Bohato bo Kopaneng Bakeng sa ho Haha Lefatšeng Lohle
HO TLOHA Sweden ho ea Korea, ho tloha Australia ho ea Ivory Coast, Lipaki tsa Jehova lia haha. Mesebetsi e ntseng e sebetsoa linaheng tse ngata e tloha ka ho nchafatsoa ho isa mehahong e meholo e mecha ea lifektri le liofisi. Molato oa mosebetsi ona ’ohle oa ho haha ke ofe?
Lipaki tsa Jehova li nka ka botebo taelo ea Jesu ea ‘ho etsa barutuoa ka batho ba lichaba tsohle.’ (Matt. 28:19, NW) Na u kile ua nahana ka mosebetsi ’ohle o kenyellelitsoeng thomong eo? Ka 1980 feela, Lipaki tse chesehang lefatšeng lohle li tsamaisite libuka tse khōlō le Libibele tse limillione tse fetang 22 hammoho le limakasine tse fetang limillione tse 218—kaofela li na le molaetsa o pholosang bophelo oa ’muso oa Molimo. Libuka, limakasine le Libibele tseo kaofela li tsoile kae? Li hatisitsoe lifektring tse hahiloeng le tse sebetsoang ke Lipaki tsa Jehova. Basebetsi ba sebetsang lifektring tseo ba lula e le malapa a maholo mahaeng a bitsoang Bethele, e bolelang “ntlo ea Molimo.”
Lipaki tse abang libuka tsena li kopana ka mehla liphuthehong tse 43 181, tse libakeng tse ngata haholo tsa lefatše. Liphutheho tseo li hlokomeloa ke liofisi tsa makala tsa libaka. Ha liphutheho li ntse li hōla (selemong se fetileng ho ile ha hlongoa tse ncha tse 581), lisebelisoa tsa makala lia imeloa ’me li tlameha ho atolosoa kapa ho nkeloa sebaka ka tse ling. Ho haha bo-mang? Neng le neng ha ho ka etsahala ke Lipaki tsa moo. Cheseho eona eo e susumetsang mosebetsi oa boboleli ba ’Muso le ho tsamaisoa ha libuka e tla litšeng tsa kaho.
KOPANO SETŠENG SA MOSEBETSI
“Ke hobane’ng ha le sa omane?” kamoo ho ileng ha botsa ’metli e mong eo e seng Paki oa Abidjan, Ivory Coast. “Litšeng tse ling ho thata ho sebetsa.” Lipolelo tsa hae li ’nile tsa phetoa ke ba bang ba bangata bao e seng Lipaki ba neng ba thusa mohahong oa lehae le lecha la Bethele le ofisi ea lekala tsa Watch Tower Society tse Ivory Coast, moo lenane la liphutheho le imenneng ka makhetlo a mane ka lilemo tse 10.
Kopano e joalo ha e-ea lokela ho makatsa har’a Lipaki tsa Jehova tsa Bakreste ha ho talingoa thapelo ea Jesu ea hore balateli ba hae ba kopane. (Joh. 17:23: bapisa Pesaleme ea 133.) Joalokaha Paki ea Abidjan e ile ea ho bolela: “Sena ke setša sa ho haha sa Jehova.”
Lefatšeng le leng, Amerika e ka Boroa, ho ntse ho qeteloa mehaho e meholo ea lehae la Bethele le fektri. Mohaho ona o moholo o mocha o Brazil o na le sebaka se imenneng ka makhetlo a tšeletseng ho sa mohaho oa pele fatše. Palo ea Lipaki naheng eo ke ea bobeli ka bongata bakeng sa naha leha e le efe lefatšeng ’me e eketseha ka potlako, e eketsehile ka 6 lekholong selemong se fetileng. Koranta ea sebaka seo e ile ea bitsa setša sa kaho se Cesario Lange “motse o moholo ka har’a motse o moholo,” e phaella: “Moo, ha ho pherekano kapa ho haelloa ke tšebelisano joalokaha ho tloaelehile pakeng tsa basebetsi mehahong e meholo. . . . Tikoloho ena ea Bokreste e ho etsa ho fapaneng ho se atisang ho bonoa mehahong e meholo Brazil.” ’Me ke mosebetsi o moholo hakaakang oa ho haha—o hlokang literaka tse thothang ka makhetlo a 10 000 konkreiti, majoe le lehlabathe, le litšehetso tsa lipilara tsa konkreiti tse ka nkang habeli bolelele ba Thaba ea Everest.
