Ho Nyarela ka Litabeng
Boprofeta ba Letsatsi la Kahlolo
Thahasello ea morao-rao hohle France ke buka e ʼngoe ea letsatsi la kahlolo ea lintho tse boletsoeng e sa le pele ea Nostradamus—phetolelo e ncha ea Sefora sa lekholong la bo16 la lilemo e fetoleloa ka Seforeng sa kajeno ka thuso ea li-computer. Hoo e ka bang bohareng ba mariha selemong se fetileng, ho ne ho rekisitsoe tse 232 000 ho buka e maqephe a 565.
Thahasello e kaale-kaale e tlang ka potlako e bakoa ke eng? Boprofeta bo bong bo bolela hore mopapa o tla bolaoa “ha rosa e thunya.” Hona ha hlalosoa hore ho phethahalitsoe ha ho etsoa boiteko ba ho bolaea Mopapa Pauluse Johanne II selemong se fetileng ka Motšeanong hoba Mokha oa “Socialist” oo letšoao la oona e leng rosa, o nka puso France.
Makasine ea “Time” ea hlalosa hore: “Boprofeta ba Nostradamus . . . ho bonahala bo sibolloa nakong e mahlonoko ea mehla ea pale—e kang hona joale ha Maeuropa a mangata a Bophirima a tšoenyehile ke moruo o thekeselang le ho hohlana ha mebuso e meholo.” ʼMe koranta e tsoang ka beke ea Sefora “Le Point” ea re: “Ho rekisoa tšabo. Kamorao ho matsatsi a lekholo Mitterrand a neiloe matla a puso, baahi bahabo rōna ba lefa $20 kopi ka ʼngoe ho tlakasela ke tšabo.”
“Tšabo” ena, leha ho le joalo, ke seo Jesu Kreste a hlileng a se bolela e le karolo ea ‘pontšo ea ho fela ha tsamaiso ea lintho,’ a re: “lefatšeng lichaba Ii tla tsieleha, . . . Batho ba tla neela moea ke tšabo le ke tebello ea tse tla tla lefatšeng.” (Mattheu 24:3; Luka 21:25, 26) Empa a eketsa hore: “Etlare ha tseo li qala ho hlaha, emisang lihloho, ʼme le lelale holimo, hobane topollo ea lōna e tla be e atametse.”—Luka 21:28.
“Kamoo u ka Bolaeang,” ka Meqolo e Tšeletseng
“Libuka tse ngata tse etsoang li sa fele, ʼme ho ithuta ka ho tlōlisa ho khathatsa ʼmele,” kamoo ho ngotseng Morena Salomone ea bohlale ho Moeklesia 12:12. Sehlohlolo sa letoto le sa feleng la libuka tse khathatsang tse hatisoang ho bonahala e le sehlopha sa meqolo e tšeletseng e bitsoang “How to Kill.” Meqolo e thathamisa kamoo motho a ka bolaeang ka melamu, liletsoana, lithipa, chefu, mollo, motlakase, liqhomane le lithunya, hammoho le litšoantšo tse hlalositsoeng hantle. Kenyelletsong, mongoli o re: “Sepheo sa boithuto bona ke ho laea ʼmali ka mahlale a ho nka bophelo ba motho e mong, a le haufi, a bile a ho etsa hantle. Ke hantle u ka ʼnang ua fumana buka ena e khopisa, u ke ke ua e mamella, e le sehlōhō e bile e le kotsi. E hlile e reretsoe sona seo. Ho hang e nyelisa bophelo ba motho, ʼme keletso feela ea ka ho ea rerang ho bolaea ke hore: Bolaea u koatile.”
Mohatisi o hlalosa libuka e le tse ‘bohlale ka ho feletseng. Ha li susumelletse boikutlo ba botho. . . . Ke ho koetlisa kelello, ho nahana mehlolo, mothinya.’ Ha a botsoa hore na ho rekisa buka ea mofuta ona ke ntho e mo tšoenyang, a arabela: “Le hanyenyane. Ha ke lumele hore le ka paka hore libuka tsena li etsa batho hore ba bolaee. . . . Tsamaisong ea rōna, ha ho motho ea ka thibelang ho hatisoa ha libuka tsena, ʼme ho lokela hore ho be joalo hantle.” Ho tla fihlela joale, ho rekisitsoe libuka tse pakeng tsa 30 000 le 40 000.
Ho Hlahlojoa Liseminari
Haufinyane Vatican e tsoa biletsa “ho ithuta kapa ho hlahloba boemo ba hona joale ba boprista liseminaring tsa Amerika.” E tlaleha ka se bonahalang e le ea pele lipatlisisong tse joalo U.S., New York “Times” e bolela hore tokisetso “e se e tšositse lihlooho tsa liseminari tse ling tse lumelang hore boithuto bo ka fella ka boiteko ba ho felisa ho se lumellane ka maikutlo le bolokolohi thutong. . . . Hloho ea seminari e ʼngoe ea bitsa boiteko ho phenya-phenya. . . . Tichere e ʼngoe ea bo bitsa ho tlontlolla boleng ba koetliso ea liseminari tsa Amerika tsa K’hatholike.”
Ho latela lipalo tsa “Official Catholic Directory” ngoliso liseminaring tsa K’hatholike tsa Amerika e oele ho tloha ho 49 000 ka 1965 ho ea ho 12 000 hona joale. Empa Vatican e amehile haholo ka “bohlokoa ba ho lumellana thutong” le “bolokolohi bo bongata haholo har’a baruti ba bang ba bolumeli,” kamoo tlaleho e totobatsang.
Khanyetsano ea liseminari le matichere patlisisong ke pontšo e bolelang hore Kereke e K’hatholike, le hoja e ipolela hore e tsoile ho baapostola, ha e-ea ela hloko keletso ea boapostola hore: “Le ke le bolele bohle taba e le ʼngoe; likhaohano Ii se ke tsa e-ba teng har’a lōna, le mpe le phethehe boikutlong bo le bong le khopolong e le ngoe.” (1 Bakorinthe 1:10) Ho oa ho iketlileng har’a baprista ho bontša seo Jesu Kreste a se boletseng: “Le ntlo ha e khaohane ho itoantša, ntlo eo e ke ke ea tiea.”—Mareka 3:25.