Phehella Lipakane Tsa Moea

“Ke hahamalla ho tse kapele; ke titimela moo ho lekanntsoeng teng, e leng pheo eo re e biletsoang.”—Ba-Filippi 3:13, 14.

1, 2. Ba neng ba kenela tlholisano ea lebelo la maoto mehleng ea boholo-holo ba ne ba iteka hakae, hona hobane’ng? (1 Ba-Korinthe 9:24)

SEMATHI se molemo ha lesela le oa feela se nahana feela ka ho itlhoma nale, se hopola feela ka ho hlōla ’me se tšepile maoto a sona hore se tle se hlōle.” Ke kamoo mongoli oa lipale oa lekholong la pele la lilemo Lucian a ileng a hlalosa matla a ba kenang peisong ea maoto. Mothapo o mong le o mong le potongoane li ne li sebelisoa ho finyella pakane ea pele. Moputso, oo hangata e neng e le moqhaka oa makhapetla, ka tloaelo o ne o nea ea hlōtseng “lithoriso tse hloahloa” bophelong bohle, hobane e mong le e mong o ne a tseba hore ea hlōtseng o tetse “tšenyehelo le mahloko” ho fihlela ‘ho hapuoa moputso.’a

² A sebelisa semathi ho bontša se hlokahalang ho atleha joaloka Mokreste, moapostola Pauluse a khothatsa ba phehellang pakane ea bophelo bo sa feleng hore: “Titimang ka mokhoa oo le tlang ho o nka ka oona [moputso].” (1 Ba-Korinthe 9:24) Pauluse o re o “hahamalla ho tse ka pele” (joaloka semathi seo ’mele oa sona o habileng pele, se habileng qetellong) le ho “titimela moo ho lekanntsoeng teng, e leng pheo eo re e biletsoang holimo ke Molimo.” (Ba-Filippi 3:13, 14) Haeba ‘setitimi’ sa Mokreste se tla fumana moputso, moputso oa bophelo bo sa feleng, ha sea lokela ho haba pakane efe kapa efe ntle ho moo eo se ka lebisang bophelo ba sona ho eona. Na ke ’nete ka bophelo ba hao?

‘Le be le Khopolo Eo’

3. Ho ea ka Ba-Filippi 3:13, Bakreste ba hōlileng tsebong ba lokela ho bontša boikutlo bofe?

³ Ka ho “lebala tse ka morao,” moapostola Pauluse a bontša hore moputso ona ke pakane ea hae ea bohlokoa haholo. “Tse ka morao” a li bitsa “matlakala,” “lithole,” kapa “mantle.” (Authorized Version) Ena e ne e le polelo e matla, ha re nahana seo Pauluse a ileng a se furalla ha a kena peisong ea bophelo. (Bona leqephe 4.) Ha a busa menahano ka mohlala oa hae, Pauluse a phehella: “Ka baka leo, rōna bohle ba phethehileng, a re ke re ikutloeng joalo.”—Ba-Filippi 3:5-8, 15, 17.

4. Ke pakane efe ea pele e lokelang ho finyelloa ke (a) ba thahasellang ba s’o kolobetsoe? (b) ba sa tsoa kolobetsoa?

⁴ Bao moapostola a neng a tobisa lipolelo tsa hae ho bona ba ne ba se ba kene peisong ’me ba se ba phethehile tsebong ea Bokreste. Empa ho thoe’ng haeba u e-so ho kolobetsoe ’me u sa lokela ho kena peisong? Joale u lokela ho sebeletsa sena e le pakane ea pele, hobane ba sitoang ho matha ba ke ke ba fumana moputso oa bophelo bo sa feleng. Leha ho le joalo, haeba u sa tsoa qalisa peisong ea bophelo, ho hlokahala hore pakane ea pele e be ho finyella khōlo ea Bokreste. Hona ho tla bolela ho loanela ho amohela letoto le feletseng la ’nete ea Bokreste le hore matla a hao a temoho ‘a tsebe ho khetha ho hotle ho ho hobe.’—Ba-Heberu 5:14; 6:1.

