea bitsoang Abimeleke a bolaea banab’abo ka sehlōhō ’me a ipea morena, empa puso ea hae ea e-ba ea nakoana ’me qetello ea hae ea e-ba sehlōhō. (Baahl. khaolo 9) Pale ena e ne e tsebisahala haholo Iseraeleng. E bontša kamoo borena ba Jehova bo ’nileng ba tsekoa ho theosa le lilemo tse makholo. Hape, ka nako ena eohle motho e mong le e mong o bile le monyetla oa ho bontša ho tšepahala ha hae ho Jehova e le Morena.
6. Pale ea pele ea lefatše e bontša eng ka borena, ’me Jehova o ne a hlile a bolela eng ka hore na litaba li tla tsoellela joang?
6 Lentsoe la Molimo le bontša hore batho ba lichaba tsa lefatše ba bile le marena a ba busang ho tloha khale haholo. Nakoana kamor’a moroallo ho ile ha hlophisoa mebuso e busoang ke motho khanyetsanong le Jehova, joalokaha ho bontšoa ho Genese 10:8-12. Hona ho bile tlas’a tšusumetso ea Satane Diabolose eena oa pele ho qholotsa ho lokela ha borena ba Jehova ka ho fetohela Jehova le ho batla hore libopuoa tse ling li tlohe borapeling ba Jehova. Jehova o neile ea mobe nako ea hore a leke ho pakahatsa phephetso ea hae. Hape o senotse hore na litaba li tla ba joang.—Gen. 3:15.
BOHOLO BA JEHOVA BO MEMA THOKO
7. (a) Moea oa Jehova o phethile karolo efe bophelong ba Davida? (b) Pesaleme ea 145 e fetisisa ka litsela life?
7 Ke Samuele ea ileng a tlotsa Davida tlas’a tataiso ea Jehova. “’Me moea oa Jehova oa tšoara Davida, ho qala tsatsing lona leo.” (1 Sam. 16:12, 13) Davida ke mohlala o motle oa kamoo moea oa Jehova o sebetsang ho ba tšepahalang ba hae. Ke moea oa Molimo o susumelitseng Davida hore a ngole lipesaleme tse ngata hakana tseo a rokang Jehova ho tsona. (2 Sam. 23:2) Pontšo e ’ngoe ea tse molemo ka ho fetisisa ke Pesaleme ea 145. Pesaleme ena e boka, e roka, e phahamisa le ho hōlisa molemo oa Jehova, boholo, matla, ho loka, bo sa feleng, ho se hlalohanngoe le mohau tsa hae. Se supang kamoo liithuti tsa Bajode li hlomphang pesaleme ena ke ’nete ea hore e hlaha ka makhetlo a mararo litšebeletsong tsa bona tsa letsatsi le letsatsi. Ka Seheberu, buka ea Lipesaleme e bitsoa Tehil·limʹ, e bolelang “Lithoko.” Pesaleme ea 145 ke eona feela eo sehloho sa eona e leng “Thoko,” lentsoe le ngotsoe ka bonngoeng ba lona.
8. Ho kenyelletsoa eng qetong ea ho roka lebitso la Jehova ka ho sa feleng?
8 Litemana tse qalang feela tsa pesaleme ena li tletse ka thabo le kananelo:
“Ke tla u holisa, Molimo oa ka, Morena oa ka! ke tla boka lebitso la hao ka mehla le ka ho sa eeng kae. Ke tla u boka ka matsatsi ’ohle, ke rorise lebitso la hao ka mehla le mehla, le ka ho sa feleng.” (Pes. 145:1, 2)
Bahlalosi ba Bibele ka kakaretso ba hlalosa qeto ea Davida ea ho roka lebitso la Molimo “ka mehla le mehla, le ka ho sa feleng” e bolela hore ke ha feela Davida a sa phela. Empa na ha ho lebaka le leng le kenyelletsoang qetong ea Davida? Hore motho a rorise lebitso la Molimo ka ho sa feleng motho o tlameha ho phela ka ho sa feleng. Na Davida o ne a se na tšepo ea ho phela ka ho sa feleng? Ruri kajeno, “bongata bo boholo” ba “linku tse ling” e le sehlopha bo na le tšepo eona eo, ea ho ba le hona ho roka le ho roka lebitso la Jehova ka ho sa feleng kaha ba ke ke ba shoa lefatšeng le ka mohla.—Sof. 2:3; Joh. 11:26; Tšen. 7:14-17; 21:4.
