Babuelli ba ’Nete ea ’Muso Baa Kopana
BATHO ba Jehova ke babuelli ba ’nete ea ’muso. Ba ho thabela haholo. Ho feta moo, ba thaba ka mehla ha ba memeloa ’mokeng o mong o khethehileng o lokiselitsoeng ke Watch Tower Society, hobane baa tseba hore hoo e tla ba nako ea botsoalle, khothatso le keletso e molemo. Likopano tsa Setereke tsa “’Nete ea ’Muso” tsa 1982 ruri li ne li jere sena.
Ho Hatisoa ’Nete ea ’Muso
Ha ba khobokane ’me ba itokisetsa ho lula bakeng sa lenaneo le qalang Labone motšehare oa mantsiboea, tebello ea phahama ha baromuoa ba sheba lenaneo le hatisitsoeng le ho hlokomela lipuo tse ngata tsa bohlokoa tseo ho tla buisanoa ka tsona. Ha e le hantle, thapameng eo ho ne ho tla buisanoa ka “’Nete” ka mokhoa o phahameng—e seng feela ’nete ka kakaretso empa, ho e-na le hoo, “’Nete ea ’Muso,” e akarellelitseng merero ea Jehova Molimo mabapi le motho, lefatše, bokahohleng bohle le Lebitso la hae le leholo.
Kahoo ho ile ha hatelloa haholo ho tseba ’nete le ho sebetsa ka ho feletseng tumellanong le tsebo eo. Ke ’nete, hoa hlokahala ho fumana tsebo e nepahetseng ea lithuto tsa mathomo tsa Bibele, empa sepheo ke ho nolofaletsa barapeli ba Jehova ho ruta tsena ka mokhoa o molemo ho batho bao ba kopanang le bona mosebetsing oa boboleli ba ntlo le ntlo. Hape, ke habohlokoa hakaakang ho ananela hore Jehova ke oona Molimo o le mong oa ’nete, oona mohloli oa ’nete eohle, le hore o hanyetsana le lira tse khopo tse sa bonahaleng tse sebelisang mano a mangata ho tlosa batho ho Molimo le ho lokeng! Bamameli ba hla ba ananela ho ithuta ka mekhoa ea bolotsana le e iketlileng e sebelisoang ke Diabolose le baemeli ba hae ha ba batla ho senya tumelo ea rōna.
Hore na ho ka loantšoa meea eo e khopo joang le ho hlōla, ho ile ha fumana tlhokomelo e loketseng lenaneong. Re tlameha ho hlokomela bohle hore sera se batla ho hōlisa moea oa boithati oa boipuso, oa ’na pele, hape le ho re tšoasa boitšoarong bo bobe ba botona le botšehali. Ho hlokahala hore re tsebe le ho rata Molimo le hore re hloee lintho tseo o li hloileng. Haeba re ipitsa ka lebitso la oona, joale re ke ke ra rata ho tlisetsa oona kapa phutheho ea oona ea lipaki tse tšepahalang thohako. Ho feta moo, ho hlokahala re nke matla matleng a hae ka thapelo e tiileng, ’me ho hlokahala re atamele haufi le phutheho ea hae e bonahalang e sireletsang.
Puo ea sehlooho ea kopano ea bontša khang ea bohlokoa eo haufinyane ho hlokahalang hore motho le motho a bontše hore na o ka lehlakoreng lefe. U khetha Satane, makhotla a hae a bademona le liphutheho tsohle tsa hae tsa lefatše le mashano a tsona kapa Jehova Morena ea Matla ’Ohle le litšepiso tsa hae tse khōlō tse tla phethahatsoa ke ’muso oa hae. Khang eo e haufi le ho khaoloa. Ha ho ea palameng terata. Bohato bo potlakileng le bo tiileng li ka re tiisetsa tšireletso le mahlohonolo a tsoang ho Jehova.
Basebeletsi ba ’Nete ea ’Muso
Seo e bile sehlooho sa lenaneo la Labohlano, ’me ruri sa thusa e mong le e mong ho hlokomela hore thato ea Jehova ke hore re be basebeletsi ba ’muso oa hae, re bolela ’muso ka ntlo le ntlo ’me kahoo re etsa hore ba bang ba tšoanelehele ho kopanela le rōna tšebeletsong e nang le tokelo joalo. Ka baka la ho potlaka ha nako eo re phelang ho eona, ho re hloka bohle hore re batle litsela le mekhoa ea ho atolosa ho kopanela ha rōna tšebeletsong ena e ntle e fanoeng ke Molimo, le haeba re karolo ea bahoeletsi ba nako e tletseng kapa ba nako e sa tlalang. Lipontšo tse ling tsa bontša kamoo ho nahana ka tieo ho ka tobisoang bohlokoa ba ho kopanela ka mehla ‘tšebeletsong e halalelang’ re le batho ka bomong le lihlopha tsa malapa.—Ba-Roma 12:1.
