Ho Leboha Bophelo bo Thabileng ba Tšebeletso

Ho boletse John Booth

KA MPHALANE 1921 puo e reng “Limillione tse Phelang Hona Joale Li ke ke Tsa E-shoa le ka Mohla” e ile ea phatlalatsoa hore e tla neheloa holong ea motse oa rōna Wallkill, New York. Ho sa tsotellehe tabatabelo ea rōna, ha ho lea mong lapeng heso ea ileng a ea. Leha ho le joalo, ka ngola hore ke romelloe libuka tse neng li ngotsoe sememong. Ha bukana e reng What Say the Scriptures About Hell? le buka e reng The Divine Plan of the Ages, tse ngotsoeng ke C. T. Russell, li fihla, li ne li nkhahla hoo ho neng ho le thata ho li bea fatše.

Pejana selemong seo ke ne ke sa tsoa qeta sekolong se phahameng, ’me ke ne ke fuputsa morero oa bophelo. Lelapa leso e ne e le la bolumeli leo kamehla le neng le e-ea kerekeng ea Dutch Reformed eo ke neng ke e sebeletsa ke le mosuoe oa sekolo sa Sontaha. Moruti o ne a rata hore ke ee kolecheng ’me ke ithutele boruti, empa hoo ha hoa ka ha ipiletsa ka ha ho ’na ho ne ho bonahala hore baruti ba phela bophelo ba boikhabi. Empa ke ne rata ho thusa batho, ’me ka hona ka nahana hore ho tla ba molemo ho ba moromuoa naheng esele.

Hoba ke tsebe moo Liithuti tsa Bibele (kamoo li neng li bitsoa ka nako eo Lipaki tsa Jehova) li kopanang, lehlabula le latelang la fihla ke tsamaea ka baesekele likilomethara tse 24 ho ea libokeng Newburgh, New York. Ka hona, ha ’moleli oa rona a fana ka puo ka “Lihele” e hananang le thuto ea Bibele ea hore bafu ha ba ikutloe, ’na le ’mè ra itokolla. (Moeklesia 9:5, 10) Ntate, ha a ntse a thabetse libuka tsa rōna tsa Bibele, a ’na a tsoela pele ka kereke ea boshanyaneng ba hae. Hamorao, baena ba ka ba babeli le likhaitseli tsa ka tse tharo, ea e-ba Lipaki.

Mosebetsi Sehlekehlekeng sa Staten

Nakong ea lehlabula la 1923 ka amohela memo ea ho ea thusa ka khaho ea setsi sa khaso e ncha sa Watchtower Society WBBR Sehlekehlekeng sa Staten. Har’a ba neng ba e-tsoa ntlo-khōlō Brooklyn ho tla thusa ka mafelo-beke e ne e le Nathan H. Knorr ea neng a le lilemo li 18, eo ka 1942 e bileng mookameli oa boraro oa Watch Tower Society. E ne e le ha ke ntse ke sebetsa moo le ho ea kopanong Motse-moholo New York ke ileng ka kolobetsoa ka la 19 Mphalane, 1923. E ne e le monyetla oa ka oa pele oa ho tšoantšetsa boinehelo ba ka ba ho sebeletsa Jehova Molimo.

Mariheng ao ka khutlela hae ho ea sebetsa polasing ea lelapa leso e nyenyane ea lebese haufi le Wallkill, empa selemo ka khutlela Sehlekehlekeng sa Staten ho ea lokisa limela tsa sebaka le ho haha litsela. Ha kabelo ea nakoana ea mosebetsi oa ka e ne e le haufi le ho fela, ba bangata ba ne ba etsa litokisetso tsa ho ea kopanong e khōlō ka Phupu 1923 Columbus, Ohio. E bile monyetla oa ka ho ea ho eona le lelapa la ntlo-khōlō ka terene e khethehileng. Kopanong ena litho tsohle tsa liphutheho li ne li itokiselitse ho ea bolela ka ntlo le ntlo.