5. Ke lipotso life tseo re ka li sebelisang ho khetholla boikutlo ba kelello ea rōna ka pakane ea bophelo?

⁵ Empa mantsoe a Pauluse, “rōna bohle ba phethehileng [khōlong], a re ke re ikutloeng joalo,” a bontša hore le bona ba phethehileng khōlong ho hlokahala ba hlahlobe ‘maikutlo’ a bona, hobane ba bang mohlomong ba ka ba le “boikutlo bosele.” (Ba-Filippi 3:15) Ka mohlala, u furaletse lintho life? Na u sa ntsane u li talima joaloka Pauluse? Kapa ho finyella lintho tse bonahalang le tse ratehang lefatšeng ho nkile boholo ba nako ea hao le tlhokomelo? Bonneteng, Mokreste o lokela ho itlhokomela ka seo a se hlokang le ba ntlo ea hae. Pauluse o ne a sebetsa mosebetsi o boima oa ho etsa litente—tsela e fapaneng ho hang le mosebetsi o lakatsehang oo a neng a o etsa pele. Empa joale “moputso” e ne e le ntho e khōlo bophelong ba hae, e seng mosebetsi oa ho iphelisa. Na ke ’nete le ho uena?—Liketso 18:3; 20:33, 34.

Ho Ikoetlisa Boineelong ba Bomolimo

6. Ho ea ka 1 Timothea 4:7, 10, ke boikoetliso bofe bo hlokahalang ho finyella pakane ea bophelo bo sa feleng?

⁶ Keletsong ea hae ho Timothea, moapostola Pauluse a hlokomelisa ka tšoaneleho ea bohlokoa ho bohle ba batlang ho fumana “moputso.” Ntle ho pelaelo a hopotse ka lilemo tsa boikoetliso bo matla bo hlokoang ho limathi, a ngola: ‘U itlhakisetse borapeling. . . . Efela ke ka baka la bona re sebetsang, re loanang.’—1 Timothea 4:7,10.

7. Boineelo ba bomolimo ke eng, ’me re ka hlahloba tšusumetso ea rōna joang?

⁷ Boineelo ba bomolimo ke ho itlamahanya le Jehova ka boeena. Ke seo re leng sona pelong, ’me ho hang ha sea itšetlehe hakaalo ka liketso tsa rōna tse bonoang tsa bolumeli.b Ka baka leo, ho hlokahala hore nako le nako re hlahlobe hore na ke hobane’ng ha re tšoareha tšebeletsong e halalelang. Na ke ka baka la seo ba bang ba tla se nahana ha re sa kopanele? Na ke ka lebaka la ho iketsetsa tlaleho e khahlang batho? Na ke hobane feela batsoali ba rōna ba re phehella? Kapa na ke hobane re batla ho khahlisa Molimo? Ka linako tse ling bohle ho ee ho hlokahale hore re sututsoe habonolo ke ba bang. Sepheo sa botho kapa tokisetso ea phutheho li ka ’na tsa kenya tšusumetso, empa se etsoang se lokela hore kannete e be ‘liketso tse halalelang tsa borapeli.’—2 Petrose 3:11.

8. Ho hōlisa boineelo ba bomolimo, ke eng hape e hlokahalang ntle ho boithuto ba Bibele?

⁸ Ka ho hlokomeloa ‘ka lipolelo tsa tumelo’ ka boithuto ba botho le ba phutheho ba Bibele, motho a ka hōlisa boineelo ba bomolimo. (1 Timothea 4:6) Empa ho hlokahala ho fetang ho phetla maqephe feela. Ipotse: Hona ho mpolella eng ka Jehova? Hona ho lokela ho ama bophelo ba ka joang kapa tsela eo ke talimang ba bang ka eona? Na ke tla sebelisa seo ke ithutileng sona? Neng? Joang? Ho inahana ka matla joalo ke karolo ea koetliso ea rōna e isang boineelong ba bomolimo.

9. Ke phihlelo efe e bontšang bohlokoa ba ho ikoetlisa ka mehla ka boineelo ba bomolimo e le sona sepheo sa rōna?

⁹ Semathi, ha se ntse se ikoetlisa, nako le nako se ntse se lokolisa hore na se ka ntlafatsa joang. Joaloka limathi peisong ea Bokreste re tlameha ho ba hlokolosi hore re se ke ra nka tsoelopele ea rōna ea moea habobebe. Mosali e mong ea neng a bile teng libokeng tsa Lipaki tsa Jehova ho tloha bonyenyaneng, a bile a kopanetse kamehla tšebeletsong ea tšimo, a fumana hore ho hlokahala ho hongatanyana ho feta feela mosebetsi oo o etsoang ka tloaelo oa Bokreste, hobane hamorao o ile a tšoasoa ke boitšoaro bo bobe ba likamano tsa botona le botšehali. Hoba a hlaphoheloe, a re: “Ke ne ke nkile hore ke motho oa moea, empa ka hlokomela hore ke ne ke latetse mekhoa feela. Hoba ke oe moeeng ka qala boithuto ba botho bo matla le ho sebelisa seo ke ithutileng sona, Ka kōpa thuso ea Jehova. Ka baka leo, ka qala ho hōla moeeng, ka lekhetlo la pele ka hōlisa kamano ea botho le eena.”