Thapameng ena basebeletsi bohle ba Jehova ba ile ba lemosoa hore lira tseo ba lokelang ho ikalosa ho tsona hase feela tse totobetseng ‘tsa ka ntle’ empa le ba ipolelang hore ke ba sehlopha sa rōna empa bao ka mano ba batlang ho fokolisa tumelo ea rōna le tšebeletso. Sebui sa re: “Bana ba fana ka khopolo ea hore, kaha Jehova ke Molimo o lerato hakana, sohle seo a batlang ha re se etsa ke hore re be batho ba molemo, re hlokomele ba bang nameng, le ho rata bao re ahisaneng le bona.” Maikutlo a kang ana a ka ba kotsi, hobane ha a nahanele taelo e beiloeng holim’a balateli bohle ba Kreste, e reng: “E-eang ke hona, le rute lichaba tsohle.”—Mattheu 28:19.
Ba bang ba botsa hore na phutheho e hlile e-ea hlokahala ’me ba bolela hore sohle seo motho a se hlokang ke ho bala Bibele ka boeena. Ho se nyalane ha sena ho totobala ha ba joalo ba iqalla liphutheho tsa bona ’me ba latela tsela eo ba itlhalosetsang eona ea ho ithuta, e theiloeng bohlaleng ba motho.
Ha re talimane le likhang tse se nang molemo joalo le tse hanyetsang, keletso ea Mangolo a Halalelang e hlakile: Ba tlohele ba le joalo. Ba qobe. Tsoela pele tšebeletsong ea hao ea bohlokoa. (Mattheu 15:14; Ba-Roma 16:17, 18) Ho phea khang pontšeng le ba bakang likarohano ekaba ho bontša ho haelloa ke temoho e ntle. E mong le e mong ho rōna o lokela ho phetha karolo ea hae ho thusa ho boloka ntlo ea tumelo hore e be le boikutlo bo nepahetseng ka ba ka nyefolang Jehova, phutheho ea hae le batho ba hae ba hlophisitsoeng. Boboleli ba ’muso bo tla phethoa ka katleho, hobane Kreste Jesu o tšepisitse hore o tla ba le bahlanka ba hae “ka mehla eohle, ho isa bofelong ba lefatše.”—Mattheu 28:20.
Tšoantšiso e ileng ea bontšoa Labohlano e siile mahlo a mangata a tletse likeleli. Ba ile ba susumeletseha hakaakang ho bona kamoo bana ba rutiloeng hantle ba ka nkang karolo ho thusa ba sa thahaselleng ho inahana kahosele le ho hlokomela bohlokoa ba ho amohela le ho latela keletso ea Molimo!
Ho Phela ka Metheo ea ’Nete
Seo e bile sehlooho sa lenaneo la Moqebelo, sehlooho se neng se hatisa tšebeliso e molemo ea lintho tseo re ithutileng tsona kopanong ena. Joaloka babuelli ba ’nete ea ’muso, re tlameha ho phela ka melao ea motheo ea ’nete eo.
Kamorao ho puisano ea temana ea letsatsi, ra thabela puo e neeletsanoang ea libui tse tharo tse thathamisang se hlokoang ke Molimo ho ba banyenyane le ba baholo, bana le batsoali. Ho tsamaisa litaba tsa lelapa tumellanong le metheo ea Jehova ho ile ha bonoa hore ke tsela ea katleho. Lerato, tšoaneleho e setsing ea Bokreste ba ’nete, le nolofaletsa bana le batsoali ho sebelisana ka kutloano.—Johanne 13:34, 35.
Ka lipuo le ka lipontšo ra fumana likhopotso tse nakong tsa kotsi ea ho lumella ntho e ’ngoe le e ’ngoe. Ho phetlile tsela bakeng sa mathata a mangata le maima ’me ho tlameha ho khahlametsoa ka ho tšoarella ka tieo melaong ea motheo ea Bibele. Kahoo, ho tlameha hore lintlha tse ngata li tiisoe ka matla bophelong ba rōna ba Bokreste. Le hoja hona ho re beela meeli, ho bonoe hore ka tsela ena maemo a mangata a lekang haholo a ile a qojoa kapa a sebetsoa ka katleho.
Taba e ’ngoe e ileng ea eloa hloko ka ho khethehileng ke ’mino. Ra ithuta hore ’mino o ka thabisa moea kapa oa o theola. O sebelisitsoe ho kenya bosatane kapa boitšoaro bo bobe. Mokreste, ka baka leo, o tlameha ho ba hlokolosi ka seo a se mamelang joalokaha ho le joalo ka seo a se shebellang thelevisheneng.