Ho Bolela ho Potoloha Wallkill

Ha ke khutla Columbus, ka qala ho paka ho potoloha polasi ea lelapa leso, sebakeng seo Mapolasi a Watchtower a leng ho sona kajeno. Pele ka koahela tšimo ke tsamaea ka baesekele, empa kamorao ho moo ka reka koloi ea Modele T Ford ’me ka e sebelisa tšimong e hōle haholo. Ha buka Deliverance e ne e lokolloa ka 1926 ka hlophisa thuto ea Bibele ho le leng la mahae a Scotts Corners, haufi le Walden. Ba bang ba neng ba e tla ba tsoela pele ’me hamorao ea e-ba Lipaki.

Kamehla ’na le lelapa leso re ne re e ea libokeng Newburgh. Ha seboka sa har’a beke sa Thapelo, sa Thoriso le sa Bopaki qetellong li fetoleloa ho ba Liboka tsa Tšebeletso, kahoo li tiisa boboleli ba rōna ba ka ntlo le ntlo, ba seng ba kae ha ba ka ba rata sena. Empa ke ne ke thabetse tiiso ea ho atolosa molaetsa oa ’Muso ka tsela ena ea boapostola. (Liketso 20:20) Ka ’Mesa 1928 ka qala ho kopanela tšebeletsong ea ho bolela ke le pulamaliboho oa kamehla.

Ho Bolela ka Boroa

Lilemong tseno e ne e le tloaelo ho bopula-maliboho ho sebetsa tšimo e ka leboea hlabula ’me mariha ho ea paka ka boroa. Ka hona nakong ea mariha a 1928 ho ea ho 1935 ’na le oa mphato oa pula-maliboho Rudolph Abbuhl ra sebetsa litereke tsa Virginia, West Virginia, North Carolina, Georgia, Tennessee le Kentucky.

Ho paka ka boroa lilemong tseno ke phihlelo e ke keng ea lebaleha. Hangata ho ne ho e-na le litsela tse fokolang tse lokisitsoeng, ’me ra ba litsebi tsa hore na re ka tsamaea bolelele bo bokae ka ntle le ho kunyuloa ke majoe kapa ho tetebela seretseng. Re ne re tsamaea haholo ka maoto kaha batho ba bangata ba ne ba phela moo likoloi li sa keneng.

Batho ka mathoko ka kakaretso ba ne ba futsanehile ’me ba se na lintho tsa boiketlo tsa morao tjena. Ha e le hantle, likarolong tsa Kentucky matlo a lifate a ne a tloaelehile le mechine e meng e sothoang ka matsoho e ne e ntse e sebelisoa. Bophelo bo ne bo e-so ho fetohe hakaalo ho ba mehleng ea Daniel Boone lilemo tse 150 pele.

Bakeng sa bolulo re ne re hira phaposi, kamehla e ne e ka ba R11 ka khoeli. Leha ho le joalo, ka linako tse ling, re ne re lula ka malapeng a batho ba moo, re lefa ho e ka bang R1,10 ka bosiu le lijo li kopanyelletsoa. Hangata re fumana ’mè oa lelapa ea re hlatsoetsang bakeng sa ho fumana libuka. Kaha batho ba ne ba e-na le chelete e fokolang, boholo ba libuka tsa rōna re ne re li tsamaisa ka ho nka lijo bakeng sa tsona.

Basali ba malapa hangata ba ne ba re, “le ka nka khoho haeba le tla e tšoara.” Re ne re itokiselitse, re nkile ntloana ea likhoho koloing ka morao. Re sebelisa terata e nang le sekhoqetsane, ra ba litsebi tsa ho tšoara likhoho ka leoto. Mahe e ne e le mokhoa o mong oa ho fapanyetsana, empa hape re hoeba ka mefuta eohle ea litholoana tse bolokiloeng ka makotikoting. Lintho tseo re neng re sa li sebelise re ne re li rekisa bakeng sa ho fumana mafura a koloi. Ka nako e ’ngoe re bile ra ba le tselana ea ho rekisetsa ntlo ea lijo lintho tseo re li rekisitseng bakeng sa libuka.

