Hatelang Pele, Lōna Baboleli ba ʼMuso!
“U etse mosebetsi oa ’moleli oa Evangeli, u phethisise tšebetso ea hao.”—2 Timothea 4:5.
1. Phapang ke efe pakeng tsa boemo ba moea ba Babylona e Moholo le ba Lipaki tsa Jehova?
LINAHENG TSE NGATA kajeno makhulu a moea a bolumeli ba bohata a omeletse ’me metsi ao Babylona e Moholo a lutseng ho oona a ntse a epsha. Ho re hopotsa ka boprofeta ba Esaia bo phethahalang mehleng ea rōna, e leng bo fumanoang ho Esaia 65:13: “Bonang, bahlanka ba ka ba tla ja, empa lōna le tla lapa; bonang, bahlanka ba ka ba tla noa, empa lōna le tla nyoroa; bonang, bahlanka ba ka ba tla thaba, empa lōna le tla soaba.” Ho tjena hobane ruri batho ba Jehova ba batla ’Muso pele, ba iteka kahohle ho bona hore litaba tse molemo tsa ’muso oa Molimo o matsohong a Mora le Morena oa hae Kreste Jesu, li boleloa lefatšeng ka bophara.—Tšenolo 14:6-8; 16:12; 17:5, 15.
2. Ke bo-mang ba nang le boikarabelo ba ho hatela pele e le baboleli ba ’Muso?
2 Pitso e ka sehloohong mehleng ea rōna ke hore “Hatelang pele, lōna baboleli ba ’Muso!” Ho mamela pitso ena re le sehlopha sa balateli ba Morena oa rōna Jesu Kreste Lipaki tsa Jehova kaofela, tse boemong ba bolebeli, hammoho le bohle banna, basali, bashemane le banana, ba tlameha ho emela ’muso oa Molimo. (Pesaleme ea 145:10-12; 148:12, 13; 2 Timothea 4:2, 5) Ho tjena le hoja ba bang ka lebaka la maemo ba sa khone ho etsa ho lekanang le ba bang. Empa tšebetso ea bona e hopotsa ka mohlolohali ea ileng a fana ka sohle seo a nang le sona le hoja se ile sa ipaka ho ba licheletana tse peli tse nyenyane haholo.—Luka 21:1-4.
3. Batho ba hloka litaba tse molemo tsa ’Muso hakae nakong ee, ’me molaetsa oa ’Muso o akarelletsa eng?
3 Na kajeno batho ba hloka litaba tse molemo tsa ’muso oa Molimo? Ba li hloka haholo! Ha ba li hloke feela hore li felise bohloko, ho kula, masoabi le lefu, empa hape hore ho felisoe leeme lohle, bokhopo bohle, bonokoane bohle, pefo le ntoa, e, ho felisa ho hloka toka hohle, le khethollo eohle. (Esaia 9:7) Ka ho hatela pele re le baboleli ba ’Muso re nea batho ntho eo ba ka e tšepang, ntho e ka ba tiisang ho fihlela Harmagedone e felisa tsamaiso ea lintho ea Satane. Ka baka la ngatafalo ea ho hloka molao ha re lokele ho hatela pele feela ka molaetsa oa lerato le tšepo, empa hape ka molaetsa oa temoso mabapi le ‘letsatsi la liphetetso tsa Molimo oa rōna.’—Esaia 61:2.