Sephethe-phethe se seng sa ho haha sa Lipaki se fumanoa Australia, moo Campbelltown Ingleburn News e ileng ea hlalosa hore, “Ba bang ba tla bitsa mosebetsi o mehahong e mecha ea Lipaki tsa Jehova e Ingleburn toro ea mohahi.” Hobane’ng? “Ha ho likhang tsa mehaho tsa mofuta ofe kapa ofe.” Lipaki tsa Jehova ke tsona tse etsang lebotho le sebetsang la basebetsi ba 220 setšeng. Ha o phethoa ka 1982, mohaho ona o tla thusa haholo mesebetsi ea ho bolela ka ’Muso ea Lipaki tse 31 686 tse hasaneng hohle Australia.
KAROLO EA MOEA OA MOLIMO
Litlhaloso tsena tsa bangoli ba likoranta le bashebelli ba bang ke feela boemeli ba se hlokomeloang lefatšeng lohle. Joaloka basebetsi, Lipaki tsa Jehova li na le moea o hlokomelehang oa kopano le sepheo. Mohloli oa oona ke ofe? Moea o halalelang oa Molimo, kapa matla a sebetsang, o hōlisang kopano le khotso.—Ba-Gal. 5:22, 23: Ba-Ef. 4:3.
Matla a susumetsang a moea oa Molimo a totobala litlhalosong tsa ba ithaopetseng ho ea sebetsa mesebetsing e fapa-fapaneng ea ho haha lefatšeng ka bophara. Denmark, ka mohlala, lisebelisoa tsa lekala tsa hona joale li ile tsa hahuoa ka 1957 ’me li se li petetsane haholo. Lehae la Bethele le lecha le ntseng le hahuoa hona joale le likamore li 50 le tla fana ka sebaka sa basebetsi ba bangatanyana, ’me hona ho tla nolofatsa hore ho hatisoe Molula-Qooa le Tsoha! ka maqephe a feletseng a 32 ka puo ea Sedanishe, e seng ka maqephe a 24 hona joale. Mohaho o mocha o tla akarelletsa le ofisi ea lekala le fektri e kholo. “Ka mehaho e mecha re tla tseba le ho ntlafatsa tšebeletso ea rōna ho baena le sebaka se kalosong ea rōna,” kamoo lekala le tlalehang. Sebaka se joalo se akarelletsa libaka tse hasaneng tsa Greenland, Iceland le Faroe Islands.
Ho thusa mosebetsing ona oa ho haha, Paki ea Denmark eo e leng setsebi sa litšepe le ea nang le lelapa a etsa qeto ena: “Ha mosebetsi oa ho haha o le makhatheng a ho qala, ka kenya tsebiso [ea ho tlohela mosebetsi oa ho iphelisa] ’me ra rekisa thepa ea rōna, ea ntlo. Re ne re tšepile hore ha re qetile mosebetsi oa ho haha ke tla fumana mosebetsi le ntlo hape. Hoo re tla ho nahana ha nkao e fihla. Re utloile hore na Jehova o lokisetsa hakae ha re mo leka ’me re batla ’muso oa hae pele.” Ruri ke polelo e ntle ea tumelo keletsong ea Jesu ho Mattheu 6:25-33.
Moea o joalo o totobetse Canada, moo Lipaki tse tsoang hohle naheng ena e khōlō li ithaopileng ho thusa ho haha ofisi ea lekala e ncha le fektri haufi le Toronto. Mohaho o mocha oa fektri o molelele hape o lekana le halofo ea lebala la bolo ea maoto ’me o limithara tse 73 ka bophara, ’me mohaho o mocha oa bululo o tla kenya litho tse 250 tsa lelapa la Bethele. Canada bahoeletsi ba fetang neng kapa neng ba 66 000 ba ile ba finyelloa ka 1980.
Paki e ’ngoe ea Canada e ile ea koala mosebetsi oa eona ’me ea falla ka lik’hilomithara tse 3 540 ho ea okamela ho beoa ha marulelo a maholo mehahong e mecha. Kamorao ho moo mosali oa hae le bara ba babeli ba latela. Paki e-ea tlaleha: “Boemo ba rōna ba moea bo phahamisitsoe haholo ke phihlelo ena. E entse hore lelapa la rōna le be le moea oa bopula-maliboho ’me re rera ho bula maliboho [mosebetsi oa ho bolela oa nako e tletseng] kamorao ho ho tloha mosebetsing oa kaho. E re neile moea oa bopula-maliboho oo ho seng mohla re kileng ra ba le oona.”
