Kamoo u Ka Nkang Bohato!
1. Liboka tsa phutheho tsa Lipaki tsa Jehova li fumantša malapa molemo joang?
KAJENO Ho na le liphutheho tsa Lipaki tsa Jehova tse fetang 43 000 lefatšeng lohle. Li kopana hammoho beke le beke Liholong tsa ’Muso tsa tsona bakeng sa ho ithuta Bibele le liboka tse sa lefelloeng tse bulehetseng bohle ba lakatsang ka tieo ho ntlafatsa tsebo ea bona ea Bibele. Malapa kaofela, le bana ba lilemo tsohle a tla libokeng tsena Holong ea ’Muso. Mona, u tla fumana melemo e meholo ntle ho ho fumana likarabo bakeng sa lipotso tse ngata tsa Bibele tse ’nileng tsa u tsietsa. Ha lelapa lohle la hao le nka karolo libokeng tse joalo ka hora kapa ho feta ka beke le beke, ’me bohle ba fumana tsebo ea metheo ea Bibele, sesosa sa khohlano le ho haella ha puisano ka lapeng se tla fela butle-butle. (Pesaleme ea 119:165) Le tla lumellana haholoanyane le ho tšepana haholoanyane. Na seo hase sona se hlokoang ke malapa?
2. Ho sebelisa metheo ea Bibele ho tla thusa bophelong ba mofuta ofe bo sa tšoaneng, hona ka litsela life?
2 Ho ithuta le ho sebelisa metheo ea Bibele bophelong ba hao ba letsatsi le letsatsi ho tla ipaka e le tšusumetso ho uena maemong a mangata. Ho etsa joalo ho tla nea seithuti se sekolong sepheo, ho ntlafatsa matla a sona a ho amohela taeo le ho rua molemo ka eona. Hona ho tla thusa mosali oa lelapa ho ananela bohlokoa ba karolo ea hae ka lapeng. Ho tla fella ka hore ho be le likamano tse ntle pakeng tsa basebetsi le ka bohlokoa ba hore mosebetsi a hlokomeloe ke monghali. Monghali le eena o tla ananela hore tsela eo a sebetsanang le ba tlas’a hae ka eona, le Jehova o tla sebetsana le eena joalo. Kahoo kutloisiso le tšebelisano li tla nka sebaka sa boikutlo ba boithati le ba boitaolo bo atileng lefatšeng lena la khale.—Jakobo 3:17, 18.
“Ke na le Lōna ka Mehla Eohla”
3. Ke ntoa efe e matla eo bahlanka ba Molimo ba lokelang ho e loana, empa e le ka tiiso efe?
3 Ha melao le mekhoa ea tsamaiso ena ea hona joale e ntse e theoha, ba ratang Molimo le ba latelang Kreste ba ke ke ba theohela bolibeng ba boitšoaro bo tlang ho lokeloa ke kotlo ea Molimo khathatsong e fetang tsohle tse kileng tsa e-ba teng. Lipaki tse tšepahalang tsa Molimo oa ’nete li tla loanela tumelo ka matla li kopane ho sa tsotellehe boiteko ba lira tsa Molimo ba ho li silafatsa le ho li susumetsa hampe. (Bapisa Juda 3, 4.) Bahlanka bana ba Jehova joale ba tšepisitsoe ke Morena ea sa bonahaleng ea khethiloeng ke Molimo hore: “Bonang, ’na, ke na le lōna ka mehla eohle, ho isa bofelong ba lefatše [la hona joale le khopo].”—Mattheu 28:20.
4. Ke maemo afe a fetohileng a ka lebelloang kamorao ho ‘mahlomola a maholo’?
4 Ho ba le bona ho fihlela ka nako eo, ho boetse ho bolela hore Kreste Jesu o tla kenya baphonyohi ba ‘mahlomola a maholo’ boemong bo fetohileng ho hang ba lefatše, boemo boo puso ea Kreste e tlohang leholimong e tla tiisa hore “ha ho sa tla hlola ho senngoa thabeng [’musong] eohle e halalelang ea ka, hobane lefatše le tla tlala tsebo ea Jehova, joale ka ha metsi a aparetse leoatle.” (Esaia 11:9; Tšenolo 7:14) Ho tla beng ho ile ke basenyi ba lefatše le lihlomo tsa bona tse tsoetseng pele tse kotsi! Ho tla beng ho ile ke bahatelli le mahata le babolai! Pusong ea hae ea lilemo tse 1 000, ka tieo empa e le ka bonolo Kreste o tla isa batho ba lefatše ka tsela e isang phethehong ea botho.—Tšenolo 21:4.
