Na Molimo o Boloka Nako?

E LE eena Mohloli oa liketsahalo, Jehova Molimo ke Moetsi oa nako. Ntlha ena e ka hlokomeloa ka ho bala buka ea pele ea Bibele. Ho Genese 1:1, 14 rea bala: “Tšimolohong, Molimo o no o hlole maholimo le lefatše. Eaba Molimo o re: Maseli ha a be teng sebakeng sa maholimo, ho arohanya motšehare ho bosiu, e be lipontšo tsa linako tse beiloeng, le tsa matsatsi, le tsa lilemo.”

Kahoo Jehova a kenya tšebetsong lisupa-nako tse khōlō—lefatše le bilikang litšieng tsa lona, khoeli e potang lefatše, ’me ka bobeli li pota letsatsi ho re nea matsatsi, likhoeli le linako tsa selemo. Lihloliloeng tsena tsa leholimo li re thusa ho tseba hore na ke nako mang, ntle ho tšenyehelo kapa boikarabelo ho rōna hore e be lia tsamaea kapa hore re li lokise.

U Seli ka Nako ka Lebaka Lefe?

Jehova o seli ka nako ’me o batla ho be joalo le ka rōna. Re entsoe hore re be ka tsela eo. Empa hase bahlanka bohle ba Molimo ba bontšitseng bohlale tšebelisong ea bona ea nako. Ba bang ba hlokomolohile ho ikutloa ka matla ka kemiso ea nako bakeng sa liketsahalo tsa Molimo.

Ka mohlala, lekholong la bosupa la lilemo BCE, batho ba khethiloeng ba Molimo ba ne ba se na lebaka la hore e be ha ba tsebe hore na ke nako efe. Moprofeta Jeremia a ngola: “Ha e le mokotatsie, e tseba nako ea eona, leholimong, le leeba, le lefokotsane, le mohololi, li ’ne li lemohe nako ea ho boela ha tsona; empa sechaba sa ka, ha se tsebe tokelo ea Jehova.” (Jeremia 8:7) Liphoofolo tse sebetsang ka lefutso la tlhaho li tseba ha e le nako ea hore li nke bohato ka liphetoho tsa linako tsa selemo. Empa Baiseraele, ho sa tsotellehe boipiletso bo phetoa-phetoang likelellong tsa bona le lipelong tsa bona, ba ne ba sa batle ho tseba hore ke nako ea Molimo ea ho ba ahlola, kapa, ho e-na le hoo, ba ne ba sa tsotelle.

Ho joang ka rōna kajeno? Na rea tseba hore na ke nako efe? Kamehla Jehova o bile le nako eo a e khethetseng ho bontša thato ea hae le kahlolo. Puong ea moapostola Pauluse ho Baathene, o itse: “Molimo ha o sa lesitse litšiu tseo tsa ho se tsebe hore li fete, joale, o bolella batho bohle, naheng tsohle, hore ba bake. Hobane o beile letsatsi le leng leo o tla ahlola lefatše ka lona ka ho loka, ka monna eo o ’meetseng hoo, ’me o lokiselitse bohle tšepiso ea teng ka ho mo tsosa bafung.’’ (Liketso 17:30, 31) Na u lumela hore re atametse ‘letsatsi leo la kahlolo’? Kapa na u nahana hore nako e sa le hole haholo?

Lekholong la pele la lilemo ho ile ha fihla nako ea hore monna eo Molimo o neng o tla mo sebelisetsa ho ahlola lefatše a hlahe. Ho fihla ha hae e ne e le nako ea bohlokoa haholo kemisong ea Molimo ea nako, joalokaha Bibele e re: “Empa nako ha li phethehile, Molimo o romile Mor’a oona, ea tsoetsoeng ke mosali, a hlahetse pusong ea molao.” (Ba-Galata 4:4) Mora oa Molimo, Jesu Kreste, o fihlile ka nako e beiloeng hantle.

Ho tla hona ha Kreste lekholong la pele la lilemo ho ile ha tšoaea nako ea kahlolo bakeng sa motse oa Jerusalema. Ka selemo sa 33 CE Jesu a lemosa baahi bao ka timetso e tlang e tsoa mabothong a sera. A re: “Ba tla u lihela fatše, uena le bana ba hao ba ho uena, ’me ba ke ke ba lesa ha hao lejoe holim’a lijoe le leng; hobane ha ua ka ua tseba nako eo u etetsoeng ka eona.” (Luka 19:44) Lilemo tse mashome a mararo a metso e supileng hamorao boprofeta boo ba fetoha ’nete. Haeba u ne u phela ka nako eo, na u ne u tla tseba hore na ke nako efe? Na u ne u tla tseba hore ke nako ea Molimo ea hore o rōmele Mora oa oona lefatšeng le ho liha kahlolo holim’a Jerusalema?