Ho khahlisang ke tlhaloso e tsoang ho Paki ea Australia. E nyetse, e na le bana ba babeli, ea koala mosebetsi oa eona oa ho haha, ea rekisa lelapa la eona ’me ea fallisetsa lelapa hole ka lik’hilomithara tse 1 500 ho ea setšeng sa kaho Bethele e ncha ea Australia. “Ho fihlela re etsa qeto ea ho tla re ne re sa ananele hore na re tšoarehile ka botebo hakae liketsong tsa rōna tsa khoebo tsa lefatše le hore na ho tla re nka nako e telele hakae ho lokoloha litlamong tsena tsa lefatše,” e lumela ka sebete. “Re fetohile ba khotsofetseng haholo ka ‘seo re hlileng re se hlokang’ ’me re ikemiselitse ho boloka bolokolohi ba rōna bakeng sa ho kopanela ka ho feletseng ‘tšebeletsong e halalelang.’—Ba-Roma 12:1; Ba-Heb. 13:5.
TSUSUMETSO EA HO ITHUTA
Koana, hase basebetsi bohle ba thusang ho haha mahae a macha a Bethele le lifektri bao e leng lihahi tse nang le tsebo. Joalokaha moea oa Jehova o susumelitse litsebi ho ithaopela ho haha Bethele, hape o susumelitse ba bacha le ba se nang tsebo hore ba tle, ’me o ba thusitse ho tseba mesebetsi e mecha.
Sweden ho na le Lipaki tsa Jehova tse ka bang 17 000. Ba likete tse hlano ho bona ba ithaopela ho haha Bethele e ncha ea Sweden! Hoo ke ho feta a le mong ho ba bang le ba bang ba bane ho bahoeletsi ba ’Muso naheng eo. Mohaho o mocha o ka feta-feta akere hanyenyane sebakeng sa oona fatše bakeng sa khatiso feela, o fana ka tšebeletso e ntlafalitsoeng haholo tšimong ea Sweden. Le hoja karolo ea 85 lekholong ea baithaopi e ne e se na tsebo, ba entse mosebetsi o motle. Khaitseli e mong, ea neng a ithutetse ho lokisa moriri, a ithuta ho potiela hantle ho hang-hang a ileng a fuoa mosebetsi ke feme ea mehaho ha a khutlela hae a qeta ho thusa mosebetsing.
Brazil, eare ha ho bonahala ho le thata ho fumana lifenstere tse ntle tsa “aluminium” Lipaki tse 20 tseo ho neng ho se mohla li kileng tsa ho etsa tsa etsa tse fetang 700 kamor’a koetliso e khutšoanyane. ’Me Italy, moo ho sa tsoa phethoa fektri e ncha, Lipaki tse nyenyane tsa ithuta ho sebelisa nkholi, ho sebelisa terekere ea khofu, ho etsa konkreiti, ho sebelisa mochine o lilang le ho bea litene. Fektri e ncha e hlokahala ka matla Italy, moo baboleli ba ’Muso ba 90 191 ba ileng ba thaba haholo ho ba le ba 187 165 Sehopotsong ngohola!
Paki e nyenyane Australia e ne e le makhatheng a ho khutlela kolocheng ha e utloa liphihlelo tse ling tse ileng tsa e etsa hore e rate ho thusa lenaneong la ho haha naheng eo. “Kamor’a selemo ka etsa qeto ea ho kenela mosebetsi oa boboleli oa nako e tletseng ho e-na le ho khutlela univesithing,” kamoo a bolelang. “Ha ke hetla morao hona joale, ke bona kamoo mosebetsi oa ho haha o mphileng tsebo moeeng e bileng le o nkenyelletsang ho khaohaneng le bophelo ba univesithi boo ke neng ke bo thabela empa bo nkisa ka tsela e fosahetseng.”
TŠEHETSO E KOPANENG TŠIMONG
Hase bohle ho Lipaki tsa Jehova ba ka sebetsang ka nako e tletseng mabothong a kaho ea makala, empa bohle ba ka tšehetsa mosebetsi oo—’me ba fela ba o tšehetsa! Spain, ka mohlala, moo lenane la Lipaki le phahametseng ho 47 000 ho tloha ho 10 000 ka lilemo tse fetileng tse leshome, mehaho e mecha ea lekala e hlokahala haholo. Ho ile ha fumanoa sebaka se setle mohahong o phethiloeng karolo feela o boholo bo lekaneng ho oona. Bothata e ne e le hore mong a oona o ne a batla ho lefuoa hang e le chelete e ngata!