9. Ho ka boleloa eng ka ho utloisisa ka botlalo mesebetsi ea Jehova?
9 Pina ea thoriso ea Davida e tsoela pele:
“Jehova o moholo, o lokeloa ke lithoko tsohle, boholo ba hae ha bo na ho lekanngoa.” (Pes. 145:3)
Bopaki ba boholo ba Jehova bo bile teng hore batho bohle ba bo bone ho tloha pōpong ho ea pele. (Ba-Roma 1:20) Leha ho le joalo ke ba seng ba kae feela bao e bileng baroki ba Jehova ka ’nete ho sa tsotellehe boholo ba hae le mesebetsi ea hae ea pōpo eo ba fumanang molemo ho eona kaofela. Ha e le hantle, Jehova le mesebetsi ea hae o moholo hoo ho tla fihlela kajeno batho ba bileng le hona ho batlisisa marang-rang a lintho tse ’maloa tseo a li bōpileng. Mopatriareka Jobo o ne a ananela joaloka Davida, hobane o buile ka Molimo e le “e leng oona o etsang lintho tse kholo, tse sa fihleloeng, lintho tse makatsang, tse sa baloeng.” (Jobo 5:9; 9:10; 26:14) ’Me moapostola Pauluse, kamor’a ho bua ka merero e meholo ea Molimo, a ikutloa a tlamehile ho bua a re: “A boliba ba monono, le ba bohlale, le ba tsebo ea Molimo! Likahlolo tsa oona ha li hlalohanngoe hakakang. Litsela tsa oona ha li na ho fihleloa hakakang!”—Ba-Roma 11:33, 34.
10. “Moloko” o mong o boleletse “moloko” o mong joang ka mesebetsi e matla ea Molimo?
10 “Leloko le leng a le ke le bolelle leloko le hlahlamang mesebetsi ea hao, le tumise liketso tsa hao tse phahameng.” (Pes. 145:4)
E, meloko e ’nile ea feta e suthelana, ’me har’a eona ba bang ba boletse ka boholo ba Jehova. Empa na ho ke ke ha boela ha boleloa hore masala a tlotsitsoeng a bōpa “moloko” o le mong o babalitseng mesebetsi ea Jehova ho “moloko” o mong oa “bongata bo boholo,” ba “linku tse ling” e le hore bana le bona ba ka bolella ba bang hape ka liketso tse matla tsa Jehova? Ho joalo ruri! Rōna ka ho nahanisisa ka hloko ka Lentsoe la Molimo, le haeba re ba “moloko” oa moea kapa oa lefatšeng, re tsebile mesebetsi ena e meholo le liketso tse matla tsa Jehova. Ke tokelo e kaakang ho bolella ba bang ka lintho tsee! (Bona mohlala oa Davida ha a bua ka liketso tse matla tsa Jehova ho Pesaleme ea 68.)
11. Re bontša ho ameha ka bokhabane ba Jehova le mesebetsi ea hae joang?
11 “Ke tla nahana bokhabane le khanya ea boholo ba hao, le liketso tse hlollang tsa hao.” (Pes. 145:5)
Ha re tla roka ‘Mōpi oa rōna ka nepo, lipelong tsa rōna re tlameha re be re nahana re bile re amehile ka boleng bo khanyang ba hae le mesebetsi e hlollang ea hae. (Matt. 12:34) U bontša ho ameha ka tsee joang? Na u ipha sebaka e le uena ho ithuta ka lintho tseo Molimo o li boletseng ka Lentsoeng la oona? Ha u etsa joalo, na ua nahanisisa le ho lumella tlhaloso e tebe ka hare hore e ngolehe ka ho sa feleng? Re ka bua hantle joang kapa ra boka Jehova Molimo ntle leha re kholisehile ka ho tebileng ka bōrōna ’me re hlile re rata Jehova? Ho ananela bokhabane le botle ba Jehova ho re thusa ho bua ka cheseho, boikemisetso le ka tšepo ka Morena e moholo.