10. Leihlo le ananelang le ka re thusa joang ho atamela haufi le Jehova?

¹⁰ Hape, ho hlokahala leihlo le ananelang. Ka mohlala, kamor’a ho thabela tholoana e hlabosang, u ka ’na ua busa monahano: ‘Re na le Ntate e moholo hakaakang ea faneng ka ntho e monate hakaale!’ Kapa, hoba u bohe ho likela ha letsatsi ka botle, u ka ’na ua tsota: ‘Ntate oa rōna ke seqapi se sekaakang!’ Litabeng tsa letsatsi le letsatsi itloaetse ho hlokomela bopaki ba paballo ea Jehova. Kahoo u tla atamela haufi haholoanyane le eena.—1 Ba-Thessalonika 5:18; Jakobo 4:8.

‘Hahamalla Pele’—Phetheho E sa Tla

11. Na Mokreste, ka lebaka la lilemo ’neteng a ka qhanolla marapo?

¹¹ Ba bang phuthehong ea lekholong la pele ea Filippi, ka baka la ho ba tseleng ea ’nete ka nakoana, mohlomong ba ne ba qalile ho qhanolla marapo, baikutloa hore ba fihlile boemong bo khotsofatsang ba moea. Pauluse a hlokomelisa ka mohlala oa hae, a re: ‘E seng hore [’na moapostola le Mokreste ka lilemo tse fetang 25] ke se ke nkile moputso [oa leholimo], leha e le hore ke se ke phethehile; empa ke ntse ke [o] phallela . . . Banab’eso, ha e le ’na, ha ke itekanye hore ke se ke hapile.’—Ba-Filippi 3:12, 13.

12. Ke hobane’ng ha Mokreste a lokela ho tsoela pele a loanela ho apara botho bo bocha?

¹² Bophelo ba Mokreste bo ntse bo tsoela pele ka nako eohle. Ho apara botho bo bocha ho hloka ho ‘tsoela pele’ ka linako tsohle. Mefokolo e etsang hore motho a se ke a tšoaneleha e tlameha ho haneloa. (1 Timothea 4:15; 1 Ba-Korinthe 9:27) E mong oa Lipaki o senola hore hangata o ne a ikhohomosa a bile a tenehela ba bang feela. Hoba a eletsoe, a hlokomela hore hona ho ka mo sitisa ho fumana bophelo bo sa feleng. O re: “Joale ka loana ntoa hore ke nahane ka ba bang hantle. Hoba ke iqobelle ka nakoana, ha e-ba bonolo haholoanyane. Ha ke khopeha, ke ne ke rapela: ‘Ha ke rate ho ba ka tsela ena, Jehova. U-ua tseba hore ke loana ntoa, ke kōpa u nthuse!’ A fela a nthusa.” Pakane ea hae ea e-ba ho batla ho hlōla bofokoli bo itseng le ho bontša boholo ba tholoana ea moea oa Molimo. A hlohonolofatsoa, a bile a tšoanelehela ho sebeletsa e le moromuoa. Na u batla ho phehella lipakane tse joalo?—Ba-Galata 5:22-26.

13. Lelapa le leng le ile la finyella pakane efe, hona ba susumelitsoe ke eng?

¹³ A hlokomela hore ha a s’o “phethehe” kapa hore ha a s’o fumane moputso oa bophelo bo sa feleng, Mokreste o ntse a alositse boikutlo ba hae ka tšebeletso. Banyalani ba babeli ba United States ba hlahloba maemo a bona. Ka nako eo (ka 1958) mosali e ne e le tichere ea sekolo se tlase sa mathomo ’me monna e le moemeli oa thekiso ’me a amohela ho feta R46,00 ka hora. Mosali o re: “Eaba re inahana ka ba sebeletsang ntlo-kholo ea lefatše ea Lipaki tsa Jehova ba tetseng menyetla ho sebeletsa moo ba sa lefuoe, e le hore feela ba tlisetse batho ba bang ba kang rōna ’nete.” Ba susumelitsoe ke mohlala oo, ba rekisa ntlo ea bona ’me ba fallela le bana ba bona ba babeli moo bahoeletsi ba ’Muso ba hlokahalang haholoanyane. Ka bobeli ba khotsofalla ho etsa mesebetsi e tlase hore ba phelise lelapa la bona. Bophelo bohle ba bona joale bo ne bo potoloha ho thuseng ba bang, ha ka bobeli e mong le e mong a ne a tsamaisa lithuto tsa Bibele tsa beke le beke tse 15 ka karolelano le batho ba thabelang. Monna o re: “Ra kotula thabo e tebileng eo ho seng chelete e ka e rekang. ’Me haholo ra thabisoa ke ho bona bana ba rōna ba hōla ka lerato le joalo bakeng sa Jehova.”—Ba-Filippi 4:12, 13.