5. Ke keletso efe e nakong eo re e fumanang ho Luka 21:36 le 2 Petrose 3:10?
5 Ka potlako, phetoho e ncha ponahalong ea lefatše e tla ba har’a rōna, ka nako eo ba bangata ba sa ho lebellang, hobane ha baa ka ba hlokomela temoso ea Bibele: “Falimehang ke hona, ’me le rapele ka mehla, le tle le neoe tokelo ea ho phonyoha ho tseo tsohle tse tla etsahala, le ea ho ema [le hauhetsoe] pel’a Mor’a motho.” (Luka 21:36) Mofere-fere o moholo o tla etsahala har’a lipuso tse bonahalang le tse sa bonahaleng tsa tsamaiso ena ea lintho e khopo. Petrose, ha a ngola ka pululelo, o lemositse: “Letsatsi la Morena lona le tla tla ka mokhoa oa lesholu la bosiu, ’me ka lona maholimo a tla feta ka lerata le tšabehang, ’me metheo ea lintho e tla felisoa ke ho cha, le lefatše le tla cha ruri le mesebetsi e ho lona.” (2 Petrose 3:10) E, Jehova o tla senola ka ho phethahetseng mano ’ohle a batho ba babe le bademona ha a felisa tsamaiso eohle ea lefatše ka tšoanelo.—Jeremia 25:31-33.
Litemoso tsa Sefefo
6. (a) Lipontšo tsa mehla li lemosa ka eng bakeng sa bokamoso bo haufi? (b) Bohato ba Molimo bo tla ipaka bo senya hakae?
6 Joalokaha lipontšo tsa sebele tsa leholimo li lemosa ka lifefo le tšenyo e akaretsang, le lipontšo tsa mehla li bua ka sefefo sa ho qetela le ho senngoa ho sebakeng se holim’a lefatše. (Luka 12:54-56) Liphello tsa bohato boo ba Molimo e tla ba tse senyang hakae tsamaisong ena e khopo ea puso ea lefatše? Ikahlolele ka mantsoe ana a moprofeta ea bululetsoeng oa Molimo: “Jehova o halefetse lichaba tsohle, o halefetse makhotla a tsona kaofela; o li neetse thohako, o li neetse lefu. Makhotla kaofela a maholimo a tla qhibiliha; maholimo a tla menoa joale ka buka e ngoliloeng, makhotla a ’ona a oele fatše joale ka mahlaku a morara ha a foforeha, le joale ka mahlaku a sefate sa feiga ha a pona.”—Esaia 34:2, 4.
7. (a) Esaia 51:6 e hlalosa bofelo ba tsamaiso ea lefatše joang? (b) Poloko ea Jehova le ho loka li ameha joang?
7 Ha a boetse a profeta ka bofelo ba tsamaiso eohle ea lefatše, ka marena a eona a phahameng a kang linaleli le ba a tšehetsang le ho a lota, moprofeta o re ho Esaia 51:6: “Emisetsang mahlo maholimong, le a ise le tlase lefatšeng; hobane maholimo a tla timela joale ka mosi, lefatše le tsofale joale ka kobo; baahi ba lona ba tla fela joale ka lintsintsi, empa poloko ea ka [ho bolela Jehova] e tla ’ne e be teng ka mehla le mehla, ’me ho loka ha ka ho ke ke ha fela.”
Ho Phethahatsa Kahlolo
8. Litšobotsi tse lemosang tsa molaetsa o ngotsoeng ho Tšenolo 6:12-17 ke life?
8 Joale, Morena ea tlotlisitsoeng, Kreste Jesu a boela a laela moapostola Johanne hore a ngole molaetsa ona oa temoso ka lengeloi la hae: “Ka talima ha e manolla tiiso ea botšelela, ’me bonang, tšisinyeho e kholo ea lefatše ea e-ba teng; letsatsi la e-ba letšo joale ka mokotla oa bolitse, ’me khoeli ea e-ba joale ka mali. Linaleli tsa leholimo tsa oela lefatšeng, joale ka lifeiga tse tala ha sefate sa tsona se tsukutloa ke moea o fokang ka matla. Leholimo la finahana joale ka lengolo ha le phuthoa, ’me lithaba le lihleke-hleke kaofela tsa suthisoa litulong tsa tsona. Marena a lefatše, le ba baholo, le barui, le balaoli, le linatla, le bohle ba ruiloeng, le bohle ba sa ruoang, ba ipata mahaheng le mafikeng a lithaba, ba re ho lithaba le ho mafika: Re oeleng holimo, le re pate pel’a sefahleho sa ea lutseng teroneng le pel’a bohale ba Konyana. Hobane letsatsi le leholo la khalefo ea eona le chabile, ’me ho ka ema mang?” (Tšenolo 6:12-17) Ha ho sera sa Jehova le sa Kreste se tla pholoha!