4. Sepheo se seholo se lokelang ho susumelletsa motho ho ba ’moleli ea mafolo-folo oa ’muso oa Molimo ke sefe?
4 Leha ho le joalo, ke joang, lefatšeng le tletseng litšusumetso tse sa lokang le le busoang ke moea oa boikhabi, re ka tsoelang pele ka moea oa boitelo re le baboleli ba Molimo lefatšeng? Ntho ea pele, ka baka la mosa o lerato oa Jehova oo a re bontšitseng oona, re be le takatso ea ho hatela pele ka baka la ho mo rata, ka baka la ho ananela sohle seo a re etselitseng sona, a ntseng a re etsetsa sona le seo a tlang ho re etsetsa sona. Joalokaha moapostola Johanne a re hopotsa, ho rata Molimo ke ho boloka litaelo tsa oona, ’me taelo e ’ngoe ea oona ke ho bolela litaba tse molemo tsa ’muso oa hae. (Mattheu 24:14; 1 Johanne 5:3) Hape, ho beoa Jehova Molimo molato bakeng sa likhathatso tsa batho le ho etselletsoa hore ke Molimo o hlokofatsang ka ho sa feleng. Ruri ho rata Jehova, Ntate oa rōna ea lerato oa leholimo, ho tla re susumelletsa ho hatela pele re le baboleli ba hae, re thusa ho hlatsoa lebitso la hae ketselletso e khopo joalo.
5. Ke sepheo sefe hape seo re nang le sona ho re susumelletsa ho hatela pele re le baboleli ba Molimo?
5 Ho rata batho ba bang le hona ho tla re khanna hore re hatele pele re le baboleli ba ’muso oa Molimo. Ho rata bao re phelang le bona ho tla re khanna hore re etelletse lithahasello tsa bona tsa moea pele, qetello ea bona e tle pele ho ho phuthuloha ha rōna ha botho. Lerato le tla re susumelletsa ho koahela sebaka sa rōna nako le nako ebile e le ka mokhoa o phethahetseng. Lerato le tla re susumelletsa ho etsa maeto a ho boela le ho amohela tlameho ea ho tsamaisa lithuto tsa malapa tsa Bibele tsa beke le beke le ba ratang ’nete. Hona ho bolela hore re batla ho ba ba mosa, ba sebete, ba bonolo le ba bohlale, re bontša ho utloelana bohloko le ho qenehelana.
6. Ho hlokomoloha boboleli ba rōna ho ka re amoha thabo joang?
6 Na kannete re lumela Lentsoe la Molimo? Le re bolella hore “ho nea ke leseho le fetisang la ho fuoa.” (Liketso 20:35) Ha re hlokomoloha tšebeletso ea tšimo re bontša hore ka ketso ea rōna ha re hlile ha re lumele mantsoe ao a Jesu. Hape re tiisetsoa hore ‘ha re jala haholo re tla kotula haholo’ le hore ‘ea nosetsang o tla nosetsoa le eena.’ Lipolelo tsena hase feela khothalletso e sa reng letho empa ke linnete tse ke keng tsa qojoa le metheo e lekang lerato la rōna ho Jehova Molimo le bao re phelang le bona, botšepehi ba rōna ’musong oa Molimo.—2 Ba-Korinthe 9:6; Liproverbia 11:25.
7. Motho a ka ipaka a se molato oa mali a batho bohle joang?
7 Hase feela hore bophelo ba ba bang boa ameha. Re tlameha ho hatela pele re le baboleli ba ’muso oa Molimo e le hore re ka lokoloha molatong oa mali. Hopola mantsoe a Ezekiele 33:2-4: “Mora motho, bua ho bana ba lechaba la heno, u re ho bona: Ekare ha ke tlisetsa lefatše le itseng lerumo, ’me sechaba sa lefatše leo se inkela monna har’a sona, ho ’mea seboholi sa sona; ha a bona lerumo le tlela lefatše leo, ’me a letsa phala, a eletsa sechaba; ha e mong a utloile molumo oa phala, a sa hlokomele, leha lerumo le ka tla, la ea le eena, mali a hae a tla ba hlohong ea hae.” Re batla ho bua joaloka moapostola Pauluse ha a itse: “Ha ke na molato maling a lōna bohle.”—Liketso 20:26, 27.
Kamoo Boboleli bo Phethoang
8. Ke lipotso life tse botsoang ka nepo ka hore na boboleli bona bo finyelloa joang?
8 Re hatela pele joang? Ka matla a rōna? Ka boikutlo ba boikakaso le ba ho itšepa? Re tšepile letsoho la nama? Kapa, ka lehlakoreng le leng, re le boi, re le ka pelo e sa fellang ’me re bontša ho tšaba motho? Na re tla hatela pele ka ho itaola, re hlokomoloha tsamaiso ea ba re etellang pele? Le hanyenyane! Re lokela ho hopola lintlha tse tharo tse khethehileng:
9. (a) Motho o hatela pele joang boboleling ka matla a Jehova? (b) 1 Petrose 3:15 e re tataisa joang boitšoarong ba rōna boboleling?