14. Lipakane tse ling tsa botho tseo ba bang ba li finyelletseng ke life?

¹⁴ Bonneteng, hase lelapa le leng le le leng le ka fallang ka tsela eo. Empa a mangata a entse litokiso hore a kopanele haholoanyane mosebetsing oa boboleli, mohlomong a nkela bopula-maliboho bo thusang kapa e e-ba bo-pula-maliboho ba kamehla. Selemong sa tšebeletso sa 1981 ka karolelano khoeling e ’ngoe le e ’ngoe batho ba 151 180 ba ne ba kopanela mosebetsing oa bopula-maliboho—ba bangata ho feta leha e le neng, ba bile ba batla ba feta ba selemo se fetileng ka 10 lekholong! Ba bangata ba entse tšebeletso ea Bethele le ea boromuoa pakane ea bona. Kaha ho sa tsoa buloa likolo tsa katoloso ea Gileade Mexico le Jeremane, ba bangata ba bile le hona ho hahamalla lipakane tse ncha le tse eketsehileng bophelong ba bona ba botho. Ba bang hape ba sebelitse ka thata ho hōlisa lerato le tebileng bakeng sa Jehova ho bana ba bona. Banna ba ineetseng ba hahamalletse mosebetsi oa bohlanka bo sebeletsang, boholo, kapa bolebeli bo tsamaeang, ka ho hōlisa litšoaneleho tse hlokahalang tsa moea.—1 Timothea 3:1-13.

15. Basali ba Bakreste ba ka thusa banna ba bona ho etelletsa pele lipakane tsa bophelo joang?

¹⁵ Basali ba Bakreste ba thusa ka ho etelletsa pele “moputso.” Paki e boletsoeng serapeng sa 13 e bolela hore: “Ha ke sa tla lebala seo mosali oa ka a ileng a se bua ha ke bala ka hore banna ba bararo bao ke ba rutileng mosebetsi oa ka ha re falla e se e le baruihali. A re: ‘Chelete u na le eona kajeno, hosesane e ile. Seo re se etsang ka ho thusa batho moeeng se na le molemo oa ka ho sa feleng.’ Kamehla o nkhothalletsa hore ke se amehe ka ho bokella chelete e ngata hape. Ka thuso ea hae re ile ra kenela mosebetsi oa potoloho ha bana ba rōna ba hōla.” E, basali ba tšehetsang banna ba bona moeeng ba ka ba thusa hore ba fumane ‘mohau oa Jehova.’—Liproverbia 18:22.

Maemo aa Fapana

16. (a) Ha moapostola Pauluse a re ho phutheho ea Bafilippi, “le ne le hloka sebaka,” ho bonahala a ne a bolela eng? (b) Re tseba joang hore Jehova o khotsofalla boiteko ba bahlanka ba hae?

¹⁶ Phutheho ea lekholong la pele ea Filippi e ne e bile mosa haholo ho fana ho Pauluse, empa ha feta nako eo ka eona e sa kang ea fana ka letho le bonahalang. Hobane’ng? Pauluse a ngola hore: “Le ne le hloka sebaka.” (Ba-Filippi 4:10) Mohlomong ho thatafalloa ke linako, maemo a fetohileng, kapa ho se tsebe ha bona hore na Pauluse o hokae ke tsona tse ileng tsa ba thibela ho etsa se lakatsoang ke lipelo tsa bona. Maemo a rōna le oona a ka theola seo re se etsang. Jehova o hlokomela sena. Mohlala ke hore tlas’a molao oa Moshe Jehova o ne a amohela nyehelo ea molato ea seo motho a ka se khonang le haeba e le likomiki tse robeli feela tsa phoofo! (Levitike 5:5-11) Sohle seo Molimo o neng o se hloka ke hore mahlabelo a etsoe ka lintho tse ntle haholo.—Exoda 23:19; Ba-Heberu 13:15, 16.

17. Ke eng se tšoanang le majoe a methang sebaka lebaleng la peiso ho phehelleng ha rōna pakane ea bofelo ea moputso oa bophelo bo sa feleng?