Lenaneo la Moqebelo la phethoa ka puo e thabisang “’Nete e Isang Lefatšeng la Paradeise.” Sebui sa re hopotsa ’nete ea hore Kreste Jesu o ile a supa ’muso le paradeise ea lefatšeng. Ka mohlala, Kreste o tiisitse ka pel’a Pilato hore ruri Ke morena le hore o rōmetsoe ho paka ’nete eo. Joale, hoba sesinyi se neng se leketlile sefateng ka thoko ho eena se re, “Morena, u nkhopole ha u kena ’musong oa hao!” Jesu a arabela: “Ka ’nete ke re ho uena: U tla ba le ’na kajeno Paradeiseng.” (Luka 23:42, 43; Johanne 18:36, 37) ‘Me ho ba ratang Molimo le ho loka kajeno, tšepo ea ho phela ka ho sa feleng paradeiseng ea lefatše ke ea sebele hakaakang!
Ho Tšoarella ’Neteng ea Boprofeta
Sebui sa hoseng lenaneong la Sontaha hoseng sa supa hore kajeno re talimane le boemo bo tšoanang le bo neng bo talimane le Bakreste lekholong la pele la lilemo. Ho na le ba neng ba batla ho khutlela litabeng tse fokolang, tseo ho qaloang ka tsona tse amang bohlale ba batho le ho phea khang ka mantsoe—lintho tse sa haheng le tse bileng li sa amaneng le ho fumana poloko. (Ba-Galata 4:9) Likotsi tsa kajeno li akarelletsa ho lumella takatso ea ho fumana lintho tse fetang tse hlokahalang bophelong hore li hape le ho koenya menahano ea rōna le nako ea rōna; ho batla boithabiso ba lefatše, hangata bo le litšila bo bile bo ja le nako: ho keta ka boitšoaro bo bobe ba botona kapa botšehali le likotsi tsa hona tse ngata. Bophelo bo sa feleng bo itšetlehile ka ho tšoarella ka matla ’neteng le tseleng ea ’nete. Ba bang bao e leng khale ba buella ’nete ea ’muso ba ile ba botsoa lipotso molemong oa bohle ba teng. Liphihlelo tsa bona tsa bontša hore ho bonolo ho tšepahala ho Jehova le melao ea motheo ea hae le har’a liteko le maima.
Ha latela puo e reng “Makhotla a Bahlabani a Phuthehela Ntoeng,” e theiloeng lengolong la 1 Likronike 12:38. Ha sebui se lutse ntlheng ea hore Bakreste ba ntoeng ’me ba lebelletsoe ho paka botšepehi ba bona joaloka masole a Jesu Kreste, ba mamella mathata le ho ipoloka ba kopane, ha utloahatsoa molumo o hlakileng oa ntoa. Kaha ho kena ha rōna lebothong la Morena, haholo ho tloha nakong ea boineelo ba rōna le kolobetso, mosebetsi o mong le o mong bophelong o lokela ho neeloa tšebeletsong ea rōna ho Molaoli e Moholo oa Ntoa oa Jehova, Jesu Kreste. Joaloka Moeta-pele oa rōna le Molaoli re tlameha ho hopola ka linako tsohle hore lebitso le halalelang la Molimo oa rōna le Moetsi lea ameha ntoeng ena.
Kaha ntoa ea rōna ke ea moea, lihlomo tsa rōna le tsona ke tsa moea empa “li matla ka Molimo ho liha liqhobosheane,” tse kang bohlale bo sa reng letho ba motho, lintho tse hananang le ’nete ea Lentsoe la ’nete, lithuto tsa bolotsana tsa bademona le ho ipiletsa hore ho etelletsoe pele boiketlo ba rōna ba botho le katleho ka pele ho tšebeletso ea Jehova. (2 Ba-Korinthe 10:4) Joalokaha sebui se ile sa hlokomela ka bohlale hore: “Ruri re ke ke ra belaela hore Molaoli oa Ntoa oa Jehova o loketse mosebetsi oa ho hlokomela hantle ba lebothong la hae! Haeba re imetsoe le ho tlala lipelaelo ka lintho tse bonahalang tseo re li hlokang, na ha re hopotsoe ka potlako hore re lahlele mejaro ea rōna ho Jehova le Kreste?” Ho khobokana ha rōna ntoeng ho bolela hore re sebelisana haufi le phutheho e le ’ngoe e bonahalang eo Jehova a e sebelisang kajeno. E mong le e mong ho rōna o lokela ho hlomela hantle le ho ba mafolo-folo ho tšehetseng letšolo la moea joalokaha le laoloa ke Moeta-pele, Kreste.
