Khutlisetsa Pelo ea Hao ho Jehova
Na u hōlisitsoe ke batsoali bao e leng Lipaki tsa Jehova? Na hona joale, leha ho le joalo, ha u mafolo-folo hantle tseleng ea ’nete ho feta pele? Haeba ho joalo, boitsebiso bo latelang bo lokela ho u khahla ka ho khethehileng.
HO BILOHA maikutlo a loantšanang pelong ea batho ba bacha ba bangata. Ka mohlala, mohlomong u batla bolokolohi bo bongatanyana. U phetlehetse mekhoeng ea bophelo e bonahalang e thabisa empa mohlomong e thulana le seo u se rutiloeng. Ka linako tse ling lintho tse ntle tse ithutiloeng bongoaneng lia hlokomolohuoa. Mohlomong hona ho u etsahalletse, le haeba batsoali ba hao e le bahlanka ba Jehova Molimo.
Mona le mane, bacha ba suthela hole le phutheho ea Bokreste. Haeba ho bile joalo ka uena, ntle ho pelaelo u hopola tse ling tsa lintho tseo u ithutileng tsona ka Jehova. Ka nako e ’ngoe mohlomong u kile ua ikutloa u le haufi le Molimo ’me u mo rapela ka mehla. Ntle ho pelaelo, Jehova o ne a u hlokomela joalokaha a ne a etsa batho ba hae ba boholo-holo, Baiseraele. A tšoantša sechaba le ngoana e monyenyane, Jehova a re: “’Na, ke rutile Efraime [ke hore, Baiseraele] ho tsamaea, ke ntse ke mo tšoere ka matsoho, . . . Ke ne ke ba hule ka khoele tsa batho, ka khoele tsa lerato.” Hosea 11:3, 4.
Ho ama maikutlo hakaakang! Ngoana e monyenyane ea thekeselang a thusoa ho tsamaea ka likhoele tse mo tsamaisang tse tšoeroeng ke motsoali ea lerato! Ka ho itšoarella ho tsona, ngoana o ne a ka tšehetsoa ’me a qoba ho oa. Joale, na kameho ea Jehova e ne e se bonolo joalo ka uena? Ka sebele lerato la hae le ile la totobala tlhokomelong eo u neng u e fumana ho batsoali ba hao ba barapeli kapa ba bang Holong ea ’Muso. Na tlhokomelo e joalo e ke ke ea tšoantšoa le hore u tsamaisoa ka “khoele tsa lerato”? Ka ho totobetseng, batsoali ba hao le baholo ba phutheho ba ne ba lakatsa ho u thusa ho qoba hore u intše kotsi maikutlong, ’meleng le moeeng. Ba ne ba batla ha u hlola tseleng ea ’nete.—Bapisa 3 Johanne 2-4.
Mohlomong hona joale hoo e se e le ntho eo u e hopolang feela. Ha u hetla morao, mohlomong u nahana ka mabaka a mangata a hore na ke hobane’ng ha u suthile tseleng ea ’nete.
Pelo e Lelerang
Ke hobane’ng ha Baiseraele ba bangata hakana ba boholo-holo ba ile ba suthela thoko le borapeli ba ’nete? Hobane ‘pelo tsa bona ha lia ka tsa khomarela’ Jehova. (Pesaleme 78:37) Ho rata lintho tse ling ho ka ’na ha lelekela ntle lerato bakeng sa Molimo. Ho ea ka Jesu Kreste, lipelaelo tsa lefatše lena, matla a leruo le “menyaka ea bophelo” li ka bupetsa lentsoe la Molimo le kileng la lengoa pelong.—Luka 8:14; Mareka 4:19.
“Menyaka ea bophelo” bona e etsoa hore e ipiletse haholo ke bao re kenang sekolo le bona, hammoho le ka baphatlalatsi le mecha ea boithabiso. Ka mohlala, mocha e mong, eo batsoali ba hae ba neng ba mo rutile Lentsoe la Molimo ho tloha bonyenyaneng, a sutha tseleng ea ’nete ha a le lilemo li leshome le metso e robong. O lumela hore: “Ke ne ke batla ho utloa hore na bophelo bo seng le hore ke etse lintho tseo bacha ba bang ba neng ba entse hore li bonahale li thabisa. Eaba ke ikhirela kamore ’me ka qala ho laetsana le ho ea meketeng e mengata feela hore ke thabe. Kapele ka khaotsa ho ea libokeng tsa phutheho. Ha hoa nkuka nako pele ke lahla boitšoaro ba Bibele.”