Ho ne ho le teng nako e khutšoanyane ea ho fumana chelete. Ebe Lipaki tsa Spain li ne li tla thusa? Karabelo ea potlaka ’me e le E, ea pelo eohle! Ba bang ‘ba tla ka masale a bona a gauda le a silevera a monoana, lipetja le lifaha tsa molala,” kamoo ho tlalehang lekala. “Bana ba banyenyane ba rōmela lichelete tsa bona tseo ba li bolokileng. Bo-pula-maliboho ba khethehileng ba kōpa hore karolo ea thuso ea bona ea selemo bakeng sa ho kula le ho apara e sebelisetsoe mosebetsi oa ho haha. Baena ba bangata ba tela litokisetso tsa bona tsa phomolo. Phutheho e Huelva ka mehla e ea kaofela moo moena a bolokang likarapa ho ea li hlophisa, ’me sehlopha sa bacha Barcelona se tlatsa liphutheloana bakeng sa mokhatlo oa “yogurt.” Tabeng e ’ngoe le e ’ngoe, se fumanoang mesebetsing ena se etsa chelete e lekaneng ea khoeli le khoeli bakeng sa mohaho oa Bethele.”
Na hoo hase moea oa Molimo ketsong? Ho re hopotsa hakaakang ka karabelo ea Baiseraele ha ba ne ba neiloe monyetla oa ho etsa meneelo bakeng sa ho hahuoa ha tabernakele.—Ex. 35:4-9, 21, 22; 36:7.
Ho etsahala joalo lefatšeng ka bophara. Netherlands, moo ho ileng ha kolobetsoa bahoeletsi ba ’Muso ba bacha ba 845 ka 1980, ho ntse ho hahuoa Bethele e ncha le khatiso. Ho phaella ho batho ba 80 ka nako ba thusang mafelong a beke, baena ba moo ba thusitse ka litsela tse ling hape. Ho ile ha fanoa ka likofuto tse ngata le liphahlo tsa mosebetsi, tse ling ka tsela e amang pelo. “Khaitseli e mong,” kamoo ho tlalehang lekala, “a kula haholo ’me a tseba hore o na le nakoana a phela, a ipha mosebetsi oa ho loha likausu bakeng sa mosebetsi e mong le e mong bakeng sa mariha.”
Afrika Boroa, moo Molula-Qhooa o hatisoang ka lipuo tse 13, ho hlokahala sebaka se seng bakeng sa bafetoleli le thepa ea khatiso. Kahoo ho se ho qalisitsoe mosebetsi bakeng sa mehaho e mecha. “Ruri baena ba tšehelitse ka mokhoa o futhumatsang pelo,” kamoo lekala le re bolellang. “Phutheho e ’ngoe ea lokisetsa ho kotula lilamunu bakeng sa molemi ea ileng a e nea karolo tse peli ho tse tharo bakeng sa chelete ea mohaho. Bo-khaitseli ba bangata ba rekisa liaparo tse seng li kile tsa sebelisoa. . . banyalani ba bang ba seng ba hōlile ba fana ka lijana tsa tee tsa silivera hore li rekisoe.”
Bacha le bona ba bontša moea o joalo. Riphabliking e Kopaneng ea Jeremane, moo ho hatisoang boholo ba libuka bakeng sa linaha tse ’maloa tsa Europe, lekala la pele la Wiesbaden le atolositsoe ka makhetlo a mahlano, ’me menyetla ea hore ho ka atolosoa hape ha e sa le eo. Kahoo mehaho e mecha ho hang e Selters, hoo e kang lik’hilomithara tse 40 thokonyana, e ntse e hahuoa hona joale ho khahlametsa se hlokoang ke tšimo ea Europe ho fepela ka libuka ka lipuo tse 14. Mohaho o mocha o moholo oa fektri o tla ba le sebaka se fatše sa boholo bo ka lekanang le mabala a mane a bolo ea maoto. Ke mohlala o motle oa boqapi, o lokiselitsoeng ho sebetsa tumellanong le se hlokoang ke ba sebelisang mehaho, moo ho tla ba le sebaka sa bolulo sa Lipaki tse 450 tsa baithaopi hore ba lule ba be ba sebetse. Matthias e monyenyane, a le lilemo li tšeletseng feela, a neelana ka cheletana eo a ipoloketseng eona ho etsa moneelo bakeng sa boiteko ba mohaho, a fana ka chelete e ka fetang lidolara tse 25 (U.S.)!