U ne u tla ho tseba joang? Ka ho tšoanang, u ka tseba joang hore na ke nako efe kajeno? U ka bolela joang hore na re atametse ‘letsatsi lela la kahlolo’ le hlileng la boleloa kapa che?

Ho Ea Kemisong ea Nako ea Molimo

Joalokaha ho hlokahala hore re bone kemiso ea nako e re bolellang ka nako ea ho fihla le ea ho tsamaea bakeng sa maeto a rōna a terene kapa sefofane, ka ho joalo ho hlokahala hore re be le kemiso ea nako ea Molimo ho tseba hore na o batla ha re etsa eng hona neng. Bibele e sebeletsa e le kemiso ea Molimo ea nako. Ka ho ea Bukeng ena re ka tseba nako e beetsoeng liketsahalo tse amang batho. Ka mohlala, Bajode bohle ba lekholong la pele la lilemo ba ne ba tlameha e be ba itokiselitse ho tla ha Kreste. Hobane’ng? Hobane Molimo ka moprofeta oa oona Daniele, o ne o hlile oa bolela hore Messia, kapa Motlotsuoa, o tla fihla ka selemo sa 29 CE. (Daniele 9:24-27) Ha e le hantle, Bajode ba lekholong la pele ba neng ba tseba boprofeta ba Daniele ba ne ba emetse ho hlaha ha hae ka selemo sona seo. (Luka 3:1, 2, 15) Seithuti sa Mojode Abba Hillel Silver o ngolile: “Messia o ne a lebelletsoe hoo e ka bang kamorao ho lilemo tse mashome a mabeli a metso e mehlano lekholo la pele la lilemo C.E. le qalile.”

Le kajeno ho ka ’na ha boleloa joalo. Ka ho sebelisa kemiso ea nako ea Bibele re ka lekanyetsa hore hona joale ke nako ea hore Kreste a be teng a sa bonahale e le Morena.a Ka baka leo, ho tla a tlile ho tla phethahatsa kahlolo ea Molimo holim’a ba khopo le ‘letsatsi la hae la ho ahlola lefatše ka ho loka’ la lilemo tse 1 000 li haufi haholo.—Liketso 17:31; Daniele 4:10-17; Mattheu 24:7-31; Luka 21:24; Tšenolo 20:4-15.

Hore na re Talima Nako Joang ho Angoa ke Tumelo

Lilemong tse fetileng tse makholo a leshome le metso e robong ba ileng ba sitoa ho ananela kemiso ea Molimo ea nako le ba ileng ba hloka mamello ka nako eo Jehova a e khethileng bakeng sa Mora oa hae hore a fihle ba ile ba fosoa ke mahlohonolo a tsotehang. Ho joalo le kajeno, haeba re sola-sola ’me re botsa, “E kae pallo ea ho tla ha hae?” le rōna re tla fosoa ke mohau oa Molimo ka baka la ho se tsebe hore na ke nako efe. (2 Petrose 3:4) Ka baka la tikoloho eo ba neng ba le ho eona, moea ona oa lithoabise o ne o solla har’a phutheho ea Bakreste ea lekholong la pele ea Efese ’me oa bea kotsi ea sebele tumelong ea bona. Na u fumana tumelo ea hao e fokola ka baka la ho hloka mamello ka kemiso ea Molimo ea nako? Re ka ithuta eng ka keletso ea moapostola Pauluse ho Baefese?

Bagerike bao e seng Bakreste ba Efese ba ne ba sa kholoe hore nako e tsamaea e lebile pele. Likolo tsa bohlale ba Bagerike li ne li ruta hore nako e-ea potoloha. Liketsahalo lia itlisa, ke hore, bophelo bo ka bilika ho pheta ntho e le ’ngoe. Haeba motho a ne a ka senya hampe nako ea hae potolohong e ’ngoe ea bophelo, o ne a ka e fumana hape ha lebili le phethoha hape. Monahano oa mofuta ona o ne o ka kenya ho Bakreste ba Efese boikutlo ba ho se tsotelle kemiso ea Molimo ea nako bakeng sa liketsahalo, ho akarelletsa kahlolo.

Hape, Bakreste ba Efese ba ne ba likiloe ke mokhoa oa bophelo o ichebetseng menyaka feela, o ba hatella ka matla hore ba khatholohe matsoalong ka kemiso ea Molimo ea nako. Hore ba lumele hore ke ho bohlale ho phelela kajeno ka ho kena-kena bophelong ba menate le ho ikhotsofatseng, ho ne ho ke ke ha ba khetholla ho liphoofolo tse sa tsebeng nako e fetileng kapa e tlang, tse itsebelang kajeno feela. Haeba ba batla ho fuoa bokamoso, ho ne ho hlokahala hore ba tsebe ’nete ena ea pale: “Hobane lea tseba hore mofebi, leha a le mong, le ea litšila, le ea ratang leruo, e leng motho ea sebeletsang melimo ea bohata, ha ba na kabelo ’musong oa Kreste le Molimo.”—Ba-Efese 5:5.