9 Ea pele: Re hatela pele re le baboleli ba ’muso oa Molimo ka matla a Jehova Molimo, re lebelletse ho susumetsoa ke moea oa hae, hore o re bee leseling le ho re tiisa. Ha re hatela pele ka matla a Jehova re tla bontša puo e lokolohileng, sebete, ho hloka tšabo hoo Petrose le Johanne ba ileng ba ho bontša ha ba sebetsana le baholo ba bolumeli mehleng ea bona. (Liketso 4:13) Le teng re batla ho ba hlokolosi hore re fane ka molaetsa oa rōna ka bonolo le ka hlompho e tebileng.—1 Petrose 3:15.
10. (a) Hore motho ebe ‘mojari ea hloekileng’ oa molaetsa oa Jehova ho bolela eng? (b) Keletso ea Ba-Filippi 1:10, 11 ke efe ntlheng ee?
10 Ea bobeli: Re batla ho hatela pele re le bajari ba hloekileng ba molaetsa oa Jehova, tumellanong le seo re se balang ho Esaia 52:11: “Itlhatsoeng lōna ba jarang lipitsa tsa Jehova!” Lipitsa tsa Jehova tsa kajeno, linnete tsa bohlokoa tsa Lentsoe la hae, li hloekile, ha li na litšila, li ntle li bile li lokile. Kahoo bohle ba li jereng ba li isa ho batho ba lokela ho ipoloka ba hloekile boitšoarong ba le batle moeeng. Na ha re memele batho hore ba itlhoekise boitšoarong, hore ba hlobole mesebetsi ea nama, joaloka Jesu ‘re biletsa baetsalibe pakong’? (Luka 5:32) Joale na re ke ke ra ba beela mohlala o motle ntlheng ee? Hopolang, Pauluse o elelitse Bakreste ba Filippi hore: “Le tsebe ho lemoha litaba tse fetisang ka molemo, le ’ne le hloeke, ’me le se ke la khopjoa, letsatsi la Kreste le be le chabe; le ntse le tletse litholoana tsa ho loka, tse beoang ka Jesu Kreste, hore e be khanya le poko ho Molimo.”—Ba-Filippi 1:10, 11.
11. (a) Ho itlhopha ke ntho ea bohlokoa hakae ho ’moleli oa Molimo? (b) Ke mohlala oa mang o motle oo re lokelang ho o latela ntlheng ee?
11 Ea boraro: Ha re hatela pele hape re batla ho itlhopha ka tšoanelo. Hore na ke ka lebaka lefe mohlanka leha e le ofe oa Jehova a ka ratang ho etsisa mekhoa e khethollang mekha e hlokang boitšoaro le ea borabele ea lefatše la Satane ho thata ho ho utloisisa. Ke hobane’ng ha u ka tšoana le lefatše leo u bolellang batho hore le tla fela ka ketso e lokileng ea Molimo? Ke hobane’ng ha u rata ho tšoana le lefatše e le hore u fapane le batho ba Jehova? Ho e-na le hoo, na re ke ke ra bonahala joaloka batho ba Jehova, ’me kahoo ra ema re fapane ha re le har’a balefatše? Re leka ho khahlisa mang? Re batla mohau oa mang? Ke hobane’ng ha re sa lemosoe ke moaparo le boitlhopho ba baena le likhaitseli ba hōlileng tsebong ba har’a rōna ka phuthehong? Na re ke ke ra ba etsisa ka mohlala oa bona o motle?—1 Timothea 2:9; 1 Petrose 3:3, 4, 16, 17.
