Tšimo e Melang Koro le Mofoka

“Re qaqisetse setšoantšo sa mofoka oa tšimo.”—Matt. 13:36.

1, 2. (a) Ka ho jala, ho ka itšetlehuoa ka metheo efe? (b) Ke setšoantšo sefe se theiloeng metheong ee e ’meli?

“HO JALA le ho kotula” ke tse ling tsa lintho tseo Jehova Molimo a itseng pelong ea hae li ke ke tsa khaotsa “lefatše ha le sa ntse le le teng.” (Gen. 8:21, 22) Molao oa motheo o ka sehloohong o amanang le seo o ile oa boleloa ke moapostola Pauluse, ha a ngola hore: “Seo motho a se jalang, o tla se kotula le hona.”—Ba-Gal. 6:7.

² Motheong oa linnete tsena tse ka sehloohong, molemi ea ileng a sebetsa ka thata ho jala koro e ntle nakong ea ho jala o ne a kholisehile hore ka nako ea teng ho tla kotuloa. Ho hong ho ne ho tla latela ho hong. Ka ho tšoanang, ha hamorao basebetsi ba masimo a hae ba mo tsebisa hore tšimo ha e-ea bea koro feela empa le mofoka o itseng, o ile a tseba hore bolotsana bo bile teng. O ne a tseba seo a se jalileng: koro, e seng mofoka. Phetoho ena e hlahang bocha e ne e hloka hore ho etsoe qeto. Bahlanka ba hae ba etsa tlhahiso ea hore ho nkoe bohato bo potlakileng. Ba ne ba batla ho fothola mofoka hona hoo, empa molemi ea bohlale a kokobetsa cheseho ea bona. A ba bolella hore ba emise, ka tšabo ea hore ba ka tšoha ba utloisa koro bohloko ha ba fothola mofoka. Li tloheloe li hole tse peli. Nako ea kotulo ke eona nako e loketseng ho arola koro ea sebele ho ea bohata.

3. Ke liphetoho life tsa bohlokoa tse amanang le ’Muso tse ileng tsa bontšoa ke Jesu, ’me mosebetsi oa ho arola e ne e tla ba tšobotsi ea eng?

³ Papiso ena e ile ea sebelisoa ke Jesu Kreste ho tšoantša liphetoho tse neng li tla etsahala mosebetsing oo a o qalileng lefatšeng. Mosebetsi oo oa ho jala o ne o reretsoe ho bea sejalo se hlokahalang sa Bakreste ba ’nete ba neng ba tla kopanela le eena ’musong oa leholimo o neng o tsejoa e le “’Muso oa maholimo.” Kahoo a hla a bolela hore ho jala ha hae ho hotle ho tla silafatsoa ke sera Satane Diabolose. Tšimo e ne e tla hlahisa le sejalo sa Bakreste ’mōtoana ba kang mofoka ntle ho ho hlahisa Bakreste ba ’nete ba kang koro bao ho neng ho hlokahala hore ba kotuloe. Ba ne ba tla lumelloa ho hōla hammoho ho fihlela nakong ea kotulo, ha ho ne ho tla qaleha mosebetsi oa ho arola. Ho feta moo, mosebetsi ona oa ho arola e ne e tla ba e ’ngoe ea litšobotsi tsa ‘mehla ea qetello,’ ‘bofelo ba tsamaiso ea lintho.’—Matt. 13:24-30, 36-43; bapisa Mattheu 24:3; 2 Timothea 3:1.

4. Ke hobane’ng ha setšoantšo see e lokela ho ba se re khahlang?

⁴ Na u thahasella ho bona bofelo ba tsamaiso ea hona joale e khopo? Na u tla ameha ka bouena ke pheletso ea mosebetsi ona oa ho kotula? ’Me, kamoo ho ka etsahalang, na papiso ea Jesu e fana ka leseli la ho utloisisa pale ea Bokreste ho theosa le makholo a lilemo? A re ke re boneng.

SETŠOANTŠO SA KORO LE MOFOKA

5, 6. (a) Ke hobane’ng ha polelo “’muso oa maholimo” setšoantšong see e ke ke ea supa ’musong oa Kreste oa leholimo? (b) Ke eng, he, e supuoang le ho bontšoa ke litšoantšo tsa ’muso?