9. (a) Ke lihlopha life tse sa tšoaneng tse qobelloang ho lumela hore Jehova o-oa li ahlola? (b) Pesaleme ea 83:17, 18 le Ezekiele 39:6, 7 li re bolella eng ka lebaka la kahlolo ee?
9 Mona Bibele e bontša hore linatla tsa lefatše—marena a lichaba, baeta-pele ba sesole, bahoebi ba baholo ba ruileng—le bohle ba ba tšehetsang, ba bitsitsoeng ka molao kapa ba ithaopileng, ba tla tlameha ho thulana le kahlolo ea Jehova. Ha ba na ho ba le mokhoa oa ho baleha! Litokisetso tsa bona tsa boithati le boiteko ba ho boloka tsamaiso ena ea khale li tla hlōleha. Ba tla qobelloa ho bona hore ha ba na mohau oa leholimo. Ho tla arabeloa thapelo ea Pesaleme ea 83:17, 18, hobane lira tsa Molimo ‘li tla fela li hlabiloe ke lihlong.’ Hobane’ng? “Ba tle ba tsebe hore uena, eo lebitso la hao e leng Jehova, u rena u ’notši lefatšeng lohle.” E, e tla ba nako ea Jehova ea ho phethahatsa seo a se boletseng ka ho se pheta ka makhetlo a fetang 60 ka moprofeta oa hae Ezekiele, hore “ba tla tseba hoba ke ’na Jehova.”—Ezekiele 39:6, 7.
Thabo ke ea ba Pholohang
10. Batho ba tla sitoa ho fumana tšireletso hokae nakong ea mahlomola?
10 Ho boloka bophelo ba bona mahlomoleng a fetang ’ohle paleng eohle ea motho batho ba tla matha ho ea ipata. Empa hokae? Ba tla be ba sa tšepa Jehova, empa mekhatlo ea bona. Kahoo, ba tla retelehela mekhatlong ea bona ea batho le ea bopolotiki e busang lefatše joaloka lithaba tse phahameng, joaloka litšiea tsa tsamaiso ea lintho ea hona joale. Ke eona tsela eo ba tla leka ho ipata ka eona, ba batla ho balehela bohale ba Jehova. Boprofeta bo halalelang bo tla phethahala ka ho ke keng ha qojoa. Ho profetiloeng ka lipontšo tsa mehla ho tla ba tšoasa ha ho felisoa ka ho sa feleng ho oela holim’a bahanyetsi bohle ba ’muso oa Molimo.
11. A mang a mabaka a thabo e tla ba afe har’a baphonyohi?
11 Empa leo e tla ba letsatsi le khanyang hakaakang bakeng sa baikokobetsi bohle ba lefatše! Ho tla tšoana le ho phaphama torong e bohloko. Thabo e tla ba ea bao ba tla pholoha. Lerato la chelete, leo e leng “motso oa libe tsohle” tse kang ho qhekella le tlhōlisano e bolaeang, li tla be li felile. (1 Timothea 6:10) Baahi ba tla sebetsa tlas’a maemo a thabileng ’me ba tla nyakallela litholoana tsa mosebetsi oa bona, hobane moprofeta oa Molimo o re: “Ba tla lula e mong le e mong ka tlas’a feiga ea hae le ka tlas’a morara oa hae, ho se ea ba tšosang, hobane molomo oa Jehova oa makhotla o boletse.” (Mikea 4:4) Nahana! Mehloli eohle ea ho ngongoreha le ho tšoenyeha e se e ile ka ho sa feleng! Na re nyakallela ho lebella se joalo?
12. (a) Malakia 4:2 e supa pheko efe? (b) Ke litšitiso life tseo Molimo o tla li tlosa ho batho ka booona?
12 Ho fapana le lebatama le chesang la puso e mpe le khatello ea Satane, molimo oa nketsisane, Jehova oa makhotla o tšepisa hore ‘ba tšabang lebitso la hae ba tla chabeloa ke tsatsi la ho loka le nang le poloko mahlaseling a lona.’ (Malakia 4:2) Ebile ho ke ke ha phekoloa maloetse a ’mele feela, empa le maloetse a kelello le maikutlo a felletseng ka masoabi a mangata hakana nakong e fetileng. Ka tsela efe? Ka ho felisa lefu le tšenyo ea lona har’a lelapa la motho. Hona hona rea ho tiisa ka baka la molaetsa o tšelisang oa Molimo: “Bonang tabernakele ea Molimo e har’a batho; o tla aha le bona; e tla ba lichaba tsa oona, ’me Molimo o tla ba le bona ka sebele sa oona, e be Molimo oa bona. Molimo o tla hlakola meokho eohle mahlong a bona; lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko; hobane tsa pele li fetile.”—Tšenolo 21:3, 4.