Ho hapa batho hore ba re tšepe ha re thusa ho hlōla khanyetso le mathata. Ho bile joalo le Cleveland, Georgia, moo ’muelli oa molao, eo e neng e bile e le mosuoe oa sekolo sa Sontaha, a ileng a etsa hore re tšoaroe ka ho rekisa ka ntle ho tumello ea molao. Batho ba bangata ba re sireletsa nyeoeng, ho kopanyelletsa monna eo re neng re lula ha hae. Ha re hlalosa mokhoa oa mosebetsi oa rōna, taba ea lahloa ’me ba kopa tšoarelo ho rōna.

Maralleng a haufi le Ferrum, Virginia, joaloka libakeng tse ling, ho etsa joala ntle ho molao ho ne ho tloaelehile. Banna ba hlometseng ba ne ba lebela sebaka seo ho ritelloang ho sona, ’me ho ne ho se moeti ea lumelloang ho kena sebakeng seo. Empa, re sa ho hlokomela, re ne re hapile batho hore ba re tšepe ’me tlaleho e ntle ea re etella pele. Ka hona ra paka sebakeng seo ntle ho tšitiso kapa kotsi. Ra fumana mosali e mong eo, ka ho utloa mananeo a sea-le-moea sa rōna, ’me a fumane libuka, o ne a bontša kananelo ea hae ka ho bua le ba bang ka lintho tseo a ithutileng tsona. Hamorao a kolobetsoa ’me e bile Paki e tšepahalang ka lilemo tse ngata.

Ha re le Harlan, Kentucky, e ne e tsejoa e le Harlan e mali, ’me e le ka lebaka le letle. Batho ba ne ba e-na le lithunya ’me ba li sebelisa. Hanngoe oa mphato oa ka oa pula-maliboho Raymond Hall a thunngoa lehetleng ke banna ba bang bao ka ho totobetseng ba neng ba mpa ba mo tšosa feela. Sepetlele moo re ileng ra mo nkela teng ho ea alafshoa ha ba ka ba botsa le lipotso; maqeba a joalo ho bonahala e ne e le liketsahalo tse tloaelehileng. Hoba re pake sebakeng seo, ra lumela ka ’nete ha re tlaleheloa hore batlatsi ba robeli ba marena le ba bang ba lekholo ba bolailoe selemong seo re neng re le moo. Leha ho le joalo, re ile ra thabisoa ke ho fumana malapa a mabeli a arabetseng ’neteng. Hamorao e mong oa bara bao a ea Bethele ea Brooklyn.

Ho Bolela ka Leboea

Linakong tsa likhoeli tsa lehlabula polasi ea rōna haufi le Wallkill e ne e le haeso moo ke neng ke paka ke tloha teng libakeng tse ’nè tse potolohileng sebaka seo. Ke ne ke nka lisebelisoa ’me ke ee ho lula kantle beke, ke paka tikolohong eo, ’me ke khutlele hae mafelo-beke ho ea libokeng Newburgh. Ka tsela ena ke ne ke bea lihora tse leshome ka letsatsi mosebetsing oa ho bolela libakeng tse hole. Ka ho fumana ho putsa ho etsa maeto a ho boela ho batho ba bangata ba khahlehang. Hoa mpha thabo e khōlō ha mosali e mong hamorao a e-tla ho ’na kopanong ’me a bolela hore libuka tseo ke neng ke mo fe tsona li mo qalisitse tseleng e isang bophelong.

Lilemong tseo Lipaki e ne e le bafo ba ho tšoaroa ho sa khaotseng, haholo-holo New Jersey. Ke ne ke le haufi le ketso ena lehlabula ’me ka arabela pitso ea ha phutuho e ne e hlophisoa ho ea pakela sebaka se likhathatso. Ka linako tse ling re ne re tšoaroa ’me re lokolloe mantsiboea, empa ka linako tse ling re ne re tla emela nyeoe. Ketsahalong e ’ngoe, ha re sebetsa kahlolo ea matsatsi a leshome, ra pakela e mong oa batšoaruoa ea ileng a amohela litaba tse molemo ’me hamorao ea e-ba Paki ea pula-maliboho.