⁵ Mabōpong a Leoatle la Galilea, haufi le ntlo eo a neng a lula ho eona, Jesu a tsebisa barutuoa ba hae ka setšoantšo sena le ho bongata bo boholo bo ratang litaba, a re: “’Muso oa maholimo o tšoantšoa ka motho ea jalileng peō e ntle tšimong ea hae. Eare ha ho robetsoe ke batho, ea mo hloileng a tla, ’me a jala mofoka har’a koro, a ntoo ikela. ’Me koro ha e se e hlahisitse lekhaba, e se e tsoetse, mofoka le oona oa bonahala.”—Matt. 13:24-26.

⁶ Ho habanya ka potlako litšoantšo tse ling tsa ’muso tse ho Mattheu khaolo ea 13 ho re thusa ho hlokomela hore polelo “’muso oa maholimo” kamoo e sebelisitsoeng litšoantšong tsena e ke ke ea bua ka puso kapa ’muso o feletseng oa Messia maholimong. Na motho a ka inahanela “mofoka,” “bobe” bo kang tomoso (tem. 33; 1 Ba-Kor. 5:8) kapa batho ba tšoantšoang le “hlapi” e khopo e sa tšoaneleheng (tem. 47-50) ba kopanela le Kreste ’musong oa hae oa leholimo? Le hanyenyane! Litšoantšo tsena li tlameha li be li amana le liphetoho tse ntle le tse mpe mabapi le ho khethoa ha ba tla kopanela le Kreste kamoso “’musong oa maholimo.” Haholoholo setšoantšo sa koro le mofoka se bontša boemo har’a ba lefatšeng ba ipolelang hore ba bilelitsoe ho ea busa le Kreste ’musong oa hae. Boemo bona bo ne bo tla lumelloa ka nakoana, pele bo felisoa ‘kotulong’ ea tšoantšetso.

7, 8. (a) “Mor’a motho” ke mang? (b) Ke boprofeta bofe bo bong bo bolelang “mor’a motho” le ba tšoantšetsoang ke “peō e ntle”?

⁷ Hamorao Jesu ka boeena a hlalosa se boleloang ka tšoantšetso ke ‘mong a ntlo,’ kapa ‘motho ea jalileng,’ “tšimo ea hae,” “peō e ntle,” ‘sera sa hae’ le “mofoka.” Tlaleho e baleha tjena: “Hobane .Jesu a khutlise bongata, a kena tlung, ’me barutuoa ba hae ba tla ho eena, ba re: Re qaqisetse setšoantšo sa mofoka oa tšimo. A ba araba, a re: Ea jalang peō e ntle ke Mor’a motho; tšimo ke lefatše; peō e ntle ke bana ba ’muso; mofoka ke bana ba e mobe; sera se o jalileng ke Diabolose.”—Matt. 13:36-39.

⁸ Jesu o itsebahalitse e le “Mor’a motho.” (Matt. 8:20; 25:31; 26:64) Ho khahlisang, ke mabapi le ’Muso moo Jesu a ileng a boleloa ka boprofeta e le “mor’a motho” ponong e ileng ea tlela Daniele. Boprofeta boo bo re: [“Mor’a motho”] a neoa ’muso, le hlompho, le borena, hore ba mefuta eohle, le ba lichaba tsohle, le ba lipuo tsohle, ba tle ba mo sebeletse; ’muso oa hae ke ’muso o sa feleng, o ke keng oa feta, borena ba hae bo ke ke ba felisoa.” E bontša hore Mor’a motho o ne a tla ba le metsoalle e busang le eena, pono ea boprofeta ea boela ea re: “Borena, le puso, le matla a mebuso eohle e ka tlas’a maholimo kaofela, li tla neoa sechaba sa bahalaleli ba Mookameli ea phahameng; ’muso oa hae ke ’muso o sa feleng, marena kaofela a tla mo sebeletsa, a mo utloe.”—Dan. 7:13, 14, 27.

HO JALA “PEŌ E NTLE”

9. “Tšimo” ke eng, hona ke hobane’ng ha Jesu a jetse “peō e ntle” ho eona?