¹⁷ Leha ho le joalo, na kannete re nea Jehova se setle haholo seo re nang le sona? Na ka mehla ho tšoelima ka pel’a pono ea rōna moputso o moholo oa bophelo bo sa feleng? (Bapisa Ba-Heberu 12:1, 2.) Re tla thusoa haholo hore re etse joalo haeba re e-na le lipakane tsa moea tseo re lekang ho li finyella. Tsena li fetoha mehato e tsoelang pele tseleng ea peiso ea rōna. Joalokaha re bone, o mong oa mehato ena ke kolobetso. Na u se u fihlile ntlheng eo? Kholo ea tsebo ea Bokreste eona ho joang ka eona, ho amohela kannete letoto lohle la ’nete ea Bokreste, u se u sa belaele, u sa botse, u sa qholotse khopolo e ’ngoe le e ’ngoe e ncha? Hona na u ithutile ho etsa liqeto tsa tsatsi le leng le leng motheong oa melao ea motheo ea Bibele? Haeba ho joalo, u nkile mohato o mong o moholo. Na litholoana tsa moea li metse ka botebo bothong ba hao? Na tšebeletso ea tšimo ke ea bohlokoa haholo ho uena joaloka ho ea re beetseng mohlala, Jesu Kreste? Hona ho thoe’ng ka lebaka la hore na ke hobane’ng ha re etsa lintho? Na u susumetsoa ke boineelo ba ’nete ba bomolimo? Le hoja Timothea e ne e le moholo ka phuthehong ea Bokreste, o ile a eletsoa hore ho hlokahala hore a ikoetlise ka sepheo seo. Na re finyella tse ling ho lipakane tsena le ho hahamalla tse ling, kamehla re talimile moputso o moholo oa bophelo bo sa feleng? Na kannete ‘re hahamalla tse ka pele’?

18. Ke meputso efe eo re e fumanang hona joale ka ho hōlisa boineelo ba bomolimo?

¹⁸ Meputso ea boiteko bo joalo e mengata. Joalokaha Pauluse a itse boineelo ba bomolimo ‘bo na le pallo ea bophelo ba joale’ (1 Timothea 4:8) O akarelitse ho khotsofala hoo re ka bang le hona hona joale ho sa tsotellehe mathata: “Re tseba masoabi, empa thabo ea rōna ke khabo e sa timeng. . . . Re ruisa ba bangata ka matlotlo a ’nete. Ha re na leha e le peni, empa leha ho le joalo re na le sohle se hlokahalang.”—2 Ba-Korinthe 6:10, Phillips.

19. Ke hobane’ng ha e mong le e mong ho rōna a lokela ho ela hloko hore na o matha joang patlong ea bophelo bo sa feleng?

¹⁹ Joale haufi re tla qetella re fihletse pakane ea bofelo—‘bophelo bo tlang ho tla.’ Pauluse o ne a ka bua tjena ha a lebelletse moputso oa hae oa leholimo: “Ke mpa ke lekanya hore mahlomola a mehla ea joale ha a tšoanele ho lekanngoa le khanya e tlang ho bonahala ho rōna.” (Ba-Roma 8:18) E, matla ’ohle a sebelisitsoeng peisong e tla ba lefeela ha a bapisoa le mahlohonolo a moputso o moholo oa bophelo bo sa feleng, leha e le leholimong kapa lefatšeng. Kahoo mahlo a hao a tsitse lipakaneng tsa moea. Titimela ho hlōla. U titime joalokaha eka bophelo ba hao bo itšetlehile ka hona—hobane ho joalo!—Pesaleme ea 37:3, 4, 11, 29.

□ Pakane ea bohlokoa eo Mokreste a ka e loanelang ke efe, ’me re lokela ho ba le ‘boikutlo’ bofe ka ho e finyella?

□ Re ikoetlisa joang re habile sepheo sa boineelo ba bomolimo?

□ Lipakane tse ling tsa mathomo ke life ha re loanela pakane ea bophelo bo sa feleng?

□ Na ho na le mohla Jehova a sa khotsofalleng boiteko ba rōna tšebeletsong ea hae e halalelang?

[Mongolo o botlaaseng ba leqephe]

[Setšoantšo se leqepheng la 8]

Ho na le lipakane tsa mathomo tseleng ea rōna ea Bokreste ha re loanela pakane ea qetello ea bophelo bo sa feleng

Boineelo ba Bomolimo

Khōlo Moeeng

Kolobetso

Tšebeletso e Eketsehileng

Litholoana tse Eketsehileng tsa Moea o Halalelang