Ho e ka bang ka nako ena ra qala ho sebelisa haholoanyane lirekoto tsa gramafomo tsa puisano e khutšoane ea Bibele tšebeletsong ea rōna ea ntlo le ntlo. Mechine e nkehang e ne e boetse e hlomiloe holim’a likoloi ho etsa molumo oa koloi. Ka ea ntlo-khōlō Brooklyn ’me ka khoesa mochine o mong koloing ea ka ka R192,50. Mantsiboea a lehlabula ke ne ke e bea qalong ea phula ’me lirekoto li ne li ka utluoa ke bohle ba hole ba likilomethara tse ka bang peli kapa ho feta. Ka tsamaea likete tse ngata tsa likilomethara selemong se latelang ka libuela-hōle tsena tse kang manaka holim’a koloi, ho finyella batho ba bangata ka molaetsa oa ’Muso.

Nakong ea lehlabula re ne re ea likopanong tse khōlō. Kopano e hopolehang ka ho khetheha ke e neng e le ka 1931 Columbus, Ohio, moo re ileng ra fumana lebitso la Mangolo, Lipaki tsa Jehova.

Likabelo Tse Ncha

Mafelong a 1935 ra khutla kabelong ea rōna ea bopula-maliboho ka boroa ho ea thusa ka mosebetsi Bethele ea Brooklyn. Hoba ke sebetse matsatsi a se makae feela fekethering, Moena Knorr a mpitsetsa ofising ’me a mpotsa haeba nka tsamaea tseleng ke le Motsamaisi oa Tšebeletso ea Libaka, ke chakela lihlopha (kamoo liphutheho li neng li bitsoa kateng ka nako eo). Ka re: “Ha ke e-so ho fane ka puo sehlopheng ’me ha ke tsebe letho ka tlhophiso ea sehlopha.”

Moena Knorr a hlalosa: “Sebui se hloahloa ha se sona se batlehang, ho hlokeha feela ea ratang tšebeletso le ea tla e etella pele ’me a bue ka tšebeletso libokeng.”

Ka likhoeli tse seng kae tse hlahlamang ka koetlisetsoa kabelo ea ka e ncha, ke tsamaea le Moena Knorr le ba bang mafelong a beke ho chakela lihlopha. Mosebetsi o moholo e ne e le ho hlophisa lihlopha bakeng sa mosebetsi oa maeto a ho boela le oa thuto ea Bibele oo ka nako eo o neng o bonahala e le tšebeletso e ncha. Mafelo-beke a mang ka etela hae (ketelo ea ka ea ho qetela ka lilemo tse tšeletseng), ka lahla lintho tse sa hlokahaleng ’me ka itokisetsa tsela. ’me ka Tlhakubele 1936, ke ikutloa ke sa tšoaneleha bakeng sa kabelo e joalo, ka qala.

Tseleng

Ketelo ea ka ea pele e bile Easton, Pennsylvania. Kamehla ke ne ke fihla ka nako tulong e itseng bakeng sa tšebeletso ea tšimo hoseng, ka shoalane ke be le seboka le bahlanka ba sehlopha ’me kamorao ho moo le sehlopha ka kakaretso. Kamehla ke ne ke nka matsatsi a mabeli le sehlopha ’me le le leng feela le sehlotšoana, ka nako tse ling ka beke ke etele lihlopha tse joalo tse tšeletseng tse nyenyane. Ke ne ke tsamaea haholo.

Ka 1936 le 1937 ka koahela likarolo tsa Pennsylvania, West Virginia, Ohio, Indiana, Illinois, Iowa, Nebraska, Wyoming, Colorado, New Mexico le Texas. Ho ’na ka Bophirima kaofela ho ne ho le hocha ’me ho nkhahla—tsela ea bophelo, lithota, lithaba le libaka tse khōlō. Ka etela lihlopha tsohle tse New Mexico ka libeke tse peli. Ka lehlabula la 1937 ke ne ke le Texas. Ho ne ho se bahlanka ba sebaka ba neng ba bua Sepanishe moo, ka hona ka boela ka etela lihlopha tsa Sepanishe, ka bua le tsona ka toloko.