Bonneteng, hase bohle ba suthelang thoko le ’nete ba amehang liphosong. Ba bang ba felloa feela ke thahasello ea ho rapela Jehova. Mohlomong ho ne ho se mohla ba kileng ba etsa ’nete hore e be ea bona. Mohlomong mohlala o mobe oa batsoali kapa ho se hlokomeloe ho tlatselitse tabeng ea hore ba se ke ba nka ’nete ka botebo. Joale lintho tse kang mathata a lelapa, ho iphumanela tsa bophelo, kapa takatso e matla ea ho tsoela pele mosebetsing oo motho a ikhethetseng oona li tletse lipelong tsa bona.
Empa na u ka thaba ka sebele haeba u sa re letho ka Moetsi oa hao? Na ho latela se lakatsoang ke pelo ea hao ho tla isa thabong ea ’nete?
Pelo—‘Ha ho se Mano ho e Feta’
“Pelo e mano ho fetisa tsohle, e bolile hampe; e ka tsejoa ke mang?” (Jeremia 17:9) E, pelo ea hao e ka u lahla—hore u tsoe kotsi. Hona ho ile ha etsahala ho moroetsana ea boletsoeng pelenyana. A ipolela hore: “Qalehong ha ke ne ke etsa eng le eng eo ke e batlang, e ne e le monyaka. Empa hamoraonyana, le hoja ke ne ke ntse ke tletse cheseho, botebong teng ke ne ke sa thaba. Ho ne ho bonahala ho e-na le ho haellang. Thabo e ne e se ea sebele. Ka hlomoha.”
Ba bangata ba ’nileng ba suthela thoko ka ho tšoanang ba ’nile ba lumela hore ba fumane thabo ‘eo e seng ea sebele.’ Ka baka la bohloko bo bileng ka ho bona le lefeela le ileng la hlahisoa ke ho latela lipelo tsa bona tse itaelang hona joale ba tseba hore ‘ha ho se mano ho e feta.’—Today’s English Version.
Ha u sheba bophelo ba hao, na u ikutloa ka tsela eona eo? Na lintho tseo u kileng ua li nka e le tse thabisang pelo ea hao li hlile tsa u etsa hore u ikutloe hore u phethile ho hong? Na tsela eo u phelang ka eona e u tliselitse khotso ea kelello le boitlhompho?
Ha u se khotsong ka bouena, u ke ke ua thaba kannete ho hang. Ha pelo ea hao ‘e le bohloko,’ e ke ke ea phekoleha leha u ka tšeha hakae. (Liproverbia 14:13) Ka mohlala, mocha e mong a kheloha melao ea Bibele eo a neng a e rutiloe bophelong bohle ba hae ha a le lilemo li leshome le metso e robeli. Empa leha ho le joalo, ha a ntse a latelletse bophelo ‘bona bo sa reng letho le bo tletseng cheseho,’ o hopola hore: “Ka qala ho inahana ka nako e tlang. Ho tla etsahala joang ka ’na haeba nka qophella tsela ea ka lilemo tse hlano? Ho hang ka sitoa ho tsoela pele ho ikholisa hore ke thabile. Ke se na tšepo ea letho, ka ikutloa eka ke ’na ngoanana ea sulafaletsoeng ho feta bohle lefatšeng!”
Kahoo, he, haeba u furaletse tsela ea ’nete, u ka boetse ua fumana thabo ea ’nete joang? Mopesaleme Davida o fane ka tlhase ha a kōpa Molimo: “Jehova, mpontše tsela ea hao, ke tle ke tsamaee ’neteng ea hao! u tlamelle pelo ea ka eohle le tšabo ea lebitso la hao!” (Pesaleme ea 86:11) Davida o ne a tseba hore pelo e arohaneng ho seo e se ratang ke kotsi e khōlō. Ka baka leo, pelo ea hao e lokela ho lokisoa e le hore matla a eona a ka lebisoa nthong e le ’ngoe—‘tšebeletso e halalelang’ ho Jehova le tšabo ea pelo eohle ho Molimo oa rōna. (Ba-Roma 12:1, 2) Empa boemo bona bo lakatsehang ba pelo bo ka tlisoa joang?
Pelo ea Hao e ka Fetoloa
Pele ho tsohle, u tlameha ho hlokomela hore pelo—pelo ea hao—e ka fetoloa. Ka batho ba hae ba itaelang, Jehova a re: “Ke tla ba nea pelo e le ’ngoe [e kopaneng], ke be ke bee moea o mocha ka hare ho bona; ke tla ntša pelo ea lejoe nameng ea bona, ’me ke ba nee pelo ea nama; hore ba tle ba tsamaee ka likomelo tsa ka, ba boloke melao ea ka, ba e etse; e tle e be sechaba sa ka, ’na ke be Molimo oa bona.” (Ezekiele 11:19, 20) Ke mosa o lerato o mokaakang oa Molimo! Nahana—lipelo tse thata joaloka lejoe li fetoha tse bonolo, tse sebetsang hantle, tse utloisisang ho amohela se fetisoang ke moea.