Ha lekala la Lihleke-hleke tsa Brithani le ne le khakoloa ka 1959 le ne le leholo ho feta kamoo ho neng ho hlokahala, empa hona joale taba e kahosele. Palo ea baboleli ba ’Muso e se e atile ho feta habeli ho tloha ka nako eo, kahoo lehae la Bethele le atolosoa hore le kenye basebetsi ba eketsehileng. Hape, ho rekiloe fektri lik’hilomithara tse seng kae ho tloha moo ho kenya mochine oa khatiso oa “off-set.” Ha litlhokahalo li tsebisahala, moea oa Jehova o susumetsa baena hore ba arabele. Moena o ile a kōpuoa hore a fumane hore na makarapa a ka fumanoa ka bokae, bakeng sa basebetsi ba mohaho. Matsatsi a mabeli hamorao a tlaleha: “Ha kea fumana hore na ke bokae. Bakeng sa hoo ke na le makarapa.”
BASEBETSI BA ITHAOPANG BA ‘MAFELONG A BEKE’
Linaheng tse ngata, “basebetsi ba mafelo a beke” ba etsa moneelo o moholo kahong ea lekala. Ivory Coast, tse ’ne ho liphutheho tse 16 tsa Abidjan li memeloa ho tla thusa kahong ea lekala Sontaha se seng le se seng. ’Me kahoo lihora tse fetang 10 000 li sebelisitsoe ke baena mosebetsing ona. Italy, baena ba ka bang pakeng tsa 30 le 50 ba thusa motheong oa beke le beke, ba tlatsetsa lebotho le sebetsang ka mehla. Ba tla ba tsoa Italy eohle hammoho le lihleke-hleke tsa Sicily le Sardinia. “Ka tsela ena,” kamoo ho hlalosang lekala, “baena bohle ba Mataliana ba tšoarehile mosebetsing ona oa ho haha.”
Japane ho ne ho le teng Lipaki tse 10 711 ka 1971, empa ka Phuptjoane 1981, lenane le ne le phahametse ho 62 381, kapa keketseho ea 482 lekholong. Hase ho makatsang hore lehae la Bethele le fektri ea khatiso tse hahiloeng mathoasong a bo1970 ho ileng ha fumaneha kapele hore li nyenyane haholo! Mehaho e mecha e hahuoang Ebina ke e meng ea tšebetso ea ho haha e khōlō ka ho fetisisa e kileng ea etsoa ke Lipaki tsa Jehova leha e le kae kapa kae lefatšeng. Mohaho o moholo o nka sebaka sa lihektare tse 3,6 ’me o na le sebaka sa mechine e meholo e ’meli ea khatiso ea “off-set.” Mosebetsi o qalile ka 1978 bakeng sa lehae le lecha la Bethele le fektri, ’me baithaopi ba ile ba hlaha ka bongata. Moqebelo oa pele le oa boraro o beiloe e le ea tšebeletso ea boithaopo khoeli e ’ngoe le e ’ngoe bakeng sa ho haha lekala la Japane, ’me batho ba tsoang liphuthehong tse hole le tse haufi ba tla ka makoloi, terene kapa ba hirile libese ho nka karolo mosebetsing. Ka Moqebelo o mong ho ile ha tla ba fetang 1 000, ba tlile le lijo tseo ba tla li ja motšehare ho tla le etsa letsatsi le monate. Ka matsoho a makholo-kholo a ithaopang, le hona ho tsoa manala ho fetoha mosebetsi o thabisang.
Australia, moo lehae le lecha la Bethele le tla ba le sebaka sa bolulo sa batho ba 135, basebetsi ba nakoana ba sebelisitsoe hamolemo haholo. Ka Phato 1980 lenaneo le khethehileng la libeke tse peli le ile la theoa bakeng sa basebetsi ba batlang ho thusa empa ba ke ke ba fallisetsa malapa a bona moo ka nako e telele. “Ka likhoeli tse latelang tse tšeletseng, ke baena ba ka bang 500 ba tlileng ’me ba tla lula le rōna,” kamoo ho tlalehang molebeli oa lenaneo. “Ba bang bonyane ba bile le leeto la ho tla le ho khutla la lik’hilomithara tse ka bang 2 000 ha ba bang ba nkile sebaka sa lik’hilomithara tse 8 500.”
