Lithapelo Tsa Lipesaleme li ka U Tšelisa
Ke batho ba ’maloa ba tsebileng hore na ho qoela ke ntho e joang ’me ba koenngoa ke hlapi e kholo ’me ba phonyoha hore ba ka ho bolela. Monna e mong ea ileng a etsa joalo ke Jonase. Boemo boo a ileng a iphumana ho bona ruri e bile bo khethollehileng har’a batho. Le ha ho le joalo o bile le hona ho sebelisa maikutlo a boletsoeng ho tse ling tsa Lipesaleme tse bululetsoeng ha a ipiletsa ka thapelo ha a le phihlelong e sa tloaelehang ka ho fetisisa ea hae. Bapisa mantsoe a latelang a Jonase le a fumanoang ho Lipesaleme.
“Ha ke ne ke le mahlomoleng, ka bitsa ho Jehova, ’me a nkutloa.”—Jonase 2:2a.
“Matsoalong a ka ka phahamisetsa mehoo ea ka ho Jehova, ’me ua nkaraba.”—Pesaleme 120:1.
“Ke le mpeng ea nģalo ea bafu ka hoeletsa.”—Jonase 2:2b.
“Jehova, botebong ba boliba ke bitsa ho uena!”—Pesaleme 130:1.
“’Me oa utloa lentsoe la ka.”—Jonase 2:2c.
“Morena utloa lentsoe la ka.”—Pesaleme 130:2.
“Hobane u no u ntahletse bolibeng, bohareng ba leoatle, likhohola tsohle li ne li mpotile kahohle.”—Jonase 2:3a
“Ke tetebetse metsing a boliba; maqhubu a ’ona a nkimela.”—Pesaleme 69:2.
“Maqhubu ’ohle a hao le likhapatseho tsa hao li ne li nkapesitse.”—Jonase 2:3b.
“Meroallo ea hao kaofela le maqhubu a hao ’ohle a fetile holim’a ka.”—Pesaleme 42:7.
“Ka ba ka re: ke lahliloe hole le uena; le ha ho le joalo, ke tla boela ke bone tempele ea hao e khethehileng.”—Jonase 2:4.
“Ka na ka re tsietsing ea ka: Ke tlositsoe pel’a mahlo a hao.”—Pesaleme 31:22.
“Metsi a ne a mpotile ho fihla le moeeng oa ka; boliba bo ne bo mpotile ka hohle, litlama tsa leoatle li ithatetse hlohong ea ka.”—Jonase 2:5.
“Hobane metsi a batla ho nka bophelo ba ka!”—Pesaleme 69:1.
“Ke ne ke theohetse tlase metheong ea lithaba, lefatše le ne le nkoaletse ka mekoallo ea lona ho isa ho sa feleng. Ebile u nyolla bophelo ba ka sekoting, Jehova, Molimo oa ka.”—Jonase 2:6.
“Jehova, u nyolotse moea oa ka nģalong ea bafu, u ntsositse, hore ke se theohele lebitleng.”—Pesaleme 30:3.
“Eanaeare ha moea oa ka o fela ka ho ’na, ka hopola Jehova.”—Jonase 2:7a.
“Ke tšela molumaelo oa ka pel’a hae, ke mo beela tsieleho ea ka.”—Pesaleme 142:2, 3.
“’Me thapelo ea ka ea fihla ho uena, tempeleng ea hao e khethehileng.”—Jonase 2:7b.
“A utloa lentsoe la ka a le sehalalelong sa hae.”—Pesaleme 18:6.
“Ba sebeletsang masaoana a lefeela ba furallana le mohau o ka ba hauhelang.”—Jonase 2:8.
“Ke hloile barapeli ba melimo ea bohata; empa ke beile tšepo ea ka ho Jehova.”—Pesaleme 31:6.
“Empa ’na ke tla u hlabela mahlabelo ka lipina tsa teboho, ke lefe seo ke se anneng.”—Jonase 2:9a.
“U abele Molimo liteboho tsa hao, u lefe likano tsa Mookameli ea phahameng!”—Pesaleme 50:14.
“Poloko ke ea Jehova!”—Jonase 2:9b.
“Poloko e tsoa ho Jehova!”—Pesaleme 3:8.
Joaloka ha Jonase a ne a ka sebelisa puo ea Lipesaleme tse joalo maemong a hae, ho joalo le ho rona. Ke ka lebaka leo, ho sa tsotelleheng hore na boemo ba hao ke bofe hona joale, u ka tšelisoang le ho khothatsoa ke lithapelo tse tlalehiloeng bukeng ea Lipesaleme.