Leha ho le joalo, na Jehova o tlisa phetoho ee ka mohlolo? Kapa, uena u nka karolo ho see? U lokela ho iteka ho lokisetsa ka pelong ea hao lintho tseo u li hopolang ka Jehova. (Liproverbia 16:1) Nahanisisa ka taba ena. Eketsa tsebong ena. U qetelletse neng ho nka Bibele kapa ho ithuta thuso e lokiselitsoeng ke phutheho ea Jehova? Ntle ho pelaelo u na le tse ling tsa libuka tsena lapeng kapa u tseba moo u ka li fumanang teng. Ke eng ha u sa qalise ho li bala ka tieo? Ho nka bohato ka tsebo e nepahetseng ea Bibele ho ka fetola pelo ea hao le tsela eo u phelang ka eona.—Liproverbia 2:10-14.
Ha u bala Bibele ka boeona, mohlomong u tla fumana Pesaleme ea 25 e tšelisa ka ho khethehileng. Nahanisisa ka lithapeli tse joalo tse eang ho Jehova tse kang “u lebale libe tsa bocha ba ka le litlolo tsa ka!” le “u ntšoarele bokhopo ba ka, leha bo le boholo.” Hape u nahane hore na ke ho tšelisang hakaakang ho tseba hore “lekunutu la Jehova ke la ba mo tšabang.”—Pesaleme ea 25:7, 11, 14.
Leha ho le joalo, thuto ea Bibele e joalo ha e-ea lokela ho ba ho rua lintlha feela. Re lokela ho ba le boikutlo bo tšoanang le ba mopesaleme, ea itseng: “Ke boloka lentsoe la hao [Jehova] ka pelong ea ka, hore ke se ke ka u siteloa.” (Pesaleme ea 119:11) U ka “boloka” lentsoe la Jehova e le la bohlokoa joang? Hoba u bale Bibele le libuka tse amanang le eona tsa “mohlanka ea khabane, ea bohlale,” ipotse: Keletso ee ke ea bohlokoa hakae? Na e tla nthusa ho khahlisa Jehova le ho qoba masisa-pelo a sa hlokahaleng? Nka e sebelisa joang? Na keletso ee e sebetsang ha e bontše hore Ntate oa ka oa leholimo o tseba se molemo haholo bakeng sa ka?—Mattheu 24:45-47.
Ha u fihlisa molao oa Molimo pelong ea hao, maoto a hao a ke ke a “thella.” (Pesaleme ea 37:31) Leha ho le joalo, ho khutlisetsa pelo ea hao ho Jehova, ho tla hlokahala hore u thusoe ke paki e hōlileng tsebong ea Jehova. E, mohlomong ho tla hlokahala hore e mong a “qale qalong” a u rute “litaba tsa bonyenyane, tseo taba tsa Molimo li qaloang ka tsona.” (Ba-Heberu 5:12) Baholo ba phutheho ba tla thabela ho thusa. Ke eng ha u sa ikopanye le bona?
Hlokomela Litloaelano
Batho ba ka sekamisetsa habonolo ‘pelo ea hao’ botleng kapa bobeng. (Bapisa 1 Marena 11:3, 4.) Mohlomong ke tšusumetso ea boitšoaro ba bakhotsi ba hao kapa “ho bebera” ha bona ho entseng hore u suthele thōko le ’nete. Batho ba joalo ba ka ’na ba re: “’Na ke nonyana e fofelang moo e ratang! Ua itšoara ka thata hakaale molato ke eng?” Empa na ka ’nete ba lokolohile? Ho thoe’ng ka mekhoa e meng eo e seng ea Bokreste eo ba leng bohlankeng ba eona ka mohlomong? (Bapisa 2 Petrose 2:18, 19.) Na batho baa ba u thusa hore u etse lintho tse tla tlisa thabo ea nako e telele? Che, baa u horeletsa. Kahoo lokoloha metsoalleng e joalo u batle batho ba hōlileng tsebong, ba “bohlale” mahlong a Molimo!—Liproverbia 13:20; 1 Ba-Korinthe 15:33.
‘Molimo o Moholo ho Pelo ea Hao’
Mocha e mong ea ileng a ameha mekhoeng eo e seng ea Bokreste ha a le lilemo li leshome le metso e robeli o itse: “Lebaka le leholo leo ke sitiloeng ho khutlela ’neteng ka lona ke hobane ke ne ke ikutloa ke sa tšoanelehe. Ke ne ke lumela hore sohle seo ke se entseng se sebe hoo Jehova a ke keng a ntšoarela le ka mohla kapa a nkamohela hape.” Le hoja pelo ea hae e ne e mo tsoa, kamorao ho nako a bona mohau oa Molimo. Maemong ana, mangolo a kang 1 Johanne 3:19, 20 e ka ba a tšelisang hakaakang! Moo rea bala: ‘Ke ka hoo re tsebang hobane re ba ’nete, ’me re ka tšepisang lipelo tsa rōna pel’a oona. Hobane leha lipelo tsa rōna li re qosa, Molimo o moholo ho lipelo tsa rōna.’