⁹ Ke ka maikutlo a ho bokella lefatšeng palo e hlokahalang ea “bahalaleli” ba joalo, kapa “bara ba ’muso,” Jesu, ‘mong a ntlo’ oa setšoantšo, aileng a jala “peō e ntle tšimong ea hae.” “Tšimo” ena, e hlalosoa e le “lefatše [koʹsmos, ka Segerike],” lefatše la batho. Ho tloha qalehong ea tšebeletso ea Jesu ea lefatšeng ho ea pele, batho ba ile ba fetoha ‘tšimo e lengoang.’ Tšimo ea bolumeli ea monyetla oa ho jala le ho hlaolela “peō e ntle,” kapa “bara ba ’muso.” (1 Ba-Kor. 3:9, NW) Jesu ka cheseho o ile a lokisa karolo ea Bajode ea “tšimo” ka lilemo tse tharo le likhoeli tse tšeletseng tsa tšebeletso ea hae ea lefatšeng. (Matt. 9:35-38) Joale, ho tloha ka Pentekonta ea 33 C.E. ho ea pele, a lema “peō e ntle,” a qala har’a Bajode, ’me a qetella ka lefatše lohle, kapa “tšimo.”—Lik. 1:8.

10. Ke tsoelopele efe e entsoeng ke mosebetsi oa ho jala har’a Bajode le basokolohi ba Sejode?

¹⁰ Ha a hlalosa “peō e ntle” Jesu o itse: “Ke bana ba ’muso.” Ba pele ho ‘bana bana ba ’muso’ ba tsoetsoeng ka moea le ba tlotsitsoeng e bile baapostola ba tšepahalang ba Jesu le ba bang ba ka bang lekholo ho barutuoa ba bang ba hae, banna hammoho le basali, ba ileng ba amohela neo ea moea o halalelang ka Pentekonta ea 33 C.E. Jerusalema. (Lik. 1:13-15; 2:1-4) Hona letsatsing leo ba bang ba ka bang 3 000, Bajode hammoho le basokolohi ba phaelloa phuthehong e theiloeng bocha ea Bokreste. (Lik. 2:5-11, 41) Jehova o hlononolofatsa mosebetsi ona oa ho jala ’me a “’na a eketsa kereke ka tsatsi le leng le le leng ka batho ba bolokehang,” hoo ka potlako “ha ba baloa, ea batla e e-ba banna ba kete tse hlano.” Hamoraonyana, tlaleho e phaella ka hore: “Bongata joa ba lumetseng ho Morena bo ne bo ntse bo ekeletsoa ka banna le ka basali.” (Lik. 2:47; 4:4; 5:14) Mosebetsi oa ho jala o ne o tsoela pele ka potlako har’a Bajode le basokolohi.

11. Ho jala ho ile ha tsoela pele joang har’a Basamaria le bao e seng Bajode?

¹¹ Hoba a lokisetse hore peō e jaloe har’a Basamaria (Lik. khaoh. 8) Mojali Jesu, ka moea o halalelang, a atolosetsa mosebetsi oa ho jala ho bao e seng Bajode kapa Balichaba ba sa bollang. (Lik. khaoh. 10; 13:1-5, 46, 47) Kamor’a lilemo tse mashome a seng makae liphutheho tsa Bokreste li ne li theiloe ho tloha Afrika Leboea ho isa Leoatleng le Letšo le ho tloha Babylona ho isa Italy, haeba e bile e se ho ea pejana ho feta moo ho elella ka bophirimela. (Lik. 2:5-11; 1 Pet. 5:13; Ba-Roma 15:24; Ba-Kol. 1:5, 6, 23) Ka baka leo la ho jala ka cheseho, ‘lekhaba le ne le hola ’me le bea litholoana.’—Matt. 13:26.

HO JALELLOA HA MOFOKA

12, 13. “Sera” ke mang, hona se jalile mofoka “ha ho robetsoe ke batho” joang?

¹² Empa bomalimabe bo ne bo tla tla. Setšoantšo sa Jesu se ne se hlile sa lemosa: “Eare ha ho robetsoe ke batho, ea mo hloileng a tla, ’me a jala mofoka har’a koro, a ntoo ikela. ’Me koro ha e se e hlahisitse lekhaba, e se e tsoetse, mofoka le oona oa bonahala.” (Matt. 13:25, 26) Jesu o tsebahalitse “sera sa hae” e le “Diabolose,” ea neng a tla etsa mosebetsi oa hae oa bokhukhuni “ha ho robetsoe ke batho.” Ka Bibeleng ‘boroko’ bo ka tšoantšetsa lefu kapa ho otsela moeeng. (Matt. 9:24; Ba-Roma 13:11; 1 Ba-Thess. 5:6) Kamor’a hore a bue ka ‘ho qeta leeto la hae,’ Pauluse a bolella baholo ba phutheho ea Bokreste ea Efese hore: “Kea tseba hobane, ha ke se ke tlohile, ho tla kena ho lona liphiri tse bohale, tse sa tlong ho qenehela mohlape; le hobane ho tla tsoa har’a lōna batho ba tla bolela litaba tse khopo, ho ikhulela barutuoa. Lebelang ke hona.”—Lik. 20:24-31.