12. Le hoja boboleli ba ntlo-le-ntlo bo ka ba boima, bo fana ka melemo efe ho ba kopanelang ho bona?
12 Ke ’nete, ha ho bonolo bakeng sa ba bang ho ea ka ntlo le ntlo ka litaba tse molemo tsa ’muso oa Molimo. Empa bohlokoa le molemo oa ho etsa joalo li bontšitsoe nako le nako. (Mattheu 10:7, 11-13. Liketso 20:20, 21) Ho sebelisa ha rōna ka mokhoa o molemo mokhoa oa ho bolela ka ntlo-le-ntlo ho o fetotse “letšoao” le khethollang bahlanka ba ’nete ba Jehova. ’Me ha ho molemo feela ha re isetsa ba bang bopaki empa mosebetsi oa ntlo-le-ntlo ka booona o molemo ho bohle ba kopanelang ho oona har’a rōna. Eona ’nete ea hore ’mele ea rōna e-ea ho tšaba e ho fetola tlhōlo nako le nako ha ’moleli oa Mokreste a kopanela ho oona.—1 Ba-Korinthe 9:16, 27.
Ho Hlokomela Lelapa le Bolebeli
13. Ho phaella boikarabelo ba motho ba boboleli, ke boikarabelo bofe bo oelang holim’a ba bangata, ho biletsa ho leka-lekana hofe?
13 Ho phaella tlamehong ea rōna ea ho ba baboleli ba ʼMuso ke boikarabelo bo bong bo oelang ho ba nang le malapa. Baboleli ba hatelang pele ba ʼMuso ba nang le malapa ba tlameha ho ruta bana ba bona ka baka la karolo eo ba e fuoeng ke Molimo e le batsoali. Selemo le selemo palo e khōlo ea ba kolobetsoang ke bacha bao batsoali ba bona ba ba “hōliselitseng le ho ba laea Moreneng.’ (Ba-Efese 6:4) Leha ho le bohloko ho bolela, tlameho ena le monyetla ba bang baa li hlokomoloha, ho soabeng ha bona. Ho ba baboleli ba hatelang pele ruri ho hloka ho leka-lakana. Ha re batle ho hlokomoloha mosebetsi oa ntlo-le-ntlo ka boikemelo ba hore re paka ka mokhoa o sa rereloang, kapa hore re batla ho tlohela menyetla ea ho paka ka mokhoa o sa rereloang hobane re ea ka ntlo-le-ntlo. Ka ho tšoanang, batsoali ba se ke ba lumella tšebeletso ea tšimo kapa boikarabelo ba phutheho le litšoanelo tse ling ho nka boholo ba nako hoo ba hlokomolohang malapa a bona. Ha e le hantle, ho hlokomela se hlokoang ke lelapa moeeng le nameng ke tlameho ea bona e khōlō.—1 Timothea 5:8.
14. (a) Batsoali ba ka lahleheloa ke letsete la bona joang nakong, tlhokomelong le cheleteng ho hōliseng bana ba bona? (b) Ke tlhokahalo efe ho hōliseng bana e tsoelang pele ho tloha boseeng ho kena bocheng?
14 E, bana ba hloka nako, tlhokomelo le chelete. Ho hakanngoa hore ho hloka liranta tse likete ho hōlisa ngoana hore ebe motho e moholo. Tsela ea ’nete ea ho lahleheloa ke chelete eo, hammoho le nako, ke ho sitoa ho lebela ka mokhoa o motle moeeng bao re ba tlisang lefatšeng. Chai e khōlō hakana ea bacha ba litlokotsebe tsa kajeno ke bopaki ba ’nete ea hore bana ba bangata ba lahloa feela ke batsoali ba bona. (Liproverbia 29:15) Masea le bana ba banyenyane hangata ba “tetesoa” ke batsoali, seng le ba bang. ‘Ba batle hakaakang! Ba boheha hakaakang! Ngoanan’a ’m’ae, le moshemane oa Ntate!’ Hoo kaofela e ka ’na ea e-ba ’nete. Empa batsoali ba lokela ho hopola hore ha bana bana ba kena lilemong tsa bocha, ʼme kahoo, ba kena bonneng le bosaling, ba sa ntsane ba hloka tlhokomelo le paballo, lerato le khalemelo, thuto ea moea le thuto. (Deuteronoma 11:18-21) Boo ke boikarabelo ba batsoali ba Bokreste. Baboleli ba Molimo ba ke ke ba lebala tlameho ena e beiloeng mahetleng a bona.