12. Ke hobane’ng ha ho le hotle ho nahana le ho bua ka lintho tsa Jehova tse kenyeletsang tšabo?
12 “Ho ke ho boleloe matla a liketso tse tšabehang tsa hao, ’me ke bolele le boholo ba hao.” (Pes. 145:6)
Ho joalo, ho hongata hoo re ka ho bolelang. Ka maqephe a Mangolo ho senoloa lintho tse ngata tse tšabisang tse bontšang matla a Jehova a bontšitsoeng lebitsong la bahlanka ba tšepahalang ba hae le khahlanong le ba iketsang lira tsa Molimo. Liketso tse ngata ho tseo tse matla tsa mehleng e fetileng li sebeletsa e le litšoantšetso tsa boprofeta ’me ke taeo molokong ona eo moloko ona oa batho o tlamehang ho ba le eona. E, “taba tsohle tse ngoliloeng pele, li ngoliloe ho re ruta, hore, ka ho mamella le ka ho tšelisoa ke Mangolo, re tle re be le tšepo.” (Ba-Roma 15:4) Ho bua ka lintho tsena pontšeng ke tšebeletso le ketso ea lerato ho ba bang. Ho sebeletsa e le temoso ho bona ka merero ea Jehova bakeng sa kamoso. Ba li bolelang ba boetse ba iphumantša molemo tabeng ea seboholi se hlalositsoeng ho Ezekiele 3:17-19. ‘Mahlomolo a maholo’ a atamelang a bontša ka ho eketsehileng boholo ba Jehova ho phethahatseng morero oa hae o a o boletseng. Ka baka leo re o bolele ha feela Jehova a sa re buletse tsela tsamaisong ena ea lintho. Re ka ’na ra etsisa mokhoa oa Jesu Kreste ho faneng ka temoso ea Molimo ea kahlolo.—Matt. 10:28-30; Luka 19:41-44.
13, 14. (a) Ke hobane’ng ha ho lokela hore ho boleloe ka molemo oa Jehova? (b) Ke lebaka lefe leo re nang le lona la ho hoa ka thabo?
13 “Ho ke ho tumisoe khopolo ea lereko la hao le leholo, ho rokoe ho loka ha hao.” (Pes. 145:7)
Ha rea lokela ho bolella lefatše feela ka matla a maholo a Jehova, empa hape le ka molemo oa hae le ho loka. Ho theosa le pale Jehova Molimo o bontšitse bahlanka ba hae molemo. Neng le neng ha ba mo sebeletsa ka botšepehi ba ne ba amohela mahlohonolo ka tekanyo e khōlō. Ho theosa ho tla fihlela joale molemo oa Jehova ho ba mo ratang e bile o tsotehang, o ba susumelletsa hore ba tšoane le seliba se seholo se ntseng se phophoma ke lipolelo tsa kananelo. Lipolelo tse joalo tsa thoriso li tlameha ho hohela ba bang ba bangata ho utloa molemo o matla oa molemo o mongata oa Jehova. Ho pheta-pheta lintlha ho sebeletsa hore li hopolehe. Hona ruri ke lehlohonolo, ho re thusa hore ho se be mohla re lahleheloang ke kananelo ea tsela eo Jehova a sebelisaneng le batho ba hae ka eona. Ruri ho molemo ho bolela pontšeng molemo oa Jehova ho rōna.
14 Na hona joale ha re na lebaka le utloahalang la ho hoa ka thabo? Bohle re bile baetsalibe ka Adama ’me ra ahloleloa ho shoa. (Ba-Roma 5:12) Empa tumellanong le ho loka le toka ea Hae, Jehova a bontša lerato le leholo ka ho lokisetsa tsela ea ho tsoa mathateng a batho. Hona o ho entse ka sehlabelo sa topollo sa Jesu Kreste. Ka Lentsoe le ngoliloeng la Jehova re tsebile litsela tsa Hae tse lokileng le litšebelisano le bana ba hae ba lefatšeng. Ke thabo ho bona lintho tsena le hore ruri ke lebaka la ho hoa ka thabo ka Jehova. Re na le lebaka le letle la ho latela mohlala oa Morena Davida, ea ileng a hoa: “Athe ke tšepile mohau oa hao. Toelo ea hao a e ke e thabise pelo ea ka. Ke tla rorisa Jehova ka baka la botle boo a nketsetsang bona.”—Pes. 13:5, 6.