13. (a) Bibele e hlalosa tšepo ea tsoho joang? (b) Ke menyetla efe ea “pele eo ba bangata ba tla ba le eona ka nako eo?
13 Leha ho le Joalo, ho thoe’ng ka libillione tsa ba shoeleng ’me ba ‘robetse lerōleng la lefatše’? (Daniele 12:2) Na tšepo e teng bakeng sa bona? E, hobane tumellanong le thuto ea Kreste Jesu, moapostola ea tšepahalang oa hae Pauluse a re: “Ke na le tšepo ho Molimo, ea hore tsoho ea bafu e tla ba teng, ea ba lokileng le ea ba sa lokang.” (Liketso 24:15) Puso ea lilemo tse 1 000 ea Kreste e tla nea ba bangata ho bana ba khutlang lebitleng monyetla oa ho utloisisa ka ho hlakileng ka lekhetlo la pele merero ea Molimo, monyetla oa pele oa ho etsa hore ka boithatelo bophelo ba bona bo lumellane le thato ea Molimo. Eo e tla ba nako ea ho kopana hape ea thabo e kaakang!
14. (a) Ke nako efe ea bohlokoa eo re emeng ho eona kajeno? (b) Lipontšo tsa mehla li lokela ho re susumetsa joang?
14 Ruri re fuoe tokelo ea hore e be kajeno re eme nakong ena ea bohlokoa! Hona joale re bona kahohle lipontšo tse supang phetoho e totobetseng le e akaretsang. Rea utloisisa hore Jehova ho hang ha a kena-kenana le puso ea lichaba ea batho ba baithati le bademona ba oeleng ka nako e telele bo lekaneng e le ho bontša ho hlōleha ha bona ho tlisetsa bohle khotso le nala. Joale lipontšo tsa mehla li senolela mahlo a rōna a lemohang hore ha ho nako e ka senngoang. Ho potlakile hore re nke mehato e tšoanelang mohau oa Molimo. Mantsoe a moapostola Pauluse ho bongata ba bamameli ba mehleng ea boholo-holo Athene a lokela ho re susumeletsa ketsong. O itse Molimo “o bolella batho bohle, naheng tsohle, hore ba bake.” (Liketso 17:30) Ka hore re etse joalo, motheong oa tsebo e nepahetseng, e be joale re ineela ho Molimo, re na le monyetla oa ho bontša Moahloli e moholo ho bohle hore re emela ’muso oa hae o tlas’a Kreste. Empa re tlameha ho nka bohato hona joale, ntle ho tieho, le ha puso ea bosatane e sa ntsane e le holim’a lefatše. Hona ho tla fana ka teko e matla ea bonnete ba lerato la rōna bakeng sa ’nete ea Molimo le ho loka ha oona.—1 Petrose 1:6, 7.
15. (a) Joale u ka arabela lipotso life, molemong oa hao? (b) Joalokaha ho bontšitsoe Pesalemeng ea 146, u tla ea thabong ea sebele ka ho nka bohato bofe?
15 Na u tla balelloa har’a letšoele leo le thabileng la baphonyohi? Na u tla be u eme khahlanong le Satane le ho hloka toka hohle u emetse Molimo le ’muso oa oona ka Kreste ka ho tšepahala ho feletseng ho Molimo? Na u tla be u ile ua kopanela ho lemoseng libopuoa tse kang uena le ho li nea monyetla oa ho ipoloka tsuong ea moloko o khopo? E se eka hoo e ka ba kabelo ea hao e hlohonolofetseng, ’me e se eka lentsoe la hao le ka ikopanya ka ho sa feleng pineng ea teboho e rorisang Jehova, Moetsi oa leholimo le lefatše le leoatle le tsohle tse ho tsona.—Pesaleme ea 146:1, 2, 5, 6.
NA U SA HOPOLA?
□ Kamoo ho kopanela kamehla phuthehong ea ’nete ea Bokreste ho tlisang melemo
□ Keletso ea Jesu ha a phetha boprofeta ba hae ka pontšo (Luka 21:36)
□ Mangolo a supang tekanyo le mabaka a bohato ba Jehova ba kahlolo
□ Litebello tse thabileng tse emetseng baphonyohi le ba shoeleng ba pusong ea mabitla hona joale
□ Bohato bo tiileng bo hlokahalang hona joale ka lehlakoreng la bohle ba nang le tšepo ea ho pholoha
[Setšoantšo se leqepheng la 24]
Tširelo e ke ea e-be teng bakeng sa ba khopo ka Harmagedone