Sehlopheng se seng se senyenyane sa Manyesemane se Texas ngoanana ea lilemo li 18 o ne a sebeletsa joalo ka mohlanka oa sehlopha. Ntat’ae o ne a lebelletsoe hore a shoe hona letsatsing leo, a fela a shoa, ’me ba nkopa hore ke eme ke tle ke etelle lepato pele. Ra ea tšebeletsong ea tšimo, ra ba le liboka tsa rōna tsa mantsiboea ’me hoseng ho hlahlamang ka tšoara tšebeletso ea lepato. Le hoja boemo bo ne bo le bohloko, empa ba ne ba thabile hore e be ke ile ka tla ’me ka nehelana ka puo.

Hoba ke be kopanong Columbus, Ohio, ka Loetse 1937, ka qeta mariha ke etela lihlopha tse ka leboea ho naha ea Leboea la Dakota, Montana le Idaho. Ka Tlhakola 1938 ka hloa mokoloko oa lithaba ’me ka thaba le ho makala ho fumana ho futhumetse haholo ’me le joang bo le botala lebopong la Pacific. Seattle e ne e e-na le sebaka se le seng feela seo ho kopaneloang ho sona ka nako eo, hajoale e na le liphutheho tse 21.

Likopano Tsa Sebaka

Mathoasong a 1938 seboka se khethehileng sa lihlopha sebakeng sa San Francisco sa hlophisoa ’me hoa tla Lipaki tse 600. Eaba sona selelekela sa kopano ea libaka (e bitsoang kopano ea potoloho hona joale). Tokisetso e ncha bakeng sa ketelo ea kamehla ea molebeli oa sebaka (potoloho) le likopano tsa sebaka ea qala ka la 1 Mphalane, 1938.

Joale ka mohlanka oa sebaka, ke ne ke e-na le boikarabelo ba kopano ea sebaka beke e ’ngoe le e ’ngoe. Liboka tsena tsa taeo ea moea hape li ne li fana ka monyetla oa ho ea kopanela mosebetsing oa ho bolela ka ntlo le ntlo le bakeng sa ba bacha ho kolobetsoa. Pele ho kopano ea libaka re ne re kolobetsa ba bacha neng kapa neng le kae kapa kae. Ke hopola ke kolobetsa monna e mong molatsoaneng oa thaba oa Oregon o fepeloang metsi ke lehloa ’me ka lekhetlo le leng ka qoelisa monna letangoaneng leo a noesang liphoofolo tsa hae le leng moo a bolokang furu.

Nakong ea likopano tsena tsa libaka ra qala ho tsamaea re jere lintho tse ngotsoeng. Re ne re jara matšoao ao ka lehlakoreng le leng a neng a baleha tjena “Bolumeli ke Leraba le Lemena, ” ’me ka lehlakoreng le leng, “Sebeletsa Molimo le Kreste Morena.” Hona hoa hapa tlhokomelo e khōlō ’me ka linako tse ling khanyetso. Joale, ka Loetse 1939, Ntoa ea II ea Lefatše ea qhoma Europa ’me khanyetso tšebeletsong ea rōna ea hōla.

Mokhopi oa qhala likopano tsa rōna Hannibal, Missouri; Columbus, Nebraska; le St. Cloud, Minnesota, Marinette, Wisconsin, mookameli oa motse a laela hore re tsoe holong ea rōna ea kopano, empa ha mapolesa a bona hore re na le tokelo ea molao ea ho ba moo, a re sireletsa. Ka lehlakoreng le leng, mapolesa a Huttonsville, West Virginia, a kopanela le mokhopi o re loantšang nakong ea kopano ea rōna Elkins, ’me ra ba tšoarisa ’me ba tlameha ho lefa beile ea R550. Taba e ile ea chechisoa ka makhetlo a mangata ’me qetellong ea lahloa, empa moo mapolesa ha a ka a hlola a kena-kenana le mosebetsi oa rōna hape.