Kopano ea Lefatše Lohle ea Baboleli ba Molimo
15, 16. (a) Re ka tiisa joang hore molaetsa oa ’Muso oo re o bolelang o hlakile o utloahala hantle ho ba o mamelang? (b) Ke thuso efe eo re nang le eona ho re thusa ho bua ka kutloano lefatšeng ka bophara?
15 Leha ho le joalo, nahana ka boikarabelo bo bong ba baboleli ba Bakreste. “Ekare ha terompeta e e-na le molumo o sa khethoeng, ke mang ea tla phallela ntoeng?” (1 Ba-Korinthe 14:8) Ka mantsoe ao moapostola Pauluse o ne a biletsa balateli ba Kreste hore ba sebelise maleme a bona ka tsela eo ba bang ba ka utloisisang se boleloang. Mehleng ea rōna ha molaetsa oa ‘Muso oo re o bolelang o tla khetholleha, o utloale hantle ho batho, re tlameha ho bua ka kutloano. Esaia 52:8 e re: “Utloa liboholi tsa hao! Li phahamisa lentsoe, li etsa mohoo oa nyakallo hammoho.” Ho kopanela mohoong o kopaneng joalo ho hloka boikokobetso le lerato la boena. Rea tseba hore hore bopaki ba rōna bo tle bo be molemo re tlameha bohle ho bolela molaetsa o tšoanang, re supa lebitso la Jehova, bohlale ba hae le lerato le ’Muso oa hae e le eona tšepo feela ea batho. Ho 1 Ba-Korinthe 1:10 Pauluse o elelitse hore bohle re batla ho bua ka tumellano.
16 Re se ke ra lumella molaetsa oa rōna o khangoe ke ho se hlake ha mofuta ofe kapa ofe. Re na le taelo re le baboleli ba Molimo. Esaia 61:1, 2 e bolela ka ho hlakileng hore na molaetsa oa rōna o bua ka eng. Mohlanka ea bohlale le ea khabane oa Jehova o iteka kahohle ho re thusa hore re bue ka lentsoe le kopaneng, a hatisa Libibele le lithuso tsa Bibele ka lipuo tse ngata e le hore ho ka fihloa ho batho ka molaetsa o utloahalang. Re ka phetha karolo ea rōna ka ho batla hore re jale ‘litaba tse molemo’ re le sehlopha se kopaneng sa barapeli ba Jehova.—Pesaleme ea 66:1, 2; 68:11.
Na re Tla Ipha Sebaka?
17. Ke boitlhahlobo bofe ba ’nete boo re lokelang ho bo etsa mabapi le karolo ea rōna boboleling?
17 Tabeng ea hore motho ka mong ho rōna a hatele pele, na ebe ho hlokahala hore re tsoelepele haholoanyane nakong eo re e sebelisang boboleling ba rōna? E mong le e mong ho rōna eo e leng mohoeletsi ea phelang hantle ka phuthehong ea se nang boikarabelo ba ho hōlisa bana kapa ho hlokomela baratuoa ba tsofetseng ke hantle ha a ipotsa: Ke eng se nthibelang ho etsa tšebeletso ea nako e tletseng? Na ebe ke ho se ananele ka ho feletseng bohlokoa ba boboleli ba ’Muso? Na ebe ke ho hloka moea oa boitelo? Haeba u sa hlakeloa hantle ke ho bona tsela ea ho sebeletsa joaloka pulamaliboho oa kamehla na u ke ke ua phetla tsela ea tšebeletso ea bopula-maliboho bo thusang bophelong ba hao? Haeba u ka etsa joalo ka sebele u ka hatela pele u le ’moleli oa Mokreste. Ho itlhahloba ka bonnete ho ka ’na ha u senolela hore na u ka etsa’ng mabapi le ho atolosa nako eo u e sebetsang khoeli e ’ngoe le e ’ngoe u sebeletsa likhahleho tsa puso ea ’Muso oa Ntate oa rōna oa leholimo le Mora oa hae.—Pesaleme ea 26:1, 2, 11, 12; Mareka 12:28-34.