Litemaneng tse latelang, Puluse o lemosa Bakreste bao hore ba hlokomele ka botlalo hore na ke nako efe. Ho seng joalo, ba ka ’na ba phoqeha ba nahana hore ba na le nako e lekaneng ho kena boitšoarong boo e seng ba Bokreste ba be ba tsoe ho bona ba sa haelloa ke letho moeeng. O itse: “Motho a se ke a le thetsa ka lipolelo tsa lefeela; hobane ke ka baka la ntho tseo bohale ba Molimo bo tlelang bana ba ho se lumele. Le qamake se ka khahlisang Morena.” (Ba-Efese 5:6, 10) Kahoo, ha ho talingoa kemiso ea Molimo ea nako, boitšoaro ba rōna bo hlile bo ama nako ea rōna e tlang.

Baefese bao ba ne ba ka honyella ho amoheleha ho Molimo joang? Rōna re ka ho etsa joang? Ka ho ‘lopolla linako.’ Ka ‘ho tsebisisa se ratoang ke Molimo.’ (Ba-Efese 5:16, 17) Hona ho ka etsoa neng? Hona joale! Hobane’ng? Hobane re ke ke ra hlola re e-ba le monyetla o mong oa ho etsa joalo. Ho tloha ka 1914 ho etsahetse liketsahalo tse ngata tse boletsoeng e sa le pele ka Bibeleng tse tšoaeang ena e le ‘mehla ea qetello,’ kaofela li bonoa ke moloko o le mong, li re nea ponahalo ea hore nako e potlakile. Ha re batle ho fumanoa re se na nako ea ho haha kamano e ntle le Jehova le Moahloli eo a mo khethileng, na ha ho joalo?—Mattheu 24; Mareka 13; Luka 21; 2 Timothea 3:1-5; 2 Petrose 3:10, 11.

Thuso ea ho ba Seli ka Nako

Molimo o lokiselitse hore ho be le sehlopha sa batho ba ineetseng le ba tlotsitsoeng ka moea ho re thusa ho ba seli ka nako. ‘Mohlanka enoa ea khabane ea bohlale’ o re fepa ka “lijo nakong ea teng” ’me o re khothalletsa hore ‘re ’ne re eketse ka mehla ho sebeletsa Morena.’ (Mattheu 24:45; 1 Ba-Korinthe 15:58) Ka tsela ena re ka ba molemo tšebeletsong ea Molimo hona joale le kamoso. Empa ho tla re hloka ho hong. Nako. Bohle re na le nako e tšoanang beke le beke—lihora tse 168. E be u sebelisa nako ea hao hamolemo hakae? Na ho bontša hore kannete u-ua tseba hore na nako ke efe ponong ea Molimo?

Ba bangata ba tla re, ‘Ha ke na nako.’ Ke ka baka leo u tlamehang ho utloisisa ho lopolla nako likarolong tse ling tsa bophelo ba hao. Mesebetsi ea boithabiso, ’mino, boithabiso, mosebetsi oa nama, kaofela li tseka nako ea hao. ’Me lisebelisoa tse ncha, tse kang lipapali tsa TV, li ka fetoha baji ba leqhoko ba nako ea hao. Le hoja ho ka ba monate kapa ea e-ba ho hlokahalang hore u be le nako eitseng boikhathollong bo hahang, na bophelo ba hao bo bontša teka-tekanyo e tšepahalang ea nako ea hao le seo u se tsebang ka kemiso ea Molimo ea nako?

U rata ha ho uena ho sebetsa mantsoe a moroki ofe?

Ana:

“Na u re ho tsamaea nako? Che!

Jo, nako e eme, ke rōna ba eang.

Kapa ana:

“Ke tla u boka ka matsatsi ’ohle, ke rorise lebitso la hao ka mehla le mehla, le ka ho sa feleng.”—Pesaleme ea 145:2.

Hore na ke afe ho tla itšetleha ka hore na u hlile u hlokomela hore na ke nako efe.

[Mongolo o botlaaseng ba leqephe]

[Lebokose le leqepheng la 7]

BOPAKI BA HORE KRESTE O TENG E LE MORENA OA LEHOLIMO

Na u lemohile latelang

Ntoa ea Lefatše Lohle Mattheu 4:3, 7

Bonokoane bo Atang Mattheu 24:12

Litlala Mareka 13:8

Boboleli Lefatšeng Lohle Mareka 13:10

Litšisinyeho tse Lefatše Luka 21:11

Mafu a Akaretsang Luka 21:11

Ho Tšaba Nako e Tlang Luka 21:26

Boithati 2 Timothea 3:2

Ho rata Menate 2 Timothea 3:4

[Litšoantšo tse leqepheng la 5]

Tsebiso ea nako ea lifofane e bolella baeti ka nako ea ho fihla le ea ho tsamaea

Kemiso ea nako ea Bibele e re tsebisa hore na liketsahalo tsa Molimo li tla ba neng