Lenaneo la hoseng la phethoa ka tšoantšiso e ’ngoe e matla. Ea bontša tšebeletso e se nang tšabo ea moprofeta Jeremia joalokaha a ile a bolela ka lilemo tse telele molaetsa o neng o sa ratehe ho ba bangata ho thaka tsa hae, ho akarelletsa morena, mahosana le baprofeta ba bohata. Ha re ntse re bona ha Jeremia ka ho se thekesele a talimana le litšokelo le mabifi ha a khothatsa ba bang hore ba tšepahale ho Jehova, na e ne e se ho re hopotsa ka matla hore batho ba Jehova kajeno ba biletsoa ho phehella ka botšepehi ho boleleng lefatšeng lee lohle le tlas’a Satane molaetsa oa likahlolo tse haufi haholo tsa Jehova, molaetsa o sa rateheng ho hang? Leha ho le joalo, re thabisoa ke ho tseba hore, ka baka la tšebeletso ea rōna e tšepahalang, ba bangata ba tla bolokoa molokong o khopo ’me ba tla sireletseha le ho pholohela tsamaisong ea lintho e ncha ea Molimo.
Puo ea phatlalatsa ka taba e reng “ ’Nete e ka u Lokollang” e fanoe e le ea pele lenaneong la thapama. Bamameli ba bangata ba lebelletseng ba ne ba le teng ha sebui se kolokisa lintlha ho bontša hore babusi ba lefatše lena le banna ba tsebisahalang ba ke ke ba felisa bofuma, kapa pefo kapa ho se sireletsehe. A supa ka Mangolo a Halalelang hore Jehova, Molimo O Matla ’Ohle, o tšepisitse, ’me o tla phethahatsa sena sohle le se seng se sengata. Jehova o tla tlosa mabaka ’ohle a ho lla, le meokho, hape a felisa ho kula, bohloko le lefu le hlahisoang ke ho futsa moetsalibe Adama. Ho feta moo, o tla khutlisa bafung boieane bo tla neoa monyetla oa bophelo bo sa feleng lefatšeng la paradeise.
Ho latelang, ho ile ha hlahlobuoa ka bokhutšoanyane mokete oa moea o khotsofatsang oo Jehova a neng a o teketse rōna Kopanong ena ea Setereke ea “ ’Nete ea ’Muso.” Ka sebele, senoelo sa rōna sa tlhohonolofatso se tsoang ho Jehova se ne se khaphatseha. Hona e le ka phello efe? Joale re ne re loketse puo ea ho qetela e ileng ea re phehella kaofela ho tsoela pele re bolela ’nete ea ’muso hafeela Jehova a sa phetlile tsela. Rea tseba hore re tseleng e nepahetseng. Har’a rōna ho tlosoa batšoai-liphoso, babelaeli le ba itaolang. Hona joale Jehova o re hlohonolofatsa ka keketseho, joalokaha re ka hlokomela ka litlaleho tse tsoang lefatšeng lohle. Bahoeletsi ba eketsehileng ba neela lihora tse eketsehileng tšebeletsong ea tšimo. Ba bang ba bangata ba tšoarehile mosebetsing oa bopula-maliboho bo thusang kapa ba nako e tletseng. Lithuto tsa Bibele tse tsamaisoang malapeng tsa batho ba thahasellang bocha li eketsehile haholo. Ha ho pelaelo ea hore re tsamaisoa ka mokhoa o hlakileng ke moea oa Jehova le phutheho ea hae.
Eitse ha re tloha libakeng tsa likopano le ho leba liphuthehong tsa habo rōna, na re ne re sa tlala kholiseho ea hore Jehova le Morena oa hae, Kreste Jesu, ba bile le rōna? Na ha rea kholiseha hore ba re fepetse ka mosa e le hore re ka hlomella hamolemo ho tsoela pele ka kopano re bolela litaba tse molemo re le babuelli ba ’nete ea ’muso? Thoriso eohle e lebisoe le khanya ho Molimo o tletseng ho loka le ’nete!
[Litšoantšo tse leqepheng la 22]
Bana ba Bakreste ba ka phehella!
Ke ’nete! Lebitso la Molimo ke Jehova
Eo e neng e le mohanyetsi o supa Lebitso
[Litšoantšo tse leqepheng la 23]
Jeremia o otloa ke bahanyetsi
. . . metšoasong
. . . o pholosoa lemeneng la seretse
[Setšoantšo tse leqepheng la 24]
Ho khethoa ha basebeletsi ka kolobetso
[Setšoantšo tse leqepheng la 25]
Litulo tse khethehileng bakeng sa maqheku
[Setšoantšo tse leqepheng la 26]
Tšebeletso e tšoanelehang ea lijo