Ke ’nete, lipelo tsa rōna li ka ’na tsa re nyatsa. Empa Jehova o bona ho fetang libe tsa rōna. O bona “makunutu a lipelo.” (Pesaleme ea 44:21) Boholo ba tsebo ea hae bo mo nolofaletsa hore a mamele ka qenehelo ha re rapela re tiile hore re tšoareloe. Ha re ipolela libe tsa rōna ’me re fetola tsela ea rōna, Molimo o utloisisa ho hlakola le libe tse khōlō motheong oa sehlabelo sa Jesu sa topollo. ’Nete ea hore motho a ikutloe a thumakane ho ea fihla pelong e bontša hore ha a s’o be mobe hakaalo hoo a ke keng a khutla. Empa hore motho a thusoe le ho hlaphoheloa moeeng, motho ea joalo o boetse ho hlokahala hore a fumane thuso ea Mangolo e tsoang ho baholo ba phutheho. (Esaia 1:18; 1 Johanne 2:1, 2; 3:21; Jakobo 5:13-16) Haeba u khelohile ’nete, na u tla nka mehato e hlokahalang hore u hlaphoheloe? Re u khothalletsa hore u etse joalo.
Jehova o Tla Fana ka Thuso
Kahoo, ‘lebisa pelo ea hao’ tseleng ho e-na le ho e tlohella hore e u khelose. Hōlisa tšabo e loketseng ho Jehova. “Hobane,” kamoo Bibele e bolelang, “efela moputso o teng, ’me tšepo ea hao e ke ke ea etsoa lefeela.” (Liproverbia 23:17-19) ’Me ke tšepo ea bohlokoa hakaakang—bokamoso bo sa feleng lefatšeng le lecha le entsoeng ka botle ba paradeise ke puso ea ’muso oa Molimo! Nahana u se u sa hlaseloe ke litšekamelo tsa pelo ea boetsalibe. Ho feta moo, maemo a lefatše hona joale a re bontša hore joale re kene ka ho teba mehleng ea qetello le hore haufinyane tšepo ena e tla fetoha ntho ea sebele. Ho loanela ho finyella tšepo e joalo ruri hoa tšoaneleha!—Mattheu 24:7-14, 34; 2 Timothea 3:1-5; 2 Petrose 3:13; Luka 23:43; Tšenolo 21:3, 4.
’Nete ea hore Jehova o re nea bokamoso bo boholo ’me o re tiisa hore re bo fumane e lokela ho re hulela haufi le eena. Kamano ena ea botho ke moputso o moholo ka boeona. Hoba a hlaphoheloe moeeng, moroetsana ea boletsoeng pelenyana a re: ‘Ke ikutloa eka Jehova e boetse ke Ntate hape.’ Kamano e haufi le Jehova Molimo e tlisa letsoalo le hloekileng, boikutlo bo ka hare ba khotso le boitlhompho. Ho feta moo, ka ho khutlela ho Jehova le phutheho ea hae, u tla boetse u thabele setsoalle sa ’nete.
Koana, ha ho bonolo ho fetola pelo. Leha ho le joalo, Jehova o tla hlohonolofatsa boiteko ba hao. Moea oa hae o tla u thusa ‘hore u tiisoe mothong oa ka hare.’ (Ba-Efese 3:16) U tla fumana hore ha u phehella thapelong le moeeng oa ho ithuta, u kopanela le Lipaki tsa Jehova ’me u laea pelo ea hao, ntoa e tla ba molemonyana. Pelo e tla qala ho hloloheloa se molemo. E tla rata ho khutlela ho Jehova.
Jehova o re: “U se ke ua tšaba, hobane ke na le uena; u se ke ua tšoha, hobane ke Molimo oa hao; ke tla u fa matla, ke u thuse.” (Esaia 41:10) Ke sona seo Jehova a tla se etsetsa ba hlileng ba mo ratang. Haeba u suthetse thōko le ’nete empa pelo ea hao e u khannela hore u etse se nepahetseng, ruri ‘Molimo o tla u thusa’ ka moea oa oona o halalelang le ka batho ba nang le boikarabelo ka phuthehong ea Bokreste. Ntlheng eo, baholo ba khethiloeng ba thabela ho fana ka thuso ea moea. (1 Ba-Thessalonika 5:12; Ba-Heberu 13:7) Iphe monyetla ka thuso ea bona e lerato. Ke eng ha u sa e batle hona joale?