15. Ke mehlala efe eo re nang le eona ea mohau oa Jehova, le tiisetso le lerato?
15 “Jehova o mohau, o lereko, o lieha ho halefa, o hauhela haholo ho fetisisa. Jehova o molemo ho bohle, mehauhelo ea hae e aparetse mesebetsi eohle ea hae.” (Pes. 145:8, 9)
Ho tloha qalehong ea pale ea motho litšoaneleho tse babatsehang tsa Jehova li ile tsa bontšoa lelapa la motho ha a phethahatsa morero oa hae ho pholosa batho ba bang. Tsela ea Jehova ea bontšoa mehleng ea Moroallo. (1 Pet. 3:20) Ruri Davida e ne e le moamoheli oa mehau ea Jehova ’me a e-na le mabaka ’ohle ho roka Jehova, Jesu o re hopotsa hantle hakaakang ka lerato la Jehova joalokaha ho bonoa mantsoe a hae a ngoliloeng ho Johanne 3:16, 17! Ho a ananela ho lokela ho re etsa hore re bue feela ho roka Jehova, le ho re susumelletsa ho rata ba bang. Moapostola Johanne o ho nahanne ka tsela ena: “Lerato la Molimo ho rōna le bonahetse ka hona: Molimo o romile lefatšeng Mora oa oona ea tsoetsoeng a le mong, re tle re phele ka eena. Lerato le bonahala hona moo hoba hase rōna ba ratileng Molimo, empa e le oona o re ratileng, ’me o romile Mora oa oona hore e be pheko ea libe tsa rōna. Baratuoa, ha e le moo Molimo o re ratile joalo, le rona e ka khona re ratane.”—1 Joh. 4:9-11.
16-18. (a) Bohle ba phehelloa ho nka tsela efe ha nako e sa lumela? (b) Mohau oa Jehova o bolela eng ho rōna? (c) Ke maikutlo afe a kananelo a Pauluse ao re lokelang ho a pheta ha e le hantle?
16 Ha re bona kamoo moloko ona oa hona joale oa batho o itšoereng mabapi le Jehova ’me re bala ka bobe le litoantšano tsa batho ho theosa le makholo a lilemo, re ka hla ra re Jehova o lieha ho halefa. Re ka ananela hakaakang hore re bile le hona ho fihla nakong ena ea ha mamello ea Jehova e sa sebelisoa! Ho ananela mantsoe a petrose ho 2 Petrose 3:9 le 15 ho lokela ho re susumelletsa hore re nahane hantle ka boholo bo boholo ba mohau oa Jehova le mosa o lerato: “[Jehova] . . . o sa mameletse ka baka la rōna; hobane ha a rate ha ba bang ba ka timela, empa o rata hore bohle ba finyelle pakong.”
17 Rea tseba tsamaiso ea lintho e tlas’a Satane e ahloletsoe timetso, ’me kahoo re rata ho phehella batho bohle hore ba talime mamello ea Molimo ka ho teba ’me ba nke mehato e hlokahalang e isang polokong pele nako e fela. (Sof. 2:3; Tšen. 18:4) Ke thabo e kaakang ho rōna hore ebe re nkile mehato eo e pholosang bophelo! ’Me joaloka bana ba tsoileng ho Adama ka nama re tlas’a mefokolo ea nama, ’me re etsa liphoso, joalokaha Davida le ba bang ba ’nile ba etsa. Kaha ho tjena, Jesu o re rutile hore re rapele: “U re tšoarele melato ea rōna, Joale ka ha re tšoarela ba nang le melato ho rōna; u se ke ua re isa molekong; u mpe u re loele ho e mobe.”—Matt. 6:12, 13.
18 Tokisetso eo Jehova a e entseng ka Jesu Kreste e bolela ho hoholo ho rōna. E se eka ka mehla re ka ananela mosa o lerato oa Jehova le mehau le sohle seo a re etselitseng sona. Moapostola Pauluse o ne a ananela ka eona tsela eo, hobane o itse: “Ke boka Morena oa rōna Jesu Kreste, ea ntiisitseng, kahobane o lekantse hoba ke tšepehile, ha a mpea mohlanka oa hae; . . . Ke taba e tiileng, e tšoanetseng ho amoheloa ka kholo eohle, hore Jesu Kreste o tlile lefatšeng ho boloka baetsalibe, bao ke leng oa sehloho ho bona. Empa ke rekolohetsoe, hore Jesu Kreste a bonahatse ka ’na, ke leng oa pele, mohau oohle oa hae, ho tle ho etsoe mehlala ka ’na ho bohle ba tlang ho lumela ho eena, hore ba be le bophelo bo sa feleng. Ho Morena ea se nang ho fela, ea sa shoeng, ea sa bonoeng, ho Molimo o bohlale o ‘notsi, e be letlotlo le khanya ka ho sa feleng! Amen!” (1 Tim. 1:12, 15-17) Teboho ea rōna e lokela ho re khannela ho roka Jehova haholo, ha re ntse re tsoela pele ho bua ka borena ba hae.