¹³ Linnete tsa pale li bontša hore ke “ha ho robetsoe ke batho” moo Satane a ileng “a tla, ’me a jala mofoka har’a koro.” Baapostola bao ka nako e ’ngoe ba neng ba ‘sebetsa e le thibelo’ ea bokoenehi, ba qala ho robala lefung, baholo ba bangata ba Bakreste ba sitoa ho ‘lebela.’ (2 Ba-Thess. 2:3, 6-8) Ba otsela moeeng, ha baa ka ba sireletsa “bana ba ’muso” ho “liphiri tse bohale” tse ileng tsa qala ho kena har’a bona. Bana e ne e le “mofoka” o jetsoeng har’a “peō e ntle.” Ha a bua ka nako e neng e atamela ea bofelo ea mehla ea baapostola, Johanne, oa ho qetela ea ileng a shoa ho baapostola, a ngola: “Ke nako ea qetello; ’me joale ka ha le utloile hobane antikreste o ea tla, le joale bo-antikreste ba bangata ba se ba hlahile; ke ka hoo re tsebang hobane ke nako ea qetello. Ba tsoile ho rōna, empa e ne e se ba rōna; hobane hoja e be e le ba rona, ba ka be ba setse ho rōna; empa hoo ho hlahile hore ho tle ho bonahale hobane bohle hase ba rōna.”—1 Joh. 2:18, 19.

14. Ke taba efe eo re e neoang ka hore na ke mofoka oa mofuta ofe oo Jesu a neng a bua ka ona setšoantšong?

¹⁴ Jesu o itse: “Mofoka ke bana ba e mobe.” (Matt. 13:38) Bukeng ea hae Natural History of the Bible, H. B. Tristram o hlalosa ka mofoka oo ho boleloang ka oona mona setšoantšong sena. A ngola: ‘Mofoka (zizania) o tšoana le zawân ea Searabia, eo ho eona ho hlahang lebitso la Segerike, Lolium temulentum, ’me ona ke oona feela mofuta oa joang oo peō ea oona e leng chefu. [Lentsoe] zawân le tsoa ho zân, ‘ho hlatsa.’ Phello ea ho ja mofoka ona e le ho hlatsa ho matla, ho tsitsipana le ho tšolla, hoo hangata ho fellang ka lefu. Joang bo le litsebe li sephara ho feta majoang a mangata a naha, ho hang bo tšoana le koro ho fihlela litsebe li hlaha.’

15. (a) Na “mofoka” ke “koro” e fofileng? (b) Ka baka leo, “Mor’a motho” ha a na molato oa eng?

¹⁵ Ho ke ho hlokomeloe hore “mofoka” ona, ha o kamoo Bajode ba bang ba Talmudea le ba bang ba lumelang hore ke koro e fofileng. Ha ho mohla peo ea koro e iphetolang mofoka. Hona ho ka hanana le molao o sa fetoheng oa Jehova: “Lefatše le hlahise joang, le limela tse beang peo, le lifate tse beang litholoana ka mefuta ea tsona.” (Gen. 1:11, 12) ’Nete ena e pakiloeng e lokolla “Mor’a motho,” Kreste Jesu, ‘mojali oa peo e ntle,’ boikarabelong bofe kapa bofe ba se etsahetseng “tšimong ea hae.” “Peō e ntle” eo a ileng a e jala ha ho mohla e neng e tla fetoha mofoka. E ne e ka hlahisa feela “koro,” kapa “bana ba ’muso” ba ’nete. Ho ileng ha hlaha hamorao “tšimong ea hae” e bile phello ea ho jala ho entsoeng ka boomo le ka bolotsana hoa sera sa hae se jala “mofoka” kapa “bana ba e mobe.”

16. Setšoantšo sa “koro” le “mofoka” ke sa thahasello efe paleng?

¹⁶ Kahoo, setšoantšo sa Jesu sa “koro” le “mofoka” se etsa ho hongata ho hlalosa pale ea Bokreste ho theosa le makholo a lilemo. Linnete tsa pale li bontša hore kamorao ho lefu la baapostola Satane o ile a kenya ka har’a liphutheho tsa Bakreste ba ’nete “mofoka” o mongata, “liphiri tse bohale” le “bo-antikreste,” joalokaha Jesu, Pauluse, Petrose le Johanne le Juda ba hlile ba bolela. (Lik. 20:29. 2 Pet. 2:1-3; 1 Joh. 2:18; Juda 4) Ho bile joalokaha Jesu a boletse hore: “’Me koro ha e se e hlahisitse lekhaba, e se e tsoetse, mofoka le oona oa bonahala.”—Matt. 13:26.

