Lentsoe la Molimo Lea Phela

Ke Bo-mang ba Lokelang ho Ja?

KA MARCH 29, kamor’a shoalane, ho tla ba le mekete e mengata lefatšeng lohle e tšoanang le oo le o bonang mona kaholimo. Ona ke mokete oa ho ikhopotsa lefu la Jesu Kreste. Bona bohobe le veine tse fetisoang. Ke bo-mang ba lokelang ho ja litšoantšetso tsee?

Seo Jesu a se bolelletseng baapostola ba hae ba 11 ba tšepahalang ha a ne a thea sejo sa hae sa khopotso se ka re thusa ho araba potso eo. Ha a fetisa senoelo sa veine ho baapostola ba hae o itse: “Senoelo sena ke selekane se secha maling a ka, a tšolelloang lōna.” (Luka 22:20) Ka baka leo ka sehlabelo sa lefu la Jesu Kreste, “selekane se secha” se ile sa sebetsa. Selekane sa ‘khale’ kapa ‘sa pele’ se ile sa nkeloa sebaka ke sefe?—Ba-Heberu 8:13.

Ke selekana sa Molao. Se ne se entsoe ka sechaba sa Iseraele hang kamor’a hore se lokolloe bokhobeng Egepeta. Moshe e ne e le mokena-lipakeng, kapa ’muelli, oa selekane se entsoeng pakeng tsa Jehova Molimo le Baiseraele (joaloka ha Jesu e le “’muelli oa selekane se secha”). Sehlabelo sa liphoofolo ke sona se ileng sa etsa hore selekane sa Molao se sebetse Thabeng ea Sinai. (Ba-Heberu 9:15-20) Empa ho bonahala eka ho ne ho le teng bongata bo boholo ba bao e neng e se Baiseraele bo ileng ba phonyoha Egepeta le Baiseraele. Le hoja bo ile ba fumana melemo selekaneng sena, bo ne bo sa kopanyeletsoe ho sona.—Exoda 12:38, 43-45, 48, 49.

Ho na le selekane se joalo se secha. Ke Bakreste bao e leng “Iseraele oa Molimo” feela bao Jehova Molimo a ba amohelang ho sona. (Ba-Galata 6:16) Jesu o buile ka palo ena e lekanyelitsoeng ea Bakreste e le “mohlatsoana.” (Luka 12:32) Ka baka leo, ho na le “bongata bo boholo” ba Bakreste ba bang, boo Jesu a reng ke “linku tse ling.” (Tšenolo 7:9, 10, 14; Johanne 10:16) Le hoja bana ba fumana melemo selekaneng se secha, ha ba kopanyeletsoe ho sona.

Moapostola Johanne o ile a khetholla lihlopha tsena tse peli tse fumanang molemo sehlabelong sa Jesu ha a bua ka Kreste. “Ke eena e leng pheko [e koahelang libe) ea libe tsa rōna; [libe tsa “mohlatsoana”], e seng tsa rōna feela, empa e le le ea tsa lefatše lohle.”—1 Johanne 2:2.

Ka baka leo, moketeng oa ho ikhopotsa lefu la Kreste, ba bōpang “Iseraele oa Molimo” ke bona feela ba lokelang ho ja litšoantšetso tsa bohobe le veine. Sehlopha sena sa Baiseraele ba moea ba 144,000, ba tla busa le Kreste ’Musong oa hae oa leholimo. (Tšenolo 14:1) Ka lehlakoreng le leng, bongata bo boholo ba “linku tse ling,” bo sa jeng, bo tla thabela bophelo bo sa feleng Paradeiseng lefatšeng, bo tla amohela melemo ea ’Muso.

[Litšoantšo tse leqepheng la 28, 29]

“LINKU TSE LING” LE “MOHLATSOANA”