Basebetsi bana ba ithaopang, ‘ba tletse moea oa Molimo,’ ba thabela ho jara litšenyehelo tsa ho tsamaea ho ea sebakeng sa mosebetsi, hammoho le ho lahleheloa ke moputso oa libeke tse peli. (Ba-Roma 12:11) “Sehlopha se seng sa baena, ba le robong kaofela, se itefella litšenyehelo tsa leeto la sefofane ho tloha Gold Coast ho ea Sydney, sebaka se ka nkang lik’hilomithara tse 1 000, nako le nako ha ba hlokahala ho tla tšela konkreiti,” kamoo ho bolelang lekala, le phaella: “Me nako le nako ba khanya ka moea oa thabo ka hore ba bile le nako ea ho kopanela mosebetsing oa ho haha. Matšeliso feela ao ba a kōpang ke hore ba mengoe hape.”
Ba bang Australia ba etsa moneelo le bona. Ba etsa joalo ka ho amohelana boeting ha bona ha Bokreste. “Kaha re leka ho lokisetsa leeto la bese bakeng sa sehlopha se seng le se seng se tsoang seterekeng se seng, liphutheho tse tseleng li fana ka lijo le botsoalle sebakeng se seng le seng seo ho phomoloang ho sona,” kamoo ho hlalosang molebeli oa lenaneo. “Ho bona kamoo phutheho e ’ngoe le e ’ngoe e bileng e ithaopelang ho etsa joalo hoa babatseha! Sehlotšoana se seng sa bahoeletsi ba 30 se ne se ikemiselitse ho lefella litšenyehelo tsa lijo ntlong ea lijo bakeng sa lijo tsa hoseng tsa batho ba tletseng bese ka nako e neng e tla feta motseng oa habo sona kaha ka nako eo se ne se tla be se le sieo ho ea kopanong ea potoloho sebakeng se seng.” Kannete, Lipaki tsena tsa Australia li etsa ‘mosebetsi o tšepahalang,’ ba tsamaisa bana babo bona ‘hore ba tsamaee ka mokhoa o tšoanelang Molimo’—3 Joh. 5, 6.
‘MAHLABELO A POKO’
E, Lipaki tsa Jehova li fana ka nako ea tsona, matla le chelete ka boithatelo mesebetsing ea kaho lefatšeng lohle. Ho tla kenngoa thepa ea khatiso, kapa e se e kentsoe, mehahong e mecha Canada, Australia, Denmark, Netherlands, Italy, Spain, Sweden, Riphabliking e Kopaneng ea Jeremane, England, Ghana, Zambia, Afrika Boroa, Nigeria, Brazil le Japane, ’me lethathamo le ntse le hōla haholoanyane.
Mahlabelo a ’nete a etsoang linaheng tsena tsohle ke ‘mahlabelo a poko, ke hore, tholoana ea melomo e bolelang pontšeng lebitso la Jehova.’ (Ba-Heb. 13:15, NW) Ke ka baka la polelo ea bona e chesehang ea pontšeng ea lebitso la Jehova moo lipaki tsa hae tse tšepahalang li lokelang ho haha liofisi le lifektri, ho hlokomela mosebetsi oa ho bolela le ho hatisa limakasine le ho tlama libuka. Kahoo e ke ke ea e-ba ho makatsang hore moea oa Molimo o kopanyang o thusa batho ba oona ho sebetsa ka lerato le kopano mesebetsing ena ea kaho, hobane e tumellanong le thato ea hae hore ‘litaba tse molemo’ li boleloe lefatšeng lohle ‘mehleng ena ea qetello.’—Matt. 24:14: Lik. 2:17-21.
[Setšoantšo se leqepheng la 9]
Har’a baithaopi ba 175 ba sebetsang mohahong oa lekala le lecha la Denmark ke lihlopha tse 46 tsa malapa. Ho ithaopa, lelapa la Jensen la rekisa ntlo ea lona le khoebo
[Setšoantšo se leqepheng la 10]
Lehae le lecha la Bethele Canada, leo ho lona ho tsamaisoang mosebetsi oa Lipaki tsa Macanada tse 66 000
[Setšoantšo se leqepheng la 11]
Jeremane, makholo a banna le basali a thusa mafelong a beke ho haha lehae le lecha la Bethele le khatiso Selters
[Setšoantšo se leqepheng la 12]
Ho thusa ho haha khatiso e ncha ea Australia, Lipaki tse ngata, ho tšoana le Peter le Raelynn Johnson, li tsamaile lik’hilomithara tse likete