18. Ke eng e tla re thusa ho boloka kamano e ntle le Jehova le Kreste Jesu?
18 Jehova Molimo le Jesu Kreste ba re beetse mohlala ka ho hatela pele le ka ho tsoela pele. Hore re etse joalo ka bomong, ho hlokahala hore pele ho tsohle, re be le kamano e ntle le Jehova Molimo. Na re loanela ho ba le letsoalo le letle, ho se mohla re hlokomolohang ka boomo eng kapa eng e ka ’nang ea silafatsa matsoalo a rōna? Na re sebelisa hamolemo tokelo ea bohlokoa ea thapelo, re tiisetsa ho eona? (Ba-Roma 12:12) Na re ipha nako ea boithuto ba botho le ho nahanisisa? Mohlomong ho na le liphetoho tse itseng ka baka la tsela eo re phelang ka eona e le hore re hlokomele lintho tsena tsa bohlokoa, e le hore boboleli ba rōna bo nke sebaka sa pele bophelong ba rōna ka polelo le ka ketso.—Ba-Efese 4:22-24.
19, 20. (a) “Lentsoe la Molimo” leo ho buuang ka lona ho Ba-Heberu khaolo ea 4 ke lefe? (b) “Lentsoe” lena le ipakile le phela le le bohale ho feta sabole e leolitsoeng ntlha tse peli joang, ’me ke hobane’ng ha re tla hlahloba o mong oa mosebetsi o entsoeng ka selemo sa tšebeletso sa 1981?
19 Ke thabo ho tlaleha hore lefatšeng ka bophara, baboleli ba Jehova ba ile ba tšoareha le ho ba mafolo-folo ho bolela litaba tse molemo tsa ’Muso selemong se fetileng. Molaetsa o kene ka botebo bophelong ba batho ba baloang ka mashome a likete. Bophelo ba ba joalo bo fetohile ka tsela e babatsehang ka lebaka la matla a fetolang a Lentsoe la Molimo. Ha ho pelaelo ea hore molaetsa oa ‘litaba tse molemo’ o-oa phela le hore o kenya matla ’me o bohale ho feta sabole e ntlha li peli. (Ba-Heberu 4:2, 12, 13) Hape, ha lentsoe la Molimo le phetha mosebetsi oa lona o motle matsohong a baboleli ba tšoanelehang, lebitso la Jehova lea tlotlisoa ’me muso oa hae o-oa phahamisoa e le oona tšepo feela ea batho.—Ba-Efese 6:17.
20 Ho u nea leseli la hore na Lipaki tsa Jehova li ’nile tsa finyella eng likhoeling tse 12 tsa selemo sa tšebeletso sa 1981, boitsebiso bo latelang bo tla thathamisa se etsahetseng ka nako eo ka lebaka la boiteko bo kopaneng ba Bakreste bana ba fokolang ka palo ba sebetsang linaheng tse 206 le lihleke-hleke tsa leoatle. (Liproverbia 25:25) Rea tiisa hore u tla thabela tlhahlobo ena e potlakileng ea mosebetsi oa baboleli ba Molimo lekholong lena la bo20 la lilemo.
[Setšoantšo se leqepheng la 18]
Re lebelletse ho re Jehova a re matlafaletse tšebeletso ea hae
[Setšoantšo se leqepheng la 19]
Moaparo o motle le mokhabo o motle li lokela baboleli ba Bakreste
[Setšoantšo se leqepheng la 20]
Baboleli ba hatelang pele ba holisetsa bana ba bona “moreneng”
[Setšoantšo se leqepheng la 21]
Baboleli ba holileng ba ’Muso ba hatela pele