17. “Mofoka” o hlile oa totobala neng?

¹⁷ “Mofoka” ona oa hla oa totobala nakong ea makholo a lilemo la bobeli le la boraro, e leng nako eo ka eona lithuto tseo e seng tsa Mangolo tse kang ho se shoe ha moea, mollo oa lihele Boraro-bobong li ileng tsa qala ho rutoa ke bao ho thoeng ke bo-ntate ba kereke. Boholo ba banna bana haholo-holo e ne e le bahlalefi ho fapana le ho ba balebeli ba tšepahalang ba Bakreste ba rutang lithuto tsa Bibele. Bophahamo ba fihla mathoasong a lekholo la bone la lilemo, ha Morena Constantine oa mohetene a tsoaka Bokreste ba bokoenehi le bolumeli ba bohetene ba Roma. Bokreste ’mōtona bo joalo ka metsoako ea bona e sa tšoaneng ea Roma K’hatholike, Kereke ea Russia, Kereke ea Magerike le tsa Boprostanta bo hlahisitse chai ea “mofoka,” e seng feela ka makholo a lilemo empa hape le ho tla fihlela nakong ea hona joale.

“LI LESENG TSE PELI, LI HOLE HAMMOHO”

18. Ho ea ka setšoantšo sa Jesu, ke liphetoho life tse tsoelang pele tse teng?

¹⁸ Boemo bona ha boa ka ba tlohela ho tšoenya “bahlanka” ba “Mor’a motho.” Setšoantšo sa Jesu se tsoela pele: “Bahlanka ba mong a ntlo ba tla, ba re ho eena: Morena, ha re re, u no u jalile peō e ntle tšimong ea hao? Na mofoka oo e o nkile kae? A re ho bona: Ke ketso ea sera. Bahlanka ba re ho eena: Na ha u rate ha re ea kha mofoka oo na? A re: Che, mohlomong ha le e-kha mofoka, le ka tšoha le fothola le eona koro. Li leseng tse peli, li hole hammoho, ho be ho fihle kotulo; ke hona mohla ho kotuloang ke tla re ho bakotuli: Helang mofoka pele, le o tlame mangata, le o chese; le mpe le bokelle koro molikong oa ka.”—Matt. 13:27-30.

19. Ke hobane’ng ha “bahlanka ba mong a ntlo” ba ne ba khathetse matla?

¹⁹ Hore na “bahlanka” bana ba tšoenyehileng (temana 27) ke ntho e le ’ngoe le “bakotuli” (temana 30) Jesu ha a hlalose. Haeba ho joalo, hona ho tla bolela hore mangeloi a ne a tšoenyehile ke bongata ba khōlō ea “mofoka” tšimong ea Mong a bona. (Matt. 13:39) “Bahlanka” bana, ba botsa hore na ba ka potlakela ho fothola mofoka, o neng o tšoantšetsa “bana ba e mobe.” (Matt. 13:38) Ba ne ba tšohile hore Bakreste ’mōtoana bana, kapa “mofoka” bao ka mano ba jetsoeng ke “sera,” Diabolose, ba ka ’na ba bupetsa “koro” ea ’nete, “bana ba ’muso” ka sebele.

20. “Mong a ntlo” a arabela “bahlanka” ba hae joang, ’me hona pale e ho tiisa joang?

²⁰ Empa “mong a ntlo,” “Mor’a motho,” ha a ka a lumella “bahlanka” ba hae ho ea le ho bokella “mofoka,” kapa Bakreste ba bohata, ba ba arola ho “koro,” Bakreste ba ’nete. A re: “Li leseng tse peli, li hole hammoho ho be ho fihle kotulo.” Ke kahoo Bokreste ba ’nete le ba bohata bo hōlang hammoho “tšimong,” kapa ‘lefatšeng,’ la batho. Leha ho le joalo, ‘nako ea kotulo’ e tlameha ho fihla. Neng? ’Me e u ama joang?

[Mongolo o botlaaseng ba leqephe]

[Setšoantšo se leqepheng la 17]

Mofoka

Koro ea sebele