Ke bile lekhotleng hangata ka liketsahalo tse joalo. Ka nako tse ling ke ne ke sebetsa joale ka ’muelli bakeng sa moqosuoa, joale ka Quincy, Illinois, moo re ileng ra hlōla nyeoe. Hayden Covington, eo e neng e le ’muelli oa molao oa Mokhatlo ka nako eo, le Fred Franz, eo e leng mookameli oa Watch Tower Society hona joale, ba re thusa linyeoeng tse ling, joale ka e neng e le London, Kentucky eo le eona re ileng ra e hlōla.

Nyeoeng ea lekhotla Indianapolis, Indiana, moo ho neng ho ameha Lipaki tse 60 li qosoa ka ho hanana le molao, ’na le moena Franz re ne re le ka lehlakoreng la bopaki nakong ea nyeoe ea matsatsi a mahlano. Leha baena ba rōna ba ile ba fumanoa ba le molato, hamorao ba ile ba lokolloa ke lekhotla le phahameng. Bekeng eona ea nyeoe eo ke ne ke le moqosuoa tabeng e ’ngoe Joliet, Illinois, ka ba ’muelli bakeng sa moena ho e ’ngoe hape Madison, Indiana, le ho ekelletsa moo, ke ne ke ikarabella bakeng sa kopano ea libaka mafelong a beke e ’ngoe le e ’ngoe. Ho ka hlokahala buka ho qaqisa liketsahalo tsa linako tseno tse tšosang.

Thabo ea sebele e bile kopanong ea matsatsi a mahlano St. Louis ka Phato 1941. Ke ile ka bitsoa libeke pejana ho moo ’me ka abeloa ho ea sebetsa sebakeng sa moo ho tla beoa matlo-koloi. Hoba re hele furu ea mong a polasi, ra etsa motse oa ba 5 000 tšimong ea furu. Empa le pele kopano e qala re ne re se re e-na le ba 10 000 kampong, ka likoloi tse ngata, literaka le ba matlo-koloi ka kampong ba ne ba ntse ba entse mokoloko oa ho kena ka hare. Qetellong ra ba le ba 15 000 ka kampong, moo ba bangata ba neng ba lutse le ho mamela mananeo ka mehala. Ha bana ba 15 000 ba eme ka pele moleng ’me ba amohela buka ea Children mahala, ka fa bana ba bangata ba ka kampong libuka tsa mahala.

Polasi ea ’Muso le Mapolasi a Watchtower

Hang kamorao ho kopano ea St. Louis hoa e-ba thata ho feta ho tšoara likopano tsa rōna tsa libaka. Ka hona hoa etsoa qeto ea ho li khaotsa. Ka bolelloa hore ke itlalehe Bethele ea Brooklyn. E ne e le matsatsi a se makae ke khutlile ha Moena Rutherford a mpotsa hore na nka sebeletsa Polasing ea ’Muso haufi le Ithaca, New York. Pele ke tloha ho ea kabelong ena e ncha ka chakela haeso haufi le Wallkill. ’Mè o ne a se a shoele, le bana beso ba ne ba se ba nyetse le ho nyaloa. Ka hona ka lebisa Polasing ea ’Muso moo ke neng ke abetsoe phaposi eo ke phetseng ho eona ka lilemo tse latelang tse 28.

Kamor’a lilemo tse fetang 13 boboleling ba nako e tletseng, ho ne ho le thata ho lula fatše ke lema. Empa ka thabela melemo e mengata ea tšebeletso maloka le mesebetsi Polasing ea ’Muso. Leha ho le joalo, ka nako eona eo, ka tsoela pele ho kopanela ka mehla mosebetsing oa ho bolela linakong tsa mantsiboea le mafelo a beke. Ka khanna lithuto tsa Bibele le batho ba bangata, ’me ba ’maloa ea e-ba Lipaki tse kolobelitsoeng.

Empa mosebetsi oa ka o ka sehlohong joale o ne o le malebana le likabelo tsa mosebetsi polasing. Ka ikitlaelletsa thutong ea liphoofolo le phepo ea limela, ke sebelisa Univesithi e haufi le moo ea Cornell le pokello ea eona ea libuka. Ka boikitlaetso ba rōna ra khona ho eketsa hlahiso ea polasi. Kamor’a nako ra hlahisa boholo ba lijo tse sebelisoang ke lelapa le hōlang la Bethele Brooklyn, le polasing ea ’Muso.

Basebetsi ba eketseha haholo polasing ka Tlhakola 1, 1943, ha Sekolo sa Gileade se qala ho sebetsa. Ka hona, ka likhoeli tse ling le tse ling tse tšeletseng, re ne re ba le sehlopha se secha sa barutoana ba ka bang lekholo ba tsoang lefatšeng lohle. E bile thabo e kaakang ho ’na ho tloaelana le barutoana ba bang ba 3 700 ba lihlopha tse 35 tse fumaneng koetliso bakeng sa mosebetsi oa boromuoa polasing pele Sekolo sa Gileade se isoa Brooklyn ka 1961! Lilemong tseno re mameletse khanyetso e matla, ho hlaseloa hanngoe ke mokhopi le nyeoe e le ’ngoe, eo re ileng ra e hlōla. Qetellong sehlopha sa rōna se senyenyane sebakeng seo sa hōla ho ba liphutheho tse ’nè.

Ha Sekolo sa Gileade se qetella tšebetso ea sona Polasing ea ’Muso, Sekolo se secha sa Tšebeletso ea ’Muso bakeng sa balebeli liphuthehong se ne se sa tsoa qala. Lilemo tseo e ka bang tse supileng tse latelang baholo ba ka bang 7 000 ba tla thupelong ea khoeli, eo hamorao e ileng ea fokoletsoa ho libeke tse peli.

Ka Pherekhong 1963 Mokhatlo oa nka sebaka se haufi le moo ke hōletseng teng, Wallkill, New York. Thepa ena ea bitsoa Mapolasi a Watchtower. Ka lilemo lisebelisoa li ’nile tsa atolosoa le ho ntšetsoa pele, hoa ba hoa ekelletsoa ka feketheri ea ho hatisa. Ka la 1 Pherekhong 1970, kabelo ea ka ea fetoleloa sebakeng sena, ka hona ka khutlela hona sebakeng sane seo ke qalileng ho paka ho sona lilemong tse fetileng tse 45! Ba fokolang ba hōlileng ba ntse ba nkhopola tikolohong eo.

Ha ke fihla Mapolasing a Watchtower, litho tsa lelapa li ne li le 55, empa hona joale ba fetang 750 ba sebeletsa moo! Har’a bana ho na le bachana ba bararo. Le e mong ea tsamaeang le monna oa hae mosebetsing oa potoloho. Ho nthabisa haholo hore e be litho tse fetang 30 tsa lelapa leso li kopanela le Lipaki tsa Jehova. Ka Pulungoana 1974 e bile tokelo ea ka ea ho khethoa ke le setho sa Sehlopha se Busang sa Lipaki tsa Jehova, ’me ka khetho eo ka khutlela ntlo-khōlō Brooklyn.

Ke thabile haholo hore, hoba ke qete sekolong se phahameng, Jehova Molimo o ile a tutubollela mahlo a ka morerong o moholo bophelong oa ho mo sebeletsa. Ho phehella morero oo ka lilemo tse fetileng tse 60 ka sebele e bile ho putsang le ho khotsofatsang. Ho nkatamelitse haufi le Ntate oa rōna oa leholimo ’me ho ntumelletse ho bona ka tsela ea sebele tšireletso ea hae le mahlohonolo holim’a batho ba hae.

[Setšoantšo se leqepheng la 25]

Kamor’a litšepe tsa teronko ka baka la ho bolela

[Litšoantšo se leqepheng la 27]

Ka bo-1930 ke ne ke sebelisa koloi ea libuela-hōle bakeng sa ho paka

[Litšoantšo se leqepheng la 28]

Ka qeta lilemo tse 28 Polasing ea ’Muso, sebaka sa mathomo sa sekolo sa Gileade

Ba babeli ho ba 3 700 bao ke ba boneng ba qeta Sekolong sa Gileade

[Setšoantšo se leqepheng la 29]

Ka boetse ka sebeletsa Mapolasi a Watchtower ka lilemo tse hlano